Hi Natan—Maunungon nga Sinuporta ha Putli nga Pagsingba

Diri masayon an pagkombinse ha usa nga may hitaas nga katungdanan nga nakabuhat hiya hin daku nga sala ngan kinahanglan magbag-o. Kukomprontahon mo ba hiya kon maaram ka nga may ginpatay hiya basi protektahan an iya reputasyon?

Hi Hadi David ha kadaan nga Israel nakabuhat hin pag-adulteryo upod ni Bat-seba, ngan nagburod hi Bat-seba. Basi itago an ira sala, iginpapatay ni David an bana ni Bat-seba ngan katapos gin-asawa hiya. Damu ka bulan nga ginsekreto ni David an iya sala ngan nagpadayon pagbuhat han iya mga responsabilidad sugad nga hadi. Kondi waray igbalewaray ni Jehova an sala han hadi. Ginsugo niya an iya propeta nga hi Natan basi komprontahon hi David.

Makuri ito nga sugo. Hunahunaa nga ikaw hi Natan. An pagkamaunungon kan Jehova ngan marig-on nga pagsunod ha Iya mga suruklan nagpagios kan Natan nga ipahinumdom kan David an iya mga sala. Paonan-o ito mahihimo ni Natan? Ngan paonan-o niya makukombinse hi David nga kinahanglan hiya magbasol?

MATAKTIKA NGA MAGTURUTDO

Kay ano nga diri maggahin hin pipira ka minuto ha pagbasa han 2 Samuel 12:1-25? Hunahunaa nga ikaw hi Natan nga nagsusumat kan David hini nga istorya: “May-ada duduha ka tawo dida ha usa nga bungto; an usa bahandianon, ngan an ikaduha kablas. An bahandianon nga tawo may damu gud nga mga kapangon nga kakarnerohan ngan mga kapangon nga kabakahan; kondi an tawo nga kablas waray ano man gawas la an usa nga nati nga karnero nga babaye, nga iya pinalit ngan ginpatambok: ngan ini tinmubo upod ha iya ngan ha iya mga anak; ini nagkaon tikang ha iya kalugaringon nga karan-an ngan  nag-inom tikang ha iya kalugaringon nga tasa, ngan naghigda ha iya dughan, ngan sugad para ha iya hin usa nga anak nga babaye. Ngan may-ada usa nga lumalangyaw nga nakada han tawo nga bahandianon, ngan hiya waray magkuha tikang ha iya kalugaringon nga kapangon nga kakarnerohan ngan ha iya kalugaringon nga kapangon nga kabakahan, ha pag-ihaw para han lumalangyaw nga tawo nga nakada ha iya, kondi kinuha an nati nga karnero han tawo nga kablas, ngan ihawon ini para han tawo nga nakada ha iya.”—2 Sam. 12:1-4.

Hi David magbarantay hin karnero hadto, ngan posible nga ginhunahuna niya nga tinuod ito nga nahitabo. Sumala ha usa nga komentarista ha Biblia, bangin hiara hi Natan nga kumadto kan David basi makimalooy para ha mga biktima hin kawaray hustisya nga waray nabulig. Pero bisan kon ito an kahimtang, ginkinahanglan ni Natan an pagkamaunungon ha Dios ngan kaisog basi kaistoryahon an hadi ha paagi nga iya ginbuhat. Nasina hi David ha gin-istorya ni Natan. ‘Sugad nga hi Jehova buhi, an tawo nga nagbuhat hini angay patayon!’ siring ni David. Katapos hi Natan mapwersa nga nagsiring: ‘Ikaw amo an tawo!’—2 Sam. 12:5-7.

Hunahunaa kon kay ano nga sugad hito an paagi ni Natan ha pagpresentar han problema. Kon an usa may hilarom nga pagbati ha iba, makuri para ha iya an paghunahuna hin matin-aw ha iya sitwasyon. Kita ngatanan may tendensya nga maghimo hin mga pasangil basi depensahan an aton mga sayop. Kondi tungod han ilustrasyon ni Natan, waray sabot hi David nga ginhukman niya an iya kalugaringon. Nasabtan hin matin-aw ni David nga maraot hinduro an paggawi nga igin-istorya ni Natan. Katapos maghukom hi David, dida la hiya ginsumatan ni Natan nga ito nga ilustrasyon nagtutudlok ha iya. Dida hito nasabtan ni David kon ano kadaku an iya sala. Nakabulig ito ha iya nga karawaton an disiplina. Iya ginkarawat nga iya “gintamay” hi Jehova pinaagi han iya paggawi may kalabotan kan Bat-seba, ngan iya ginkarawat an disiplina nga angay ha iya.—2 Sam. 12:9-14; Sal. 51, superskripsyon.

Ano nga leksyon an aton hibabaroan hito? Katuyoan han usa nga nagtututdo han Biblia nga buligan an iya gintututdoan nga makahimo hin husto nga konklusyon. Ginrirespeto ni Natan hi David salit mataktika an iya pakiistorya ha iya. Maaram hi Natan nga hi David nahigugma ha katadongan ngan hustisya. Salit naggamit hiya hin ilustrasyon nga maaram hiya nga makakabantad ha usa nga may-ada hini nga mga kalidad. Mabubuligan liwat naton an mga tawo nga masabtan an panhunahuna ni Jehova. Paonan-o? An mga tawo may ideya kon ano an husto. Mahimo naton hira buligan nga gamiton ito nga kahibaro nga diri naton ginpapaabat ha ira nga mas maopay kita o may katungod kita pagbuot kon ano an ira bubuhaton. An Biblia an aton awtoridad may kalabotan ha kon ano an husto ngan sayop, diri an aton personal nga opinyon.

Labaw ha ngatanan, an pagkamaunungon ha Dios nakabulig kan Natan nga sawayon an gamhanan nga hadi. (2 Sam. 12:1) An sugad hito nga pagkamaunungon mabulig ha aton nga magkaada kaisog nga marig-on nga sumunod ha magtadong nga prinsipyo ni Jehova.

SINUPORTA HA PUTLI NGA PAGSINGBA

Hira David ngan Natan posible nga maopay nga magsangkay, kay an usa nga anak ni David ginngaranan hin Natan. (1 Kron. 3:1, 5) Han siyahan nga gin-unabi hi Natan ha Biblia, kaupod hiya ni David. Pariho hira nahigugma kan Jehova. Matin-aw nga natapod hi David ha opinyon ni Natan, kay iya iginsumat an iya hingyap nga magtukod hin templo para kan Jehova. “Kitaa yana,” siring ni David, “ako naukoy ha balay nga sedro, kondi an arka han Dios nag-uukoy ha sulod ha mga biray. Ngan hi Natan nagsiring han hadi: Kadto, buhata an ngatanan nga aada ha imo kasingkasing; kay hi Jehova kaupod nimo.”—2 Sam. 7:2, 3.

Sugad nga matinumanon nga magsiringba ni Jehova, hi Natan andam gud pagsuporta ha plano ni David nga tukuron an siyahan nga templo han putli nga pagsingba dinhi ha tuna. Pero hito nga higayon, an iginpahayag ni Natan iya la opinyon, diri sugo ni Jehova. Hito nga gab-i ginsugo hiya han Dios nga magsumat hin lain nga mensahe ha hadi: Diri hi David an magtutukod han templo ni Jehova. Tutukuron ito han usa han iya mga anak. Kondi hi Natan nagsiring nga an Dios naghihimo hin kauyonan kan David basi an iya pagmando ‘matukod ha waray kataposan.’—2 Sam. 7:4-16.

Diri uyon ha kaburut-on han Dios an opinyon ni Natan may kalabotan ha pagtukod han templo. Pero inin mapainubsanon nga propeta waray magreklamo. Ginkarawat niya an instruksyon ni Jehova ngan ginsunod  ito. Maopay gud hiya nga susbaranan ha aton kon ginsasaway kita han Dios ha anoman nga paagi! An mga ginbuhat ni Natan ha urhi sugad nga propeta nagpapakita nga padayon nga gin-uyonan hiya han Dios. Ha pagkatinuod, baga hin gin-giyahan hiya ni Jehova upod ni Gad nga bisyonaryo nga hatagan hi David hin mga instruksyon ha pag-organisa hin 4,000 nga musikero nga mag-aalagad ha templo.—1 Kron. 23:1-5; 2 Kron. 29:25.

NAGDEPENSA HAN PAGKAHADI

Maaram hi Natan nga hi Salomon an sadang sumaliwan kan David sugad nga hadi. Salit ginios dayon hi Natan han nagsari hi Adonias nga agawon an trono han lagas na hi David. Makausa pa, iginpakita ni Natan an pagin mataktika ngan pagkamaunungon. Siyahan iya ginsagda hi Bat-seba nga ipahinumdom kan David an iya saad nga himoon nga hadi an ira anak nga hi Salomon. Katapos kinadto hiya kan David basi magpakiana kon ginpili ba niya hi Adonias sugad nga sunod nga hadi. Nasantop ni David nga delikado an kahimtang, salit iya ginsugo hi Natan ngan an iba nga maunungon nga mga surugoon nga dihogan hi Salomon ngan iproklamar nga hadi. Napakyas an plano ni Adonias nga agawon an trono.—1 Hadi 1:5-53.

MAPAINUBSANON NGA HISTORYADOR

Hira Natan ngan Gad an ginkikilala nga nagsurat han 1 Samuel kapitulo 25 tubtob 31 ngan han bug-os nga 2 Samuel. Dida hiton giniyahan nga mga libro, ini an aton mababasa: “An mga binuhatan ni David an hadi, siyahan ngan kataposan, kitaa, ini isinurat dida ha kaagi ni Samuel an manarag-an, ngan dida ha kaagi ni Natan an manaragna, ngan dida ha kaagi ni Gad an manarag-an.” (1 Kron. 29:29) Gin-unabi liwat ha Biblia nga hi Natan nagsurat mahitungod han “mga binuhatan ni Salomon.” (2 Kron. 9:29) Nangangahulogan ito nga posible gud nga hi Natan padayon nga nagtrabaho ha palasyo han hadi bisan han patay na hi David.

Bangin hi Natan mismo an nagsurat han kadam-an han aton hinbabaroan mahitungod ha iya. Kondi damu liwat an aton hibabaroan mahitungod ha iya ha diri niya pagsumat han pipira nga detalye. Matin-aw nga hi Natan usa nga mapainubsanon nga historyador. Diri hiya ambisyoso o interesado nga magin bantogan. Usa nga diksyonaryo ha Biblia an nagsiring nga basta gin-unabi la hiya ha Biblia ngan waray iginsumat nga impormasyon mahitungod han iya pamilya. Diri kita maaram han iya kaapoy-apoyan o han iya personal nga kinabuhi.

NAPAGIOS HAN PAGKAMAUNUNGON KAN JEHOVA

Ha pipira nga impormasyon nga gin-unabi han Biblia mahitungod kan Natan, hinbaroan naton nga mapainubsanon hiya ngan madasigon ha pagsuporta han mga kahikayan han Dios. Gintokahan hiya ni Jehova hin dagku nga responsabilidad. Pamalandonga an mga kalidad ni Natan sugad han pagkamaunungon ha Dios ngan hilarom nga apresasyon ha mga ginkikinahanglan han Dios. Pangalimbasog nga subaron ito nga mga kalidad.

Bangin diri ka sugoon nga sawayon an mga hadi nga nag-adulteryo o pugngan an mga plano nga agawon an trono. Pero ha bulig han Dios, mahimo ka magin maunungon ha iya ngan depensahan an iya ginsisiring nga husto. Mahimo ka liwat magin maisugon kondi mataktika nga magturutdo han kamatuoran ngan marig-on nga sumuporta ha putli nga pagsingba.

[Retrato ha pahina 25]

Ha pagdepensa han pagkahadi, mataktika nga nakiistorya hi Natan kan Bat-seba