Neʼe lagi tuʼa lahi tau fai te ʼu palalau ʼaia kia koe peʼe ki ʼihi atu ʼi tau avahi he Tule Leʼo foʼou. Neʼe mole fakatuʼu noa te ʼu pakī matalelei ʼaia ʼae neʼe teuteuʼi fakalelei. Kaʼe neʼe fai moʼo akoʼi ʼo tatou ke tou fakakaukauʼi pea ke malave ki totatou loto. ʼE feala ke ʼaoga kia tatou te ʼu pakī ʼaia, tafitō la moka tou teuteuʼi tatatou Tule Leʼo pea mo fai ni tali ʼi te fono.

Ohage la, ʼe feala ke ke fakakaukauʼi pe ko ʼe neʼe filifili te ʼuluaki pakī ʼae ʼe tuʼu ʼi te ʼu alatike ako takitahi. Kotea ʼae ʼe ha ai? Kotea tona pikipikiga mo te kupu taki ʼo te alatike peʼe ko te vaega tafitō? Pea ke ke fakakaukauʼi te pikipikiga ʼo te tahi atu ʼu pakī mo te manatu ʼae ʼe vakaʼi ʼi te alatike, ʼo toe feia mo tou maʼuli.

ʼE loto anai e te tehina ʼae ʼe ina takitaki te Ako ʼo Te Tule Leʼo, ke ina tuku he faigamalie ki te nofoʼaki ke natou fakamatalatala te ʼu pakī, ke natou fakaha tona pikipikiga mo te alatike ako, pea mo malave feafeaʼi kia natou. ʼI ʼihi pakī, ʼi te fakamatala ʼae e tuʼu ai, ʼe fakaha ai te palakalafe ʼae ʼe alu tahi mo te pakī ʼaia. Pea ki te tahi ʼu pakī leva, ʼe lagi filifili anai e te tehina ʼae ʼe ina takitaki te ako ia te palakalafe ʼae ʼe lelei ke faipalalau ki te pakī. ʼI tana fai ʼaia, ʼe tou maʼu tatau anai te ʼu lelei mai te ʼu faiga ʼae ke tokoni mai ke tou mahino ʼaki te ʼu pakī ki te ʼu ako ʼae ʼe tou maʼu ʼi te Folafola ʼa te ʼAtua.

Neʼe ui e te tehina, neʼe toe ʼasili age tana leleiʼia he alatike ʼuhi ko te ʼu pakī.