Mga Bulig ha Pagpugong han Aton mga Pagbati

AN NEGATIBO ba nga pagbati usahay baga hin nagkukontrol han imo kinabuhi? Naaaringit ka ba dayon, nasisina, o nasusubo tungod ha kapakyas? Naaapektohan ka ba hinduro han mga kabaraka ha kinabuhi? Ano an makakabulig?

An mga reaksyon ha pagbati bahin na han eksperyensya han tawo. Kon husto nga nakukontrol, nakakahimo ito han kinabuhi nga mas makaruruyag. Kondi, nasiring an Biblia nga “an pag-agaw [“panalumpigos,” NW] nakakahimo nga lurong-lurong han tawo nga makinaadmananon.” (Eklesiastes 7:7) Ha kalibotan diin kalyap hinduro an kamadarahog ngan mga aksidente, hin-o ba an diri apektado an pagbati tungod han mga nahitatabo ha palibot? Kondi, an Kasuratan nasiring liwat: “Waray maoroopay, kay nga an tawo magmalipay ha iya mga buruhaton.” (Eklesiastes 3:22) Salit, basi magin mas makalilipay an kinabuhi, kinahanglan hibaroan naton an pagrayhak pinaagi han pagpatubo hin positibo nga mga pagbati. Paonan-o naton mapapatubo an mapulsanon nga mga pagbati ngan mapupugngan an nakakadaot?

An pagbuhat hin praktikal nga mga paagi agsob nga nakakaiban han pagkaseryoso han aton negatibo nga mga pagbati. Pananglitan, kon nababaraka kita ha mga butang nga diri naton kontrolado, diri ba mas maopay nga bag-ohon an aton rutina o palibot imbes nga isentro an aton hunahuna ha kabaraka? An paglakat-lakat para magrelaks, pagpamati ha nakakaliaw nga musika, aktibo nga pag-ehersisyo, o an pagbuhat hin pagkabuotan para ha usa nga nanginginahanglan mahimo maghatag ha aton hin pagliaw ngan kalipayan.—Buhat 20:35.

Kondi, an pinakamaopay nga paagi ha pagsalikway han negatibo nga mga hunahuna, amo an aton pagsarig ha Maglalarang. Kon nagpapadayon an negatibo nga mga panhunahuna, kinahanglan aton ‘ibutang ha Dios an ngatanan nga aton pangarit’ pinaagi han pag-ampo. (1 Pedro 5:6, 7) An Biblia nagpapasarig ha aton: “Hi Jehova hirani hadton may masinakitnon nga kasingkasing . . . Damu an mga kagol-anan han matadong nga tawo; kondi binabawi hiya ni Jehova, tikang hiton ngatanan.” (Salmo 34:18, 19) Paonan-o kita makakasarig nga an Dios mahimo magin aton “parabulig ngan parabawi”? (Salmo 40:17) Mahihimo naton ito pinaagi han pag-aram ha Biblia ngan pamalandong ha totoo-ha-kinabuhi nga mga ehemplo hito mahitungod han personal nga interes han Dios ha kaopayan han iya mga surugoon.