Katalwasan Para Hadton Nagpipili han Kalamrag
Katalwasan Para Hadton Nagpipili han Kalamrag
“Hi Jehova amo an akon kalamrag ngan akon kaluwasan; Hin-o ba an akon kahahadlukan?”—SALMO 27:1.
1. Ano nga mga tagana nga naghahatag-kinabuhi an ginhihimo ni Jehova?
HI Jehova an Surok han sirak han adlaw nga tungod hito mayada kinabuhi ha tuna. (Genesis 1:2, 14) Hiya liwat an Maglalarang han espirituwal nga kalamrag, nga nagwawara han makamaratay nga kasisidman han kalibotan ni Satanas. (Isaias 60:2; 2 Korinto 4:6; Efeso 5:8-11; 6:12) Adton nagpipili han kalamrag makakasiring han ginsiring han salmista: “Hi Jehova amo an akon kalamrag ngan akon kaluwasan; Hin-o ba an akon kahahadlukan?” (Salmo 27:1a) Kondi, sugad han nahitabo ha panahon ni Jesus, adton nagpipili han kasisidman makakalaom la han maraot nga paghukom.—Juan 1:9-11; 3:19-21, 36.
2. Ha kadaan nga mga panahon, ano an nahitabo hadton nagdumiri han kalamrag ni Jehova ngan hadton namati ha iya pulong?
2 Ha panahon ni Isaias, kadam-an han may-kauyonan nga katawohan ni Jehova nagdumiri han kalamrag. Sugad nga resulta, hinkit-an ni Isaias an kabungkagan han norte nga ginhadian han Israel sugad nga nasud. Ngan han 607 A.K.P., ginbungkag an Jerusalem ngan an templo hito ngan gindara nga bihag an mga umurukoy han Juda. Kondi, adton namati ha pulong ni Jehova ginparig-on ha pag-ato ha apostasya hiton nga panahon. May kalabotan han 607 A.K.P., nagsaad hi Jehova nga matatalwas adton namati ha iya. (Jeremias 21:8, 9) Yana nga panahon, kita nga nahigugma han kalamrag mahibabaro hin daku tikang ha nahitabo hadto.—Efeso 5:5.
An Kalipayan Hadton Aada ha Kalamrag
3. Yana nga panahon, ano an aton masasarigan, ano nga “nasud nga matadong” an hinigugma naton, ngan mayada ano “marig-on nga bungto” iton nga “nasud”?
3 “Mayada kami marig-on nga bungto; han kaluwasan [an Dios] magtatanda para han mga kuta ngan mga balwarte. Abrihan niyo an mga ganghaan, nga an nasud nga matadong nga nagtitipig han pagtoo makasulod.” (Isaias 26:1, 2) Ini an malipayon nga mga pulong han mga tawo nga sinarig kan Jehova. An matinumanon nga mga Judio ha panahon ni Isaias naglaom kan Jehova, sugad nga amo la an totoo nga Surok han seguridad, diri ha palso nga mga dios han ira mga igkasi-kahimungto. Yana nga panahon, mayada kita pariho nga pagsarig. Dugang pa, nahigugma kita han kan Jehova “nasud nga matadong”—‘an Israel han Dios.’ (Galasia 6:16; Mateo 21:43) Hi Jehova liwat nahigugma hini nga nasud tungod han matinumanon nga paggawi hito. Pinaagi han iya bendisyon, an Israel han Dios mayada “marig-on nga bungto,” an sugad-bungto nga organisasyon nga nasuporta ngan nagpapanalipod hito.
4. Ano nga panhunahuna an sadang patuboon naton?
4 Adton aada ha sulod hini nga “bungto” maaram nga “babantayan [ni Jehova] ha hingpit nga kamurayaw, kanay panumduman napabilin ha [iya]; tungod kay hiya nasarig [kan Jehova].” Hi Jehova nasuporta hadton nasarig ha iya ngan nasugot ha iya matadong nga mga prinsipyo. Salit, an mga matinumanon ha Juda sinugot ha pagsagda ni Isaias: “Sarig kamo ha kadayonan kan Jehova; kay hi Jehova, bisan hi Jehova, amo an bato nga dayon.” (Isaias 26:3, 4; Salmo 9:10; 37:3; Proberbios 3:5) Adton mayada hiton nga panhunahuna naglalaom kan “Jehova” sugad nga amo la an marig-on nga Bato. Nagpapahimulos hira han “hingpit nga kamurayaw” upod niya.—Filipos 1:2; 4:6, 7.
Ginpaubos an mga Kaaway han Dios
5, 6. (a) Paonan-o ginpaubos an kadaan nga Babilonya? (b) Ha ano nga paagi ginpaubos an “Babilonya nga Daku”?
5 Ano man kon adton nasarig kan Jehova nag-aantos hin kagol-anan? Kinahanglan diri hira mahadlok. Tinutugotan ni Jehova an sugad nga mga butang ha usa ka panahon, kondi ha kataposan iginhahatag niya an katalwasan, ngan adton naghihimo hin kagol-anan maatubang ha iya paghukom. (2 Tesalonika 1:4-7; 2 Timoteo 1:8-10) Tagda an kahimtang han usa ka “hitaas nga bungto.” Hi Isaias nasiring: “Gindara [ni Jehova] ha ubos hira nga naukoy ha hitaas, an hitaas nga bungto; iya ini ginpahibubo, iya ini ginpahibubo bisan ngada ha tuna; iya ini gindara bisan ngada ha tapotapo. An tiil magtatamak hini; bisan an mga tiil han mga kablas, ngan an mga pitad han mga runos.” (Isaias 26:5, 6) An hitaas nga bungto nga gin-unabi dinhi bangin an Babilonya. Iton nga siyudad sigurado nga nagdaot ha katawohan han Dios. Kondi ano an nahitabo ha Babilonya? Han 539 A.K.P., nasakop ito han mga Medes ngan mga Persiahanon. Ginpaubos gud ito!
6 Ha aton panahon iginsasaysay hin maopay han matagnaon nga mga pulong ni Isaias an nahitabo ha “Babilonya nga Daku” tikang han 1919. Iton hitaas nga bungto nag-antos hin makaarawod nga kapukan hiton nga tuig han ginpuwersa ito nga pagawson an katawohan ni Jehova tikang ha espirituwal nga pagkabihag. (Pahayag 14:8) An sunod nga nahitabo mas makaarawod pa gud. Iton gutiay nga grupo han mga Kristiano binirik ha ‘pagtamak’ ha mga nagbihag ha ira hadto. Han 1922 nagtikang hira ha pagpasamwak han tiarabot nga kataposan han Kakristianohan, iginsusumat an upat nga pagbudyong han anghel ha Pahayag 8:7-12 ngan an tulo nga kairo nga igintagna ha Pahayag 9:1–11:15.
“An Dalan han Hingpit Amo an Kamaligdong”
7. Ano nga giya an nakakarawat hadton nabirik ha kalamrag ni Jehova, kan kanay hira naglalaom, ngan ano an ira hinigugma?
7 Hi Jehova nagtatagana hin katalwasan para hadton nabirik ngadto ha iya kalamrag, ngan ginigiyahan niya an ira dalan, sugad han sunod nga ipinapakita ni Isaias: “An dalan han hingpit amo an kamaligdong; ikaw nga maligdong nagmamando han dalan han hingpit. Oo, ha dalan han imo mga paghukom, O Jehova, naghulat kami ha imo; ha imo ngaran, bisan ha imo handumanan nga ngaran, amo an inuungara han amon kalag.” (Isaias 26:7, 8) Hi Jehova an matadong nga Dios, ngan adton nagsisingba ha iya kinahanglan sumugot ha iya matadong nga mga suruklan. Kon ginbubuhat nira ito, hi Jehova naggigiya ha ira, nagpapasayon han ira dalan. Pinaagi han pagsugot ha iya giya, ipinapakita hini nga mga maaghop nga naglalaom hira kan Jehova ngan bug-os-kasingkasing nga hinigugma an iya ngaran—an iya “handumanan.”—Eksodo 3:15.
8. Ano nga susbaranan nga paggawi an ipinakita ni Isaias?
8 Hinigugma gud ni Isaias an ngaran ni Jehova. Matin-aw ito ha iya sunod nga mga pulong: “Ha akon kalag ako inungara ha imo ha gab-i; oo, pinaagi han akon espiritu nga nakada ha akon ako mangingita ha imo ha tinuod gud; kay kon an imo mga paghukom aada ha tuna, an mga umurukoy ha kalibotan nakakatoon han pagkamatadong.” (Isaias 26:9) Ginhingyap ni Isaias hi Jehova ‘ha iya kalag’—ha iya bug-os nga kinabuhi. Handurawa an propeta nga nag-aampo kan Jehova ha mamingaw nga mga panahon han kagab-ihon, iginpapahayag an iya gihilarumi nga mga pagbati ngan sinsero nga namimiling han giya ni Jehova. Pagkamaopay nga susbaranan! Dugang pa, hinbaroan ni Isaias an pagkamatadong tikang ha mga paghukom ni Jehova. Hini, ginpapahinumdom kita niya han panginahanglan nga magin mabinantayon pirme, alerto pirme nga masabtan an kaburut-on ni Jehova.
Ginpipili han Iba an Kasisidman
9, 10. Ano nga mga buhat han kalooy an ginbuhat ni Jehova ha iya diri-matinumanon nga nasud, kondi paonan-o hira ginios?
9 Ipinakita ni Jehova an daku mahigugmaon-nga-kalooy ha Juda, kondi makasurubo diri ngatanan nagkarawat hito. Agsob, an kadam-an nagpili han pagrebelde ngan apostasya imbes nga kalamrag han kamatuoran ni Jehova. Hi Isaias nagsiring: “Ipakita an pagdapig ha mga maraot, bisan pa ngani diri hiya makakatoon han pagkamatadong; ha tuna han pagkamaligdong hiya manunulos ha maraot, ngan diri makita han pagkaharangdon ni Jehova.”—Isaias 26:10.
10 Ha panahon ni Isaias han an kamot ni Jehova nagpanalipod han Juda kontra han iya mga kaaway, kadam-an an waray kumilala hini. Han ginbendisyonan niya hira hin kamurayaw, waray magpasalamat an nasud. Salit, binayaan hira ni Jehova basi mag-alagad ha “iba nga mga ginoo,” ha kataposan ginpabay-an an mga Judio nga bihagon ngadto ha Babilonya han 607 A.K.P. (Isaias 26:11-13) Kondi, ha kataposan an nanhibilin nga mga Judio binalik, nga nabadlong na, ngadto ha ira tuna nga natawohan.
11, 12. (a) Ano an tidaraon han mga nagbihag han Juda? (b) Han 1919 ano an tidaraon han mga nagbihag hadto ha dinihogan nga mga surugoon ni Jehova?
11 Kumusta an mga nagbihag han Juda? Hi Isaias matagnaon nga binaton: “Hira mga patay, diri hira mabubuhi; hira mga patay, diri hira mabangon; busa imo hira dinuaw ngan gingunaw, ngan ginhimo nga an ngatanan nga handumanan ha ira mahanaw.” (Isaias 26:14) Oo, katapos han iya kapukan han 539 A.K.P., an Babilonya waray na tidaraon. Maabot an panahon, mawawara na an siyudad. Hiya ‘waray mahihimo ha kamatayon,’ ngan an iya daku nga imperyo mahibubutang na la ha mga libro han kasaysayan. Usa ka pahamangno gud ito para hadton naglalaom ha mga gamhanan hini nga kalibotan!
12 Natuman an mga bahin hini nga tagna han gintugotan han Dios an iya dinihogan nga mga surugoon nga bihagon ha espirituwal han 1918 ngan gintalwas hira han 1919. Tikang hadto padayon, masirom an tidaraon han nagbihag ha ira, labi na an Kakristianohan. Kondi an mga bendisyon nga igin-andam para han katawohan ni Jehova tinuod nga hura.
“Imo Gindugangan an Nasud”
13, 14. Ano nga hura nga mga bendisyon an pinahihimulsan han dinihogan nga mga surugoon ni Jehova tikang han 1919?
13 Ginbendisyonan han Dios an mabinasulon nga panhunahuna ngan mga buhat han iya dinihogan nga mga surugoon han 1919 ngan ginpauswag hira. Siyahan, iginhatag an atensyon ha pagtirok han ultimo nga nanhibilin han Israel han Dios, ngan nagtikang an pagtirok han ‘daku nga kadam-an’ han ‘iba nga mga karnero.’ (Pahayag 7:9; Juan 10:16) Ini nga mga bendisyon igintagna ni Isaias: “Imo gindugangan an nasud, O Jehova, imo gindugangan an nasud; ikaw ginhihimaya; imo ginpadaku an ngatanan nga pag-ultan han tuna. Jehova, ha kasamokan hira dinuaw ha imo; hira nagbubo hin usa nga pag-ampo han nakada ha ira an imo pagbadlong.”—Isaias 26:15, 16.
14 Yana nga panahon, an mga giutan han Israel han Dios nagsasarang ha bug-os nga tuna, ngan an daku nga kadam-an nga igindudugang yana mga unom ka milyon na an kadamu nga madasigon nga nakikigbahin ha buruhaton nga pagwali han maopay nga sumat. (Mateo 24:14) Bendisyon gud ito tikang kan Jehova! Ngan naghihimaya gud ini ha iya ngaran! Ito nga ngaran nababatian yana ha 235 nga nasud—urusahon nga katumanan han iya saad.
15. Ano nga simboliko nga pagkabanhaw an nahitabo han 1919?
15 Ginkinahanglan han Juda an bulig ni Jehova basi makapalagiw tikang ha pagkabihag ha Babilonya. Diri nira mahihimo ito ha ira kalugaringon. (Isaias 26:17, 18) Sugad man, an katalwasan han Israel han Dios han 1919 amo an pamatuod han bulig ni Jehova. Diri gud ito mahitatabo kon waray hiya. Ngan urusahon gud an pagbag-o ha ira kahimtang nga iginpariho ito ni Isaias ha pagkabanhaw: “An imo mga patay mabubuhi; an akon patay nga kalawasan mabangon. Pagmata ngan pagkanta, kamo nga nag-uukoy ha tapotapo; kay an imo tun-og sugadsugad hin tun-og han mga tanom, ngan an tuna masalikway han mga patay.” (Isaias 26:19; Pahayag 11:7-11) Oo, adton waray mahihimo ha kamatayon matatawo-utro, siring pa, para ha bag-o nga buruhaton!
Panalipod ha Peligroso nga mga Panahon
16, 17. (a) Han 539 A.K.P., ano an kinahanglan buhaton han mga Judio basi matalwas ha kapukan han Babilonya? (b) Sigurado, ano an “mga sulod” yana nga panahon, ngan paonan-o nagpapahimulos kita hito?
16 An mga surugoon ni Jehova nagkikinahanglan pirme han iya panalipod. Kondi, diri na mag-iiha, iya uunaton an iya kamot ha ultimo nga panahon kontra han kalibotan ni Satanas, ngan an iya mga magsiringba magkikinahanglan han iya bulig labaw kay ha kan-o pa man. (1 Juan 5:19) May kalabotan hiton peligroso nga panahon, hi Jehova nagpapahamangno ha aton: “Kadi, katawohan ko, sulod ikaw ha imo mga sulod, ngan panadhi an imo mga ganghaan palibot ha imo; tumago ka ha madali nga panahon, ngada nga an kaaligutgot matapos. Kay, kitaa, hi Jehova magawas tikang ha iya lugar ha pagsirot ha mga umurukoy ha tuna tungod han ira karat-an; an tuna liwat magpapakita han iya dugo, ngan diri na magtatabon han iya mga patay.” (Isaias 26:20, 21; Sepania 1:14) Ipinakita hini nga pahamangno ha mga Judio kon paonan-o matatalwas ha kapukan han Babilonya han 539 A.K.P. Adton namati hito magpapabilin ha ira mga balay, nga talwas tikang ha nananakop nga kasundalohan dida ha kakalsadahan.
17 Yana nga panahon, an “mga sulod” ha tagna sigurado nga nagrirepresentar han napuplo ka yukot nga mga kongregasyon han katawohan ni Jehova ha bug-os nga kalibotan. An sugad nga mga kongregasyon amo an panalipdanan bisan yana, usa nga lugar diin talwas an mga Kristiano upod han ira kabugtoan, ilarom han mahigugmaon nga pagmangno han mga tigurang. (Isaias 32:1, 2; Hebreo 10:24, 25) Totoo ini labi na tungod han pagkahirani han kataposan hini nga sistema han mga butang nga an katalwasan madepende ha pagsugot.—Sepania 2:3.
18. Paonan-o nga ha diri na mag-iiha kan Jehova ‘papatayon an mananap ha dagat’?
18 Mahitungod hito nga panahon, hi Isaias nagtatagna: “Hadto nga adlaw hi Jehova pinaagi han iya matig-a ngan daku ngan makusog nga kampilan magsisirot han Lebiatan an malaksi nga halas, ngan kan Lebiatan an nagbabarobaliko nga halas; ngan iya papatayon an mananap nga aada ha dagat.” (Isaias 27:1) Ano an moderno nga “Lebiatan”? Matin-aw, amo “an daan nga halas,” hi Satanas mismo, upod an iya maraot nga sistema han mga butang, nga ginagamit niya ha pakig-away kontra han Israel han Dios. (Pahayag 12:9, 10, 17; 13:14, 16, 17) Han 1919, nawara han Lebiatan an iya gahum ha katawohan han Dios. Maabot an panahon, bug-os nga mabubungkag ito. (Pahayag 19:19-21; 20:1-3, 10) Salit, kan Jehova ‘papatayon an mananap ha dagat.’ Samtang yana, waray bisan ano nga mahimo gamiton han Lebiatan kontra han katawohan ni Jehova nga maglalampos ha kadayonan. (Isaias 54:17) Nakakaliaw gud nga pagpasarig ito!
“Usa nga Urubasan han Alaksiw”
19. Ano an kahimtang han nanhibilin yana nga panahon?
19 Tungod hini ngatanan nga kalamrag tikang kan Jehova, diri ba mayada kita han ngatanan nga hinungdan nga magrayhak? Oo! Matahom nga iginsasaysay ni Isaias an kalipay han katawohan ni Jehova han hiya nagsurat: “Hadto nga adlaw; An usa nga urubasan han alaksiw, pagkanta kamo ngada hini. Ako hi Jehova amo an magbarantay hini; akon ini babaribihan ha tagsatagsa ka dali; bangin may bisan hin-o nga magdaot hini, akon ini babantayan ha gab-i ngan ha adlaw.” (Isaias 27:2, 3) Ginbabantayan ni Jehova an iya “urubasan,” an nanhibilin han Israel han Dios, ngan an ira mauyatom nga mga kaupod. (Juan 15:1-8) An resulta amo an mga bunga nga naghihimaya han iya ngaran ngan nagpaparayhak hinduro ha iya mga surugoon ha tuna.
20. Paonan-o ginpapanalipdan ni Jehova an Kristiano nga kongregasyon?
20 Malipayon kita nga an siyahan nga kasina ni Jehova kontra ha iya dinihogan nga mga surugoon—nga tungod hito gintugotan niya hira nga mabihag ha espirituwal han 1918—nawara na. Hi Jehova mismo nasiring: “An kapungot waray dinhi ha akon. Pumatok pa unta an kabaknitan ngan an katunkan ha akon dida ha away! Ako magmamartsa ngada ha ira, susunugon ko hira ngatanan. O kon diri man pagunita hiya ha akon kusog, nga hiya makigdait ha akon; oo, makigdait hiya ha akon.” (Isaias 27:4, 5) Basi masiguro nga an iya mga balagon padayon nga naghahatag hin hura nga “alaksiw,” gintatamakan ngan ginsusunog ni Jehova an bisan ano sugad-banwa nga impluwensya nga makakadaot ha ira. Salit, waray bisan hin-o nga magdadaot han kaopayan han Kristiano nga kongregasyon! Hinaot an ngatanan ‘dumangop ha darangpanan ni Jehova,’ namimiling han iya pag-uyon ngan panalipod. Ha pagbuhat hito, nakikigmurayaw kita ha Dios—nga importante gud salit duha ka beses nga gin-unabi ito ni Isaias.—Salmo 85:1, 2, 8; Roma 5:1.
21. Ha ano nga paagi ginpupuno hin “bunga” an mabungahon nga tuna?
21 An mga bendisyon nagpapadayon: “Ha mga adlaw nga umarabot hi Jakob magamot; an Israel mabukad ngan mabiyoos; ngan ira pupun-on an nawong han kalibotan hin bunga.” (Isaias 27:6) Ini nga bersikulo natutuman tikang han 1919, nagtatagana hin urusahon nga ebidensya han gahum ni Jehova. Ginpupuno han dinihogan nga mga Kristiano an tuna hin “bunga,” han masustansya espirituwal nga pagkaon. Ha butnga han maraot nga kalibotan, malipayon nga gintitipigan nira an hitaas nga mga suruklan han Dios. Ngan padayon nga ginbibendisyonan hira ni Jehova hin pag-uswag. Sugad nga resulta, an ira minilyon nga mga kaupod, an iba nga mga karnero, “nagmamangno [ha Dios] ha adlaw ngan gab-i.” (Pahayag 7:15) Hinaot diri gud kita manluya ha urusahon nga pribilehiyo han pagkaon han “bunga” ngan ipaangbit ito ha iba!
22. Ano nga mga bendisyon an naabot ngada hadton nakarawat han kalamrag?
22 Hinin magpakalilisang nga mga panahon, nga an kasisidman nagpuputos han tuna ngan an madakmol nga kasisidman ha mga nasud, diri ba kita mapasalamaton nga hi Jehova nagpapasanag han espirituwal nga kalamrag ha iya katawohan? (Isaias 60:2; Roma 2:19; 13:12) Para ha ngatanan nga nakarawat hito, an sugad nga kalamrag nangangahulogan hin kamurayaw han hunahuna ngan kalipay yana ngan kinabuhi nga waray kataposan pa ngani ha tidaraon. Salit, may maopay nga hinungdan nga kita nga nahigugma han kalamrag malipayon an aton mga kasingkasing ha pagdayaw kan Jehova ngan nasiring pinaagi han salmista: “Hi Jehova amo an kabaskugan han akon kinabuhi; Hin-o ba an akon kahahadlukan? Hulat kan Jehova; Pangusog, ngan papintasa an imo kasingkasing; oo, hulat ikaw kan Jehova.”—Salmo 27:1b, 14.
Nahinunumduman Mo Ba?
• Ano an tidaraon para hadton nagtatalumpigos han katawohan ni Jehova?
• Ano nga pag-uswag an igintagna ni Isaias?
• Ha ano nga “mga sulod” sadang magpabilin kita, ngan kay ano?
• Kay ano nga an kahimtang han katawohan ni Jehova nakakadayaw ha iya?
[Mga Pakiana]
[Kahon ha pahina 22]
BAG-O NGA PUBLIKASYON
Kaurugan han impormasyon nga ginhisgotan hinin duha nga aradman nga artikulo iginpresentar sugad nga pahayag ha programa han distrito nga kombensyon para han 2000/2001. Ha kataposan han pahayag, iginpagowa an bag-o nga publikasyon, nga may ulohan Isaiah’s Prophecy—Light for All Mankind I. Inin 416-pahina nga libro naghihisgot han kada bersikulo han siyahan nga 40 nga kapitulo han libro ni Isaias.
[Retrato ha pahina 18]
An mga magtadong la an tinutugotan nga sumulod ha “marig-on nga bungto” ni Jehova, ha iya organisasyon
[Retrato ha pahina 19]
Hi Isaias namiling kan Jehova “ha gab-i”
[Retrato ha pahina 21]
Ginpapanalipdan ni Jehova an iya “urubasan” ngan ginhihimo ito nga mabungahon