1, 2. Kay ano nga importante para ha mga Saksi ni Jehova an hitaas nga suruklan ha pamado? (Kitaa an retrato hini nga pahina.)

“DAMU an nakasul-ot hin diri pormal nga bado, labi na kon mapaso,” siring han usa nga Olandes nga peryodiko may kalabotan ha usa nga miting han mga lider han relihiyon. “Diri sugad hito an kahimtang ha kombensyon han mga Saksi ni Jehova. . . . An kabataan ngan adulto nga kalalakin-an nakasul-ot hin amerikana ngan kurbata, ngan an kahilaba han saya han kababayin-an, bata man o adulto . . . desente pero moderno.” An mga Saksi ni Jehova agsob kumendasyonan tungod han ira “desente nga pamado, nga may dignidad ngan maopay nga panhunahuna . . . ha paagi nga angay [para hadton] nagpapahayag hin debosyon ha Dios.” (1 Tim. 2:9, 10) Bisan kon an ginhihisgotan dinhi ni apostol Pablo nga prinsipyo para ha kababayin-an, aplikado liwat ini ha Kristiano nga kalalakin-an.

² Sugad nga katawohan ni Jehova, importante ha aton an hitaas nga suruklan ha pamado, ngan importante liwat ito ha aton Dios. (Gen. 3:21) An ginsisiring han Kasuratan mahitungod ha pamado ngan pag-ayos nagpapakita nga an Soberano ha uniberso may suruklan ha pamado para ha iya mga magsiringba. Salit an aton pamado ngan pag-ayos diri sadang magdepende ha kon ano la an aton  karuyag. Kinahanglan naton tagdon an nakakapalipay ha Soberano nga Ginoo nga hi Jehova.

3. Ano an aton mahibabaroan ha Balaud han Dios nga iginhatag ha mga Israelita mahitungod ha pamado?

³ Pananglitan, an Balaud han Dios nga iginhatag ha mga Israelita may mga surundon nga nagpanalipod ha ira basi diri maimpluwensyahan han maraot gud nga pagkinabuhi han mga nasud nga nakapalibot ha ira. Iginpapakita hito nga Balaud nga nadiri gud hi Jehova han pamado nga waray na kaibahan han lalaki ngan babaye​—nga gintatawag naton yana nga unisex nga estilo. (Basaha an Deuteronomio 22:5.) Matin-aw an igintututdo ha aton han sugo han Dios​—diri hiya nalilipay ha pamado nga nagigin babaye pagkit-on an mga lalaki, ngan an mga babaye pariho na ha lalaki, o diri na nasasabtan kon hin-o an lalaki ngan kon hin-o an babaye.

4. Ano an makakabulig ha mga Kristiano ha paghimo hin maaramon nga desisyon mahitungod ha pamado?

⁴ An Biblia may mga prinsipyo nga mabulig ha mga Kristiano ha paghimo hin maaramon nga mga desisyon mahitungod ha pamado. Aplikado ito diin man hira naukoy ngan anoman an ira kultura o an kahimtang han panahon. Diri naton kinahanglan hin lista han angayan ngan diri angayan nga pamado. Lugod, ginigiyahan kita han Kasuratanhon nga mga prinsipyo nga nagtutugot ha aton nga pumili han aton karuyag. Hisgotan naton an pipira nga prinsipyo ha Biblia nga makakabulig ha aton nga hibaroan “an kaburut-on han Dios nga maopay, hingpit, ngan nakakalipay ha iya” kon nagdidesisyon mahitungod ha aton pamado.​—Roma 12:1, 2.

5, 6. Ano an sadang magin epekto ha iba han aton pamado?

⁵ Hi apostol Pablo gin-giyahan ha pagsurat han importante nga prinsipyo ha 2 Corinto 6:4. (Basaha.) An aton pamado ngan pag-ayos nagpapakita han aton personalidad. Damu nga tawo an naghahatag hin impresyon o opinyon uyon ha ira ‘nakikita’ ha aton. (1 Sam. 16:7) Salit sugad nga mga ministro han Dios, maaram kita nga importante gud an aton pamado; diri la kay basta komportable kita hito o karuyag naton ito. An mga prinsipyo nga aton hinbabaroan ha Pulong han Dios sadang magpagios ha aton nga diri magsul-ot hin bado nga sobra ka fitting, malaw-ay pagkit-on, o nakakadani ha sekso. Nagpapasabot ini nga kinahanglan naton likyan an pamado nga nakikita o nalutop an pribado nga mga parti han lawas. An aton pamado diri sadang magin hinungdan nga magin diri komportable an iba o lumingiw pa ngani tungod hito.

⁶ Kon limpyo kita, desente mamado, ngan maopay an aton pag-ayos, posible gud nga respetuhon kita sugad nga mga ministro han Soberano nga Ginoo nga hi Jehova. Ngan bangin madani an mga tawo ha aton Dios nga ginsisingba. Dugang pa, an aton desente nga pamado maghahatag hin maopay nga impresyon ha aton organisasyon. Ngan an iba bangin mamati pa ngani ha aton mensahe nga nagtatalwas hin kinabuhi.

7, 8. Ha ano nga mga kahimtang labi nga kinahanglan magin desente an aton pamado?

⁷ Obligasyon naton ha aton baraan nga Dios, ha aton kabugtoan, ngan ha mga tawo ha teritoryo nga magsul-ot hin bado nga nagpapasidungog han aton mensahe ngan nagdadayaw kan Jehova. (Roma 13:8-10) Importante ini labi na kon nakikigbahin kita ha Kristiano nga mga buruhaton, sugad han pagtambong ha mga katirok o pagsangyaw. Kinahanglan mamado kita “ha paagi nga angay ha [katawohan] nga nagpapahayag hin debosyon ha Dios.” (1 Tim. 2:10) Syempre, may mga pamado nga ginkakarawat ha usa nga lugar pero bangin diri ginkakarawat ha iba nga lugar. Salit, ginkukonsiderar han katawohan ni Jehova ha bug-os nga kalibotan an lokal nga mga kustomre basi diri hira makapakdol.

 ⁸ Basaha an 1 Corinto 10:31. Kon natambong kita hin mga asembleya ngan kombensyon, an aton pamado kinahanglan magin angayan ngan desente imbes nga sundon an kalibotanon nga mga estilo. Bisan ha aton paggawas ngan pagsulod ha hotel, sugad man ha aton pagpahalibway antes ngan katapos han programa han kombensyon, kinahanglan likyan naton nga magin sobra ka kaswal o ragid an aton pamostura. Hito nga paagi, diri kita mag-aalang pagpakilala sugad nga Saksi ni Jehova ngan pagsangyaw kon may higayon.

9, 10. Kay ano nga sadang makaapekto ha aton pamado an Filipos 2:4?

⁹ Basaha an Filipos 2:4. Kay ano nga kinahanglan tagdon naton an epekto han aton pamado ha aton mga igkasi-Kristiano? Usa nga rason tungod kay an katawohan han Dios nangangalimbasog nga sundon an sagdon han Biblia: “Pataya an mga bahin han iyo lawas nga tikang ha tuna may kalabotan ha imoralidad, kahugaw, hingyap ha pakighilawas.” (Col. 3:2, 5) Diri naton karuyag nga makurian an aton mga igkasi-magsiringba ha pagsunod hini nga sagdon. Bangin gin-aatohan pa gihapon han mga kabugtoan nga nagkinabuhi hin imoral hadto an magraot nga hingyap. (1 Cor. 6:9, 10) Diri gud naton karuyag nga mas makurian hira ha ira pakig-away, diri ba?

¹⁰ Kon kaupod naton an aton kabugtoan, an aton pamado sadang magpakita nga nabulig kita ha pagtipig han kalimpyo ha moral han kongregasyon. Ito an angay naton buhaton natambong man kita ha katirok o bisan ha ordinaryo nga pagturotarampo. Oo, may kagawasan kita nga pumili han aton karuyag isul-ot. Pero may  responsabilidad kita nga pilion an bado nga mabulig ha iba nga magpabilin nga putli ngan matipigan an suruklan han Dios han pagin limpyo ha hunahuna, pulong, ngan buhat. (1 Ped. 1:15, 16) An tinuod nga gugma “diri nagawi hin diri desente, diri naghuhunahuna han kalugaringon la nga kaopayan.”​—1 Cor. 13:4, 5.

11, 12. Paonan-o an Eklesiastes 3:1, 17 nabulig ha aton nga magin makatadunganon ha aton iginsusul-ot?

¹¹ Kon an mga surugoon han Dios nagdidesisyon han ira isusul-ot, maaram hira nga ‘may panahon para ha tagsa nga tuyo ngan para ha tagsa nga buhat.’ (Ekles. 3:1, 17) An iba-iba nga klima o panahon ngan kahimtang han kinabuhi nakakaapekto ha kon ano an aton isusul-ot. Pero an suruklan han Dios diri nagbabag-o anoman an klima o panahon.​—Mal. 3:6.

¹² Kon mapaso an panahon, bangin makuri an pagpili hin estilo hin bado nga desente, angayan, ngan nagpapakita hin maopay nga panhunahuna. Salit aapresyaron gud han kabugtoan kon diri kita magsusul-ot hin sobra ka fitting o haluag hinduro nga bado nga nagigin malaw-ay na kita pagkit-on. (Job 31:1) Sugad man, kon nakarigo ha dagat o ha swimming pool, an aton pankarigo sadang magin desente. (Prob. 11:2, 20) Bisan kon damu ha kalibotan an nagsusul-ot hin pankarigo nga haros nakikita na an pribado nga mga parti han lawas, gintatagad han mga alagad ni Jehova kon ano an magpapasidungog ha aton hinigugma ngan baraan nga Dios.

13. Kay ano nga an sagdon ha 1 Corinto 10:32, 33 sadang makaimpluwensya ha aton pagpili hin bado?

¹³ An usa pa nga makakabulig ha aton ha pagpili hin angayan nga bado amo an prinsipyo may kalabotan ha pagkonsiderar ha konsensya han iba​—igkasi-magsiringba man naton o diri. (Basaha an 1 Corinto 10:32, 33.) Sadang naton seryosohon an aton responsabilidad nga diri magsul-ot hin bado nga makakapakdol ha iba. Hi Pablo nagsurat: “Sadang lipayon han tagsa ha aton an iya igkasi-tawo para ha kaopayan ngan ha pagparig-on ha iya. Kay bisan an Kristo waray magpalipay ha iya kalugaringon.” (Roma 15:2, 3) Pariho kan Jesus, sadang magin mas importante ha aton an pagbuhat han kaburut-on han Dios ngan pagbulig ha iba kay han aton personal nga mga karuyag. Salit diri naton isusul-ot an bado nga aton karuyag kon magigin hinungdan ito nga diri mamati an mga tawo ha aton mensahe.

14. Paonan-o mabubuligan han mga kag-anak an ira mga anak nga himayaon an Dios pinaagi han ira pamado?

¹⁴ Responsabilidad han Kristiano nga mga kag-anak nga tutdoan an ira pamilya nga iaplikar an mga prinsipyo ha Biblia. Nag-uupod ito ha pagsiguro nga napapalipay han bug-os nga pamilya hi Jehova pinaagi han ira desente nga pamado ngan pag-ayos. (Prob. 22:6; 27:11) Maipapasilsil han mga kag-anak ha ira mga anak an pagtahod ha aton baraan nga Dios pinaagi ha pagpakita hin maopay nga susbaranan ngan paghatag hin mahigugmaon ngan praktikal nga giya. Maopay gud nga tutdoan han mga kag-anak an ira mga anak kon diin ngan paonan-o makakabiling hin angayan nga bado. Nagpapasabot ini nga kinahanglan mahibaro an mga anak nga pilion diri la an ira karuyag kondi adton maghihimaya liwat kan Jehova, an Dios nga ira ginrirepresentaran.

15. Ano an makakabulig ha aton ha paghimo hin maaramon nga desisyon may kalabotan ha aton pamado?

¹⁵ An Pulong han Dios naghahatag hin praktikal nga giya nga makakabulig ha aton ha paghimo hin maaramon nga mga desisyon nga maghihimaya ha Dios. Bisan pa hito, may kagawasan pa gihapon kita nga isul-ot kon ano an aton karuyag. Nagkakaibaiba an estilo han bado nga  aton karuyag ngan an bado nga maaakos naton paliton. Pero an aton pamado kinahanglan pirme malimpyo, desente, angayan ha kahimtang, ngan ginkakarawat han mga tawo ha aton lugar.

16. Kay ano nga takos gud nga mangalimbasog kita nga mamado hin desente?

¹⁶ Diri pirme masayon an paghimo hin desisyon nga nagpapakita hin maopay nga panhunahuna ngan pagturotimbang ngan hin pagin maaramon. Ha damu nga tindahan yana, mga uso la nga estilo han bado an iginbabaligya, salit bangin makuri an pamiling hin desente nga saya, bado, ngan blouse o amerikana ngan saruwal nga diri sobra ka fitting. Pero posible nga malipay ngan apresyaron han kabugtoan an aton pangalimbasog nga makabiling hin angayan ngan desente nga bado. An kalipay nga aton inaabat tungod kay nadadayaw naton an aton mahigugmaon nga Amay ha langit diri gud matutupngan han anoman nga sakripisyo nga bangin ginhimo naton basi an aton pamado maghimaya ha iya.

17. Ano an pipira nga butang nga mahimo tagdon han usa nga brother kon angay ba hiya magkaada barangas o bungot?

¹⁷ Kumusta man an pagkaada barangas o bungot? Angayan ba ito ha mga brother? An Mosaiko nga Balaud nagsusugo ha kalalakin-an nga magkaada barangas. Pero an mga Kristiano diri na sakop han Mosaiko nga Balaud o obligado nga sundon ito. (Leb. 19:27; 21:5; Gal. 3:24, 25) Ha pipira nga kultura, an malimpyo nga pagkaarot ha barangas o bungot angayan ngan ginkakarawat, ngan diri ito nagmiminos ha mensahe han Ginhadian. Ngani, an pipira nga ministeryal nga surugoon ngan tigurang may bungot. Pero an iba bangin magdesisyon nga diri magkaada hito. (1 Cor. 8:9, 13; 10:32) Ha iba nga kultura o lugar, diri kustomre ngan diri angayan para ha mga Kristiano an pagkaada bungot. Ngani, kon an usa nga brother may-ada hito, an iya hitsura bangin diri maghimaya ha Dios ngan may ikakasaway ha iya.​—Roma 15:1-3; 1 Tim. 3:2, 7.

18, 19. Paonan-o an Mika 6:8 nabulig ha aton nga mapalipay an Dios pinaagi han aton pamado?

¹⁸ Mapasalamaton gud kita nga waray kita tagi ni Jehova hin lista han mga surundon may kalabotan ha pamado ngan pag-ayos. Lugod, gintutugotan kita niya nga gamiton an aton kagawasan ha pagbuot ngan maghimo hin makatadunganon nga mga desisyon uyon ha mga prinsipyo ha Kasuratan. Salit bisan ha aton pamado ngan pag-ayos, maipapakita naton nga karuyag naton nga ‘maglakat ha mapainubsanon kaupod han aton Dios.’​—Mika 6:8.

¹⁹ An aton pagin mapainubsanon nagpapasabot nga ginkikilala naton nga putli ngan baraan hi Jehova ngan an iya mga suruklan amo an pinakamaopay nga giya nga sadang naton sundon. An pagin mapainubsanon nagpapasabot liwat nga kinahanglan naton respetuhon an pagbati ngan opinyon han iba. Salit ‘naglalakat kita nga mapainubsanon kaupod han Dios’ kon nagkikinabuhi kita uyon ha iya hitaas nga suruklan ngan ginrirespeto naton an pagbati ngan opinyon han iba.

20. Ano an sadang magin epekto ha iba han aton pamado ngan pag-ayos?

²⁰ An aton pamado sadang gud magpakita nga magsiringba kita ni Jehova. Sadang makita han aton kabugtoan ngan hadton diri mga Saksi nga angay gud kita magrepresentar ha aton matadong nga Dios. May-ada hiya hitaas nga suruklan, ngan malipayon naton ito nga ginsusunod. Ginkukumendasyonan gud naton an aton kabugtoan kay pinaagi han ira pamado ngan pag-ayos pati na han ira maopay nga panggawi, damu nga sinsero nga tawo an naaaghat nga mamati han mensahe han Biblia, ngan napapalipay ngan napapasidunggan nira hi Jehova. An paghimo hin maaramon nga mga desisyon ha aton pamado sigurado nga padayon nga magdadayaw ha Usa nga “nagsusul-ot [hin] kagamhanan ug himaya.”​—Sal. 104:1, 2; Baraan nga Biblia.