Pag-abat hin Seguridad Yana—Pagin May Seguridad ha Kadayonan

KAY ano nga agsob nga makuri mabilngan an seguridad ngan, kon hiagian, temporaryo la? Tungod ba ito kay an aton pag-abat hin seguridad basado ha imahinasyon—ha aton ginlalaoman nga madadangat imbes nga ha kon ano an posible madangat? An sugad nga imahinasyon mahimo tawagon nga pagkinabuhi ha kalibotan ha inop.

An imahinasyon natugot ha hunahuna nga bayaan an kamatuoran mahitungod han kinabuhi upod an mga kawaray-seguridad hito ngan sumulod ha maopay, may seguridad nga kahimtang, ginbabalewaray an bisan ano nga mahimo makadaot han inop. Kondi, agsob nga an mga problema han totoo nga kalibotan tigda nga nasulod hini nga kalibotan ha inop ngan padayon nga nagkukuha han pag-abat han kaopayan, ginsasangpit an nag-iinop ngadto ha seryoso nga kamatuoran.

Tagdon naton an usa nga bahin diin namimiling an mga tawo hin kasigurohan—ha hinmumutangan han lugar. Pananglitan, an daku nga siyudad bangin maopay pagkit-on, nag-aaghat hin mga imahinasyon han kaliawan, dagku nga mga suweldo, ngan mag-opay nga mga urukyan. Oo, baga hin makakahatag ito hin maiha na nga ginhuhulat nga seguridad. Kondi totoo ba ini nga imahinasyon?

Lugar—Daku nga Siyudad o Daku nga mga Inop?

Ha nagkukuri nga mga nasud, an kaanyag han daku nga siyudad iginpapahibaro pinaagi ha pag-anunsyo nga mahimo makadani han disidido nga mga imahinasyon. An mga organisasyon nga nag-aaghat han sugad nga pag-anunsyo posible nga diri interesado ha imo seguridad kondi, lugod, ha ira mga kita. Ira gintatabonan an mga problema han totoo nga kalibotan hin mga sitwasyon han kalamposan nga nagpapakita hin seguridad. Salit, an seguridad naikakaw-ing ha ira igin-anunsyo nga produkto ngan ha daku nga siyudad.

Tagda an masunod nga ehemplo. An mga opisyal ha usa nga siyudad ha Weste nga Aprika nagbutang hin mga karatola nga matin-aw nga nagpapakita nga ha kamatuoran an pagsigarilyo diri naiiba ha pagsunog han makuri-mabilngan nga kwarta. Bahin ito han usa nga kampanya ha pagpahamangno ha mga tuminungnong hito kontra ha pagsigarilyo. An mga parahimo ngan mga parabaligya hin sigarilyo kinontra pinaagi ha pagpaskin hin maopay an pagkadisenyo nga mga karatola nga nagpapakita hin mga parasigarilyo ha nakakadani nga mga kahimtang nga may kalipayan ngan kalamposan. Dugang pa, usa nga kompanya han sigarilyo an nagpasul-ot ha pipira nga mga empleyado hito hin magarbo nga mga uniporme ngan de-uso nga mga kalo ha baseball basi manaltag hin mga sigarilyo ha mga batan-on ha kalsada, gindadasig an kada usa nga “sarihan ito.” Damu hini nga mga batan-on an tikang ha mga barangay ngan, diri maaram han tuso nga mga paagi han paanunsyo, nalimbongan hini nga pagdani. Hira nagin giyan nga mga parasigarilyo. An mga batan-on nga taga-baryo kinadto  ha daku nga siyudad ha pamiling hin seguridad basi masuportahan an ira mga pamilya o basi maglampos ha pinansyal. Lugod, ginsinunog nira an kadak-an han kwarta nga magagamit unta nira ha mas maopay nga mga katuyoan.

An mga paanunsyo nga nagpapakita hin malampuson nga kinabuhi ha daku nga siyudad diri nagtitikang pirme ha mga magbaraligya. Bangin magtikang ito ha mga tawo nga binalhin ngadto ha daku nga siyudad ngan naaawod na pagbalik ha ira gintikangan nga barangay. Tungod kay nadiri nga hunahunaon sugad nga mga pakyas, iginhahambog nira an mahitungod han karikohan kuno ngan mga kalamposan nga ira na nabilngan ha siyudad. Kondi, an mas duok nga pag-usisa ha ira gin-aangkon nga kahimtang nagpapakita nga an ira presente nga estilo han kinabuhi diri kauswagan tikang ha ira kinabuhi hadto ha barangay; nagkukuri hira ha pinansyal pariho han kadam-an han iba nga mga umurukoy ha siyudad.

Ha dagku nga mga siyudad labi nga nabibiktima han magraot nga mga tawo an naabot pa la nga mga namimiling hin seguridad. Kay ano? Ha kasagaran, waray hira panahon nga magkaada duok nga mga sangkay ngan hirayo hira ha mga membro han pamilya. Salit waray nakakasagdon ha ira nga bangin makakabulig ha ira nga malikyan an mga lit-ag han materyalistiko nga pagkinabuhi ha siyudad.

Hi Josué waray masulay ha pagsigarilyo. Dugang pa, nasantop niya nga diri gud niya malalamposan an mga panginahanglan han pagkinabuhi ha siyudad. Ha gimaopayi nga kahimtang, an maihahatag la han siyudad ha iya amo an dagku, waray matuman nga mga ambisyon. Hinsabtan niya nga waray hiya totoo nga seguridad ha siyudad; diri gud hiya para didto. An mga pagbati hin kawaray-pulos, pagminos ha kalugaringon, ngan kapakyasan nakaapekto ha iya, ngan ha urhi iya ginpahamubo an iya garbo ngan binalik ha barangay.

Nahadlok hiya nga bangin hiya tamayon. Kondi, an iya pamilya ngan totoo nga kasangkayan kinasingkasing nga kinarawat ha iya han iya pagbalik. Tungod han gugma han iya pamilya, han pamilyar nga palibot han barangay, ngan han gugma han iya kasangkayan ha Kristiano nga kongregasyon, waray pag-iha nga inabat niya an mas labaw nga seguridad kay han nakadto pa hiya ha daku nga siyudad, diin napapakyas an mga ambisyon han damu. Nahipausa hiya nga an pagin maduruto ha pagtrabaho kaupod han iya amay ha uma aktuwal nga nagdara ha iya ngan ha iya pamilya hin mas daku nga kita kay han iya magigin limpyo nga kita ha siyudad.

Kwarta—Ano an Totoo nga Problema?

Maihahatag ba ha imo han kwarta an pag-abat hin pagkamay-ada seguridad? Hi Liz nga tikang ha Canada nasiring: “Sugad nga batan-on, tinoo ako nga an kwarta nagwawara han kabaraka.” Inabat hiya hin gugma ha lalaki nga riko. Waray pag-iha ginkasal hira. Inabat ba hiya hin seguridad? Hi Liz nagpapadayon: “Han nag-asawa ako, nagkaada kami maopay nga balay ngan duha nga awto, ngan an amon pinansyal nga kahimtang naghatag ha amon hin kagawasan ha pagpahimulos han haros bisan ano nga materyal nga mga butang, pagbiyahe, ngan kaliawan. Urusahon nga nababaraka la gihapon ako mahitungod ha kwarta.” Hiya nagsasaysay kon kay ano: “Damu hinduro an mawawara ha amon. Baga hin kon mas damu an imo gintatag-iya, mas diri ka naabat hin seguridad. An kwarta waray magdara hin kagawasan tikang ha kabaraka o pangarit.”

Kon inaabat mo nga waray ka igo nga kwarta basi umabat hin seguridad, pakianhi an imo kalugaringon, ‘Ano gud an problema? Tungod gud ba ito han kawaray kwarta, o kawaray maopay nga pagbadyet han kwarta?’ Ha pagpamalandong han iya naglabay, hi Liz nasiring: “Hinbaroan ko na yana nga an hinungdan han mga problema han akon pamilya han bata pa ako amo an sayop nga pagbadyet. Napalit kami pinaagi han utang, ngan salit pirme kami nabubug-atan han utang. Nagdara ini hin kabaraka.”

Kondi, yana, hi Liz ngan an iya bana mas naabat hin seguridad, bisan kon mas gutiay an ira kwarta. Han hinbaroan nira an kamatuoran han Pulong han Dios, inundang hira pagpinamati ha nakakadani nga mga pulong mahitungod ha kwarta ngan nagtikang mamati ha kinaadman han Dios, upod na ini nga mga pulong: “Kondi bisan hin-o nga mamati ha akon magpupuyo ha marig-on, ngan magmamamingaw ha waray kahadlok han  karaotan.” (Proberbios 1:33) Karuyag nira magin mas birilhon an ira kinabuhi kay han maihahatag han daku nga deposito ha bangko. Yana, sugad nga mga misyonero ha higrayo nga nasud, hi Liz ngan an iya bana nagtututdo ha mga riko ngan mga pobre nga ha diri na maiha hi Jehova nga Dios magdadara hin totoo nga seguridad ha bug-os nga tuna. Ini nga buruhaton naghahatag hin hilarom nga katagbaw ngan karig-onan nga nagtitikang ha hitaas nga katuyoan ngan labaw nga mga prinsipyo, diri tikang ha pinansyal nga makukuha.

Hinumdumi inin importante nga kamatuoran: An pagin bahandianon ha Dios labaw pa kabirilhon kay han pagkaada materyal nga karikohan. Ginpapabug-atan han bug-os nga Baraan nga Kasuratan, diri an pagtag-iya hin materyal nga karikohan, kondi an pagkaada maopay nga relasyon kan Jehova, nga aton matitipigan pinaagi han padayon nga pagbuhat han kaburut-on han Dios ha pagtoo. Gindasig kita ni Kristo Jesus nga magin “manggaranon ha Dios” ngan magtirok hin ‘bahandi ha langit.’—Lukas 12:21, 33.

Katungdanan—Diin Ka Makadto?

Kon nasusulay ka nga umabat nga an pagkaada hiruhitaas nga katungdanan ha sosiedad amo an paagi ha pagkaada seguridad, pakianhi an imo kalugaringon: ‘Hin-o nga may katungdanan an tinuod  nga nakakadangat ha totoo nga seguridad? Ano nga katungdanan an kinahanglan ko maabot basi madangat ito?’ An malampuson nga karera mahimo makahatag ha imo hin sayop nga pag-abat hin seguridad, nga nagtutugway ngadto ha kapakyasan o, mas maraot, ha kabungkagan.

An aktuwal nga mga eksperyensya nagpapakita nga an maopay nga ngaran ha Dios naghahatag hin mas daku nga kasigurohan kay han ngaran ha tawo. Hi Jehova la an makakahatag ha katawohan han regalo nga kinabuhi nga waray kataposan. Nag-uupod ito han pagsurata han aton ngaran, diri ha usa nga libro han bantogan nga mga tawo, kondi ha libro han kinabuhi han Dios.—Eksodo 32:32; Pahayag 3:5.

Kon imo ginbabalewaray an positibo nga paghunahuna, paonan-o mo ginhuhunahuna an imo presente nga kahimtang, ngan ano an imo tangkod nga malalaoman ha tidaraon? Waray usa nga nagtatag-iya han ngatanan nga butang. Sugad han siring han usa ka maaramon nga Kristiano, “Hinbaroan ko nga an kinabuhi diri gud ini NGAN ito kondi ini O ito.” Undang anay ngan basaha an kahon nga “Iginsumat ha Benin.”

Yana batona ini nga mga pakiana: Ano an importante nga katuyoan, o tumong, ha akon kinabuhi? Ano an pinakadirekta nga ruta basi makakadto? Posible ba nga aada ako ha hirayo, waray-seguridad nga iba nga dalan ngan an akon karuyag gud ngan an posible makab-ot mahimo madangat pinaagi han mas diri-komplikado nga ruta?

Katapos magsagdon mahitungod han relatibo nga bili han materyal nga mga butang kon itanding ha bili han espirituwal nga mga butang, hi Jesus nagsiring nga tipigan an mata nga “simple,” o “nakasentro.” (Mateo 6:22) Iya iginpatin-aw nga an importante nga mga butang ha kinabuhi amo an espirituwal nga mga prinsipyo ngan mga tumong nga nakasentro ha ngaran han Dios ngan ha iya Ginhadian. (Mateo 6:9, 10) An iba nga mga butang diri sugad kaimportante o, siring pa, diri amo an sentro.

Damu nga mga kamera yana nga panahon an awtomatiko nga nakasentro ha mga butang ha hirayo ngan hirani. Nahihilig ka ba nga magin sugad hito? Haros ngatanan ba nga imo ginkikita “sentro”—karuyag sidngon, importante, hiringyapon, ngan ginlalaoman nga makab-ot? Kon totoo ini bisan ha usa ka bahin, an importante nga butang para ha mga Kristiano, an Ginhadian, masayon mawara ha kasamok han iba nga mga ideya, nga an kada tagsa nangangalimbasog nga makuha an imo atensyon. An marig-on nga pagsagda ni Jesus amo an: “Kondi pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo.”—Mateo 6:33.

May Seguridad Yana Ngan ha Kadayonan

Bangin kita ngatanan naghihingyap han mas maopay nga mga butang para ha aton kalugaringon ngan ha aton mga hinigugma. Kondi, an kamatuoran nga diri kita hingpit, nga nagkikinabuhi ha diri-hingpit nga kalibotan, ngan may-ada limitado nga pag-eksister nagpipirit ha aton nga limitahan an mga butang nga maminatud-on nga malalaoman naton nga madangat. Usa nga parasurat ha Biblia an nagsaysay yinukot na ka tuig an naglabay: “Ako binalik, ngan nakakita ha sirong han adlaw, nga an rumba diri ha malaksi, diri man an away ha makusog, diri ngani an tinapay ha makinaadmananon, diri ngani an bahandi ha mga tawo nga may sarabotan, diri ngani an pagpalabi ha mga tawo nga senate; kondi an panahon ngan an [diri ginlalaoman nga hitabo] nahinanabo ha ira ngatanan.”—Eklesiastes 9:11.

Usahay nagigin okupado gud kita tungod han adlaw-adlaw nga nakakakapoy nga rutina ha kinabuhi salit hinngangalimtan naton nga kitaon an mas importante nga butang nga kon hin-o kita ngan kon ano gud an aton ginkikinahanglan basi umabat hin totoo nga seguridad. Tagda inin  makinaadmananon nga mga pulong ha naglabay: “Kon nahigugma ka ha kwarta, diri ka gud matatagbaw; kon naghihingyap ka nga magin riko, diri mo gud makukuha an ngatanan nga imo karuyag. Waray pulos ito. An nagtatrabaho nga lalaki bangin magkaada o bangin diri magkaada hin igo nga makakaon, kondi mahimo hiya mahingaturog hin maopay. Kondi, an riko nga lalaki damu gud an gintatag-iya salit nagmiminata hiya nga nababaraka.” (Eklesiastes 5:10, 12, Today’s English Version) Oo, diin nagtitikang an imo seguridad?

Kon an imo kahimtang baga hin pariho ha imposible nga ambisyon ni Josué, mababag-o mo ba an imo mga plano? Adton totoo nga nahigugma ha imo mabulig, sugad la han pamilya ngan kasangkayan ha Kristiano nga kongregasyon ni Josué. Mahimo ka makabiling hin darodaku nga seguridad ha simple nga mga palibot kaupod hadton nahigugma ha imo kay ha siyudad kaupod hadton bangin magsari nga pahimulsan ka.

Kon may-ada ka na karikohan, sugad kan Liz ngan han iya bana, maipapahiuyon mo ba an imo estilo-han-kinabuhi basi makagamit hin dugang nga panahon ngan kusog ha pagbulig ha mga tawo, riko man o pobre, nga mahibaro mahitungod han Ginhadian, an paagi ha pakakuha hin totoo nga seguridad?

Kon nangangalimbasog ka nga madangat an mas hitaas nga katungdanan ha sosiedad o ha imo trabaho, bangin karuyag mo pamalandungon hin tangkod an imo motibo. Oo, an pipira nga imo mga kaopayan bangin makadugang hin kalipay ha kinabuhi. Kondi, natitipigan mo ba an Ginhadian—an totoo nga paagi ha pagkaada permanente nga seguridad—nga nakasentro? Hinumdumi an mga pulong ni Jesus: ‘Mas daku an kalipay ha paghatag kay ha pagkarawat.’ (Buhat 20:35) Kon nakikigbahin ka ha magkalainlain nga mga buruhaton ha Kristiano nga kongregasyon, makakaeksperyensya ka hin makapatagbaw nga seguridad.

Adton bug-os nga nasarig kan Jehova ngan ha iya Ginhadian nagkikinabuhi nga may makalilipay nga seguridad yana ngan naglalaom hin bug-os nga seguridad ha tidaraon. An salmista nagsiring: “Hi Jehova iginbutang ko gihapon ha atubangan ko: Tungod kay aadi hiya ha akon too nga kamot, diri ako hitatalindas. Busa nagmamalipay an akon kasingkasing, ngan an akon himaya narayhak; Sugad man an akon unod magpupuyo ha kamurayawan.”—Salmo 16:8, 9.

[Kahon/Retrato ha pahina 6]

Iginsumat ha Benin

Ini nga istorya iginsumat na hin yinukot ka beses nga damu an kaibahan. Bag-o pa la, usa nga lagas nga taga-baryo ha Benin, Weste nga Aprika, an nagsumat han masunod nga bersyon ha pipira nga mga batan-on.

Inuli an parapangisda pinaagi han iya baluto ngan gintapo han usa nga langyawanon nga eksperto nga nagtatrabaho dinhi hinin nagkukuri nga nasud. Ginpakianhan han eksperto an parapangisda kon kay ano nga inuli hiya hin temprano hinduro. Hiya binaton nga mahimo unta hiya magpabilin hin mauruiha kondi nakadakop na hiya hin igo para ha iya pamilya.

“Ngan yana, ano man an imo ginbubuhat ha imo bug-os nga panahon?” nagpakiana an eksperto.

Binaton an parapangisda: “Bueno, nangingisda ako hin gutiay. Nakikipagmulay ako ha akon mga anak. Napahuway kami ngatanan kon mapaso na an panahon. Ha gab-i, urosa kami nga nangingiklop. Katapos, nakikig-upod ako ha akon kasangkayan basi magpahimulos han musika, ngan iba pa.”

Sinagbang an eksperto: “Maaram ka, nagtapos ako ha unibersidad ngan gin-adman ini nga mga butang. Karuyag ko buligan ka. Kinahanglan mangisda ka hin mas maiha. Magdudugang an imo kita ngan diri mag-iiha makakapalit ka hin lantsa nga darodaku hini nga baluto. Pinaagi han darodaku nga lantsa, magdudugang pa an imo kita ngan diri mag-iiha magkakaada ka grupo hin mga lantsa nga magdadanas hin pukot.”

“Ngan katapos?” nagpakiana an parapangisda.

“Katapos, imbes nga magbaligya hin isda pinaagi han parapamakyaw, mahimo ka makigkontrata hin direkta ha pabrika o magtikang pa ngani han imo kalugaringon nga planta ha pagproseso hin isda. Makakabaya ka na ha imo baryo ngan makakabalhin ha Cotonou, o ha Paris, o ha New York ngan dumarahon an negosyo tikang didto. Bangin maghunahuna ka pa ngani ha pagbutang hin negosyo ha stock market ngan kumita hin minilyon.”

“Mationan-o kaiha ito ngatanan?” nagpakiana an parapangisda.

“Bangin mga 15 tubtob 20 ka tuig,” binaton an eksperto.

“Ngan katapos?” padayon han parapangisda.

“Ito na an panahon nga magigin makalilipay an kinabuhi,” siring han eksperto. “Katapos mahimo ka na magretiro. Mahimo ka na bumaya tikang ha sagipo nga mga buruhaton ha siyudad ngadto ha hirayo nga baryo.”

“Ngan ano an magigin resulta?” nagpakiana an parapangisda.

“Hito nga panahon may-ada ka na oras para ha pangisda hin gutiay, pakigmulay ha imo mga anak, pagpahuway kon mapaso na an panahon, pangiklop kaupod han pamilya, ngan pakig-upod ha kasangkayan basi magpahimulos han musika.”

[Mga Retrato ha pahina 7]

An pag-uswag ba ha katungdanan nagdadara hin seguridad?

[Mga Retrato ha pahina 8]

Interesado gud ha imo seguridad an imo mga igkasi-Kristiano