ʼE Fia ʼIloʼi e Te Kau Lautohi . . .

ʼE Fakapiko Anai Koa Te Maʼuli Heʼegata ʼi Te Palatiso?

▪ ʼE foaki mai ʼi te Tohi-Tapu ia te ʼamanaki ʼaē ke tou māʼuʼuli ʼo heʼegata ʼi te Palatiso ʼi te kele. (Pesalemo 37:29; Luka 23:43) ʼE feala koa ke mole faʼa lelei te maʼuli heʼegata i te palatiso haohaoa?

Ko te fehuʼi ʼaenī ʼe maʼuhiga. Neʼe maʼu ʼe te hahaʼi fai kumi ko nātou ʼaē ʼe pipiko tuʼumaʼu ʼe natou liliu anai ʼo tuʼania fau, pea mo lotomamahi pea natou fai tuʼumaʼu he ʼu meʼa fakamataku. Ko nātou ʼaē ʼe mole natou maʼu he ʼuhiga ʼo tonatou maʼuli peʼe ko nātou ʼaē kua fiu ʼi te mole he fetogi ʼo tonatou maʼuli ʼe liliu anai nātou ʼo pipiko ʼi te maʼuli. ʼE mole ʼi ai anai koa he fakatuʼutuʼu ki te maʼuli ʼo nātou ʼaē ʼe māʼuʼuli anai ʼi te Palatiso? ʼE tou pipiko koa anai ʼi te māʼuʼuli ʼi te ʼu ʼaho fuli?

ʼUluaki, tou manatuʼi ʼe ko Sehova ʼAtua, te ʼAtua ʼaē neʼe ina tohi ia te Tohi-Tapu, ʼaē ʼe ina foaki te maʼuli heʼegata. (Soane 3:16; 2 Timoteo 3:16) Ko te kalitātē tāfito ʼo te ʼAtua, ʼe ko te ʼofa. (1 Soane 4:8) ʼE ʼofa ʼaupitō ia Sehova kiā tātou pea ʼe ina foaki mai kiā tātou te ʼu meʼa lelei fuli ke tou fiafia ai.—Sake 1: 17.

ʼE ʼiloʼi e totatou Tupuʼaga, ke feala hatatou fiafia ʼe tonu ke tou maʼu he gāue ʼe ʼaoga. (Pesalemo 139:14-16; Tagata Tānaki 3:12) ʼI te Palatiso, ʼe mole logoʼi anai e te kau gāue ʼe natou hagē ko he ʼu masini. Ko te gāue ʼaē kā natou fai ʼe fua lelei anai kiā natou totonu pē pea mo te hahaʼi ʼaē ʼe natou ʼoʼofa ai. (Isaia 65:22-24) Kapau lā neʼe kotou maʼu hakotou gāue ʼe lelei pea mo kotou fia gāue ʼi ai tuʼumaʼu, ʼe kotou manatu koa ʼe mole faʼa lelei anai tokotou maʼuli?

Kotou fakatokagaʼi age muʼa, neʼe mole fakagafua ʼe Sehova ke maʼuli te tagata fuapē ʼi te Palatiso. Neʼe ina foaki te meʼa ʼofa ʼaē ko te maʼuli heʼegata kiā natou pe ʼaē ʼe natou mulimuli ki te faʼifaʼitaki ʼo tona ʼAlo ko Sesu. (Soane 17:3) ʼI tana maʼuli ʼaē ʼi te kele, neʼe ko he meʼa fakafiafia kiā Sesu tana fai ʼo te finegalo ʼo te ʼAtua. Neʼe ina akoʼi tana ʼu tisipulo ʼaki tana ʼu palalau pea mo tana faʼifaʼitaki ʼe lahi age te fiafia ʼi tatatou foaki ʼi tatatou tali. (Gāue 20:35) ʼI te Palatiso ʼaē kā toe fakatuʼu, ʼe tou maʼuliʼi fuli anai te ʼu fakatotonu lalahi ʼe lua ʼaē ko te ʼofa ki te ʼAtua pea mo te ʼofa ʼaē ki te ʼu kāiga. (Mateo 22:36-40) ʼE ke fakakaukauʼi age muʼa ʼe ke maʼuli ʼi te lotolotoiga ʼo te ʼu hahaʼi manavaʼofa pea ʼe natou ʼoʼofa kiā koe pea ʼe natou leleiʼia tanatou ʼu gāue! ʼE ke manatu koa ʼe mole ke leleiʼia anai te ʼu taʼi kaumeʼa fēia?

Koteā koa te tahi ʼu meʼa ʼe tou fai ʼi te Palatiso? ʼI te ʼaho fuli, ʼe tou ako anai te ʼu meʼa foʼou mai totatou Tupuʼaga. Neʼe kua maʼu e te ʼu tagata fai kumi ia te ʼu meʼa foʼou taulekaleka mai te ʼu gāue fakatupu ʼa Sehova. (Loma 1:20) ʼO aʼu ki te temi nei ʼe mole heʼeki kātoa tatatou mahino ʼo ʼuhiga mo te ʼu gāue fakatupu ʼo Sehova. Kua hili nei kiai te ʼu taʼu ʼe lauʼi afe, neʼe fakakaukauʼi e te tagata agatonu ko Sopo ia te ʼu meʼa ʼaē neʼe ina ʼiloʼi ʼo ʼuhiga mo te ʼu gāue fakatupu ʼa te ʼAtua, pea ʼe kei moʼoni aipē tana ʼu palalau fakaʼosi. Neʼe ʼui fēnei e Sopo: “Koʼenā te ʼu tafatafa ia ʼo tona ʼu ala [ʼo te ʼAtua], pea koteā te muhumuhu neʼe tou logo ʼo ʼuhiga mo ia! Kae ko tana mana mālohi, ko ai ʼe feala ke ina fakahā ʼe mahino kiai?”—Sopo 26:14.

Tatau aipē peʼe tou māʼuʼuli ʼo heʼegata, ʼe mole feala anai ʼi he temi ke tou mahino kātoa ki te ʼu meʼa ʼaē ʼe tonu ke tou ʼiloʼi ʼo ʼuhiga mo Sehova ʼAtua pea mo tana ʼu gāue. ʼE fakahā ʼi te Tohi-Tapu, neʼe ʼai e Sehova ki totatou loto ia te fakaʼamu ʼaē ki te maʼuli heʼegata. Pea ʼe ina toe ʼui ʼe mole feala anai ia “ke ʼiloʼi e te tagata te gāue ʼaē neʼe fai e te ʼAtua moʼoni mai tona kamataʼaga ʼo aʼu ki tona fakaʼosi.” (Tagata Tānaki 3:10, 11) ʼE kotou manatu koa ʼe mole kotou leleiʼia anai takotou ako he ʼu meʼa foʼou ʼo ʼuhiga mo totatou Tupuʼaga?

Māʼia lā ʼi te temi nei, ko nātou ʼaē ʼe maʼumaʼua ʼi te gāue moʼo fakafīmālie te kau hahaʼi pea mo fakakolōliaʼi ia te ʼAtua, ʼe tahitahiga tanatou pipiko. ʼE feala ke tou tui papau, kapau ʼe tou fai tuʼumaʼu ia te tāʼi gāue ʼaia, ʼe mole feala anai he temi ke tou fiu tatau aipē lā mo kapau ʼe tou māʼuʼuli ʼo heʼegata.

[Haʼuʼaga ʼo te ʼu pāki pāsina 20]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)