Sunda an Giya han Dios ha Ngatanan nga Butang
Sunda an Giya han Dios ha Ngatanan nga Butang
“Ini nga Dios amo an aton Dios hin waray kataposan: Hiya amo an aton paramando, bisan ngadto ha kamatayon.”—SAL. 48:14.
1, 2. Kay ano nga sadang sundon naton an giya ni Jehova imbes nga sumarig ha aton kalugaringon nga kahibaro, ngan ano nga mga pakiana an nabangon?
KON huhunahunaon naton nga birilhon an mga butang nga waray pulos o nakakadaot, masayon la kita malimbongan. (Prob. 12:11) Ngan kon karuyag gud naton buhaton an diri angay ha usa nga Kristiano, an aton kasingkasing agsob nga maghihimo hin makakombinse nga mga hinungdan ha pagbuhat hito. (Jer. 17:5, 9) Tungod hito, an salmista nagpakita hin kaaram han nag-ampo hiya kan Jehova: “Ipagawas an imo lamrag ngan imo kamatuoran; nga ini makagdandan [makaggiya] ha akon.” (Sal. 43:3) Sinarig hiya kan Jehova, diri ha iya limitado nga kahibaro, ngan waray na iba nga makakahatag ha iya hin gimaopayi nga giya. Pariho han salmista, makakaopay ha aton an pagsunod ha giya han Dios.
2 Kondi, kay ano nga ha giya la ni Jehova kita sadang sumarig? San-o naton ito susundon? Ano nga disposisyon an sadang kultibaron naton basi magpahimulos hito, ngan paonan-o kita ginigiyahan ni Jehova yana? Inin importante nga mga pakiana paghihisgotan dinhi hini nga artikulo.
Kay Ano nga Sadang Sumarig Kita ha Giya ni Jehova?
3-5. Kay ano nga bug-os nga makakasarig kita ha giya ni Jehova?
3 Hi Jehova an aton langitnon nga Amay. (1 Kor. 8:6) Kilala gud niya an kada tagsa ha aton ngan maaram hiya han aada ha aton kasingkasing. (1 Sam. 16:7; Prob. 21:2) Hi Hadi David nagsiring ha Dios: “Nakilala ka han akon paglingkod ngan han akon pagtindog; maaram ka han akon hunahuna bisan hirayo. Kay waray bisan usa ka pulong ha akon dila, kondi, kitaa, O Jehova, . . maaram [ka na] hito ngatanan.” (Sal. 139:2, 4) Tungod kay kilala gud kita ni Jehova, diri kita sadang magruhaduha nga maaram hiya kon ano an gimaopayi para ha aton. Labot pa, hi Jehova makinaadmananon ha ngatanan. Nakikita niya an ngatanan, mas nakakasabot hiya kay ha bisan hin-o nga tawo, ngan maaram hiya han magigin resulta han mga butang ha tinikangan pa la. (Isa. 46:9-11; Roma 11:33) Hiya la an “Dios nga makinaadmananon.”—Roma 16:27.
4 Dugang pa, hinigugma kita ni Jehova ngan karuyag niya pirme an pinakamaopay para ha aton. (Juan 3:16; 1 Juan 4:8) Sugad nga mahigugmaon nga Dios, mahinatagon hiya ha aton. Hi Jakobo nagsurat: “An ngatanan nga maopay nga hatag ngan an ngatanan nga hingpit nga hatag tikang ha igbaw, tikang ha Amay han mga kalamragan.” (Jak. 1:17) Adton nagpapagiya ha Dios nagpapahimulos hinduro han iya pagkamahinatagon.
5 Hi Jehova liwat an makagarahum ha ngatanan. May kalabotan hini, an salmista nagsiring: “An naukoy dida ha pinapahuwayan han Gihitaasi maukoy ha ilarom han lambong han Makagarahum. Masiring ako tungod kan Jehova: Hiya amo an akon arayopan ngan akon kuta; Dios nakon nga ha iya ako nagtatapod.” (Sal. 91:1, 2) Kon ginsusunod naton an giya ni Jehova, makakasiguro kita nga ito nga giya an gimaopayi tungod kay diri hiya napapakyas. Bisan kon kontrahon kita, hi Jehova mabulig ha aton. Diri kita niya pababay-an. (Sal. 71:4, 5; basaha an Proberbios 3:19-26.) Oo, maaram hi Jehova han pinakamaopay para ha aton, karuyag niya an gimaopayi para ha aton, ngan may gahum hiya ha paghatag han pinakamaopay para ha aton. Kalurongan gud kon igbabalewaray naton an iya giya! Kondi, san-o kita magkikinahanglan hito nga giya?
San-o Kita Magkikinahanglan hin Giya?
6, 7. San-o naton ginkikinahanglan an giya ni Jehova?
6 Oo, kinahanglan naton an giya han Dios ha aton bug-os nga kinabuhi, tikang ha pagkabata tubtob ha kalagas. An salmista nagsiring: “Ini nga Dios amo an aton Dios hin waray kataposan. Hiya amo an aton paramando [“maggigiya ha aton,” NW], bisan ngadto ha kamatayon.” (Sal. 48:14) Pariho han salmista, an may-kaaram nga mga Kristiano naglalaom pirme ha Dios para han giya.
7 Syempre, may mga panahon nga kinahanglan dayon naton an bulig. Usahay nakakaeksperyensya kita hin “kaguol,” pagtimaraot, grabe nga sakit, o tigda nga kawad-i hin trabaho. (Sal. 69:16, 17) Hito nga panahon, nakakaliaw an pagdaop kan Jehova—nasarig nga paririg-unon kita niya basi makailob ngan gigiyahan kita ha paghimo hin mag-opay nga desisyon. (Basaha an Salmo 102:17.) Kondi, kinahanglan liwat naton an iya bulig ha iba nga kahimtang. Pananglitan, kon nagsasangyaw kita mahitungod han maopay nga sumat han Ginhadian, kinahanglan naton an iya giya basi kita magin epektibo. Ngan kon magdidesisyon kita—mahitungod man ito ha pagpahalibway, pamado ngan pag-ayos, pagpili hin mga kaupod, trabaho, edukasyon, o bisan ano—mahihimo la naton ito hin may-kaaram kon susundon naton an mga giya ni Jehova. Ha pagkamatuod, kinahanglan naton an giya ha ngatanan nga aton ginbubuhat.
An mga Peligro han Diri Pagsunod ha Giya han Dios
8. Ano an iginpapasabot han pagkaon ni Eva han igindidiri nga bunga?
8 Hinumdumi liwat nga kinahanglan magin disidido kita nga sundon an giya ni Jehova. Diri hiya magpipirit ha aton nga sumunod kon nadiri kita. Hi Eva an siyahan nga tawo nga nagdesisyon nga diri sumunod ha giya ni Jehova, ngan nakikita ha resulta han iya ginbuhat nga peligroso gud an sugad nga maraot nga desisyon. Hunahunaa liwat an iginpapasabot han iya ginbuhat. Ginkaon niya an igindidiri nga bunga tungod kay karuyag niya ‘mahinugad ha Dios nga maaram han maopay ngan maraot.’ (Gen. 3:5) Ha pagbuhat niya hito, iya ipinakita nga karuyag niya magin pariho ha Dios pinaagi han iya paglugaring ha pagdesisyon may kalabotan ha maopay ngan maraot, imbes nga sundon an mga giya ni Jehova. Hito nga paagi, iya iginsalikway an pagkasoberano ni Jehova. Ginbuhat ni Eva an iya karuyag. Sugad liwat hito an ginbuhat han iya bana nga hi Adan.—Roma 5:12.
9. Kon aton isalikway an giya ni Jehova, ha pagkamatuod ano an aton ginbubuhat, ngan kay ano nga diri gud ito maaramon?
9 Yana, kon diri naton sundon an giya ni Jehova, iginsasalikway liwat naton an iya pagkasoberano. Pananglitan, hunahunaa an tawo nga nabatasan na an pagkinita hin maglaw-ay. Kon membro hiya han Kristiano nga kongregasyon, maaram hiya han mga giya ni Jehova may kalabotan hini. An maghugaw nga butang diri ngani sadang unabihon man la, labi na gud an pagkita hito nga may malaw-ay nga hingyap. (Efe. 5:3) Pinaagi han pagsalikway han mga giya ni Jehova, ginninigaran niya an Iya pagkasoberano, ngan diri nagpapasakop ha Iya pagkaulo. (1 Kor. 11:3) Diri gud ito maaramon tungod kay sugad han ginsiring ni Jeremias, “diri aada ha tawo nga naglalakat an pagmando han iya mga pitad.”—Jer. 10:23.
10. Kay ano nga sadang gamiton naton an aton kagawasan ha pagbuot ha husto nga paagi?
10 An iba bangin kumontra ha ginsiring ni Jeremias. Naghuhunahuna hira nga tungod kay gintagan kita ni Jehova hin kagawasan ha pagbuot, diri kita Niya sadang basulon ha paggamit hito. Kondi, hinumdumi nga an kagawasan ha pagbuot usa nga responsabilidad ngan regalo. May baratunon kita ha Dios tungod ha aton ginyayakan ngan ginbubuhat. (Roma 14:10) Hi Jesus nagsiring: “Tikang ha kahuraan han kasingkasing iginyayakan han baba.” Nagsiring liwat hiya: “Tikang ha kasingkasing nagawas an magraot nga mga hunahuna, mga pagpatay ha igkasi-tawo, mga pakighilawas, mga panlibog, mga pangawat, mga buwa nga pagtestigo, mga pagpakaalo.” (Mat. 12:34; 15:19) Salit, makikita ha aton mga pulong ngan buhat kon ano an aada ha aton kasingkasing. Ipinapakita hito kon ano gud an aton pagkatawo. Salit an may-kaaram nga Kristiano nasunod ha giya ni Jehova ha ngatanan nga butang. Hito nga paagi, tatagdon hiya ni Jehova sugad nga ‘matul-id an kasingkasing’ ngan magbubuhat hin ‘maopay’ ha iya.—Sal. 125:4.
11. Ano an hinbaroan naton ha kasaysayan han Israel?
11 Hinumdumi an kasaysayan han Israel. Han naghimo hira hin mag-opay nga pagpili ngan nagsugot ha mga sugo ni Jehova, iya ginpanalipdan hira. (Jos. 24:15, 21, 31) Kondi, agsob nga sayop an ira paggamit han ira kagawasan ha pagbuot. Ha panahon ni Jeremias, hi Jehova nagsiring mahitungod ha ira: “Hira waray pamati, o waray humilig han ira talinga, kondi naglakat ha ira kalugaringon nga pagsarusarabot ngan ha pagkamatig-a mawaring han ira maraot nga kasingkasing, ngan nagtipaisol, ngan diri tipaunhan.” (Jer. 7:24-26) Makasurubo gud! Tungod han katig-a han aton ulo o pagtagbaw han mga hingyap, bangin isalikway naton an giya ni Jehova ngan magbuhat han aton kalugaringon nga karuyag ngan tungod hito kita ‘magtipaisol ngan diri tipaunhan.’ Hinaot diri gud naton buhaton ito!
Ano an Ginkikinahanglan ha Pagsunod ha Sagdon han Dios?
12, 13. (a) Ano nga kalidad an nag-aaghat ha aton nga sundon an giya ni Jehova? (b) Kay ano nga importante an pagtoo?
12 Tungod kay nahigugma kita kan Jehova, karuyag naton sundon an iya giya. (1 Juan 5:3) Kondi, iginpatin-aw ni Pablo an usa pa nga aton ginkikinahanglan: “Naglalakat kita ha pagtoo, diri ha pagtan-aw.” (2 Kor. 5:6, 7) Kay ano nga importante an pagtoo? Bueno, ginigiyahan kita ni Jehova ha “mga dalan han katadongan,” kondi diri ito tipakadto ha pagkaada bahandi o ranggo hini nga kalibotan. (Sal. 23:3) Tungod hito, kinahanglan may-ada kita marig-on nga pagtoo ha waray-kapariho nga mga bendisyon ha pag-alagad ha iya. (Basaha an 2 Korinto 4:17, 18.) Ngan an pagtoo nabulig ha aton nga magin kontento ha igintatagana nga materyal nga panginahanglan.—1 Tim. 6:8.
13 Ipinakita ni Jesus nga an tinuod nga pagsingba nag-uupod hin pagsakripisyo, nga nagkikinahanglan liwat hin pagtoo. (Luk. 9:23, 24) An iba nga matinumanon nga magsiringba nagsasakripisyo hinduro, nag-iilob han kapobrehan, panalumpigos, pagpasulabi, ngan duro nga pagtimaraot pa ngani. (2 Kor. 11:23-27; Pah. 3:8-10) An marig-on la nga pagtoo an nakabulig ha ira nga makailob nga malipayon. (Jak. 1:2, 3) Tungod han marig-on nga pagtoo, bug-os nga nasarig kita nga pinakamaopay pirme an pagsunod ha giya ni Jehova. Pirme ito para ha aton nagpapadayon nga kaopayan. Sigurado gud kita nga an balos para hadton maunungon nga nagpapailob mas labaw kay ha bisan ano nga temporaryo nga pag-antos.—Heb. 11:6.
14. Kay ano nga kinahanglan magpaubos hi Agar?
14 Tagda liwat kon paonan-o an pagpaubos kinahanglan ha pagsunod ha giya ni Jehova. Ipinapakita ini ha ehemplo ni Agar, nga surugoon ni Sara. Han nasantop ni Sara nga diri hiya magkakaanak, iginhatag niya hi Agar kan Abraham, ngan nagburod hiya. Katapos hito, naghambog hi Agar ha iya baw-as nga agaron. Sugad nga resulta, ginpakaalohan hiya ni Sara, ngan binaya hi Agar. Gintapo hiya hin anghel ni Jehova nga nagsiring: “Balik ha imo agaron nga babaye, ngan pagsugot ha iya.” (Gen. 16:2, 6, 8, 9) Puydi unta hi Agar mamiling hin iba nga sagdon tungod kay kon susundon niya ito, kinahanglan isalikway niya an iya pagkamapahitas-on. Kondi, mapainubsanon nga ginbuhat niya an ginsiring han anghel, ngan an iya anak nga hi Ismael natawo nga may seguridad ha tolda han iya amay.
15. Ihulagway an pipira nga sitwasyon diin an pagsunod ha giya ni Jehova bangin magkinahanglan han aton pagpaubos yana.
15 An pagsunod ha giya ni Jehova bangin mangahulogan nga kinahanglan magpaubos liwat kita. Bangin kinahanglan karawaton han iba nga an pagpahalibway nga ira naruruyagan nakakapasubo kan Jehova. An usa nga Kristiano bangin nakapasubo ha iba ngan kinahanglan mangaro hiya hin pasaylo. O bangin nagsayop hiya ngan kinahanglan karawaton niya ito. Kumusta man kon an usa nakasala hin seryoso? Kinahanglan magpaubos hiya ngan isumat ito ha mga tigurang. Bangin paiwason pa ngani hiya. Basi makabalik ha kongregasyon, kinahanglan mapainubsanon nga magbasol hiya ngan magbag-o. Ha sugad hini nga mga sitwasyon, nakakaliaw an Proberbios 29:23: “An kanan tawo palabilabi magpapahiubos ha iya; kondi hiya nga may mapainubsanon nga espiritu makakakuha hin dungog.”
Paonan-o Kita Ginigiyahan ni Jehova?
16, 17. Paonan-o naton pahihimulosan hin bug-os an Biblia sugad nga surok han giya han Dios?
16 An pinakaimportante nga surok han giya han Dios amo an Biblia, an Iya Pulong. (Basaha an 2 Timoteo 3:16, 17.) Basi magpahimulos hin bug-os hito, maaramon an diri paghulat nga mahitabo an kakurian antes naton bilngon an mga pulong ha Kasuratan nga makakabulig ha aton. Lugod, babatasanon naton an adlaw-adlaw nga pagbasa han Biblia. (Sal. 1:1-3) Hito nga paagi, mahibabaro kita han mga pulong han Dios. Masusubad naton an panhunahuna han Dios, ngan magigin andam kita bisan ha diri ginlalaoman nga mga problema.
17 Dugang pa, importante an pamalandong ha nababasa naton ha Kasuratan ngan pag-ampo may kalabotan hito. Kon ginpapamalandong naton an mga teksto ha Biblia, ginhuhunahuna naton kon paonan-o magagamit ito ha partikular nga sitwasyon. (Sal. 77:12) Kon may-ada kita mabug-at nga mga problema, nangangaro kita kan Jehova hin bulig para han giya nga ginkikinahanglan naton. An espiritu ni Jehova mabulig ha aton nga mahinumdoman an mga prinsipyo ha Kasuratan nga nabasa naton ha Biblia o ha aton mga publikasyon.—Basaha an Salmo 25:4, 5.
18. Ha ano nga mga paagi ginagamit ni Jehova an aton Kristiano nga kabugtoan ha paggiya ha aton?
18 An aton Kristiano nga kabugtoan birilhon liwat nga surok han giya ni Jehova. Importante nga bahin hito “an matinumanon ngan maaramon nga uripon” upod an representante hito nga Nagmamando nga Lawas nga padayon nga nagtatagana hin espirituwal nga pagkaon pinaagi han mga publikasyon ngan programa para ha mga katirok ngan asembleya. (Mat. 24:45-47, NW; itanding an Buhat 15:6, 22-31.) Dugang pa, may-ada kita kabugtoan nga hamtong ha espirituwal, labi na an mga tigurang, nga kwalipikado ha paghatag hin personal nga bulig ngan Kasuratanhon nga sagdon. (Isa. 32:1) An mga batan-on ha Kristiano nga mga pamilya may-ada dugang pa nga maaaroan hin birilhon nga giya. Ordinado han Dios an ira Saksi nga mga kag-anak ha paggiya ha ira, ngan sadang karawaton nira ito.—Efe. 6:1-3.
19. Ano nga mga bendisyon an nakakarawat naton tungod han padayon nga pagsunod ha giya ni Jehova?
19 Oo, hi Jehova naggigiya ha aton ha damu nga paagi, ngan kinahanglan bug-os nga pahimulosan naton ito. Han matinumanon pa an Israel, hi Hadi David nagsiring: “An amon mga amay nanarig ha imo: Nanarig hira, ngan imo hira ginluwas. Nagsinggit hira ha imo, ngan pinanluwas hira: Nanarig hira ha imo, ngan waray pagpakaalohi.” (Sal. 22:3-5) Kon may pagsarig nga nasunod kita ha giya ni Jehova, kita liwat diri ‘pakakaalohan.’ Diri mapapakyas an aton paglaom. Kon aton ‘itubyan kan Jehova an aton agian,’ imbes nga sumarig ha aton kalugaringon nga kinaadman, magriresulta ito hin hura nga mga bendisyon bisan yana. (Sal. 37:5) Ngan kon magpadayon kita nga maunungon kan Jehova, mawawaray kataposan ito nga mga bendisyon. Hi Hadi David nagsurat: “Hi Jehova nahigugma hiton katadongan, ngan diri nagpapasibaya ha iya mga baraan; hira ginbabantayan hin waray kataposan . . . An mga magtadong makakapanunod han tuna, ngan maukoy hira dida hin waray kataposan.”—Sal. 37:28, 29.
Maisasaysay Mo Ba?
• Kay ano nga nasarig kita ha giya ni Jehova?
• Ano an iginpapasabot kon aton isalikway an giya ni Jehova?
• Ano an pipira nga kahimtang diin kinahanglan magpaubos an Kristiano?
• Paonan-o kita ginigiyahan ni Jehova yana?
[Mga Pakiana]
[Mga Retrato ha pahina 8]
Nagpapagiya ka ba kan Jehova ha ngatanan nga imo ginbubuhat?
[Retrato ha pahina 9]
Iginsalikway ni Eva an pagkasoberano ni Jehova
[Retrato ha pahina 10]
Ano nga kalidad an ginkinahanglan ni Agar basi masunod niya an giya han anghel?