Mga Pakiana Tikang ha mga Magbarasa

Kon an usa nag-unay, mahimo ba an Kristiano nga ministro magpahayag hin seremonya ha paglubong?

An tagsa nga Kristiano nga ministro kinahanglan personal nga magdesisyon kon hiya ba makakagpahayag para ha seremonya ha paglubong nga may-ada limpyo nga konsensya para ha usa nga baga hin nag-unay. Ha pagdesisyon, sadang tagdon niya an masunod nga mga pakiana: Paonan-o gintatagad ni Jehova an pag-unay? An kamatay ba totoo nga pagpatay ha kalugaringon? May-ada ba sakit ha panhunahuna o ha emosyon nga nakaaghat han pag-unay? Paonan-o gintatagad an pag-unay ha lokal nga komunidad?

Sugad nga mga Kristiano, interesado kita kon paonan-o gintatagad ni Jehova an pag-unay. Para kan Jehova presyoso ngan sagrado an kinabuhi han tawo. (Genesis 9:5; Salmo 36:9) An tinuyo nga pag-unay amo an pagpatay ha kalugaringon, ngan salit diri ito nakakapalipay ha paniplatan han Dios. (Eksodo 20:13; 1 Juan 3:15) Tungod hito, imposible ba an pagpahayag para ha seremonya ha paglubong ha usa nga biktima han pag-unay?

Tagda an kahimtang ni Hadi Saul han Israel. Han nasantop niya nga diri na hiya makakatalwas ha iya ultimo nga pakig-away kontra ha mga Pilisteohanon, imbes nga tugotan an iya mga kaaway nga may-pag-abuso nga tratuhon hiya, “kinuha ni Saul an iya kampilan, ngan humamlag hini.” Han hikit-an han mga Pilisteohanon an iya patay nga lawas, ira igingaod ito ha pader han siyudad han Bet-san. Han hibaroan an ginbuhat han mga Pilisteohanon, ginkuha han mga umurukoy han Jabes-galaad an patay nga lawas ngan ginsunog ito. Katapos ira ginkuha an iya mga tul-an ngan iginlubong ito. Nagpuasa pa ngani hira ha sulod hin pito ka adlaw, usa nga naandan nga seremonya ha pagminatay han mga Israelita. (1 Samuel 31:4, 8-13; Genesis 50:10) Han hinbaroan ni David, an dinihogan ni Jehova, an ginbuhat han mga umurukoy han Jabes-galaad, hiya nagsiring: “Mabulahan kamo kan Jehova, nga kamo nagpakita hini nga pagpaid ha iyo ginoo, bisan ngadto kan Saul, ngan iginlubong niyo hiya. Ngan yana hi Jehova magpakita unta ha iyo han mahigugmaon nga pagpaid ngan hin kamatuoran.” (2 Samuel 2:5, 6) Diri iginpapakita han Biblia nga ginkondenar an mga umurukoy han Jabes-galaad tungod ha pagbuhat han bangin tagdon sugad nga seremonya para ha paglubong kan Hadi Saul. Itanding ito ha kahimtang hadton waray ilubong tungod han ira sayop nga buhat. (Jeremias 25:32, 33) Mahimo tagdon han Kristiano nga ministro an asoy mahitungod kan Saul ha pagdesisyon kon makakagpahayag ba hiya para ha seremonya ha paglubong ha usa ka biktima han pag-unay.

Bangin karuyag liwat tagdon han ministro an katuyoan han pahayag para ha seremonya ha paglubong. Diri pariho ha mga tawo nga natoo ha pagkadiri-mamaratyon han kalag, an mga Saksi ni Jehova diri naghihimo hin mga seremonya ha paglubong nga may-ada sayop nga ideya nga nagpapahayag nga an patay adto na ha iba nga kalibotan. Imbes nga bumulig ha patay, an nangunguna nga katuyoan han pagkaada seremonya ha paglubong amo an pagliaw ha nagmiminatay ngan an pagpamatuod may kalabotan ha kahimtang han patay ngada hadton natambong. (Eklesiastes 9:5, 10; 2 Korinto 1:3-5) Usa pa nga importante nga hinungdan ha pagkaada pahayag para ha seremonya ha paglubong amo an pagbulig ha ngatanan nga natambong nga mamalandong ha pagkatemporaryo han kinabuhi. (Eklesiastes 7:2) Matutuman ba ini nga mga katuyoan pinaagi ha pagkaada pahayag para ha seremonya ha paglubong ha biktima han pag-unay?

Oo, bangin abaton han iba nga tinuyo nga nagpakamatay an tawo, bug-os nga maaram nga nakakasala hiya kan Jehova. Kondi posible ba pirme nga mapamatud-an an sugad nga pag-abat? Posible ba nga tigda la adto nga buhat? An iba nga nagsari ha pag-unay nagbag-o han ira panhunahuna ngan diri na nag-uunay. Katapos mamatay, an usa ka tawo diri na makakagbasol han iya nabuhat.

Usa pa nga importante nga hinungdan amo an mga sakit ha panhunahuna ngan ha emosyon nga nahiuupod  ha damu nga mga pag-unay. Matatawag gud hira nga mga biktima han pag-unay. Sumala ha pipira nga mga estadistika, 90 porsyento han mga nag-uunay an may-ada usa nga klase hin problema ha panhunahuna, emosyon, o pagkagiyan. Pasasayloon ba ni Jehova an mga tawo nga nagpatay han kalugaringon nga aada ha sugad nga kahimtang han panhunahuna? Waray kita kapas nga mahibaro kon an namatay nakahimo hin diri-mapapasaylo nga sala ha paniplatan ni Jehova. Mahimo tagdon han Kristiano nga ministro an mga kahimtang ngan rekord ha kahimsog han namatay kon iya gintatagad an pagdumara o diri pagdumara hin seremonya para ha paglubong ha biktima han pag-unay.

May-ada usa pa nga angay tagdon: Paonan-o gintatagad han mga tawo ha komunidad an pag-unay ngan an kamatayon han tawo? Labi nga importante ini ha mga tigurang, nga interesado ha dungog han lokal nga kongregasyon han mga Saksi ni Jehova. Depende ha kabug-osan nga pagtagad ha pag-unay hito nga lugar, ngan labi na ha nahidadabi nga kahimtang, bangin pilion han mga tigurang nga diri ipahibaro an sugad nga pahayag para ha seremonya ha paglubong ha publiko o diri himoon ito ha Kingdom Hall.

Kondi, kon hangyoon an usa nga Kristiano nga ministro nga magpahayag para ha seremonya ha paglubong, bangin abaton niya nga ha iya personal nga desisyon, mahihimo niya ito. Kon ito an iya desisyon, sadang hiya magin maaramon nga diri maghimo hin naninigurado nga mga pulong mahitungod ha kon posible ba an pagkabanhaw. Bisan ano nga tidaraon nga paglaom para ha patay aada ha mga kamot ni Jehova, ngan waray usa nga makakasiring kon babanhawon ba an patay o diri. Mahimo isentro han ministro an iya mga pulong ha mga kamatuoran han Biblia mahitungod han kamatayon ngan magtagana hin pagliaw ha mga namatayan.