Bala Timirttiyaa 2: Iita Asati Siꞌooliyan Xuugettoosona

Ha bala timirttiyau denddoy aybee? “Beni wode Giriike palasppatu ubbaappe aaruwan Siꞌooliyaa xeelliyaagan woga ammanuwaa minttidaagee Pilaata.”—Histoire des enfers (Siꞌooliyaa Taarikiyaa) ZHorzh Menuway xaafidoogaa, sinttaa 50.

“Giriike palasppatu timirttiyaa amaridaagaa tamaarida Kiristtaaneti 2ntta xeetu laytta M.L. baggaappe doommidi, bantta ammanuwaa he palasppatu qofaadan qonccissana koshshiyaabadan qoppidosona. . . . Etau keehippe injjetida timirttee Pilaato timirttiyaa.”—Ze Niwu Inssaykilopidiya Biritanika (1988), Vooliyum 25, sinttaa 890.

“Woosa keettay tamaarissiyoobay siꞌoolee merinau deꞌiyoogaa qonccissees. Nagaranchati hayqqosaara eta shemppoy ‘merinaa taman’ qaxxayettanau siꞌooliyaa wodhees. Siꞌooliyaa qixaatiyan waannay Xoossaappe merinau shaahettiyoogaa.”—Katekiizim of ze Kaatolik CHerch, 1994n attamettidaagaa, sinttaa 270.

Geeshsha Maxaafay woygii? “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona. . . . Neeni baanasan duufuwan woy siꞌooliyan oosoi, woikko halchchoi, woikko eri, woikko aadhdhida eratetti baawa.”—Eranchchaa 9:5, 10.

“Hayqqidaageeti deꞌiyoosaa” malaatiya SHiꞌol giya Ibraawetto qaalay, issi issi Geeshsha Maxaafaa birshshettatun “siꞌooliyaa” geetettidi birshshettiis. Qommoora deꞌiya xiqisee hayqqidaageetu hanotaa ay qonccissii? Eti oottido nagaraa gishshau Siꞌooliyan qaxxayettiyoonaa? Eti ‘aybanne erenna’ gishshau qaxxayettokkona. Ba soo asau huuphe gidida Iyyoobi wolqqaama harggiyaa harggidi: ‘Tana duufo [Ibraawettuwan, SHiꞌol] giddon gentta’ giidi Xoossaa woossidoy hegaassa. (Iyyooba 14:13) Siꞌoolee merinaa tamay deꞌiyoosaa gidikko, a woosau ayba goꞌꞌi deꞌii? Siꞌoolee oottiyoobi baynnasaa, asaa naatu ubbaa duufuwaa gidiyoogaa Geeshsha Maxaafay qonccissees.

Siꞌooliyaa hagaadan qonccissiyoogee tumanne Geeshsha Maxaafaara moggiyaaba gidennee? Gidoppe attin, siiqo Xoossay issi uraa hegaa keeni merinau qaxxayanay ayba wolqqaama nagara oottiinee? (1 Yohaannisa 4:8) SHin siꞌooliyaa tamay bala timirtte gidikko, saluwaa biyoogaabaa woygana danddayettii?

Kaallidi deꞌiya Geeshsha Maxaafaa xiqiseta beꞌa: Mazamure 146:3, 4; Oosuwaa 2:25-27; Roome 6:7, 23

TUMAA:

Xoossay asaa siꞌooliyan qaxxayenna

[Sinttaa 5n deꞌiya Misilee Ekettidosaa]

Barrators—Giampolo/The Doré Illustrations For Dante’s Divine Comedy/Dover Publications Inc.