ʼE Gāue Mālohi Totatou Takitaki Iā ʼAho Nei

“Neʼe hū fakatoʼa ia ki tuʼa pea mo fakaʼosi tana mālo.”—FAKH. 6:2.

1, 2. (a) ʼE fakamatala feafeaʼi ʼi te Tohi-Tapu te ʼu gāue fakahau ʼa Kilisito talu mai te taʼu 1914? (b) Koteā te ʼu gāue neʼe fai e Kilisito talu mai tona fakanofo hau?

 NEʼE fakanofo ia Kilisito ʼi te taʼu 1914 ke Hau ki te Puleʼaga Fakamēsia ʼo Sehova. ʼI takotou manatu ʼe feafeaʼi ʼapē ia Sesu ʼi te temi nei? ʼE hagē koa ia ko he hau ʼe nofo fakaʼauʼauganoa ʼi tona hekaʼaga fakahau, ʼo tau fakasiosio ifo ki te kele? Kapau koʼenā tatatou faʼahiga sio ʼo ʼuhiga mo ia, pea ʼe tonu anai ke tou toe fakakaukauʼi te faʼahi ʼaia. ʼE fakamatala ʼi te ʼu Pesalemo pea mo te tohi ʼo Fakahā, ko Sesu ʼe ko he hau ia ʼe heka ʼi te hōsi, pea ʼe hū “fakatoʼa ia ki tuʼa pea mo fakaʼosi tana mālo” ʼo hoholo atu tana lele ki te “mālo.”—Fakh. 6:2; Pes. 2:6-9; 45:1-4.

² Ko te ʼuluaki gāue ʼa Kilisito ʼi tona fakanofo hau, neʼe ko tana mālo ʼaē ʼi “te talakone pea mo tana kau ʼāselo.” Pea ʼi tona ʼuhiga ʼalekaselo ko Mikaele ʼi tana taki tana kau ʼāselo, neʼe lī ifo e Kilisito ia Satana pea mo tana kau temonio mai te lagi taputapu ki te ʼu tafaʼaki ʼo te kele. (Fakh. 12:7-9) ʼOsi ʼaia, ʼi tona ʼuhiga “tagata ʼave logo ʼo te fuakava,” neʼe haʼu Sesu mo tana Tamai ʼo ʼaʼahi te fale lotu fakalaumālie. (Mala. 3:1) Neʼe ina fakamāu te Keletiate, ia te koga ʼaē ʼe kovi ʼaupitō ʼo “Papiloni Lahi,” ʼo ina maʼu tana lakahala ʼuhi ko tana ligitoto pea mo tana tono ʼi te faʼahi fakalaumālie mo te ʼu meʼa fakapolitike ʼo te mālamanei.—Fakh. 18:2, 3, 24.

ʼE Fakamaʼa e Kilisito Tana Tagata Kaugana ʼAē ʼi Te Kele

3, 4. (a) Koteā te gāue neʼe fakahoko e Kilisito ʼi tona ʼuhiga “tagata ʼave logo” ʼa Sehova? (b) Koteā ʼaē neʼe hā ʼi te temi ʼaē neʼe ʼaʼahi ai te fale lotu, pea koteā te gāue neʼe fai e Sesu ʼi tona ʼuhiga Pule ʼo te kōkelekāsio?

³ ʼI te ʼaʼahi e Sehova pea mo tana “tagata ʼave  logo” te ʼu malaʼe fakakelekele ʼo te fale lotu fakalaumālie, neʼe nā maʼu te kūtuga ʼo te kau Kilisitiano moʼoni, neʼe mole natou kau ki te ʼu lotu ʼo te Keletiate. Kae māʼiapē lā mo te kau Kilisitiano fakanofo ʼaia, peʼe ko “te ʼu foha ʼo Levi,” neʼe tonu mo nātou ke fakamaʼa. Neʼe hagē pē ko te fakakikite ʼaenī ʼa te polofetā ko Malakia: “ ʼE tonu anai ke heka [ia Sehova] ohagē ko he tagata ʼe ina fakamaʼa pea mo fakaʼātea te siliva, pea ʼe tonu anai ke ina fakamaʼa te ʼu foha ʼo Levi; pea ʼe tonu anai ke ina fakamaʼa ia nātou ohagē ko te ʼaulo pea mo te siliva, pea ʼe mahino papau ia, ʼe natou liliu anai maʼa Sehova ko he hahaʼi ʼe natou momoli he mōlaga ʼaki te faitotonu.” (Mala. 3:3) Neʼe fakaʼaogaʼi e Sehova tana “tagata ʼave logo ʼo te fuakava,” ia Kilisito Sesu, moʼo fakamaʼa te kau Iselaele fakalaumālie ʼaia.

⁴ Neʼe toe maʼu pē e Kilisito te kau Kilisitiano fakanofo agatonu ʼaia, ʼe natou fai ia meʼa fuli pē ʼe natou lavaʼi moʼo foaki ʼi tona temi totonu te meʼa kai fakalaumālie ki te loto fale ʼo te tui. Talu mai te taʼu 1879, pe neʼe faigataʼa pe neʼe māui mālie pē, kae neʼe natou tā ʼi te nusipepa ʼaenī te ʼu moʼoni Fakatohi-tapu ʼo ʼuhiga mo te Puleʼaga ʼo te ʼAtua. Neʼe fakakikite e Sesu ʼi tana “tau mai” ʼo ʼaʼahi tana hahaʼi faifekau lolotoga “te fakaʼosi ʼo te tuʼu ʼo te ʼu faʼahiga meʼa ʼaenī,” ʼe ina maʼu anai he tagata kaugana ʼe ina foaki kiā nātou te “meʼa kai ʼi tona temi tonu.” ʼE ina tala anai ko te kaugana ʼaia ʼe fiafia pea ʼe ina “fakanofo anai [ia ia] ke pule ki ʼona koloa fuli” ʼi te kele. (Mat. 24:3, 45-47) ʼI tona ʼuhiga Pule ʼo te kōkelekāsio Fakakilisitiano, neʼe fakaʼaogaʼi e Kilisito te “tagata kaugana agatonu mo poto” ʼaia moʼo takitaki te ʼu lelei ʼo Tona Puleʼaga ʼaē ʼi te kele. ʼAki te Kolesi Pule neʼe ina takitaki te kau “faifekau” fakanofo pea mo tonatou ʼu kaumeʼa te “tahi ʼu ovi.”—Soa. 10:16.

Te Tānaki ʼo Te Taʼukai ʼi Te Kele

 5. Koteā te gāue fakahau neʼe fakahā ke sio kiai te ʼapositolo ko Soane?

⁵ Neʼe hā age ki te ʼapositolo ko Soane, te tahi gāue kā fai anai e te Hau Mesianike ʼi “te ʼaho ʼo te ʼAliki,” ʼi tona kua ʼosi fakanofo hau ʼi te taʼu 1914. Neʼe ʼui fēnei e Soane: “Pea neʼe au sio, koʼenī te ʼao hina, pea ʼi te ʼao ʼaia neʼe heka ai te tahi ʼe hagē ko he foha ʼo he tagata, ʼe ʼi ʼai te kolona ʼaulo ʼi tona ʼulu, pea ʼi tona nima ʼe ʼi ai te hele piko māsila.” (Fakh. 1:10; 14:14) Neʼe logo ia Soane ki te ʼāselo ʼa Sehova ʼe ina ʼui ke foaki ki te Tagata Tānaki Fulumeto hana hele piko, heʼe “kua matuʼa te taʼukai fulumeto ʼo te kele.”—Fakh. 14:15, 16.

 6. Koteā ʼaē neʼe ʼui e Sesu ʼe tuputupu anai ʼaki te temi?

⁶ Ko te “taʼukai fulumeto [ʼaia] ʼo te kele,” ʼe ina fakamanatuʼi mai te lea fakatātā ʼa Sesu ʼo ʼuhiga mo te fulumeto pea mo te vao kovi. Neʼe fakatatau e Sesu ia ia totonu ki he tagata neʼe ina tō ki tana gāueʼaga te pulapula ʼaki te fakatuʼutuʼu ʼaē ke ina utu te fulumeto, ʼaē ʼe ina fakatātā “te ʼu foha ʼo te puleʼaga,” te kau Kilisitiano fakanofo moʼoni ʼaē kā kaugā hau mo ia ʼi tona Puleʼaga. Kae lolotoga te pōʼuli, ko te fili “te Tēvolo” neʼe ina tūtū te vao kovi ʼi te gāueʼaga, ʼaē ʼe ko “te ʼu foha ʼo te agakovi.” Neʼe fakatotonu e te tagata tō pulapula ki tana kau gāue ke natou tuku te  fulumeto pea mo te vao kovi ke homo fakatahi ʼo aʼu ki te taʼukai, “te fakaʼosi ʼo te tuʼu ʼo te ʼu faʼahiga meʼa.” ʼI te temi ʼaia, ʼe ina fekauʼi anai tana ʼu ʼāselo ke natou vaeʼi kehe te fulumeto mai te vao kovi.—Mat. 13:24-30, 36-41.

 7. ʼE fakahoko feafeaʼi e Kilisito “te taʼukai fulumeto ʼo te kele”?

⁷ Moʼo fakahoko te meʼa ʼaē neʼe hā kiā Soane, ko Sesu ʼe ina takitaki te gāue ʼo te tānaki ʼo te taʼukai fakamālamanei. Neʼe kamata ia te tānaki ʼo “te taʼukai fulumeto ʼo te kele” ʼaki te fakamāʼopoʼopo ʼo nātou ʼaē kei toe ʼi te toko 144 000 ʼo “te ʼu foha ʼo te puleʼaga,” ia “te fulumeto” ʼo te lea fakatātā ʼa Sesu. Ko te kehekehe ʼo te kau Kilisitiano moʼoni pea mo te kau Kilisitiano loi, neʼe hā lelei ʼi te hili ʼo te ʼUluaki Tau Fakamālamanei, ʼo hoko atu ai mo te lua koga ʼo te tānaki ʼo “te taʼukai ʼo te kele,” ia te fakatahitahi ʼo te tahi ʼu ovi. Ko nātou ʼaia neʼe mole ko “te ʼu foha ʼo te puleʼaga,” kae neʼe ko “he toe hahaʼi tokolahi” ʼe natou fakalogo ki te Puleʼaga ʼaia. Neʼe tānaki nātou mai te “ ʼu fenua, pea mo te ʼu faʼahiga lea kehekehe.” ʼE natou fakalogo ki te Puleʼaga Mesianike, ʼaē ʼe faʼufaʼu e Kilisito Sesu pea mo te toko 144 000 “kau māʼoniʼoni” ʼaē ʼe kaugā hau anai mo ia ʼi te puleʼaga ʼi selō.—Fakh. 7:9, 10; Tan. 7:13, 14, 18.

Te Takitaki ʼo Te Kōkelekāsio

8, 9. (a) Koteā ʼaē ʼe hā ai ko Kilisito ʼe mole gata pē tana sio ki te kōkelekāsio kātoa kae ʼe toe sio foki ki te faʼahiga maʼuli ʼo tana hahaʼi takitokotahi? (b) Ohagē ko tona tuʼu ʼi te pāsina 29, koteā “te ʼu meʼa loloto ʼa Satana” ʼaē ʼe tonu ke tou tekeʼi?

⁸ Neʼe tou vakaʼi ʼi te ʼalatike kua ʼosi, pe neʼe feafeaʼi te tokaga lelei ʼaē ʼa Kilisito ki te ʼaluʼaga fakalaumālie ʼo te ʼu kōkelekāsio takitahi ʼi te ʼuluaki sēkulō ʼo totatou temi. ʼI totatou temi, ʼi tona ʼuhiga Hau ʼaē kua foaki age ki ai ‘te pule kātoa ʼi te lagi pea mo te kele,’ ko Kilisito ʼe ina takitaki mālohi ia te ʼu kōkelekāsio ʼaē ʼi te mālamanei pea mo tonatou ʼu taupau. (Mat. 28:18; Kol. 1:18) Ko Sehova neʼe ina “fakanofo [ia Sesu] ke pule kiā meʼa fuli ʼi te kōkelekāsio” ʼa te kau fakanofo. (Efe. 1:22) ʼI tona tuʼulaga ʼaia, ʼe ina ʼiloʼi te ʼu gāue fuli ʼe hoko ʼi te ʼu kōkelekāsio e 100 000 tupu ʼa te kau Fakamoʼoni ʼa Sehova.

⁹ Ki te kōkelekāsio ʼo Tiatile ʼo te temi muʼa, neʼe fakahā e Sesu te logo ʼaenī kiā nātou: “Koʼenī te ʼu meʼa ʼaē ʼe ʼui e te ʼAlo ʼo te ʼAtua, ia ia ʼaē ʼe hagē ʼona mata ko he ʼu uloʼi afi, . . . ‘ ʼE au ʼiloʼi tau ʼu gāue.’ ” (Fakh. 2:18, 19) Neʼe ina fakatonutonuʼi te ʼu tehina mo tuagaʼane ʼo te kōkelekāsio ʼaia ʼuhi ko tanatou ʼu aga heʼeʼaoga, tonatou maʼuli fakafīfīmālie, ʼo ʼui māʼana kiā nātou: “Ko au ʼaē ʼe ina vakaʼi te ʼu ifiifi pea mo te ʼu loto pea ʼe au foaki atu anai kiā koutou takitokotahi ʼo mulimuli pē ki takotou ʼu gāue.” (Fakh. 2:23) ʼE fakahā ʼi te ʼu palalau ʼaenī, ko Kilisito ʼe mole gata pē tana sio ki te kōkelekāsio takitahi kae toe sio foki ki te faʼahiga maʼuli ʼo tana hahaʼi takitokotahi. Neʼe vikiʼi e Sesu te kau Kilisitiano ʼo Tiatile ʼaē neʼe “mole natou ako ‘te ʼu meʼa loloto ʼa Satana.’ ” (Fakh. 2:24) Iā ʼaho nei, ʼe ina toe leleiʼia ia nātou ʼe tūpulaga peʼe mātutuʼa, ʼaē ʼe mole natou fia ʼiloʼi “te ʼu meʼa loloto ʼa Satana” ʼaē ʼe fakahāhā ʼi te Neti peʼe ʼi te ʼu gaoʼi viteo peʼe natou maʼu he ʼu manatu fakatagata ʼe fakagafua ai ki te hahaʼi ke natou fai te meʼa ʼaē ʼe natou loto kiai. Ko he meʼa fakafiafia hana sio ifo ki te ʼu faiga pea mo te ʼu sākilifisio ʼa te kau Kilisitiano tokolahi iā ʼaho nei ʼaē ʼe natou faiga mālohi ke natou muliʼi tana takitaki ʼi te ʼu faʼahi fuli ʼo tonatou maʼuli!

10. ʼE fakatā feafeaʼi te takitaki ʼaē e Kilisito ia te ʼu tagata ʼāfea ʼo te kōkelekāsio, kae koteā ʼaē ʼe tonu ke natou fakamoʼoni kiai?

¹⁰ ʼAki te ʼu tagata ʼāfea ʼaē neʼe ina fakanofo, ʼe fakahā ai e Kilisito tana tokaga ʼofa ʼaē ki tana ʼu kōkelekāsio ʼi te kele. (Efe. 4:8, 11, 12) ʼI te ʼuluaki sēkulō, neʼe fakanofo te kau taupau fuli ʼaki te laumālie māʼoniʼoni. ʼI te tohi ʼo Fakahā, ʼe fakatātā nātou ki he ʼu fetuʼu ʼi te nima mataʼu ʼo Kilisito. (Fakh. 1:16, 20) Iā ʼaho nei, ko te ʼu tagata ʼāfea ʼaē ʼi te ʼu kōkelekāsio ʼe natou kau ki te tahi ʼu ovi. Kae ko nātou ʼaia neʼe fakanofo ʼi te kua ʼosi faikole pea mo takitaki e te laumālie māʼoniʼoni, ʼo feala ai foki mo nātou ke taki e Kilisito. (Gāue 20:28) Kae ʼe natou fakamoʼoni ko Kilisito ʼe ina fakaʼaogaʼi te ʼu Kilisitiano fakanofo e tokosiʼi, ko te Kolesi Pule moʼo pule ki tana ʼu tisipulo ʼaē ʼi te kele pea mo taki nātou.—Lau ia Gāue 15:6, 28-30.

 “Haʼu, ʼAliki Sesu”

11. He koʼē ʼe tou fia sisio ki te haʼu fakavilivili ʼo totatou Takitaki?

¹¹ ʼI te tohi ʼo teFakahā ʼaē neʼe foaki e Sesu ki te ʼapositolo ko Soane, neʼe tuʼa lahi te ʼui ʼaē e Sesu ʼe haʼu fakavilivili. (Fakh. 2:16; 3:11; 22:7, 20) ʼE mahino ia, neʼe talanoa ki tana haʼu ʼo fakahoko te fakamāu ki Papiloni Lahi pea ki te tahi ʼu koga ʼo te tuʼu agakovi ʼa Satana. (2 Tes. 1:7, 8) ʼI tana kua fia sio ki te fakahoko ʼo te ʼu meʼa taulekaleka fuli ʼaia ʼaē neʼe fakakikite, neʼe ʼui fēnei e te ʼapositolo matuʼa ko Soane: “Ameni! Haʼu, ʼAliki Sesu.” Ko tātou ʼaē ʼe tou māʼuʼuli ʼi te temi fakaʼosi ʼo te tuʼu agakovi ʼaenī, ʼe tou toe fia sisio foki mo tātou ki totatou Takitaki mo Hau ʼe haʼu ʼi te Puleʼaga mālohi moʼo fakatapuhā ia te huafa ʼo tana Tamai pea mo fakalakatonuʼi ia Tana pule faʼitaliha.

12. Ko te gāue fea ʼaē kā fai anai e Kilisito ʼi muʼa ʼo te tuku mai ʼo te ʼu matagi ʼo te fakaʼauha?

¹² ʼI muʼa ʼo te haʼu ʼa Sesu ʼo fakaʼauha ia te kautahi ʼa Satana ʼi te kele, ʼe ʼai anai te fakaʼiloga fakaʼosi ki te tehina peʼe ko te tuagaʼane fakamuli ʼaē ʼe kau ki te toko 144 000 ʼo te Iselaele fakalaumālie. ʼE fakahā lelei ʼi te Tohi-Tapu, ko te ʼu matagi ʼo te fakaʼauha ʼo te tuʼu ʼa Satana, ʼe hoki tuku mai anai mokā kua kātoa te fakaʼiloga ʼo te toko 144 000.—Fakh. 7:1-4.

13. ʼE fakahā feafeaʼi anai e Kilisito tana ʼi henī lolotoga te ʼuluaki koga ʼo te “mamahi lahi”?

¹³ Ko te “ ʼi henī” ʼa Kilisito talu mai te taʼu 1914, neʼe mole tokagaʼi ia e te hahaʼi e tokolahi ʼo te kele. (2 Pet. 3:3, 4) Kae kua vave mai pē anai te hā ʼo tana ʼi henī ʼaki tana fakahoko ia te ʼu fakamāu ʼa Sehova ki te ʼu faʼahi kehekehe ʼo te tuʼu ʼo te ʼu faʼahiga meʼa ʼa Satana. Ko te fakaʼauha ʼo “te tagata ʼaē ʼe [ina] manuki te lao,” te kau takitaki lotu ʼo te Keletiate, ʼe ko he faʼahi ʼe ina ‘fakahā lelei ai anai tana ʼi henī.’ (Lau ia 2 Tesalonika 2:3, 8.) ʼE ko he fakamoʼoni lelei anai ko Kilisito neʼe gāue ʼi tona ʼuhiga Tuʼi Fakamāu fakanofo ʼa Sehova. (Lau ia 2 Timoteo 4:1.) Ko te fakaʼauha ʼo te koga tāfito ʼaē ʼo Papiloni Lahi, ʼe ko he fakamelomelo ʼaia ʼo te fakaʼauha kātoa ʼo te kautahi fakamālamanei agakovi ʼo te ʼu lotu hala. ʼE ʼai anai e Sehova ki te ʼu loto ʼo te hahaʼi politike ke natou fakaʼauha ia te fafine paomutu fakalaumālie ʼaia. (Fakh. 17:15-18) ʼE ko te ʼuluaki koga anai ʼaia ʼo te “mamahi lahi.”—Mat. 24:21.

14. (a) He koʼē ʼe fakanounou anai te ʼuluaki koga ʼo te mamahi lahi? (b) Maʼa te hahaʼi ʼa Sehova, koteā anai te fakaʼuhiga ʼo “te fakaʼiloga ʼo te Foha ʼo te tagata”?

¹⁴ Neʼe ʼui e Sesu ko te ʼu ʼaho ʼaia ʼe fakanounou anai “ ʼuhi ko nātou ʼaē neʼe fili,” te ʼu tehina mo tuagaʼane ʼaē kei toe ʼo te kau Kilisitiano fakanofo pea kei māʼuʼuli ʼi te kele. (Mat. 24:22)  ʼE mole tuku anai e Sehova te fakaʼauha fakamataku ʼaia ʼe fai ki te lotu hala, ke ina molehi mo te ʼu Kilisitiano fakanofo pea mo tonatou ʼu kaumeʼa te tahi ʼu ovi. Neʼe toe ʼui e Sesu “ ʼi te hili pē ʼaē ʼo te mamahi ʼo te ʼu ʼaho ʼaia,” ʼe ʼi ai anai te ʼu fakaʼiloga ʼi te laʼā, mo te māhina, pea mo te ʼu fetuʼu, “pea ʼe hā mai anai ʼi te lagi te fakaʼiloga ʼo te Foha ʼo te tagata.” Ko he faʼahi ʼe ina fakaliliu anai te ʼu puleʼaga ʼo te kele ke natou “tuki fatafata . . . pea mo fetāgihi.” Kae ʼe mole fēia anai ki te kau fakanofo, ia nātou ʼaē ʼe ʼamanaki ke natou māʼuʼuli ʼi selō, pea mo tonatou ʼu kaumeʼa, ia nātou ʼaē ʼe natou ʼamanaki ke natou māʼuʼuli ʼi te kele. ʼE natou ‘tuʼu tonu ake anai pea mo lagaʼi ake ʼonatou ʼulu, heʼe kua ovi mai tonatou haofaki.’—Mat. 24:29, 30; Luka 21:25-28.

15. Koteā anai te gāue ʼaē kā fai e Kilisito ʼi te temi ʼaē kā haʼu ai?

¹⁵ ʼI muʼa ʼo te fakaʼosi ʼo tana mālo, ʼe toe haʼu anai te Foha ʼo te tagata ʼi hona tahi age ʼaluʼaga. Neʼe ina fakakikite fēnei: “Kā haʼu anai te Foha ʼo te tagata ʼi tona kolōlia, pea mo te kau ʼāselo fuli mo ia, pea ʼe heka anai ki tona hekaʼaga fakahau fakakolōlia. Pea ʼi ʼona muʼa ʼe tānaki anai te ʼatu puleʼaga kātoa, pea ʼe ina fevaevae kehe ʼaki anai te hahaʼi, ohagē ko te vaheʼi e te tagata tauhi ovi te ʼu ovi mai te ʼu tao. Pea ʼe ina tuku anai te faga ovi ki tona toʼomataʼu, kae ko te faga tao ki tona toʼohema.” (Mat. 25:31-33) ʼE fakaʼuhiga te ʼu palalau ʼaenī, ki te haʼu ʼa Kilisito ʼi tona tuʼulaga Tuʼi Fakamāu moʼo vaevae te hahaʼi ʼo “te ʼatu puleʼaga kātoa” kiā kalasi e lua: “te ʼu ovi,” ia nātou ʼaē neʼe natou lagolago mālohi ki tona ʼu tehina fakalaumālie (te kau Kilisitiano fakanofo ʼaē kei māʼuʼuli ʼi te kele) pea mo “te ʼu tao,” ia nātou “ ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu.” (2 Tes. 1:7, 8) Ko te ʼu ovi ʼaē neʼe ʼui ko te “kau agatonu” ʼe natou maʼu anai te “maʼuli heʼegata” ʼi te kele, kae ko te ʼu tao ʼe natou “ ʼolo . . . anai ki te pulinoa heʼegata” peʼe ko te fakaʼauha.—Mat. 25:34, 40, 41, 45, 46.

ʼE Fakaʼosi e Sesu Tana Mālo

16. ʼE fakaʼosi feafeaʼi anai e Kilisito totatou Takitaki ia tana mālo?

¹⁶ ʼI te kua ʼosi kātoa ʼo te fakamaʼu ʼaē ʼo tona ʼu kaugā hau fakapelepitelō, pea mo te kua ʼiloʼi ʼo te ʼu ovi pea mo fakatuʼu nātou ki tona nima mataʼu ki te haofaki, ʼe feala leva kiā Kilisito ke ina “fakaʼosi tana mālo.” (Fakh. 5:9, 10; 6:2) ʼI tana takitaki tana foʼi kautau ʼāselo mālohi, pea ʼe mahino ia, mo tona ʼu tehina kua fakatuʼuake, ʼe ina fakaʼauha anai te tuʼu kātoa ʼa Satana ʼaē ʼi te kele, ʼaē ʼe faʼufaʼu ʼaki te faʼahi fakapolitike, mo te ʼu foʼi kautau, pea mo te faʼahi fakakoloa. (Fakh. 2:26, 27; 19:11-21). ʼE fakaʼosi anai te mālo ʼa Kilisito ʼi te temi ʼaē kā ina fakaʼauha ai te tuʼu agakovi ʼa Satana. Koia ʼe ina lī anai Satana pea mo tana kau temonio ki te vanu iā taʼu e afe.—Fakh. 20:1-3.

17. ʼE takitaki anai kifea e Kilisito ia tana tahi ʼu ovi lolotoga tana ʼAfio Iā Taʼu e Afe, pea koteā ʼaē ʼe tonu ke tou fakatuʼutuʼu tāfito kiai?

¹⁷ ʼO ʼuhiga mo te “toe hahaʼi tokolahi” ʼo te tahi ʼu ovi, ʼaē kā māʼuʼuli anai ʼi te mamahi lahi, neʼe fakakikite e te ʼapositolo ko Soane ko “te ʼAkeno ʼaē ʼe ʼi te lotomālie ʼo te hekaʼaga fakahau, ʼe ina fafaga anai ia nātou pea mo ina takitaki anai ia nātou ki he ʼu matapuna vai ʼo te maʼuli.” (Fakh. 7:9, 17) ʼEī, lolotoga tana ʼAfio Iā Taʼu e Afe, ʼe hoko atu anai e Kilisito ia tana takitaki te tahi ʼu ovi, ʼaē kā natou fakalogo moʼoni anai ki tona leʼo, pea mo ina takitaki nātou ki te maʼuli heʼegata. (Lau ia Soane 10:16, 26, 27.) ʼOfa pē ke tou muliʼi fakalelei totatou Takitaki fakahau ʼi te temi nei ʼo aʼu ki te mālama foʼou ʼaē neʼe fakapapauʼi mai e Sehova!

Moʼo Fakamanatu

• Koteā te gāue ʼaē neʼe fai e Kilisito ʼi tona kua ʼosi fakanofo hau?

• Ko ai ʼaē ʼi te kele neʼe fakaʼaogaʼi e Kilisito moʼo takitaki te ʼu kōkelekāsio?

• Ko te ʼu ʼaluʼaga fea ʼaē ʼe haʼu fakavilivili ai anai totatou Takitaki ko Kilisito?

• ʼE hoko feafeaʼi atu anai e Kilisito ia tana takitaki ʼaē ʼo tātou ʼi te mālama foʼou?

[ʼU fehuʼi ʼo te ako]

[Paki ʼo te pasina 31]

ʼE hā anai ʼi te fakaʼauha ʼo te tuʼu agakovi ʼa Satana ia te ʼi henī ʼa Kilisito