Te ʼu Tali Ki Te ʼu Fehuʼi Fakatohi-Tapu

He ko ʼe neʼe fakahigoa ia Sesu ko te ʼAlo ʼo te ʼAtua?

Neʼe mole he ʼohoana ʼo te ʼAtua ke maʼu ai hana fanau. Ko ia ʼe ko te Tupuʼaga ʼo te ʼu meʼa maʼuli fuli. Neʼe fakatupu te tagata ʼaki te fealagia ʼae ke ina faʼifaʼitaki te ʼu kalitate ʼo te ʼAtua. Ko te tupuʼaga la ʼaia ʼo te fakahigoa ʼo te ʼuluaki tagata ʼae neʼe fakatupu e te ʼAtua, ia Atama, ko te “foha o te Atua.” ʼO toe feia pe, neʼe fakahigoa ia Sesu ko “te Alo mooni o te Atua” koteuhi neʼe fakatupu ia ʼaki te ʼu kalitate ohage ko ʼae ʼo tana Tamai.—Lau ia Luka 3:38; Soane 1:14, 49.

Ko te temi fea ʼae neʼe fakatupu ai ia Sesu?

Neʼe fakatupu e te ʼAtua ia Sesu ʼi muʼa ʼo tana fakatupu ia Atama. ʼI tona fakahagatonu, neʼe fakatupu e te ʼAtua ia Sesu pea mo ina fakaʼaoga ia ia moʼo fakatupu ia meʼa fuli, ʼo kau ai ia te kau ʼaselo. Ko te tupuʼaga la ʼaia ʼo te fakahigoa ʼo Sesu ʼi te Tohi-Tapu ko “te uluaki tupu ia o te u mea fuli nee fakatupu” e te ʼAtua.—Lau ia Kolose 1:15, 16.

ʼI muʼa ʼo tana tupu ʼi Petelehemi, neʼe maʼuli ia Sesu ʼi te lagi ko he ʼaselo. ʼI te temi ʼae neʼe fakatuʼutuʼu ki ai ia te ʼAtua, neʼe ina tuku ifo te maʼuli ʼo Sesu mai te lagi ki te ʼalo ʼo Malia ke feala hana tupu tagata.—Lau ia Luka 1:30-32; Soane 6:38; 8:23.

He ko ʼe neʼe finegalo te ʼAtua ke tupu tagata ia Sesu ʼi te kele? Kotea te gaue makehe ʼae neʼe tonu ke fakahoko e Sesu? ʼE feala hakotou maʼu te ʼu tali ʼo te ʼu fehuʼi ʼaia ʼi te Tohi-Tapu, pea ʼe feala ke kotou fakalahi ai takotou mahino pea mo takotou leleiʼia te ʼu meʼa ʼae neʼe fai e te ʼAtua mo Sesu maʼa tatou.

Kapau ʼe kotou fia maʼu he tahi ʼu fakamahino, vakaʼi te kapite 4 ʼo te tohi ʼaeni Koteā ʼAē ʼe Akoʼi Moʼoni Mai ʼi Te Tohi-Tapu?, neʼe ta e te kau Fakamoʼoni ʼa Sehova

[Paki ʼo te pasina 16]

ʼI muʼa ʼo tana tupu ʼi Petelehemi, neʼe maʼuli ia Sesu ʼi te lagi ko he ʼaselo