ʼI tana ʼi selo, neʼe ako e Sesu mai tana Tamai te ʼu kalitate ke liliu ko he kaugā gaue ʼe lelei. ʼI te kele, neʼe ina fakaha tana lava gaue fakatahi pea mo ʼihi. Ko te faʼifaʼitaki fea neʼe ina tuku mai? Tou vakaʼi tana faʼifaʼitaki, pea mo pelesepeto ʼe tolu ʼe tokoni mai ke tou liliu ai ko he ʼu kaugā gaue ʼe lelei. ʼE tokoni mai te ʼu pelesepeto ʼaia ke tou logo tahi mo gaue fakatahi.

Ko he kaugā gaue ʼe lelei ʼe fiafia ia ki ʼona kaugā gaue. ʼE mole ina faigaʼi ke fakamaʼuhigaʼi kae ke agavaivai. Neʼe akoʼi e Sesu mai tana Tamai te agavaivai. Pea ʼe tau pe ia mo Sehova tokotahi ke fakahigoaʼi ko te Tupuʼaga, kae neʼe ina loto ke tou tokagaʼi te ʼu gaue neʼe fakahoko e tona ʼAlo, tona kaugā gaue. ʼE ha te faʼahi aia ʼi te ui e te Atua: “Ta fakatupu te tagata ʼo fakatatau kia taua.” (Sen. 1:26, NWT) Neʼe tokagaʼi e Sesu te agavaivai ʼa Sehova pea neʼe fiafia ai.—Pes. 18:36.

ʼI te mauli ʼa Sesu ʼi te kele, neʼe ha tana agavaivai ohage pe ko tana Tamai. Neʼe ina fakakololiaʼi tuʼumaʼu pe te ʼAtua moka vikiʼi ia ia ʼuhi ko te ʼu gaue ʼae neʼe ina fai. (Mko. 10:17, 18; Soa. 7:15, 16) Neʼe faigaʼi tuʼumaʼu pe e Sesu ke logo tahi ʼana tisipulo, pea neʼe ina fakahigoaʼi natou ko ʼona kaumeʼa kae  mole ko he ʼu kaugana. (Soa. 15:15) Neʼe ina toe fufulu ʼonatou vaʼe ʼo ina fakaha ai kia natou pe ʼe feafeaʼi te agavaivai. (Soa. 13:5, 12-14) Ohage ko Sesu, tou fakamaʼuhigaʼi ʼotatou kaugā gaue. Kapau ʼe ‘tou fefakamaʼuhigaʼaki,’ ʼe feala ke tou fakahoko he ʼu gaue ʼe lahi age ʼo mole tou fai ke fakakololiaʼi ai ia tatou totonu.—Loma 12:10.

Ko he tahi ʼe agavaivai ʼe ina iloʼi ko te ʼu fakatuʼutuʼu “ʼe hoko moka lahi te kau faitokoni.” (Taag. 15:22, NWT) Logo la ʼe tou maʼu ni fealagia mo ni faiva kae ʼaua naʼa galo kia tatou ʼe mole feala ki he tahi ke ina iloʼi ia meʼa fuli. ʼO feia mo Sesu neʼe ina ui ʼe lahi te ʼu meʼa ʼe mole ina iloʼi. (Mat. 24:36) Neʼe ina tokagaʼi te ʼu meʼa ʼae ʼe iloʼi peʼe manatu ki ai ʼana tisipulo, ʼae ʼe heʼe haohaoa. (Mat. 16:13-16) Koia ʼae neʼe fiafia ai ʼona tehina gaue ʼi te gaue fakatahi mo ia. ʼE toe feia mo tatou, kapau ʼe tou mahino ʼe ʼi ai ʼotatou tuʼakoi, mo kumi tokoni ki ʼihi, ʼe tou tokalelei tuʼumaʼu anai mo te ʼu tehina mo tuagaʼane ʼo tou fakahoko fakatahi te gaue.

ʼE maʼuhiga ki te ʼu tagata ʼafeā ke natou faʼifaʼitakiʼi ia Sesu moka natou gaue fakatahi. ʼE tonu ke natou manatuʼi ʼe feala ki te laumalie maʼoniʼoni ke ina fakalotoʼi he tagata ʼafeā pe ʼo te kolesi. Koia ka natou fono ʼe tonu ke tahi fakaha e te tagata ʼafeā takitokotahi tana manatu. ʼI tanatou fai ʼaia, ʼe natou toʼo ai anai ni tonu ʼe lelei ki te kokelekasio.

Ko he kaugā gaue lelei ʼe fakapotopoto ʼi ʼana felogoi mo ʼona kaugā gaue. ʼE mole ina faigaʼi anai ke lakatonu tuʼumau, kae ʼe lotolelei ke fagono ki ʼihi. Neʼe lahi te ʼu aluʼaga neʼe tokagaʼi e Sesu ia te fakapotopoto ʼo tana Tamai. Ohage la, neʼe fekauʼi mai e Sehova ke ina totogi te tuʼā ʼa te malamanei ki te mate.—Soa. 3:16.

Neʼe fetogi e Sesu tana manatu moka sio ʼe ʼaoga. Neʼe hoko te faʼahi ʼaia ʼi te temi neʼe tokoni ai ki te fafine matapule mai Fenisia. Logo la neʼe fekauʼi mai Sesu ke tokaga tafito ki te puleʼaga ʼo Iselaele, kae neʼe lotolelei pe ke tokoni ki te fafine ʼaia. (Mat. 15:22-28) Neʼe toe aga fakapotopoto ki ʼana tisipulo. Neʼe lotolelei Sesu ʼo fakamolemole kia Petelo ʼi tana fakafisi ʼae ʼe mole ina iloʼi ia ia. Ki muli age, neʼe falala kia Petelo ʼo ina foaki age kia ia te ʼu gaue maʼuhiga ʼaupito. (Luka 22:32; Soa. 21:17; Gaue 2:14; 8:14-17;  10:44, 45) ʼE ha mai ʼi te faʼifaʼitaki ʼa Sesu ʼe tonu ke tou faiga ‘ke iloʼi e te tagata fuli tatatou aga fakapotopoto.’—Flp. 4:5.

Kapau ʼe tou fakapotopoto, ʼe faigafua anai hatatou gaue fakatahi mo te hahaʼi fuli. Neʼe agalelei ia Sesu mo te hahaʼi. Kae neʼe maheheka ʼona fili kia ia mo ui “ʼe kaumeʼa mo te kau tanaki tukuhau mo te kau agahala,” ʼae neʼe natou tali te logo lelei. (Mat. 11:19) ʼE feala koa ke tou lava gaue mo te hahaʼi fuli ohage ko Sesu? Neʼe ui fenei e Louis, ʼae neʼe kua fualoa tana taupau fakasiliko pea neʼe gaue ʼi te Petele mo te ʼu tehina mo tuagaʼane kehekehe: “Neʼe au faiga ke au fakata ia natou fuli ʼae neʼe matou gaue fakatahi ki he kaupa neʼe faʼu ʼaki ni maka kehekehe. Kapau ʼe matatau te fakatuʼu ʼo te ʼu maka, pea ʼe feala anai ke totonu te kaupa. ʼE toe feia pe ohage ko te totonu ʼo he kaupa, ʼe au faigaʼi ke au felogoi lelei mo te ʼu tehina mo tuagaʼane fuli.” ʼE ko he faʼahiga fai ʼaia ʼe lelei.

Ko te aluʼaga fea ʼe tou fakaha ai ko tatou ko he kaugā gaue ʼe lelei ʼi te kokelekasio? Ohage la moka tou faifakamafola mo tatatou kiʼi kutuga. ʼE feala ke tou mulimuli ki te aluʼaga ʼo natou ʼae ʼe maʼu fanau peʼe ko te ʼu tehina mo tuagaʼane matuʼa pea mo tokoni kia natou ke lahi age tonatou fiafia ʼi te faifakamafola.

Ko he kaugā gaue ʼe lelei ʼe “fia vaevae” anai. (1 Tim. 6:18) ʼI tana gaue fakatahi mo tana Tamai, neʼe tokagaʼi e Sesu ko Sehova ko he tahi ʼe ina fia vaevae ʼana gaue mo ʼihi. Ohage la “i tana teuteui te atu lagi,” ko Sesu neʼe gaue fakatahi mo Sehova pea neʼe ina maʼu te ʼu ako mai ia ia. (Taag. 8:27) Ki muli age, neʼe vaevae e Sesu mo ʼana tisipulo te ʼu ‘meʼa fuli ʼae neʼe logo ki ai’ mai tana Tamai. (Soa. 15:15) Ka tou faʼifaʼitakiʼi ia Sehova, ʼe mole tou fufu anai te ʼu logo maʼuhiga mo ʼaoga ki ʼotatou kaugā gaue kae ʼe tou fiafia anai ʼi te vaevae mo natou.

ʼE toe feala mo tatou ke tou fakalotomalohiʼi ʼotatou kaugā gaue. Ka tokagaʼi e he tahi ʼatatou faiga pea mo fakamalo mai, ʼe tou lotomalohi ai. Neʼe fakaha e Sesu ki ʼana tisipulo te ʼu meʼa ʼae ʼe ina leleiʼia ia natou. (Vakaʼi ia Mateo 25:19-23; Luka 10:17-20) Neʼe ina ui age kia natou ʼe natou fakahoko anai ni ‘gaue ʼe lahi age ʼi te ʼu gaue ʼaʼana.’ (Soa. 14:12) ʼI te po fakaʼosi ʼi muʼa ʼo tona mate, neʼe vikiʼi e Sesu ʼana tisipulo agatonu, ʼo ina ui age kia natou: “Ko koutou ʼae neʼe kotou fakatahi tuʼumaʼu mo au ʼi ʼoku ʼahiʼahi.” (Luka 22:28) ʼE mahino ia ko te ʼu palalau ʼaia neʼe malave ki ʼonatou loto ʼo natou lotomalohi ai. Kapau ʼe tou vikiʼi ʼotatou kaugā gaue, ʼe lahi anai tonatou fiafia pea ʼe natou loto anai ke toe lahi age ʼanatou gaue.

Neʼe ui fenei e te tehina ko Kayode: “Ko he kaugā gaue lelei ʼe mole ʼaoga ia ke haohaoa, kae ʼe ina faigaʼi ke ʼaua naʼa kinakina fau te ʼu gaue ʼo ʼona kaugā gaue pea mo fakafiafiaʼi natou.” ʼE kotou hage koa ko te tehina ko Kayode? He koʼe ʼe mole kotou fakalavelave ki ʼokotou kaugā gaue pe kotea tanatou manatu ʼo ʼuhiga mo koutou? Neʼe fiafia te ʼu tisipulo ʼa Sesu ʼi te gaue fakatahi mo ia. Pea kapau ʼe fia gaue ʼokotou tehina mo koutou, ʼe feala ke koutou fai te ʼu palalau ʼaeni ʼa te apositolo ko Paulo: “ʼE tou kaugā gaue ki tokotou fiafia.”—2 Ko. 1:24.