Paglabay hin pipira ka panahon, samtang nakadto an mga Israelita ha kamingawan, nagrebelde kan Moises hira Kore, Datan, Abiram, ngan an 250 pa nga kalalakin-an. Nagsiring hira kan Moises: ‘Sobra na an iyo ginbibinuhat! Kay ano nga ikaw an amon magigin lider ngan hi Aaron an magigin hitaas nga saserdote? Hi Jehova upod naton ngatanan, diri la ha iyo ni Aaron.’ Waray malipay hito hi Jehova. Para ha iya, pagrebelde ito ha iya!

Hi Moises nagsiring kan Kore ngan ha mga nasuporta ha iya: ‘Kadto ha tabernakulo buwas, ngan dad-a an iyo burutangan hin baga ngan pun-a ito hin insenso. Ipapakita ha aton ni Jehova kon hin-o an iya ginpili.’

Kinabuwasan, hi Kore ngan an 250 nga kalalakin-an kumadto kan Moises ha tabernakulo. Didto, nagsunog hira hin insenso nga sugad hin mga saserdote hira. Hi Jehova nagsiring kanda Moises ngan Aaron: ‘Bulag kamo kan Kore ngan ha mga nasuporta ha iya.’

Bisan kon kumadto hi Kore kan Moises ha tabernakulo, waray kumadto hira Datan, Abiram, ngan an ira pamilya. Ginsidngan ni Jehova an mga Israelita nga magpahirayo ha tolda nira Kore, Datan, ngan Abiram. Salit nagpahirayo dayon an mga Israelita. Hira Datan,  Abiram, ngan an ira pamilya tumindog ha gawas han ira mga tolda. Katapos, tigda nga nabuka an tuna ngan ginlamoy hira! Ha tabernakulo, may nahulog nga kalayo tikang ha langit nga nagsunog kan Kore ngan ha 250 nga kalalakin-an.

Tapos, hi Jehova nagsiring kan Moises: ‘Kuha hin tungkod tikang ha lider han tagsa nga tribo, ngan isurat an iya ngaran dida hito. Pero ha tungkod han tribo ni Levi, isurat an ngaran ni Aaron. Ibutang an mga tungkod ha sulod han tabernakulo, ngan an tungkod han tawo nga akon ginpili mamumukad.’

Kinabuwasan, ginkuha ni Moises ha tabernakulo an ngatanan nga tungkod ngan iginpakita ito ha mga lider. An tungkod ni Aaron nagkaada mga bukad ngan hinog nga mga almendras. Hini nga paagi, iginpakita ni Jehova nga hi Aaron an iya ginpili nga magin hitaas nga saserdote.