Ko te fehiʼa, ʼe ko takita mole leleiʼia he tahi peʼe ko he kiʼi kutuga. ʼE ko takita logoʼi tuʼumaʼu te agakovi.

ʼE lahi te ʼu tupuʼaga ʼo te maʼu e te hahaʼi ia te fehiʼa. ʼI te agamahani, ʼe fakahagahaga ia te fehiʼa ki ʼihi ʼuhi ko tonatou ʼuhiga kae mole ki te meʼa ʼae neʼe natou fai. Ko natou ʼae ʼe fehiʼaʼinaʼi ʼe lau ʼe natou agakovi, mo fia fai ia te meʼa ʼae ʼe kovi pea ʼe mole feala ke natou fetogi. ʼE fakaʼuhiga natou ʼe mole natou maʼuhiga, peʼe natou fakatupu kovi. Ko natou ʼae ʼe fehiʼa ki ʼihi, neʼe lagi gaohi koviʼi natou, peʼe natou felaveʼi mo he ʼu aga heʼe faitotonu peʼe neʼe hoko kia natou he aluʼaga ʼe tupu ai tanatou maʼu he ʼu manatu ʼe mole lelei.

ʼE feala ke fehiʼa he tahi ki ʼihi neʼe heʼeki natou felaveʼi. Ohage la, ʼe feala ki he tahi ke manatu tahi mo ʼihi ʼe fakaʼapaʼapa ki ai peʼe natou felogoi lelei. Koia, ʼe feala ke mafola vave ai te fehiʼa pea liliu ai ko he manatu ʼa he kiʼi kutuga.

ʼI te temi ʼae kua tou mahino ai ki te tupuʼaga ʼo te mafola ʼo te fehiʼa, ʼe feala ai ke tou mahino pe ʼe koʼe ʼe pikisia ai he tokolahi. Koia, moʼo fakagata te malohi ʼo te fehiʼa ʼi te malama ʼaeni ʼe tou maʼuʼuli ai, ʼe tonu ke tou tauʼi tafito te ʼu faʼahi ʼe tupu mai ai te fehiʼa. ʼE fakaha mai ʼi te Tohi-Tapu ia te ʼu faʼahi ʼe tupu mai ai te fehiʼa.

KO TE FEHIʼA ʼE MOLE TUPU MAI TE TAGATA. Neʼe kamata mai, ʼi te temi ʼae neʼe fakafeagai ai te ʼaselo ʼi te lagi, neʼe fakahigoa ko Satana te Tevolo. ʼI te temi ʼae neʼe kamata ai tana fakafeagai, ko te Tevolo “neʼe faifakapo ʼi te kamataʼaga.” ʼI tona ʼuhiga ‘gutuloi pea mo tamai ʼo te loi,ʼ neʼe hoko atu tana fakaneke ia te fehiʼa mo te fakahoko ʼo te agatuʼu. (Soane 8:44; 1 Soane 3:11, 12) ʼE ui ʼi te Tohi-Tapu ʼo ʼuhiga mo ia, ʼe kaka, mo hoko ita pea mo aga itaita.​—Sopo 2:7; Apokalipesi 12:9, 12, 17.

ʼE LOGOʼI E TE TAGATA IA TE FEHIʼA ʼUHI KO TONA ʼUHIGA AGAHALA. Neʼe muliʼi e te ʼuluaki tagata, ia Atama, ia te ala ʼo te agahala ʼae neʼe tofa e Satana. Ko te tupuʼaga la ʼaia ʼo te pikisia ʼo te tagata fuli ʼi te agahala pea mo te maʼuli heʼe haohaoa. (Loma 5:12) ʼI tona fehiʼa, neʼe fakapogi e te ʼuluaki foha ʼo Atama, ia Kaino ia tona tehina ko Apele. (1 Soane 3:12) ʼE moʼoni, tokolahi ʼe natou fakaha ia te ʼofa pea mo te lotomanavaʼofa. Kae ʼuhi ko totatou ʼuhiga agahala, tokolahi ʼe natou manatu pe kia natou totonu, mo manumanū pea mo fiatuʼu, ʼae ko he ʼu faʼahi ʼe ina fakatuputupu ia te fehiʼa.​—2 Timoteo 3:1-5.

ʼE MALOHI TE FEHIʼA ʼI TE MOLE TALI ʼO HE MANATU KEHE. ʼE tuputupu te fehiʼa ʼi te malama ʼaeni ʼe tou maʼuʼuli ai ʼaki tanatou fakaneke ia te ʼu aga ʼe fakatupu kovi. Kua ʼaʼasili ia te mole tali ʼo he manatu kehe, mo te maʼu ʼo he manatu ʼe kovi ki he tahi, mo te leakovi mo te gaohi koviʼi ʼo he tahi e he kiʼi kutuga pea mo te ʼu maumau koteʼuhi “ ʼe nofo te malamanei katoa ʼi te malohi ʼo Satana.”​—1 Soane 5:19.

Kae ʼe mole gata pe ki te fakaha mai ʼi te Tohi-Tapu ia te ʼu tupuʼaga ʼo te fehiʼa. ʼE ina toe foaki mai foki mo te ʼu puleʼaki.