Para ha mga Batan-on
Likyi an Pagin Ambisyoso!
Instruksyon: Basaha an mga teksto ngan batona an mga pakiana ha lugar nga waray aringasa. Samtang nagbabasa ka, hunahunaa nga aktuwal nga naieksperyensyahan mo an nahitatabo. Handurawa an kahimtang. Hunahunaa nga hinbabatian mo an mga tingog. Abata an mga emosyon han mga nahidadabi. Handurawa an mga panhitabo.
Importante nga mga tawohan: David, Absalon, Joab
Sumaryo: Nangalimbasog hi Absalon ha pag-agaw han trono han iya amay.
PAMALANDONGA HIN MAOPAY AN KAHIMTANG.—BASAHA AN 2 SAMUEL 14:25-33; 15:1-17; 18:9-17, 30-33.
Ano daw la an hitsura ni Absalon? (Basaha utro an 2 Samuel 14:25, 26.)
Para ha imo, ano an ginhihimo ni Absalon ngan ano an tono han iya tingog samtang nangangalimbasog pagkuha han pagtagad han mga napakadto ha hadi para hin hustisya? (Basaha utro an 2 Samuel 15:2-6.)
Sumala ha 2 Samuel 14:28-30, ano daw la an personalidad ni Absalon?
DUGANG NGA USISAHA.
Ano an ginbuhat ni Absalon basi maagaw an trono? (Basaha an 2 Samuel 13:28, 29. Hi Amnon an suhag nga lalaki ni David, salit hiya an manurunod han trono.)
Bisan pa han pagin ambisyoso ni Absalon ngan han iya mga pangalimbasog nga dayawon, ano gud an pagtagad ha iya han mga tawo sugad han iginpapakita han paagi han iya lubong? (Basaha utro an 2 Samuel 18:17.)
Kay ano nga nagin ambisyoso hi Absalon? (Itanding an asoy mahitungod kan Diotrepes ha 3 Juan 9, 10.)
Ano an nagin epekto kan David han ginbuhat ni Absalon? (Basaha an Salmo 3 nga iginsurat ni David ha panahon han pagrebelde ni Absalon.)
IAPLIKAR AN IMO HINBAROAN. ISURAT AN IMO HINBAROAN MAHITUNGOD HAN . . .
Peligro ha pagin ambisyoso.
Kasakit nga mahimo magin resulta ha iba ngan ha imo mga kag-anak tungod han imo paggawi.
PARA HA DUGANG NGA APLIKASYON.
Ano an mahimo mag-aghat ha imo nga magin ambisyoso?
Paonan-o mo malilikyan an pagpahitaas?
ANO NGA BAHIN HINI NGA MGA ASOY AN NARURUYAGAN MO GUD, NGAN KAY ANO?
Suhestyon: Handurawa kon ano unta an nahitabo kon hi Absalon nagin mapainubsanon.—Proberbios 18:12.
