Kotou Tokoni Kiā Nātou Ke Natou Foimo Liliu Mai Ki Te Kōkelekāsio!

“Ke matou ʼolo lā kiā ai? ʼE ke maʼu koe te ʼu folafola ʼo te maʼuli heʼegata.”—SOA. 6:68.

 1. Koteā ʼaē neʼe ʼui e Petelo ʼi te temi ʼaē neʼe situʼa ai te tokolahi kiā Sesu?

 ʼI TE tahi temi neʼe situʼa te ʼu tisipulo kiā Sesu Kilisito he neʼe mole natou tali tana tahi akonaki. Neʼe ina fehuʼi fēnei age ki tana kau ʼapositolo: “ ʼE mole koa lā toe fia ʼolo ai mo koutou?” Pea tali age e Petelo: “ ʼAliki, ke matou ʼolo lā kiā ai? ʼE ke maʼu koe te ʼu folafola ʼo te maʼuli heʼegata.” (Soa. 6:51-69) Neʼe mole ʼi ai honatou tahi age haofakiʼaga. ʼI te Lotu ʼa te kau Sutea neʼe mole ʼi ai hanatou “ ʼu folafola ʼo te maʼuli heʼegata” pea ʼe mole maʼu pē lā te ʼu taʼi folafola ʼaia ʼi te temi nei ʼi Papiloni Lahi, te kautahi fakamālamanei ʼo te ʼu lotu hala. Ko he tahi kua hehē mai te faga ovi ʼa te ʼAtua kae ʼe ina fia fakafiafia ia Sehova, ʼe ko ‘te temi ʼaenī ke ʼalaʼala ake’ ai pea mo liliu mai ki te kōkelekāsio.—Loma 13:11.

 2. Koteā ʼaē ʼe tonu anai ke manatuʼi ʼo ʼuhiga mo he agahala neʼe fai?

² Neʼe fakahā e Sehova ia tana tokaga ʼaē ki te ʼu ovi ʼo Iselaele ʼaē neʼe hehē. (Lau ia Esekiele 34:15, 16.) ʼO toe fēia pē mo te ʼu tagata ʼāfea ʼaē ʼe natou fia fai ia te faʼahi ʼaia, pea ko he maʼua kiā nātou ke natou tokoni ki he ovi kua hehē mai te faga ovi. Kapau ʼe natou hinoʼi he tehina peʼe ko he tuagaʼane ke ako mo he tahi ʼe kumi tokoni kae ʼe mole kei fakatahi mo te kōkelekāsio, koteā ʼaē ʼe tonu ke ina fai mo kapau ʼe fakahā age e te ovi ʼaia neʼe ina fai tana agahala mamafa? ʼE mole ina faigaʼi anai ke ina foaki age he ʼu tokoni ʼo ʼuhiga mo te agahala ʼaē neʼe ina fai, kae ʼe tokoni anai ki ai ke ʼalu ʼo fakahā ki te ʼu tagata ʼāfea. Kapau ʼe mole ina fai te faʼahi ʼaia, pea ʼe tonu anai ko te tehina peʼe ko te tuagaʼane ʼaē ʼe tokoni ki ai ke ʼalu totonu ʼo fakahā ki te kau tagata ʼāfea.—Lev. 5:1; Kal. 6:1.

 3. Neʼe feafeaʼi te tagata ʼaē neʼe ʼi ai tana ʼu ovi e teau ʼi te temi ʼaē neʼe ina maʼu ai ia tana ovi ʼaē neʼe puli?

³ ʼI te ʼalatike ʼaē kua ʼosi, neʼe talanoa ai ki te lea fakatātā ʼa Sesu ʼo ʼuhiga mo te tagata neʼe ina maʼu tana ʼu ovi e 100. ʼI te temi ʼaē neʼe puli ai te tahi ovi, neʼe ina tuku tana ʼu ovi e 99 kae ʼalu ʼo kumi te ovi ʼaē kua hehē. ʼI toe fiafia ʼa te tagata ʼaia ʼi te temi ʼaē neʼe ina maʼu ai tana ovi! (Luka 15:4-7) ʼE tou maʼu  mo te fiafia fēia mokā liliu mai he ovi neʼe kua hehē ʼi te faga ovi ʼa te ʼAtua. ʼI tanatou ʼoʼofa ki te ovi ʼaē ʼe mole kei fakatahi mo te kōkelekāsio, ko te kau tagata ʼāfea pea mo ʼihi ʼo te kōkelekāsio neʼe lagi natou ʼaʼahi ia ia ʼaia. Mo nātou foki ʼe natou fakaʼamu ke toe liliu mai te ovi ʼaia ki te kōkelekāsio pea ke natou maʼu ia te tokoni ʼa te ʼAtua, mo tana puipui pea mo tana tapuakina. (Teu. 33:27; Pes. 91:14; Taag. 10:22) Kapau ʼe natou maʼu he faigamālie ke natou tokoni ki he tahi fēia, koteā ʼaē ʼe feala ke natou fai?

 4. Koteā ia te manatu ʼe tou maʼu ʼi te koga tohi ʼo Kalate 6:2, 5?

⁴ ʼE lagi feala ke natou fakalotomālohiʼi he tahi ke liliu ki te kōkelekāsio ʼaki hanatou fakahā fakalelei age, ko Sehova ʼe ʼofa ki Tana ʼu ovi pea ʼe ina fakamaʼua mai pē ia he ʼu meʼa ʼe tou lavaʼi. Ohagē lā ke tou ako te Folafola, mo kau ki te ʼu fono, pea mo fakamafola ia te logo lelei ʼo te Puleʼaga. ʼE lagi lelei anai ke tou lau ia te koga tohi ʼo Kalate 6:2, 5 pea mo fakahā age ko te kau Kilisitiano ʼe feala hanatou ʼamo fakatahi mo tonatou ʼu tehina tonatou ʼu fihifihia, kae ʼi muʼa ʼo Sehova ʼe “tahi ʼamo pē anai tana ʼāmoga.” ʼE mole feala ki he tahi kehe ke agatonu ki te ʼAtua maʼa tātou.

Kua Natou Hehē Koa ʼUhi Ko “Te ʼu Tuʼania ʼo Te Maʼuli”?

5, 6. (a) He koʼē ʼe maʼuhiga ke tou fakalogo fakalelei mokā palalau mai ia totatou ʼu tehina mo tuagaʼane ʼaē ʼe mole kei fakatahi mo te kōkelekāsio? (b) ʼE feafeaʼi hakotou tokoniʼi ia nātou ʼaē ʼe mole kei fakatahi mo te kōkelekāsio ke natou mahino ʼe hoki natou fiafia pē mo kapau ʼe natou ʼomai ki te ʼu fono?

⁵ Ke ʼiloʼi e te ʼu tagata ʼāfea pea mo ʼihi tehina mo tuagaʼane fotufotuʼa ʼi te faʼahi fakalaumālie ia te tokoni ʼaē ke fai ki tonatou ʼu tehina ʼaē ʼe mole kei fakatahi mo te kōkelekāsio, ʼe tonu ke natou fakalogo fakalelei mokā natou palalau age. Kotou fakakaukauʼi age muʼa ʼe kotou tagata ʼāfea pea ʼe kotou ʼaʼahi he taumātuʼa kua tō fono ʼuhi ko “te ʼu tuʼania ʼo te maʼuli,” ʼo tupu ai tanā mole kei fakatahi mo te kōkelekāsio. (Luka 21:34) Ko te ʼu fihifihia fakapaʼaga peʼe ko te lahi fau ʼo te ʼu maʼua fakafāmili ʼe lagi tupu ai tanā kua vaivai ʼi te faʼahi fakalaumālie. ʼE feala ke nā ʼui atu, ʼe nā fia tuku muʼa tonā ʼu maʼua ʼaē ʼi te kōkelekāsio, kae ʼe feala hakotou ʼui age ʼe mole nā mālolohi anai ʼi te faʼahi fakalaumālie mo kapau ʼe nā tō kehe ʼi te kōkelekāsio. (Lau ia Tāʼaga Lea 18:1.) ʼE feala anai ke kotou fehuʼi fakaʼeteʼete age: “Kua kolua fiafia age koa lā talu takolua tō fono? Kua lelei age koa tokolua maʼuli fakafāmili? Ko te fiafia ʼo Sehova ʼe kei tuʼu koa ko hokolua tule mālohi?”—Neh. 8:10.

⁶ Ko te metitāsioʼi ia te ʼu taʼi fehuʼi ʼaia mo nātou, ʼe feala ai ke natou fakakaukauʼi kua natou vaivai ʼi te faʼahi fakalaumālie pea mo puli tonatou fiafia ʼuhi ko tanatou mole kei fakatahi mo te kōkelekāsio. (Mat. 5:3; Hep. 10:24, 25) ʼE feala hatatou tokoni age ke natou mahino kua puli tanatou fiafia ʼaē neʼe natou maʼu mai tanatou fakamafola ia te logo lelei. (Mat. 28:19, 20) Koia, koteā ʼaē ʼe tonu anai ke fai e nātou ʼaē ʼe mole kei fakatahi mo te kōkelekāsio?

 7. Koteā ʼaē ʼe feala ke tou fakalotomālohiʼi ke fai e nātou ʼaē kua hehē mai te faga ovi?

⁷ Neʼe ʼui fēnei e Sesu: “Ke kotou tokaga kiā koutou totonu, talia naʼa mamafa tokotou ʼu loto ʼi te  lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli. . . . Koia ke kotou nonofo ʼalaʼala pea mo kotou kole mamahi ʼi te temi fuli pē, ke feala ai hakotou hao ʼi te ʼu meʼa fuli ʼaia ʼaē ʼe tonu ke hoko mai.” (Luka 21:34-36) Ko nātou ʼaē kua hehē mai te faga ovi kae ʼe natou fia maʼu te fiafia ʼaē neʼe natou maʼu ʼi muʼa atu, ʼe feala ke fakalotomālohiʼi nātou ke natou kole ia te laumālie māʼoniʼoni pea mo te tokoni fakaʼatua, pea ke natou mulimuli ki te ʼu meʼa ʼaē neʼe natou kole.—Luka 11:13.

Neʼe Natou Tūkia Koa Tupu Ko He Tahi?

8, 9. ʼE feafeaʼi ki he tagata ʼāfea hana fai tokoni ki he tahi neʼe tūkia?

⁸ ʼI te ʼuhiga heʼe haohaoa ʼaē ʼa te tagata, ʼe feala ke hoko ni ʼu fihifihia, ʼo feala ai ke tūkia he tahi. Ko ʼihi neʼe natou tūkia ʼuhi ko he tahi kua fotufotuʼa ʼi te faʼahi fakalaumālie neʼe ina fai he aga ʼe fakafeagai ki te Tohi-Tapu. Kapau neʼe ko he meʼa fēia ʼaē neʼe tupu ai te mole kei fakatahi ʼa he tahi mo te kōkelekāsio, ko te tagata ʼāfea ʼaē ʼe ina ʼaʼahi ia ia ʼe feala ke ina fakahā age, ʼe mole ko Sehova ʼaē neʼe ina fakatūkia ia ia. Koteā lā te tupuʼaga ʼo te motuhi e he tahi tana ʼu felōgoi mo te ʼAtua pea mo Tana hahaʼi? ʼE mole tonu koa ke hoko atu pē tana tauhi ʼaē ki te ʼAtua, ʼo falala ko “te Tuʼi Fakamāu ʼo te kele kātoa” ʼe ina ʼiloʼi ia te meʼa ʼaē neʼe hoko pea ʼe ina fakatokatoka anai? (Sen. 18:25; Kol. 3:23-25) Kapau neʼe toka he tahi, pea ʼe mole nofo anai ia ʼi lalo kae ʼe faiga anai ke tuʼu ake.

⁹ ʼI tana faiga ʼaē ke tokoni kiā ia ʼi te faʼahi fakalaumālie, ʼe feala ki he tagata ʼāfea ke ina ʼui age ko ʼihi ʼaki te temi neʼe mole kei faʼa maʼuhiga kiā nātou te ʼaluʼaga ʼaē neʼe tupu ai tanatou tūkia. ʼI tona fakahagatonu, ko te ʼaluʼaga ʼaia kua liliu ia ko he meʼa noa. Kapau neʼe tūkia he tahi ʼuhi he neʼe fakatonutonuʼi, ko te metitāsio ʼi te faikole ʼe feala ke tokoni ki ai ke ina tali lelei te tokoni pea ʼe mole tonu ke tūkia ʼi tona akonakiʼi ʼaia.—Pes. 119:165; Hep. 12:5-13.

Neʼe Mole Natou Tali Koa Ia He Akonaki Fakatohi-tapu?

10, 11. Ko te ʼu manatu fea ʼe feala ke fua lelei moʼo tokoni ki he tahi ʼe mole tatau tana mahino mo he akonaki Fakatohi-tapu?

¹⁰ Ko ʼihi neʼe natou mavae ʼi te faga ovi ʼa te ʼAtua he neʼe mole natou tali he akonaki Fakatohi-tapu. Ko te kau Iselaele ʼaē neʼe fakaʼāteaina mai tanatou ʼaunofo ʼi Esipito neʼe ‘natou galoʼi ia te ʼu gāue ʼa te ʼAtua’ ʼaē neʼe ina fai maʼa nātou pea ‘neʼe mole natou fakalogo ki tana tokoni.’ (Pes. 106:13) ʼE lagi ʼaoga anai ke fakamanatuʼi age ki he tahi ʼe mole kei fakatahi mo te kōkelekāsio, ko “te tagata kaugana agatonu mo poto” ʼe ina foaki ia te meʼa fakalaumālie lelei ʼaupitō. (Mat. 24:45) Neʼe ina ʼiloʼi te moʼoni ʼaki te faʼahi ʼaia. Koia he koʼē ʼe mole faiga anai ke haga haʼele aipē ʼi te moʼoni?—2 Soa. 4.

¹¹ Kā faiga he tagata ʼāfea ke tokoni kiā nātou ʼaē kua hehē mai te faga ovi ʼa te ʼAtua, ʼe feala hana talanoa ki te ʼu tisipulo ʼaē neʼe natou situʼa kiā Sesu koteʼuhi neʼe mole natou tali tana akonaki. (Soa. 6:53, 66)ʼI tanatou fakagata tanatou felōgoi ʼaē mo Kilisito pea mo tana ʼu tisipulo agatonu, neʼe natou vaivai ʼi te faʼahi fakalaumālie pea mo puli ai tonatou fiafia. Ko nātou ʼaē ʼe mole kei fakatahi mo te kōkelekāsio, neʼe natou maʼu koa he tahi age kautahi ʼe maʼu ai he meʼa kai fakalaumālie lahi? Kailoa, heʼe mole ʼi ai he tahi age kautahi fēia!

 Neʼe Natou Agahala Koa?

12, 13. Kapau ko he tahi kua hehē mai te faga ovi ʼe ina fakahā neʼe agahala mamafa, ʼe feafeaʼi anai hona tokoniʼi?

¹² Ko ʼihi ʼe mole kei natou fai fakamafola pea mo kau ki te ʼu fono koteʼuhi neʼe natou fai ia te agahala mamafa. Lagi ʼi tanatou manatu, mo kapau ʼe natou fakahā tanatou agakovi ki te kau tagata ʼāfea, pea ʼe fakamavae anai nātou ʼi te kōkelekāsio. Kae ʼe mole fakamavae anai nātou ʼi te kōkelekāsio mo kapau ʼe natou tuku tanatou ʼu aga heʼeʼaoga pea mo natou fakahemala moʼoni. (2 Ko. 7:10, 11) Kae ʼe tali lelei anai nātou, pea ko te ʼu tagata ʼāfea ʼe natou foaki anai kiā nātou ia te tokoni fakalaumālie ʼaē ʼe ʼaoga kiā nātou.

¹³ Kapau ko koutou ʼe ko he tehina peʼe ko he tuagaʼane kua fotufotuʼa ʼi te faʼahi fakalaumālie pea neʼe hinoʼi koutou ke kotou tokoni ki he tahi ʼe mole kei fakatahi mo te kōkelekāsio, koteā ʼaē ʼe tonu ke kotou fai mo kapau ʼe ina ʼui atu neʼe ina fai tana agahala mamafa? Ohagē ko te manatu ʼaē neʼe tou vakaʼi ʼi te ʼuluaki ʼalatike, ʼaua naʼa kotou kumikumi peʼe koteā te agahala ʼaē neʼe fai, kae kotou fakalotomālohiʼi ia ia ke ʼalu ʼo fakahā tana agahala ki te kau tagata ʼāfea. Kapau ʼe mole ina fia fakahā, pea ʼe kotou fakahā anai takotou fakaʼapaʼapa ki te huafa ʼo Sehova pea mo te maʼa ʼo te kōkelekāsio, ʼo kotou mulimuli ki te manatu Fakatohi-tapu ʼo ʼuhiga mo te ʼu faʼahi ʼaia. (Lau ia Levitike 5:1.) Ko te kau tagata ʼāfea ʼe natou ʼiloʼi pe koteā te tokoni ʼaē ke foaki ki he tahi ʼe fia liliu mai pea mo fia maʼuli ʼo mulimuli ki te finegalo ʼo te ʼAtua. ʼE feala ke fai ki ai he fakatonutonuʼi ʼofa. (Hep. 12:7-11) Kapau ʼe ina ʼiloʼi neʼe agahala ki te ʼAtua, ʼo ina tuku te aga ʼaē ʼe kovi, pea mo fakahemala moʼoni, ʼe tokoni anai te kau tagata ʼāfea ki ai, pea ʼe feala ke fakamolemole tana agahala e Sehova.—Isa. 1:18; 55:7; Sake 5:13-16.

Neʼe Hoko Te Fiafia ʼi Te Liliu Mai ʼa Te Foha

14. ʼAki takotou ʼu palalau māhani, kotou fakamatala te lea fakatātā ʼa Sesu ʼo ʼuhiga mo te foha maumau koloa.

¹⁴ Kā tou tokoni ki he tahi kua hehē, ko ia ʼaē neʼe hinoʼi ki te faʼahi ʼaia, ʼe feala hana talanoa ki te lea fakatātā ʼa Sesu ʼaē ʼe tuʼu iā Luka 15:11-24. ʼI te lea fakatātā ʼaia, neʼe maumauʼi e te tama tona ʼu koloa ʼi tona maʼuli hēʼia. Pea ki muli age neʼe fehiʼa leva ia ki tona maʼuli heʼeʼaoga ʼaē neʼe nofo ai. Kua pakupaku, kua ina manatuʼi tona fāmili, pea neʼe fakatuʼutuʼu leva ke toe liliu ki tona ʼapi! ʼI tana kei haʼu mai mamaʼo, pea ʼi te sio atu ʼo tana tamai ki ai, neʼe lele ki ai pea ina fāʼufua tona foha, ʼo ʼuma ki ai, pea neʼe fiafia ʼaupitō ia. Ko te metitāsioʼi ʼo te lea fakatātā ʼaia, ʼe feala ke ina uga he tahi kua hehē ke liliu mai ki te kōkelekāsio. Mai tona ʼaluʼaga ʼaē kua vave pē ia te fakaʼauha ʼo te tuʼu ʼo te ʼu faʼahiga meʼa ʼaenī, ʼe tonu ke foimo ‘haʼu’ ai.

15. He koʼē ko ʼihi neʼe natou hehē mai te kōkelekāsio?

¹⁵ Tokolahi iā nātou ʼaē kua mavae ʼi te kōkelekāsio, ʼe mole fakaʼuhiga leva ʼe natou tatau mo te foha maumau koloa. Ko ʼihi neʼe natou mavae māmālie, ohagē pē ko he vaka ʼe tafea māmālie ki te moana. Ko ʼihi ʼi tanatou kua mafasia ʼi te ʼu tuʼania ʼo te maʼuli neʼe puli ai leva kiā nātou ia te sio fakalaumālie. Ko ʼihi neʼe natou tūkia ʼuhi ko he tehina peʼe ko he tuagaʼane, peʼe mole kei natou fakatahi mo te kōkelekāsio he neʼe mole natou tali he akonaki Fakatohi-tapu. Ko te tokosiʼi neʼe natou fai he aga ʼe fakafeagai ki te Tohi-Tapu. Kae ko te ʼu tokoni ʼo ʼuhiga mo te fihifihia takitahi ʼaia, ʼe feala ke ʼaoga kiā koutou moʼo tokoni kiā nātou ʼaē kua hehē ʼi te faga ovi tupu ko te ʼu faʼahi ʼaenī peʼe ko he tahi age ʼu tupuʼaga, ke natou liliu mai ki te kōkelekāsio naʼa tauhala.

“Tama, ʼe Au Fiafia ʼi Tau Toe Liliu Mai!”

16-18. (a) Neʼe tokoni feafeaʼi ia te tagata ʼāfea ki te tehina neʼe kua fualoa ʼaupitō ia tana mole kei fakatahi mo te kōkelekāsio? (b) He koʼē neʼe mole kei fakatahi ia te tehina ʼaia ki te kōkelekāsio, pea neʼe feafeaʼi tona tokoniʼi, pea neʼe feafeaʼi tona fakatalitali ʼaē ʼi te kōkelekāsio?

¹⁶ Neʼe ʼui fēnei e te tagata ʼāfea: “Ko tamatou ʼu tagata ʼāfea ʼe natou tōkakaga ʼo ʼaʼahi ia nātou ʼaē  ʼe mole kei fakatahi mo te kōkelekāsio. Neʼe au manatuʼi te tehina neʼe ako mo au pea neʼe au tokoni ki ai ke ina maʼu ia te ʼatamai mālama ʼo te moʼoni. Iā taʼu e 25 neʼe mole kei fakatahi mo te kōkelekāsio pea neʼe tau mo ia te ʼaluʼaga faigataʼa, koia neʼe au fakamahino age peʼe ko te ʼu pelesepeto fea ʼo te Tohi-Tapu ʼaē ʼe feala anai ke tokoni kiā ia. Hili te kiʼi temi, neʼe kamata haʼu ki te ʼu fono pea neʼe ina tali ke fai hana ako Tohi-Tapu moʼo tokoni ki ai ke fakalotomālohiʼi ʼi tana toe fia liliu mai ʼaē ki te kōkelekāsio.”

¹⁷ He koʼē neʼe mole kei fakatahi te tehina mo te kōkelekāsio? ʼE ina ʼui fakahagatonu fēnei: “Neʼe kua lahi taku tokaga ki te ʼu gāue ʼo te mālamanei ʼi te ʼu gāue fakalaumālie. Koia neʼe au tuku ai taku ako Tohi-Tapu, mo taku fai fakamafola, pea mo te ʼu fono. ʼO fakaʼosiʼosi age, neʼe mole kei au fakatahi mo te kōkelekāsio. Kae neʼe ko te tokaga fakamālotoloto ʼaē kiā au ʼa te tagata ʼāfea ʼaē neʼe tokoni ai ke au liliu ki te kōkelekāsio.” Ko te ʼu fihifihia ʼo te tehina neʼe kamata puli māmālie ʼi tana kua tali ʼaē ke fai hana ako Tohi-Tapu. ʼE ina ʼui fēnei: “Neʼe mahino kiā au ko te meʼa ʼaē neʼe ʼaoga ki toku maʼuli neʼe ko te ʼofa pea mo te takitaki ʼa Sehova pea mo tana kautahi.”

¹⁸ Neʼe feafeaʼi ia te fakatalitali ʼo te tehina ʼaia ʼi te kōkelekāsio? ʼE ina ʼui fēnei: “Neʼe au hagē ko te foha maumau koloa ʼaē neʼe talanoa ki ai Sesu Kilisito. Pea ko te tuagaʼane kua finematuʼa ʼaē neʼe kua taʼu 30 tana ʼi te kōkelekāsio pea ʼe kei tauhi agatonu aipē kiā Sehova, neʼe ina ʼui mai: ‘Tama, ʼe au fiafia ʼi tau toe liliu mai!’ Neʼe malave ʼaupitō ki toku loto ia tana ʼu palalau ʼaia. Neʼe au logoʼi ʼi taku toe liliu mai ki te kōkelekāsio ʼe ko te koga meʼa pē ʼaia ʼe tonu ke au nofo ai. Pea ʼe au fia fakahā ia toku fakafetaʼi ʼaupitō ki te tagata ʼāfea ʼaia pea mo te kōkelekāsio kātoa, tonatou ʼofa, tonatou faʼa kātaki, pea mo tanatou tokaga ʼaē kiā te au. Ko tonatou ʼofa kiā Sehova pea mo tonatou kāiga ʼaē neʼe tokoni moʼoni mai kiā te au ke au liliu mai ki te kōkelekāsio.”

Fakalotomālohiʼi Nātou Ke Natou Foimo Kau Ki Te ʼu Gāue Fakalaumālie!

19, 20. ʼE feafeaʼi hakotou fakalotomālohiʼi ia nātou ʼaē ʼe mole kei fakatahi mo te kōkelekāsio ke natou foimo liliu mai ki te faga ovi, pea ʼe feafeaʼi hakotou fakahā age ko te ʼAtua ʼe mole ina fakamaʼua mai he ʼu meʼa ʼe mole tou lavaʼi?

¹⁹ ʼE tou māʼuʼuli nei ʼi te ʼu ʼaho fakamuli, pea kua ovi mai te fakaʼosi ʼo te ʼu faʼahiga meʼa ʼo te tuʼu ʼaenī. Koia, tou fakalotomālohiʼi ia nātou ʼaē ʼe mole kei fakatahi mo te kōkelekāsio ke natou ʼomai ki te ʼu fono. Tou fakalotomālohiʼi nātou ke natou foimo ʼomai. Tou fakahā age ko Satana ʼe faiga ia ke ina maumauʼi tanatou ʼu felōgoi mo te ʼAtua pea mo natou manatu ʼe natou maʼu anai he fīmālie mai te ʼu faigataʼaʼia ʼo te maʼuli mo kapau ʼe natou liʼaki ia te tauhi moʼoni. Tou fakahā age ʼe hoki tou liliu pē ko ni ʼu tisipulo agatonu ʼa Sesu, pea hoki tou maʼu ai ia te fakafīmālie moʼoni.—Lau ia Mateo 11:28-30.

²⁰ Kotou fakamanatuʼi age kiā nātou ʼaē ʼe mole kei fakatahi mo te kōkelekāsio, ko te ʼAtua ʼe mole ina fakamaʼua mai he ʼu meʼa ʼe mole tou lavaʼi. ʼI te temi ʼaē neʼe fatufatuʼi ai Malia, ia te tokolua ʼo Lasalo, ʼi tana liligi te lolo magoni mo totogi kovi ki te ʼulu ʼo Sesu ʼi te kiʼi temi pē ʼi muʼa ʼo tana mate, neʼe ʼui fēnei e Sesu: “Kotou haganoa kiā te ia. . . . Neʼe ina fai te meʼa ʼaē ʼe ina lavaʼi.” (Mko. 14:6-8) Neʼe vikiʼi e Sesu te fafine vītua ʼaē neʼe ina foaki tana kihiʼi meʼa ʼofa ʼi te fale lotu. Neʼe ina toe foaki pē mo ia ia te meʼa ʼaē neʼe ina lavaʼi. (Luka 21:1-4) Tokolahi iā tātou ʼe feala pē ke tou kau ki te ʼu fono pea mo te fakamafola ʼo te Puleʼaga. ʼAki te tokoni ʼa Sehova, tokolahi iā nātou ʼaē ʼi te temi nei ʼe mole kei fakatahi mo te kōkelekāsio ʼe feala pē hanatou fai ia te faʼahi ʼaia.

21, 22. Koteā ʼaē ʼe kotou lava fakapapau kiai ia nātou ʼaē ʼe liliu mai kiā Sehova?

²¹ Kapau ko he ovi kua hehē mai te faga ovi ʼe ina tuʼania tana toe felāveʼi mo tona ʼu tehina, pea ʼe lagi kotou fakamanatuʼi age anai ia te fakafiafia ʼaē neʼe hoko ʼi te temi ʼaē neʼe liliu mai te foha maumau koloa ki tona ʼapi. ʼE toe fēia pē ia te fakafiafia ʼa te ʼu tehina mo tuagaʼane ʼo ʼuhiga mo nātou ʼaē ʼe liliu mai ki te kōkelekāsio. Kotou fakalotomālohiʼi nātou ke natou fakafeagai ʼi te temi nei ki te Tēvolo pea ke natou fakaovi ki te ʼAtua.—Sake 4:7, 8.

²² Ko he fakatalitali fakafiafia ʼe ʼamanaki hoko kiā nātou ʼaē ʼe liliu mai kiā Sehova. (Tagi. 3:40) Ko te ʼu meʼa ʼaē neʼe hoko kiā nātou ʼi te temi muʼa ʼi tanatou gāue ʼaē ʼi te tauhi ki te ʼAtua, neʼe natou fiafia ʼaupitō ai. Ko te ʼu tuʼuga tapuakina ʼi te kā haʼu ʼe fakatalitali kiā nātou ʼaē ʼe foimo liliu mai ki te kōkelekāsio!

ʼE Kotou Tali Feafeaʼi Anai?

• ʼE feafeaʼi anai hakotou tokoni ki he Kilisitiano neʼe tūkia pea mole kei fakatahi mo te kōkelekāsio?

• Ko te ʼu manatu fea ʼe feala anai ke tokoni ki he tahi kua hehē mai te faga ovi ʼa te ʼAtua he neʼe mole ina tali he akonaki Fakatohi-tapu?

• ʼE feafeaʼi he tokoni ʼo he tahi ʼe lotolotolua ʼi te liliu mai ki te kōkelekāsio?

[ʼU fehuʼi ʼo te ako]

[Paki ʼo te pasina 17]

Tou fakalogo fakalelei mokā palalau mai hota tehina ʼe mole kei fakatahi mo te kōkelekāsio

[Paki ʼo te pasina 18]

Ko te metitāsioʼi ia te lea fakatātā ʼa Sesu ʼo ʼuhiga mo te foha maumau koloa ʼe feala ke ina uga ʼihi ke liliu mai ki te kōkelekāsio