Katapos magpabilin ni Jesus ha Samaria hin duha ka adlaw, inuli hiya ha ira lugar. Mauruiha hiya nga nagsangyaw ha Judea, pero bumalik hiya ha Galilea diri basi pumahuway. Lugod, gintikangan niya an mas daku nga buruhaton ha lugar diin hiya nagtubo. Posible nga diri hiya naglalaom nga kakarawaton didto kay hiya nagsiring, “an usa nga propeta waray dungog ha iya kalugaringon nga lugar.” (Juan 4:44) Imbes nga umupod ha iya an iya mga disipulo, inuli hira ha ira mga pamilya ngan binalik ha ira mga trabaho.

Ano nga mensahe an iginsangyaw ni Jesus? Amo ini: “Hirani na an Ginhadian han Dios. Magbasol kamo ngan tumoo ha maopay nga sumat.” (Marcos 1:15) Ano an reaksyon han mga taga-Galilea? Ha pagkamatuod, damu ha ira an kinarawat kan Jesus ngan nagpasidungog ha iya. Diri la ini tungod han iya mensahe. An iba ha ira nakadto ha Paskua ha Jerusalem pipira ka bulan na an naglabay ngan nakakita han makatirigamnan nga mga milagro ni Jesus.—Juan 2:23.

Diin gintikangan ni Jesus an iya daku nga buruhaton ha ministeryo ha Galilea? Posible nga ha Cana, diin ginhimo niya nga bino an tubig ha usa nga kasal didto. Han kumadto hiya ha ikaduha nga higayon, hinbaroan niya nga may olitawohay nga grabe an sakit ngan haros mamatay na. Anak hiya han opisyal han gobyerno ni Herodes Antipas, an hadi nga ha urhi nagsugo nga pugotan hi Juan nga Parabaptis. Hinbatian hini nga opisyal nga inabot hi Jesus ha Cana tikang ha Judea. Salit nagbiyahe hiya tikang ha Capernaum ngadto ha Cana basi makigkita kan Jesus. An nasusubo nga opisyal nakimalooy ha iya: “Ginoo, kadtoa an akon anak antes hiya mamatay.”—Juan 4:49.

An baton ni Jesus nakapahiusa gud ha opisyal: “Sige, uli na; buhi an imo anak.” (Juan 4:50) Tinoo kan Jesus an opisyal ni Herodes ngan nagbiyahe tipauli. Ha dalan, gintapo hiya han iya mga uripon nga nagdadagmit basi ig-istorya an maopay nga sumat. Oo, an iya anak buhi ngan nag-opay na! Basi mausisa an mga panhitabo, hiya nagpakiana: ‘Kakan-o hiya nag-opay?’

Hira binaton: “Kakulop han mga ala-una han kulop nawara an iya hiranat.”—Juan 4:52.

Nasantop han opisyal nga ito an eksakto nga oras han hi Jesus nagsiring, “Buhi an imo anak.” Katapos hito, inin riko nga opisyal nga may mga uripon, ngan an iya bug-os nga panimalay nagin mga disipulo han Kristo.

Duha ka beses nga naghimo hin milagro hi Jesus ha Cana, iya ginhimo nga bino an tubig ngan ha urhi iya gintambal an olitawohay nga mga 26 ka kilometro an kahirayo. Syempre, diri la ini an mga milagro nga iya ginhimo. Pero importante ini nga pagtambal tungod kay nagtitigaman ini han iya pagbalik ha Galilea. Matin-aw nga usa hiya nga propeta nga gin-uuyonan han Dios, pero tubtob san-o ini nga ‘propeta papasidunggan ha iya kalugaringon nga lugar’?

Hibabaroan naton ito pag-uli ni Jesus ha Nazaret. Ano an mahitatabo ha iya didto?