Taupau Maʼu Ia “Te ʼOfa ʼAē Neʼe Ke Maʼu ʼi Te Kamata”

“Haga taupau maʼu te meʼa ʼaē ʼe ke maʼu.”—FAKH. 3:11.

1, 2. Neʼe malave feafeaʼi kiā koutou ʼi te temi ʼaē neʼe kotou tui papau ai ki te ʼu moʼoni ʼo ʼuhiga mo Sehova?

 ʼE KEI kotou manatuʼi koa takotou ʼuluaki ako ia te ʼamanaki taulekaleka ʼaē ʼe fakahā e Sehova ki te hahaʼi talagafua? Kapau neʼe kotou tauhi ki he tahi lotu, neʼe malave feafeaʼi kiā koutou ʼi te temi ʼaē neʼe fakamahino atu, ia te ʼu fakatuʼutuʼu fakaʼatua ʼo te Tohi-Tapu peʼe ko he ʼu akonaki ʼaē neʼe mahino gataʼa, ʼo kotou mālama lelei leva kiai? Neʼe lagi kotou mahino ai leva neʼe kotou faihala. Kae kua kotou fiafia leva ʼi te temi nei ʼi takotou ʼiloʼi ia te moʼoni! Kapau neʼe kotou tutupu mai he ʼu mātuʼa Kilisitiano, ʼe kei kotou manatuʼi koa pe neʼe malave feafeaʼi kiā koutou, ia te temi ʼaē neʼe kotou tui papau ai ki te ʼu moʼoni ʼo ʼuhiga mo Sehova ʼo kotou fakatotonu ai ke kotou maʼuliʼi ia te ʼu moʼoni ʼaē neʼe kotou ako?—Loma 12:2.

² ʼE ʼui anai e te tokolahi ʼi totatou ʼu tehina fakalaumālie, neʼe lahi tonatou fiafia, mo natou ovi kiā Sehova, pea mo natou loto fakafetaʼi ʼi tana “taki mai” nātou. (Soa. 6:44) Ko tonatou fiafia ʼaē neʼe ina uga nātou ke natou kau ki te ʼu gāue Fakakilisitiano. Neʼe natou maʼu he toe fiafia lahi koia ʼaē neʼe natou fia fakamahino ai te ʼu faʼahi ʼaē neʼe malave kiā nātou ki te hahaʼi fuli pē. Neʼe kua hoko koa kiā koutou he ʼaluʼaga fēia?

 3. Koteā ʼaē neʼe hoko ʼi te kōkelekāsio ʼo Efesi ʼi te temi ʼaē neʼe fakahā age e Sesu te logo ʼaē kiā nātou?

³ ʼI tana talanoa ki te kōkelekāsio Fakakilisitiano ʼo Efesi ʼo te ʼuluaki sēkulō, neʼe palalau ia Sesu “ki te ʼofa ʼaē neʼe [natou] maʼu ʼi te kamata.” Neʼe lahi te ʼu kalitātē lelei ʼo te kau Efesi, kae ko te ʼofa ʼaē neʼe natou fakahā kiā Sehova ʼi te temi muʼa neʼe kua vaivai ia. Koia, neʼe ʼui fēnei age e Sesu kiā nātou: “ ʼE au ʼiloʼi tau ʼu gāue, mo tau gāue kinakina pea mo tau faʼa kātaki, pea ʼe au ʼiloʼi ʼe mole ke faʼa kātakiʼi ia te ʼu tagata ʼaē ʼe kovi, pea kua ke ʼahiʼahiʼi ia nātou ʼaē ʼe natou ʼui ko nātou ko te kau ʼapositolo, kae ʼe mole ko ia, pea kua ke ʼiloʼi ai ʼe natou gutuloi. ʼE ke toe fakahā foki, ʼe ke faʼa kātaki, pea neʼe ke lava kātakiʼi ʼuhi ko toku huafa pea neʼe mole ke fiu. Kae, koʼenī te meʼa ʼaē ʼe au koviʼia ai ia koe, heʼe kua ke liʼaki te ʼofa ʼaē neʼe ke maʼu ʼi te kamata.”—Fakh. 2:2-4.

 4. He koʼē ko te logo a Sesu ki te kau Efesi ʼe toe maʼuhiga iā ʼaho nei?

⁴ Ko te tokoni ʼaē neʼe fai e Sesu ki te kau Efesi pea mo te tahi ʼu kōkelekāsio ʼaē neʼe talanoa kiai ʼi te tohi ʼo te Fakahā, neʼe tō lelei mo te ʼu ʼaluʼaga ʼaē neʼe hoko ki te kau Kilisitiano fakanofo talu mai te taʼu 1914. (Fakh. 1:10) Heʼe māʼia pē lā mo te temi nei, ʼe feala pē ki te kau Kilisitiano ke puli iā nātou “te ʼofa ʼaē neʼe [natou] maʼu ʼi te kamata” ʼaē kiā Sehova pea mo te ʼu moʼoni. ʼAki te manatu ki te faʼahi ʼaia, tou vakavakaʼi peʼe feafeaʼi, ʼaki takotou toe fakamanatu pea mo takotou metitāsio ki te ʼu ʼaluʼaga ʼaē neʼe hoko kiā koutou, hakotou taupau maʼu, mo hatatou fakafoʼou pea mo fakatuputupu ia te ʼofa pea mo te tauhi fakamālotoloto ki te ʼAtua pea mo te moʼoni ʼaē neʼe kotou maʼu ʼi te kamata.

Koteā Koa ʼAē Neʼe Kotou Tui Papau Ai Ko Te Moʼoni?

5, 6. (a) Koteā ʼaē ʼe tonu ke tahi tui papau kiai te Kilisitiano takitokotahi? (b) Koteā ʼaē neʼe kotou tui papau ai ko te kau Fakamoʼoni ʼa Sehova ʼe natou akoʼi atu ia te moʼoni? (c) Koteā ʼaē ʼe feala ke tokoni ki he tahi ke toe fakamālohiʼi age tona ʼofa ʼaē neʼe ina maʼu ʼi te kamata?

⁵ Ko te hahaʼi fuli ʼaē ʼe foaki tonatou maʼuli kiā Sehova, neʼe natou ‘ ʼahiʼahi’ vakaʼi muʼa kiā nātou totonu peʼe koteā ia “te finegalo ʼo te ʼAtua, tona lelei, tona tali lelei, pea mo tona haohaoa.” (Loma 12:1, 2) Neʼe ʼaoga ai ke kotou akoʼi te ʼu moʼoni ʼo te Tohi-Tapu. Ko he puani ʼe feala ke ina fakalotoʼi he tahi ke tui papau ki te moʼoni ʼaē neʼe akoʼi age e te kau Fakamoʼoni a Sehova, ʼe lagi mole tatau anai ia mo he tahi age. Ko ʼihi ʼe natou ʼui, neʼe fetogi tanatou manatu, ʼi tanatou lau te huafa ʼo te ʼAtua ʼi te Tohi-Tapu peʼe ʼi tanatou mahino ʼaē ki te ʼaluʼaga ʼo te kau mate. (Pes. 83:18; Tnk. 9:5, 10) Ko te tahi faʼahi ʼaē neʼe malave ki ʼihi, neʼe ko te feʼofaʼofani ʼi te hahaʼi ʼa Sehova. (Soa. 13:34, 35) Ko te tahi  faʼahiga, neʼe malave kiā nātou ia te fakamahino age ʼo te mole kau ki te mālamanei. Neʼe natou fakamoʼoni ai ko te kau Kilisitiano moʼoni, ʼe mole tonu ia ke natou kau ki te fai politike peʼe ko te ʼu tau fakapuleʼaga.—Isa. 2:4; Soa. 6:15; 17:14-16.

⁶ Maʼa te tokolahi, ko te ʼu manatu lā ʼaia ʼaē neʼe tupu ai te maʼu ʼo tonatou ʼuluaki ʼofa ʼaē ki te ʼAtua. Ke kotou toʼo he temi ʼo fakakaukau ki te ʼu moʼoni, ʼaē neʼe kotou tui papau kiai. ʼE tahi ʼalu pē te tagata takitokotahi mo tona agaaga ʼo ʼona totonu, pea ko te ʼu tupuʼaga ʼo tokotou ʼofa kiā Sehova pea mo takotou tui ki tana ʼu fakapapau ʼe mahino ia ʼe kehekehe ia mo ʼihi. Ko te ʼu manatu pē ʼaia, ʼe kei totonu pea mo ʼaoga aipē ia kiā koutou iā ʼaho nei, ohagē pē ko takotou kamata akoʼi te moʼoni. ʼE mole heʼeki fetogi ia te moʼoni. Koia ʼaē, ʼi hona faʼahiga ʼaluʼaga pē ʼe feala ʼaki takotou toe fakamanatu ki te ʼu manatu ʼaia pea mo te ʼu faʼahi ʼaē neʼe malave kiā koutou, ke kotou toe fakafoʼou pea mo toe fakamālohiʼi age tokotou ʼofa ʼaē neʼe kotou maʼu ki te moʼoni ʼi te kamata.—Lau ia Pesalemo 119:151, 152; 143:5.

Fakamālohiʼi Tokotou ʼOfa ʼAē Neʼe Kotou Maʼu ʼi Te Kamata

 7. He koʼē ʼe ʼaoga kiā tātou ke tou fakamālohiʼi totatou ʼuluaki ʼofa ʼaē ki te moʼoni, pea ʼe tou lava fai feafeaʼi ia te faʼahi ʼaia?

⁷ ʼE lagi lahi ia te ʼu fetogi neʼe kotou fai ʼi tokotou maʼuli talu takotou foaki ia koutou kiā Sehova. Neʼe maʼuhiga tokotou ʼuluaki ʼofa ʼaē ki te moʼoni. Kae ʼaki te temi, neʼe ʼaoga hakotou maʼu he ʼofa lahi ʼaupitō, ke kotou lava tauʼi he ʼu ʼaluʼaga foʼou ʼe ʼahiʼahiʼi ai takotou tui. Kae neʼe tokoni atu ia Sehova kiā koutou. (1 Ko. 10:13) Koia, ko te ʼu ʼaluʼaga ʼaē neʼe hoko ʼi te ʼu taʼu ʼaia, ʼe toe maʼuhiga ʼaupitō kiā koutou. ʼE tokoni atu, ke kotou fakamālohiʼi tokotou ʼofa ʼaē neʼe kotou maʼu ʼi te kamata. Pea ko te ʼu ʼaluʼaga ʼaia ʼaē neʼe hoko kiā koutou, neʼe ko he tahi ʼaia fakafealagia atu kiā koutou, ke kotou tui papau peʼe koteā te finegalo ʼo te ʼAtua tona lelei, tona tali lelei, pea mo tona haohaoa.—Sos. 23:14; Pes. 34:8.

 8. Ko Sehova neʼe ina fakahā feafeaʼi ia ia totonu kiā Moisese, pea neʼe ʼiloʼi lelei age feafeaʼi e te kau Iselaele ia te ʼAtua?

⁸ Tou toʼo he faʼifaʼitaki: Tou vakaʼi ia te ʼaluʼaga ʼaē neʼe hoko ki te kau Iselaele. Neʼe fakahā e Sehova, ʼe ina haofaki ia nātou mai tonatou maʼuli pōpula ʼi Esipito. Ko te ʼAtua neʼe ina fakahā ia ia totonu kiā Moisese ʼo ʼui fēnei māʼana: “ ʼE au fakahā anai pe ko ai ia au.” (Eke. 3:7, 8, 13, 14) Ko tona fakaʼuhiga ʼe maʼu anai e Sehova he tuʼulaga maʼuhiga ke liliu ko he haofakiʼaga ki tana hahaʼi. ʼI te ʼu meʼa ʼaē neʼe hoko pea mo he ʼu ʼaluʼaga ʼo tonatou maʼuli, ko te kau Iselaele neʼe natou mamata ki tona ʼuhiga totonu ʼo tona ʼulugaaga—ʼi tona ʼuhiga Māfimāfi, Tuʼi Fakamāu, ʼi tona ʼuhiga Pule, Haofakiʼaga, mo Laga Tau pea mo tona ʼuhiga ʼAtua ʼaē ʼe ina foaki ia meʼa fuli.—Eke. 12:12; 13:21; 14:24-31; 16:4; Neh. 9:9-15.

9, 10. Koteā he ʼaluʼaga ʼe feala ke tokoni ki he tahi ke ina ʼiloʼi te ʼAtua, pea he koʼē ʼe lelei ia te toe fakamanatu ʼo te ʼu taʼi ʼaluʼaga ʼaia?

⁹ ʼE mole feala ia ke fakatatau tokotou maʼuli ki ʼaē ʼo te kau Iselaele ʼo te temi muʼa. Kae, ʼe lagi neʼe ʼi ai he ʼu ʼaluʼaga neʼe hoko kiā koutou, ʼo kotou tui papau ai ki te tokaga moʼoni ʼa te ʼAtua kiā koutou pea neʼe toe mālohi age ai takotou tui. ʼE lagi ʼe ʼi ai he ʼaluʼaga neʼe fakahā ai e Sehova ko ia ko he ʼAtua ʼe ina foaki mai ia meʼa fuli, ko he ʼAtua ʼe ina Fakalotofīmālie peʼe ko he Faiako. (Lau ia Isaia 30:20b, 21.) Pe neʼe feala ke kotou mahino ai leva ki he tali ʼo he faikole. Neʼe kotou tau mo he fihifihia, pea ko he tehina peʼe ko he tuagaʼane neʼe haʼu ʼo tokoni atu kiā koutou. Peʼe ʼi takotou ako takitokotahi, neʼe lagi kotou fakatokagaʼi he ʼu vaega Fakatohi-tapu ʼe ʼalutahi mo tokotou fihifihia.

¹⁰ Kapau ʼe kotou fakamatala ki ʼihi ia te ʼu faʼahi ʼaia, ʼe feala ke mole malave kiā nātou. Heʼe ko te ʼu ʼaluʼaga ʼaia ʼe mole ko he ʼu milakulo. Kae, ʼe maʼuhiga ʼaupitō kiā koutou. ʼEī, ko Sehova neʼe liliu tonu ia ʼo foaki atu te ʼu meʼa ʼaē neʼe ʼaoga kiā koutou. Kotou fakakaukauʼi age muʼa, tokotou ʼu taʼu ʼi te moʼoni. ʼE kei kotou manatuʼi tāfito koa lā, he ʼu ʼaluʼaga neʼe tokaga moʼoni ai ia Sehova ki tokotou maʼuli? Kapau koia, ko takotou manatuʼi ia te ʼu faʼahi ʼaia pea mo tona malave ʼaē kiā koutou ʼi te temi muʼa, ʼe feala ia ke natou uga tokotou loto, ke kotou taupau maʼu tokotou ʼofa kiā Sehova ʼaē neʼe kotou logoʼi ʼi te ʼu temi ʼaia. Kotou taupau fakalelei pea mo metitāsio ki te ʼu ʼaluʼaga ʼaia. ʼE hā ʼi te ʼu ʼaluʼaga ʼaia, ʼe tokaga lelei ia Sehova kiā koutou, pea ʼe mole feala ki he tahi ke ina toʼo te ʼu meʼa ʼaē kua kotou tui papau kiai.

Kotou Sivisivi Fakalelei Ia Koutou Totonu

11, 12. Kapau kua vaivai te ʼofa ʼo he Kilisitiano ki te moʼoni, koteā ʼapē tona tupuʼaga, pea ko te tokoni fea ʼaē neʼe foaki mai e Sesu?

¹¹ Kapau ʼe mole kei kotou maʼu te ʼofa ki te ʼAtua  pea mo te moʼoni ohagē ko te temi muʼa, ʼe mole fakaʼuhiga leva kua fetogi te manatu ʼo te ʼAtua, ʼo ʼuhiga mo koutou. He ko Sehova, ʼe mole fetogi ia ʼi he temi. (Mala. 3:6; Sake 1:17) Kapau neʼe tokaga kiā koutou ʼi te temi muʼa, ʼe toe fēia pē ʼi te temi nei. Koia, koteā ʼapē te faʼahi ʼaē neʼe tupu ai leva te mole kei lelei takotou ʼu felōgoi mo Sehova? ʼE lagi kua lahi fau takotou hoha ki te ʼu tuʼania ʼo te maʼuli. ʼE lagi ʼi te temi muʼa, neʼe kotou faikole mo ako fakamālotoloto, pea mo metitāsio tuʼumaʼu. ʼE kei kotou faʼafai koa, ʼi te fai fakamafola pea mo kau tuʼumaʼu ki te ʼu fono ohagē ko te temi muʼa?—2 Ko. 13:5.

¹² ʼE feala pē, ke mole kotou fakatokagaʼi he ʼu fetogi ʼi te ʼu ʼaluʼaga ʼaia, kae kapau ʼe kotou sio ki he faʼahi ʼe kotou tōtō ai, koteā ʼaē neʼe tupu ai te ʼu faʼahi ʼaia? Kua lagi lahi age ʼapē takotou tuʼania ki te ʼu meʼa ʼaē ʼe ʼaoga ki tokotou fāmili, mo tonatou maʼuli mālōlō peʼe ko he tahi age ʼu meʼa lelei, ʼo kotou galoʼi leva te ʼu faʼahi ʼe maʼuhiga kiā koutou, ohagē ko te kua ovi mai ʼo te ʼaho ʼo Sehova? Neʼe ʼui fēnei e Sesu ki tana kau ʼapositolo: “Ke kotou tokaga kiā koutou totonu, naʼa mamafa tokotou ʼu loto ʼi te lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli, pea mo fokifā pē kua hoko fakapunamaʼuli mai kiā koutou te ʼaho ʼaia ohagē ko he hele. Heʼe haʼu anai kiā nātou fuli ʼaē ʼe nonofo ʼi te kele kātoa. Koia ke kotou nonofo ʼalaʼala pea mo kotou kole mamahi ʼi te temi fuli pē, ke feala ai hakotou hao ʼi te ʼu meʼa fuli ʼaia ʼaē ʼe tonu ke hoko mai.”—Luka 21:34-36.

13. Neʼe fakatātā e Sake ia te Folafola ʼa te ʼAtua kiteā?

¹³ Ko te tagata faitohi ʼo te Tohi-Tapu, ia Sake neʼe ina fakalotomālohiʼi fēnei tona ʼu tehina Kilisitiano, ke natou sivisivi fakamālotoloto ia nātou totonu ʼo natou fakaʼaogaʼi ia te Folafola ʼa te ʼAtua. Neʼe tohi fēnei e Sake: “Ke kotou liliu ko he ʼu hahaʼi ʼe natou maʼuliʼi te folafola, kae mole ko he ʼu hahaʼi ʼe natou fagono pē kiai, ʼo kotou kākāʼi pē ia koutou totonu ʼaki he ʼu fakakaukau hala. Kapau ʼe fagono he tahi ki te folafola kae mole ko he tahi ʼe ina maʼuliʼi, ʼe hagē ia ko he tagata ʼe ina fakasiosio tona fofoga ʼi he sioʼata. Heʼe fakasiosio pē ia, pea ʼalu pea galo atu aipē tona faʼahiga tagata. Ko ia ʼaē ʼe sio loloto ki te lao haohaoa ʼo te ʼāteaina, pea mo haga nofo ai, ko te tagata ʼaia ʼe fiafia anai ʼi tona maʼuliʼi, koteʼuhi ʼe mole ko he tagata fagono ʼe loto galogalo, kae ko he tahi ʼe ina fai te gāue.”—Sake 1:22-25.

14, 15. (a) ʼE feala ke tokoni feafeaʼi atu ia te Tohi-Tapu ke lelei age takotou ʼu felōgoi mo Sehova? (b) Koteā anai te ʼu fehuʼi ʼe kotou metitāsio kiai?

¹⁴ Ko he tahi ʼe ina fakaʼaogaʼi he sioʼata, ʼe feala ai ke ina ʼiloʼi papau peʼe kua tokalelei tana faiteuteu. Ohagē lā, kapau ʼe fakatokagaʼi e he tagata ʼe hipa tona hēkesi ʼe feala ke ina ʼai fakalelei. Kapau, ko he fafine ʼe ina fakatokagaʼi mole heʼeki tokalelei te faʼu ʼo tona ʼulu, ʼe lava heluhelu fakalelei ai. ʼO toe fēia mo te Tohi-Tapu, ʼe tokoni mai ke tou sivisivi ia tātou totonu. ʼI te temi ʼaē ʼe tou fakaʼalutahi ai totatou maʼuli ki te Tohi-Tapu pea ʼe tou fakaʼaogaʼi anai ohagē ko he sioʼata. Kae, koteā anai te ʼaoga ʼo te fakaʼaogaʼi ʼo he sioʼata, mo kapau ʼe mole tou fakatokatoka te faʼahi ʼaē ʼe tou fakatokagaʼi ʼe tōtō iā tātou? He ko he aga fakapotopoto mo kapau, ʼe tou gāueʼi ke fakaʼalutahi totatou maʼuli, pea mo “te lao haohaoa” ʼa te ʼAtua, ʼo tou liliu “ko he ʼu hahaʼi ʼe natou maʼuliʼi” te folafola. Koia kā tou fakatokagaʼi, kua vaivai totatou ʼofa ʼaē neʼe tou maʼu ʼi te kamata kiā Sehova pea mo te moʼoni, ʼe lagi lelei ke tou fai te ʼu fehuʼi ʼaenī: ‘Koteā te ʼu fihifihia, ʼaē ʼe au tauʼi ʼi te ʼaho fuli, pea ʼe feafeaʼi taku tali te ʼu ʼaluʼaga ʼaia? ʼI te temi muʼa, neʼe feafeaʼi taku tali ia te ʼu faʼahi ʼaia? Kua ʼi ai koa he faʼahi kua fetogi?’ ʼAua naʼa tou meʼa noaʼi, mo kapau ʼe tou fakatokagaʼi hotatou ʼu vaivaiʼaga, tou foimo fai he ʼu fetogi fakavilivili.—Hep. 12:12, 13.

 ¹⁵ Ko te taʼi metitāsio ʼaia, ʼe feala ke tokoni atu, ke kotou fai he ʼu fakatuʼutuʼu neʼe fakafuafua lelei ki takotou tuputupu fakalaumālie. Ko te ʼapositolo ko Paulo, neʼe ina foaki te tokoni ki tona kaugā gāue ko Timoteo ke tuputupu ʼi te fai fakamafola. Neʼe fakalotomālohiʼi fēnei e Paulo ia te tagata tūpulaga: “Metitāsio ki te ʼu meʼa ʼaia; nofo kātoa ai, ke ʼiloga tau ʼu faiga ki te hahaʼi fuli.” ʼE tonu anai ke tou metitāsio lelei ʼaki te Folafola ʼa te ʼAtua, ko he faʼahi ʼe feala pē ke tou fai.—1 Tim. 4:15.

16. Koteā te faʼahi ʼaē ʼe tonu ke kotou tōkakaga kiai mokā kotou sivisivi ia koutou totonu ʼaki te Tohi-Tapu?

¹⁶ Kapau ʼe tou sivisivi fakalelei ia tātou totonu, ʼe tou ʼiloʼi ai totatou ʼu vaivaiʼaga. ʼE feala pē, ke kita lotovaivai ai, kae ʼaua naʼa tou maʼu te faʼahiga manatu ʼaia. Heʼe ko te fakatuʼutuʼu ʼo he sivisivi ʼo tātou totonu, ʼe ko tatatou ʼiloʼi ʼaia totatou ʼu puani vaivai, ʼaē ʼe tonu ke tou gāueʼi. ʼE mahino ia ko te loto ʼo Satana, ke maʼu he Kilisitiano te manatu ʼaē, ʼe mole hona ʼaoga ʼuhi pē ko tona ʼuhiga agahala. ʼI tona fakahagatonu, neʼe lau ko te ʼAtua ʼe ina meʼa noaʼi tatatou ʼu faiga fuli ʼaē ke tou tauhi kiā te ia. (Sopo 15:15, 16; 22:3) Neʼe fakafeagai mālohi ia Sesu ki te taʼi manatu ʼaia, heʼe ki te ʼAtua ʼe tou maʼuhiga takitokotahi. (Lau ia Mateo 10:29-31.) ʼI tatatou ʼiloʼi totatou ʼuhiga agahala, ʼaki he agavaivai pea mo te tokoni ʼaē ʼe haʼu mai ia Sehova, ʼe tonu ke tou gāueʼi totatou ʼu puani vaivai ʼaia. (2 Ko. 12:7-10) Kapau, ko te mahaki peʼe ko te vaivai matuʼa ʼe ko he ʼu ʼaluʼaga ʼe feala ke ina fakatuʼakoi tatatou gāue, pea tou fai he ʼu fakatuʼutuʼu ʼo fakafuafua lelei ʼo mulimuli pē ki totatou ʼu fealagia, kae ʼaua naʼa tou lotovaivai peʼe tou tuku ke vaivai totatou ʼofa.

ʼE Lahi Te ʼu Tupuʼaga Ke Tou Loto Fakafetaʼi Ai

17, 18. Koteā te ʼu tapuakina ʼaē ʼe kotou maʼu ʼi tatatou fakamālohiʼi totatou ʼofa ʼaē neʼe kotou maʼu ʼi te kamata?

¹⁷ ʼE lahi te ʼu tapuakina ʼe tokoni mai ke hoko ʼatu te fakamālohiʼi ʼo tokotou ʼofa ʼaē neʼe kotou maʼu ʼi te kamata. ʼE feala ke kotou fakatuputupu tokotou ʼatamai mālama ki te ʼAtua, pea mo takotou loto fakafetaʼi ki te takitaki ʼofa ʼa Sehova. (Lau ia Tāʼaga Lea 2:1-9; 3:5, 6.) Neʼe ʼui fēnei e te tagata fai pesalemo: “ ʼE ʼi ai te fakapale lahi ʼi [te] taupau [ʼo te ʼu tonu faifakamāu ʼa Sehova]. Ko te fakamanatu ʼa Sehova ʼe feala takita falala kiai, heʼe ina fakaliliu ke poto ia ia ʼaē ʼe mole heʼeki fakapotopoto.” Tahi ʼaē, “fiafia ia nātou ʼaē ʼe natou haohaoa ʼi tonatou ʼu ala, ia nātou ʼaē ʼe natou haʼele ʼi te lao ʼa Sehova.”—Pes. 19:7, 11; 119:1.

¹⁸ ʼE kotou fakamoʼoni anai, ʼe lahi te ʼu lelei ʼe tonu ai ke kotou loto fakafetaʼi. ʼE kotou mahino ki te tupuʼaga ʼo te ʼu ʼaluʼaga ʼaē ʼe hoko ʼi te ʼu ʼaho ʼaenī. ʼE foaki e te ʼAtua, ia he puipui mo he tokoni ʼofa ʼi te faʼahi fakalaumālie ki tana hahaʼi, pea ʼe ʼi ai tona fua lelei kiā koutou. ʼE mahino ia, ʼe kotou toe loto fakafetaʼi foki ki te taki mai ʼo koutou e Sehova ki tana kōkelekāsio ʼi te mālamanei kātoa, pea neʼe ina foaki atu te pilivilēsio ʼaē ke kotou kau ki tana kau Fakamoʼoni. Kotou fakakaukauʼi te ʼu tapuakina ʼaē ʼe kotou maʼu! Kanapaulā neʼe tonu ke kotou tohi he lisi ʼo te ʼu lelei ʼaia, ʼe mahino ia ko he lisi loaloaga. Kapau ʼe kotou tautau fai te fakamanatu ʼo te ʼu lelei ʼaē neʼe kotou maʼu, ʼe mahino papau ia, ʼe tokoni atu anai ke kotou maʼuliʼi te fakatotonu ʼaenī: “Haga taupau maʼu te meʼa ʼaē ʼe ke maʼu.”—Fakh. 3:11.

19. ʼO mole gata pē ki takotou metitāsio ki takotou felōgoi mo te ʼAtua, koteā te ʼu faʼahi maʼuhiga ke kotou taupau fakalelei ai tokotou maʼuli fakalaumālie?

¹⁹ Ko takotou metitāsio ki te faʼahiga tuputupu ʼo takotou tui ʼaki te temi, ko he faʼahi ia ʼe tonu ke kotou haga fai, heʼe feala ai ke tokoni atu ke kotou taupau maʼu te meʼa ʼaē ʼe kotou maʼu. Ko te nusipepa ʼaenī, neʼe ina fakamanatuʼi mai he tahi ʼu puani tāfito ki te taupau fakalelei ʼo totatou maʼuli fakalaumālie. ʼI te ʼu faʼahi maʼuhiga ʼaia, ʼe ʼi ai te faikole, mo te kau tuʼumaʼu pea mo lagolago ki te ʼu fono, pea mo te faʼafai ʼi te fai fakamafola. ʼE feala ki te ʼu meʼa ʼaia, ke tokoni atu ke kotou fakafoʼou pea mo toe fakamālohiʼi te ʼofa ʼaē neʼe kotou maʼu ʼi te kamata.—Efe. 5:10; 1 Pet. 3:15; Suta 20, 21.

ʼE Kotou Tali Feafeaʼi Anai?

• ʼE feafeaʼi hokotou fakalotomālohiʼi ʼi te temi nei e te ʼu tupuʼaga ʼaē ʼo tokotou ʼofa kiā Sehova?

• Kā kotou fakakaukau ki te ʼu ʼaluʼaga ʼaē neʼe hoko kiā koutou totonu, koteā ʼaē ʼe ina fakalotoʼi koutou kiai?

• He koʼē ʼe tonu ke kotou sivisivi fakalelei tokotou ʼofa ʼaē ki te ʼAtua?

[ʼU fehuʼi ʼo te ako]

[Paki ʼo te pasina 27]

ʼE ʼi ai koa he ʼu fetogi ʼe ʼaoga ke kotou fai?