“An Iyo Amay . . . Malolooyon”
“An Iyo Amay . . . Malolooyon”
‘Magmalolooyon kamo, sugad han iyo Amay nga malolooyon.’—LUKAS 6:36.
1, 2. Paonan-o an ginsiring ni Jesus ha mga eskriba ngan mga Pariseo ngan ha iya mga sumurunod nagpapakita nga makaruruyag nga kalidad an kalooy?
AN Balaud nga iginhatag pinaagi kan Moises may-ada mga 600 nga sugo ngan turumanon. Bisan kon kinahanglan sundon an mga sugo han Mosaiko nga Balaud, importante gud liwat nga ipakita an kalooy. Tagda an ginsiring ni Jesus ha mga Pariseo nga waray kalooy ha iba. Ha duha nga higayon, iya ginsaway hira, ginpapabug-atan nga an Dios nagsiring: “Karuyag ko an kalooy, ngan diri an halad.” (Mateo 9:10-13; 12:1-7; Hosea 6:6) Ha ikatarapos han ministeryo ni Jesus, hiya nagsiring: “Kairo niyo, mga eskriba ngan mga Pariseo, mga salingkapaw! Kay naghahatag kamo han ikanapulo han herbabuena ngan han ruda, ngan han kuminos, ngan iyo binayaan an mga butang nga darodaku han Kasugoanan, an katadongan, an kalooy, ngan an pagkamatinoohon.”—Mateo 23:23.
2 Matin-aw, importante gud kan Jesus an kalooy. Iya ginsugo an iya mga sumurunod: ‘Magmalolooyon kamo, sugad han iyo Amay nga malolooyon.’ (Lukas 6:36) Kondi, basi ‘makagsubad ha Dios’ may kalabotan hini, kinahanglan hibaroan naton kon ano an totoo nga kalooy. (Efeso 5:1) Dugang pa, an pagsabot ha mga kapulsanan han kalooy magpapagios ha aton nga magin mas maloloy-on.
Kalooy ha mga Nanginginahanglan hin Bulig
3. Kay ano nga sadang kita magpatutdo kan Jehova basi hibaroan kon ano an totoo nga kalooy?
3 An salmista nagkanta: “Hi Jehova puno hin grasya, ngan malolooyon, mahinay ha kasina, ngan daku ha mahigugmaon nga kalooy. Hi Jehova maopay ha ngatanan; ngan an iya mahumok nga mga kalooy aada ha iya ngatanan nga mga buhat.” (Salmo 145:8, 9) Hi Jehova “an Amay han ngatanan nga pagkalooy ngan Dios han ngatanan nga paglipay.” (2 Korinto 1:3) An kalooy ipinapakita pinaagi han mapinairon nga pagtratar ha iba. Usa ini han nangunguna nga bahin han personalidad han Dios. An iya susbaranan ngan mga instruksyon makakagtutdo ha aton kon ano an totoo nga kalooy.
4. Ano an igintututdo ha aton han Isaias 49:15 mahitungod han kalooy?
4 Sugad han iginrekord ha Isaias 49:15, hi Jehova nasiring: “Makakalimot ba an usa nga babaye ha iya nasuso nga bata, nga hiya mawaray pagbati han anak han iya tagoangkan?” An Hebreo nga mga pulong nga haros kapariho ha pulong nga iginhubad dinhi nga “pagbati” ginagamit may kalabotan ha kalooy ha Salmo 145:8, 9, nga ginkotar na. An pagbati nga nagpapagios kan Jehova nga magin maloloy-on iginpapariho ha gugma nga kasagaran nga inaabat han nagpapasuso nga iroy ha iya anak. Bangin nagugutom ito o may-ada iba nga ginkikinahanglan. Tungod kay nakakaaghat ini ha iroy nga pumaid, iya iginhahatag an panginahanglan han bata. Hi Jehova may-ada han sugad mahigugmaon nga pagbati para hadton iya nalolooyan.
5. Paonan-o ipinakita ni Jehova ha Israel nga hiya “bahandianon ha kalooy”?
5 Maopay gud an pag-abat hin pagpaid kondi mas maopay an pagbuhat uyon hito para ha kaopayan han mga nanginginahanglan. Tagda an reaksyon ni Jehova han an iya mga magsiringba nauripon ha Ehipto mga 3,500 ka tuig na an naglabay. Hiya nagsiring kan Moises: “Ha pagkamatuod akon hinkit-an an mga kakurian han akon katawohan nga aadto ha Ehipto, ngan hinbatian ko an ira tuok tungod han ira mga kapatas, kay ako maaram han ira mga kabidoan; ngan ako nakanhi pagluwas ha ira tikang ha mga kamot han mga Ehiptohanon, ngan ha pagdara ha ira tikang hadto nga tuna, ngadto ha tuna nga daku ngan haluag, ngadto ha tuna diin pag-aagay an gatas ngan an dugos.” (Eksodo 3:7, 8) Mga 500 ka tuig katapos pagawson an mga Israelita ha Ehipto, hi Jehova nagpahinumdom ha ira: “Akon gindara an Israel tikang ha Ehipto, ngan akon kamo linuwas tikang ha kamot han mga Ehiptohanon, ngan tikang ha kamot han ngatanan nga ginhadian nga nagtalumpigos ha iyo.” (1 Samuel 10:18) Tungod ha pagtalapas ha magtadong nga suruklan han Dios, an mga Israelita agsob makaeksperyensya hin kasakitan. Kondi, pinaid hi Jehova ha ira ngan pauroutro nga ginluwas hira. (Hukom 2:11-16; 2 Kronikas 36:15) Ipinapakita hini an mahigugmaon nga ginbubuhat han Dios para ha mga nanginginahanglan, namimeligro, o nagkukuri. Hi Jehova “bahandianon ha kalooy.”—Efeso 2:4.
6. Paonan-o ginsubad ni Jesu-Kristo an iya Amay ha pagpakita hin kalooy?
6 Han nakanhi ha tuna hi Jesus, hingpit nga ginsubad niya an iya Amay ha pagpakita hin kalooy. Ano an ginbuhat ni Jesus han an duha nga buta nakimalooy ha iya, nasiring: “Ginoo, malooy ka ha amon, Anak ni David”? Nakikimalooy hira kan Jesus nga milagroso nga tambalon hira. Ginbuhat ito ni Jesus, kondi diri ha paagi nga waray la pagbati. Tungod kay “hi Jesus nalooy,” siring han Biblia, iya “kinamkam an ira mga mata; ngan ha kadagmitan hira nakakarawat han ira pagkita.” (Mateo 20:30-34) An kalooy nagpagios kan Jesus nga buhaton an damu nga milagro nga nakabulig ha mga buta, ginsasakit hin demonyo, sanlahon, ngan ha mga kag-anak nga magsakit an mga anak.—Mateo 9:27; 15:22; 17:15; Markos 5:18, 19; Lukas 17:12, 13.
7. Ano an igintututdo ha aton han mga susbaranan ni Jehova nga Dios ngan han iya Anak mahitungod han kalooy?
7 An mga susbaranan ni Jehova nga Dios ngan ni Jesu-Kristo nagpapakita nga an kalooy may-ada duha nga bahin—pag-abat hin pagpaid o simpatiya ha mga nanginginahanglan hin bulig ngan pagbuhat basi buligan hira. An pagin maloloy-on nagkikinahanglan hito nga duha. Ha Kasuratan, an kalooy agsob gud nga nagpapasabot nga may-ada ka maopay nga bubuhaton para ha mga nanginginahanglan hin bulig. Kondi, paonan-o ipinapakita an kalooy ha pagdumara hin mga kaso? Nahiuupod ba liwat hini an diri la paggios, sugad han diri pagpadapat hin sirot?
Kalooy ha mga Nakasala
8, 9. Ano an nahiupod ha pagpakita hin kalooy kan David katapos han pakasala nira ni Batseba?
8 Tagda an nahitabo katapos komprontahon ni propeta Natan hi Hadi David han kadaan nga Israel mahitungod han iya adulteroso nga relasyon kan Batseba. An mabinasulon nga hi David nag-ampo: “Hatagi ako hin kalooy, O Dios, sugad han imo mahigugmaon nga kalooy; sugad ha kadam-an han imo maghumok nga mga kalooy panasa an akon mga pagsupak. Hugasi ako hin maopay tikang ha akon karat-an, ngan hamisi ako han akon sala. Kay nakilala ako han akon mga pagsupak; ngan an akon sala ha atubangan nakon gihapon. Kontra ha imo, ha imo gud la, ako nakasala, ngan ginbuhat ko adton maraot ha atubangan han imo mga mata.”—Salmo 51:1-4.
9 Nagbasol gud hi David. Ginpasaylo ni Jehova an iya sala ngan waray ipadapat an sirot nga angay unta ha iya ngan kan Batseba. Sumala ha Mosaiko nga Balaud, hira David ngan Batseba sadang unta patayon. (Deuteronomio 22:22) Bisan kon waray hira makalikay ha ngatanan nga resulta han ira sala, waray hira pataya. (2 Samuel 12:13) An pagin maloloy-on han Dios nag-uupod han pagpasaylo han sala. Kondi, iginpapadapat niya an angayan nga sirot.
10. Bisan kon maloloy-on hi Jehova ha pagpadapat hin paghukom, kay ano nga kinahanglan diri naton hunahunaon nga malolooy la gihapon hiya bisan kon tinuyo an aton pakasala?
10 “Tungod ha usa ka tawo [Adan], sinulod an sala ha kalibotan,” ngan “an suhol han sala amo an kamatayon,” salit an ngatanan nga tawo takos mamatay. (Roma 5:12; 6:23) Mapasalamaton gud kita nga hi Jehova maloloy-on kon naghuhukom ha aton! Kondi, kinahanglan mag-ikmat kita nga diri hunahunaon nga malolooy la gihapon an Dios bisan kon tinuyo an aton pakasala. ‘An ngatanan nga dalan ni Jehova amo an katadongan,’ siring han Deuteronomio 32:4. Ha pagpakita hin kalooy, diri ginbabalewaray han Dios an iya hingpit nga mga suruklan han hustisya.
11. Paonan-o ipinakita ni Jehova an husto nga pagtagad ha hustisya ha iya pagtratar kan David may kalabotan ha ira sala ni Batseba?
11 Ha kaso nira David ngan Batseba, antes mapagaan an sirot nga kamatayon, kinahanglan pasayloon an ira sala. An Israelita nga mga hukom waray hatagi hin awtoridad ha pagpasaylo. Kon gintugotan hira ha paghukom hini nga kaso, obligado unta hira nga ipadapat an sirot nga kamatayon. Ini an ginkikinahanglan han Balaud. Kondi, tungod han kauyonan ni Jehova kan David, karuyag niya siguruhon kon may-ada ba hinungdan nga pasayloon an sala ni David. (2 Samuel 7:12-16) Salit, hi Jehova nga Dios, “an Maghuhukom han bug-os nga tuna,” nga “nagsasari han kasingkasing,” nagdesisyon nga hiya mismo an maghukom. (Genesis 18:25; 1 Kronikas 29:17) An Dios husto nga makakabasa han kasingkasing ni David, makakaturotimbang han pagkatotoo han iya pagbasol, ngan makakapasaylo ha iya.
12. Paonan-o an magpakasasala makakapahimulos ha kalooy han Dios?
12 An kalooy nga ipinapakita ni Jehova ha aton pinaagi han paghimo hin paagi nga makagawas kita ha sirot nga kamatayon tungod han aton napanunod nga sala nauyon ha iya hustisya. Basi mapasaylo an mga sala nga diri natatalapas an hustisya, hi Jehova nagtagana han halad lukat han iya Anak, hi Jesu-Kristo—an gimaopayi nga kapahayagan han kalooy. (Mateo 20:28; Roma 6:22, 23) Kon karuyag naton magpahimulos han kalooy han Dios, nga makakaluwas ha aton ha sirot nga kamatayon tungod han napanunod nga sala, kinahanglan kita ‘tumoo ha Anak.’—Juan 3:16, 36.
Dios han Kalooy Ngan Hustisya
13, 14. Ginpapagaan ba han kalooy han Dios an epekto han iya hustisya? Isaysay.
13 Bisan kon an kalooy ni Jehova diri nagtatalapas han iya suruklan han hustisya, nababag-o ba hito ha anoman nga paagi an iya hustisya? An kalooy ba nakakaiban han bug-os nga epekto han hustisya han Dios pinaagi han pagpagaan hito? Diri.
14 Pinaagi kan propeta Hosea, hi Jehova nagsiring ha mga Israelita: “Akon ka aasawahon ha kadayonan; oo, akon ka aasawahon ha pagkamatadong, ngan ha kasubayan, ngan ha mahigugmaon nga pagpaid, ngan ha mga kalooy.” (Hosea 2:19) Matin-aw nga ipinapakita hini nga an kalooy ni Jehova pirme nauyon ha iya iba nga mga kalidad, upod na an hustisya. Hi Jehova “usa ka Dios nga maloloy-on ngan mapinairon, . . . mapinasayloon hin karat-an ngan hin pagtalapas ngan hin sala; ngan ha waray anoman nga paagi pagpapakamatadungon an maraot.” (Eksodo 34:6, 7) Hi Jehova an Dios han kalooy ngan hustisya. Mahitungod ha iya, an Biblia nasiring: “An Bato nga bantilis, an iya buhat hingpit; kay an ngatanan niya nga mga dalan amo an katadongan [“hustisya,” NW].” (Deuteronomio 32:4) Hingpit an hustisya han Dios, sugad la han iya kalooy. Waray mas labaw hini nga duha, diri liwat ginkikinahanglan han hustisya an bulig han kalooy basi mapagaan an epekto hito. Lugod, ito nga duha nga kalidad hingpit nga nagkakauyon.
15, 16. (a) Ano an nagpapakita nga an hustisya han Dios diri mapintas? (b) Kon ipadapat na ni Jehova an paghukom ngada hinin maraot nga sistema, ha ano makakasiguro an iya mga magsiringba?
15 Diri mapintas an hustisya ni Jehova. An hustisya haros pirme nga may kalabotan ha paghukom, ngan an paghukom kasagaran nga nagkikinahanglan hin pagpadapat han sirot nga takos ha magpakasasala. Kondi, an hustisya han Dios mahimo liwat magresulta hin kaluwasan ha mga takos hito. Pananglitan, han ginbungkag an magraot ha syudad han Sodoma ngan Gomorra, naluwas an patriarka nga hi Lot ngan an iya duha nga anak nga babaye.—Genesis 19:12-26.
16 Makakasarig kita nga kon ipadapat na ni Jehova an iya paghukom ha maraot nga sistema yana, maluluwas an daku nga panon han totoo nga mga magsiringba, nga ‘pinanmunakan an ira higlawig nga panapton, ngan ginpabusag ito ha dugo han Kordero.’ Salit, hira ‘magkakagowa tikang ha daku nga kagol-anan.’—Pahayag 7:9-14.
Kay Ano nga Magin Maloloy-on?
17. Ano an usa nga importante nga hinungdan ha pagin maloloy-on?
17 An mga susbaranan ni Jehova ngan ni Jesu-Kristo nagtututdo gud ha aton kon ano an totoo nga kalooy. Ha paghatag ha aton hin importante nga hinungdan ha pagin maloloy-on, an Proberbios 19:17 nasiring: “Hiya nga may pagbati han kablas naalayon kan Jehova, ngan han iya maopay nga buhat iya hiya pagbabayaran liwat.” Nalilipay hi Jehova kon aton ginsusubad hiya ngan an iya Anak pinaagi han pagin maloloy-on ha aton pagtratar ha usa kag usa. (1 Korinto 11:1) Ngan nadadasig an iba nga magin maloloy-on, tungod kay an kalooy ginbabalosan hin kalooy.—Lukas 6:38.
18. Kay ano nga sadang mangalimbasog kita nga magin maloloy-on?
18 An kalooy amo an kombinasyon han damu nga mag-opay nga kalidad. Nag-uupod ito han pagkamapinairon, gugma, pagkabuotan, ngan pagkamaopay. An mahigugmaon nga pag-abat hin pagpaid o simpatiya amo an nagpapagios han pagpakita hin kalooy. Bisan kon an kalooy han Dios diri nagkukompromiso han hustisya, hi Jehova mahinay ha kasina ngan mapailubon nga naghahatag ha magpakasasala hin igo nga panahon nga magbasol. (2 Pedro 3:9, 10) Salit an kalooy nag-uupod hin pagpasensya ngan hilawig nga pagpailob. Sugad nga kombinasyon han damu nga makaruruyag nga kalidad—upod na an magkalain-lain nga bahin han mga bunga han espiritu han Dios—an kalooy naghahatag hin higayon ha pagpatubo hini nga mga kalidad. (Galasia 5:22, 23) Importante gud nga mangalimbasog kita nga magin maloloy-on!
“Bulahan an mga Maloloy-on”
19, 20. Ha ano nga paagi naghihimaya an kalooy kontra han paghukom?
19 An disipulo nga hi Jakobo nagsusumat ha aton kon kay ano nga sadang himoon naton an kalooy nga importante nga kalidad ha aton kinabuhi. Hiya nagsurat: “An pagkalooy naghihimaya kontra ha paghukom.” (Jakobo 2:13b) Gin-uunabi ni Jakobo an kalooy nga ipinapakita han magsiringba ni Jehova ha iba. Naghihimaya ito kontra ha paghukom tungod kay pag-abot han panahon nga an usa makikighusay kan Jehova, tatagdon Niya an iya pagin maloloy-on ngan pasasayloon hiya pinaagi han halad lukat han Iya Anak. (Roma 14:12) Sigurado nga usa han mga hinungdan kon kay ano nga ginkalooyan hi David ha sala nira ni Batseba amo an iya mismo pagin maloloy-on. (1 Samuel 24:4-7) Ha luyo nga bahin, “an paghukom waray hin kalooy ha iya nga waray pagbuhat hin pagkalooy.” (Jakobo 2:13a) Diri urusahon nga an “waray kalooy” iginlista nga kaupod hadton gintatagad han Dios sugad nga “takos ha kamatayon”!—Roma 1:31, 32.
20 Ha Sermon ha Bukid, hi Jesus nagsiring: “Bulahan an mga maloloy-on kay hira makakakarawat hin kalooy.” (Mateo 5:7) Marig-on gud nga iginpapasabot hini nga adton naghihingyap han kalooy han Dios sadang magin maloloy-on! Paghihisgotan ha masunod nga artikulo kon paonan-o naton maipapakita an kalooy ha aton adlaw-adlaw nga pagkinabuhi.
Ano an Imo Hinbaroan?
• Ano an kalooy?
• Ha ano nga mga paagi ipinapakita an kalooy?
• Ha ano nga paagi hi Jehova an Dios han kalooy ngan hustisya?
• Kay ano nga sadang kita magin maloloy-on?
[Mga Pakiana]
[Retrato ha pahina 21]
An mahigugmaon nga pagbati ni Jehova para hadton nanginginahanglan hin bulig pariho han inaabat han iroy ha iya anak
[Retrato ha pahina 23]
Ha mga milagro ni Jesus, ano an mahibabaroan naton mahitungod han kalooy?
[Retrato ha pahina 24]
Gintalapas ba ni Jehova an iya hustisya han nalooy hiya kan David?
[Retrato ha pahina 25]
An kalooy han Dios ha magpakasasala nauyon ha iya hustisya
