Ano an Nahitatabo ha Pagkamahinatagon?

KATAPOS han mga pag-atake han Septyembre 11, 2001, ha New York City ngan Washington, D.C., makatirigamnan an suporta han mga tawo para ha mga biktima han trahedya. An mga institusyon nga nagkukolekta hin mga donasyon para ha mga nanginginahanglan nakalasan ha $2.7 bilyon nga mga donasyon basi ibulig ha pag-ataman ha mga pamilya han mga biktima. Tungod kay nasubo ha kadaku han kadaot, an mga tawo ha bisan diin naruyag ha pagbulig.

Kondi, han hinbaroan an mga alegasyon nga an kilala nga mga institusyon naggasto hin kwarta ha sayop nga paagi, nasina dayon an iba nga mga tawo. Nagkamay-ada daku nga kapungot tungod ha report nga an usa nga daku nga institusyon nagplano ha pagtago han haros katunga han $546 ka milyon nga nakarawat hito ngan gamiton ito para ha iba nga mga katuyoan. Bisan kon ha urhi ginbag-o han institusyon an desisyon hito ngan nangaro hin pasaylo, usa nga reporter an nakaobserba: “Ginhuhunahuna han mga kritiko ini nga pagbag-o sugad nga urhi na hinduro basi maibalik an pagsarig” nga napahimulsan han institusyon antes han mga pag-atake. Kumusta ka man? Nagtitikawara na ba hinin bag-o la an imo pagsarig ha mga institusyon nga nabulig ha mga nanginginahanglan?

Mapulsanon o Pagkarag?

An paghatag ha mga institusyon kasagaran nga gintatagad sugad nga darayawon nga buhat. Kondi, diri ngatanan nga tawo nauyon hito. Sobra 200 ka tuig na ha naglabay, an Ingles nga parasurat nga hi Samuel Johnson nagsurat: “Mas nakakasiguro ka nga darayawon an imo ginbubuhat kon nagbabayad ka hin kwarta ngada hadton nagtatrabaho, sugad nga bayad han ira kabudlay, kay ha kon nahatag ka hin kwarta sugad nga regalo la.” An iba yana may-ada pariho nga mga pagruhaduha, ngan an mga report mahitungod han mga organisasyon nga nagdidispalko o sayop nga nagamit han mga donasyon diri nakakaaghat ha pagparig-on han kompyansa han publiko. Tagda an duha nga bag-o pa la nga ehemplo.

Usa nga direktor han usa nga relihiyoso nga institusyon ha San Francisco an ginpaiwas katapos mapamatud-an nga iya igin-upod ha gastos han administrasyon han institusyon an kabaraydan han iya cosmetic surgery ngan han iya sinemana nga baraydan nga $500 ha restawran ha sulod hin duha ka tuig. Ha Britanya, naawod an mga organisador han usa ka daku nga pangulekta hin donasyon ha telebisyon han nadiskobrehan nga ha 6.5 milyon libra (mga $10 milyon ha E.U.), nga iginhatag basi ibulig ha pagtukod hin bag-o nga mga urukyan han mga ilo ha Romania, 12 la nga maluya-an-katukod nga kabalayan an natukod, ngan ginatos ka yukot ka dolyar an waray hisabti kon ano an gingastohan. An negatibo nga mga report  nga pariho hini, husto nga nagin hinungdan nga an pipira nga mga humaratag nagin mas mabinantayon mahitungod ha kon pira an ira ihahatag ngan ha kan kanay.

Mahatag o Diri Mahatag

Kondi, makasurubo kon tutugotan naton nga an mga buhat han pipira nga mga indibiduwal o mga institusyon magpaundang han aton putli nga pagtagad ngan pagpaid para ha iba. An Biblia nasiring: “An relihiyon nga putli ngan waray buring ha atubangan han aton Dios ngan Amay amo ini; an paglaoy ha mga ilo ngan mga balo nga babaye ha ira mga kasakitan.” (Jakobo 1:27) Oo, an pagbuhat hin maopay para ha mga pobre ngan mga nanginginahanglan usa nga importante nga bahin han Kristianidad.

Ha gihapon, bangin magpakiana ka, ‘Magpapadayon pa ba ako paghatag ha institusyon nga nabulig ha mga nanginginahanglan, o sadang na la ba ako bumulig pinaagi ha paghatag hin personal nga mga regalo ha mga indibiduwal?’ Ano nga klase hin paghatag an linalaoman han Dios? Babatunon ini nga mga pakiana ha masunod nga artikulo.