Neʼe kamata e te kau Fakamoʼoni ʼa Sehova te laga ʼo te ʼu fale ʼo ʼanatou pilo lalahi foʼou, ʼe tuʼu ovi ki te vai tafe ʼe higoa ko Sterling Forest (pe ʼe ko te Lac Bleu). ʼE natou puipui feafeaʼi anai te ulufenua ʼi ai?

Neʼe fakaʼaʼa e te kau Fakamoʼoni te koga meʼa ʼae ʼe fai ai te ʼu gaue laga fale, ke mole hu ki loto te ʼu gata pea mo te ʼu fonu kehekehe ʼae ʼe maʼuʼuli ʼi ai pea ke mole natou lavevea. ʼE natou vakaʼi tuʼumaʼu pe te ʼa pe kei lelei ke mole feulufi te ʼu manu ki te faʼahi ʼae ʼe fai ai te ʼu gaue. Ka kua ʼosi leva te gaue laga fale, ʼe toʼo anai te ʼa. Pea kapau ʼe fakaovi fau anai te ʼu gata ki te ʼu fale, ko he tahi ʼe ina iloʼi lelei te ʼu manu ʼaia, ʼe ina toʼo anai ʼo ʼave ki he tahi age koga meʼa.

Neʼe tuʼusi te ʼu ʼakau ʼi te ʼu mahina momoko, ke mole fakahohaʼa ai ki te ʼu manu lelei ʼae ʼe natou faʼu ʼanatou fataʼi. Ka kua ʼosi leva te ʼu gaue laga fale, ʼe fakatuʼu anai e te kau Fakamoʼoni he ʼu fataʼi neʼe natou faʼu ke toe liliu age te ʼu manu lele.

ʼO toe feia pe, ko te kau Fakamoʼoni neʼe natou fakatatau pea mo fakamaʼa ʼihi faʼahi ʼo tonatou kele ʼi te ʼu mahina ʼo Oketopeli ki Malesio, ke feala ke mavetevete pea mo homo lelei ake te ʼu pulapula ʼo te fuʼu ʼakau ʼe higoa ko scutellaire latériflore ʼae kua tahitahiga tona maʼu. ʼE natou fai feia tuʼumaʼu pe, tatau aipe pe mole he ʼu fuʼu ʼakau feia neʼe maʼu ʼi te kele ʼi Warwick talu mai te taʼu 2007.

ʼI te vai tafe ʼae ʼe higoa ko Sterling Forest, ʼi te ʼu tafa ʼo tomatou kele, ʼe maʼu ai te ʼu faʼahiga manu lele pea mo te ʼu ika kehekehe. Moʼo puipui te vai tafe, neʼe filifili e te hahaʼi ʼae ʼe natou fakakaukauʼi te laga ʼo te ʼu fale ke natou fakaʼaogaʼi he ʼu faʼahiga fai kehekehe moʼo puipui te ulufenua. Ohage la, neʼe natou fakatuʼutuʼu ke to he ʼu ʼakau ʼi te ʼu fuga ʼato ʼo te ʼu fale, ke fakamaʼa ai te ʼu vai ʼuli moka ʼua pea mo natou taʼofi te hali ʼo te ʼu vai. Pea ʼe natou toe faiga ke natou puipui te ulufenua ʼo te vai tafe.

ʼE ui fenei e te tehina Fakamoʼoni ʼe kau ki te ʼu fakatuʼutuʼu ʼaia: “ʼE moʼoni, ʼe ʼaoga ke fai he tahi age ʼu fakatuʼutuʼu pea mo he temi ʼe lahi moʼo fakahoko te faʼahi ʼaia, kaʼe ʼe matou loto moʼoni ke puipui te ulufenua ʼi Wakwik.”