Xoossaappe Tamaariyoogee Aybippenne Aadhidi Goꞌꞌees

“Taani ta Godaa Kiristtoos Yesuusa eriyoogee ubbabaappe keehi aadhdhiyo gishshau, ubbabaa tana mulekka go77ennabaadan qoodaas.”—PILIPHPHISIYUUSA 3:8, 9.

1, 2. Issi issi Kiristtaaneti ay oottanau dooridonaa? Aybissi?

 ROBERTTI naatettaappe doommidi gooba tamaare. Ayyo layttay hosppuna gidido wode a asttamaaretuppe issinna eta soo baada, i ubbabaa oottana danddayiyoogaa ayyo yootaasu. I sinttappe dottore gidana gaada a qoppiyoogaa yootaasu. Naaꞌꞌntto xekka timirttiyan i demmido markkee he biittan deꞌiya yuniversttettu ubbaappe aadhdhiya augaaninne tamaaranau danddayissiyaagaa. SHin Robertti kumetta wode aqinye gididi oottanau, daroti issi uri ba deꞌon zaarettidi demmana danddayenna injjedan xeelliyoobaa agganau qofaa qachiis.

² Yelaga gidin cima gidin, daro Kiristtaaneti Roberttaagaadan ha siraatan ishaliyoobaa demmiyo injjee deꞌees. Issoti issoti ayyaanaaban kessido hoolliyaa gakkanau hegaa mala injjiyaa kumetta hanotan goꞌettennan agganau dooridosona. (1 Qoronttoosa 7:29-31) Robertta mala Kiristtaaneti sabbakiyo oosuwan minnidi oottanaadan denttettiday aybee? Hegau waanna gaaso gidida Yihoowa siiqiyoogaa bolli, Yihoowappe tamaariyoogee keehippe goꞌꞌiyoogaa eti akeekoosona. Neeni tumaa erennaba gidiyaakko ne deꞌoy ay mala gidanaakko mata wode qoppadii? Nuuni Yihoowappe tamaaridoogan demmido gita anjjotuppe amaridaageeta wotti dentti qoppiyoogee, mishiraachoy keehippe goꞌiyoogaa ubbatoo hassayanaadaaninne hegaa haratussi mishettidi yootanaadan maaddees.

Xoossaappe Tamaariyoogee Keehi Gita Maata

3. Yihooway polo gidenna asaa naata tamaarissanau koyiyoogaa aybin erana danddayiyoo?

³ Yihooway ba kehatettan polo gidenna asaa naata tamaarissanau koyees. Isiyaasa 54:13n deꞌiya hiraagay: “Ne attuma naata ubbaa GODAI tamaarissana; ne naatu sarotettaikka darana” yaagidi ayyaanan tiyettida Kiristtaanetubaa yootees. Hegan deꞌiya baaso siraatay Kiristtoosa ‘hara dorssatussikka’ hanees. (Yohaannisa 10:16) Nu wodiyan polettiiddi deꞌiya issi hiraagan hegee qoncciis. Ubba kawotettatuppe asay tumu goynuwaakko zulanaagaa Isiyaasi ajjuutan beꞌiis. Eti issoy issuwau: “Haayite! GODAA deriyaa, Yaaqooba Xoossaa Beeta Maqidasiyaa ane pude kiyoos. I koyiyoogaadan nuuni baana mala, i nuna ba ogiyaa tamaarissana” yaagiyoobadan i yootiis. (Isiyaasa 2:1-3) Yihoowappe tamaariyoogee ayba gita maatee!

4. Yihooway baappe tamaariyaageeti ay oottanaadan koyii?

⁴ Nuuni Yihoowappe tamaaranau ay oottana koshshii? Issi uri ashkke gidiyoogee hegau koshshiya waannaba. Mazamuraawee Daawiti: “GODAI kehanne suure; . . . ashkketa ba ogiyaa tamaarissees” yaagidi xaafiis. (Mazamure 25:8, 9) Yesuusi qassi: “Ta Aawau, saluwaa sa7aa Godau, neeni hagaa aadhdhida eranchchatuppenne akeekanchchatuppe genttada, erenna naatussi qonccissido gishshau, nena galatais” yaagiis. (Luqaasa 10:21) “Banttana kaushshiyaageetuyyo aaro kehatettaa” immiya Xoossaakko shiiqanau koyikkii?—1 PHeexiroosa 5:5.

5. Nuuni Xoossaa eraa demmana danddayidoy aybiinee?

⁵ Nuuni tumaa erana danddayidoy nu aadhida eratettaanee? Akkay. Nuuni nurkka Xoossaa eraa demmanau mule danddayokko. Yesuusi: “Tana kiittida ta Aawai taakko ehiido asappe attin, taakko yaanau danddayiya asi baawa” yaagiis.  (Yohaannisa 6:44) Sabbakiyo oosuwaanne geeshsha ayyaanaa baggaara Yihooway “kawotettatu ubban de7iya” aquwaa, giishin dorssa mala asata ehiiddi deꞌees. (Hagga 2:7) Yihooway ba Naꞌꞌaakko ehiidoogeetuppe neeni issuwaa gidiyoogan galatikkii?—Ermmaasa 9:23, 24 nabbaba.

Xoossaappe Demmiyo Timirttee Deꞌuwaa Laammees

6. ‘GODAA eraa’ demmiyoogan asay ayba loꞌꞌo hanotan laamettana danddayii?

⁶ Nu wodiyan asaa eeshshay laamettiiddi deꞌiyo hanotaa Isiyaasa hiraagay loꞌꞌo leemisuwan qonccissees. Kase makkalancha gidida asati saro asa gididosona. (Isiyaasa 11:6-9 nabbaba.) Zariyaa, biittaa, sheeshshaa woykko wogaa dummatettaappe denddidaagan issi wode issoy issuwau morkke gididaageeti issippetettan deꞌiyoogaa tamaaridosona. “Eti bantta bisuwaa marasha” kessanau qoxxiyoogaa malabaa oottidosona. (Isiyaasa 2:4) Eti hegaa mala maalaalissiya hanotan laamettanaadan oottiday aybee? Asay ‘GODAA eraa’ demmiisinne he eraa ba deꞌuwan oosuwan peeshshiis. Xoossaa ashkkarati polo gidana xayikkokka, saꞌa yuushuwan tumu ishatettan issippetettaa medhidosona. Saꞌa yuushuwan mishiraachuwau asay loꞌꞌo zaaruwaa immidoogeenne hegan beettida loꞌꞌo ayfee Xoossaappe tamaariyoogan demmiyo goꞌꞌaa qonccissees.—Maatiyoosa 11:19.

7, 8. (a) Xoossaa timirttee maaddin asay laalido ‘qatotuppe’ issoti issoti awugeetee? (b) Xoossaa timirttee Yihoowa sabissiyoogaa bessiyay aybee?

⁷ Kiitettida PHauloosi Xoossaa ashkkaratu oosuwaa ayyaana olan leemisiis. I: “Nuuni olettiyo toorai ha sa7aagaa gidenna. SHin qatuwaa laalanau wolqqaara de7iya Xoossaa tooraa. Nuuni asa qofa xaissoos; qassi Xoossaa eratettaa bolli denddidi xubbiya otoro qofa ubbaa laaloos” yaagidi xaafiis. (2 Qoronttoosa 10:4, 5) Xoossaa timirttee asaa laꞌa kessiyo ‘qatotuppe’ amaridaageeti awugeetee? Amarida leemisoti, worddo timirttee, mala ammanoynne asa eray kaalettiyo deexo toohuwaa. (Qolasiyaasa 2:8) Xoossaa timirttee asay iita meeziyaa xoonanaadaaninne Xoossaa ufayssiya eeshshaa dichanaadan maaddees. (1 Qoronttoosa 6:9-11) He timirttee so asaa deꞌoy giiganaadan oottees. He timirttee hidooti baynnaageetu deꞌoy tumu halchoy deꞌiyoogaa gidanaadan oottees. Ha wodiyan koshshiyay hegaa mala timirttiyaa.

⁸ Kaallidi deꞌiya temokroy bessiyoogaadan, asay dichanaadan Yihooway maaddiyo issi eeshshay ammanettiyoogaa. (Ibraawe 13:18) Hindde biittan deꞌiya issi maccaasiyaa Geeshsha Maxaafaa xannaꞌada, guyyeppe xammaqettennan aassiyaaro gidaasu. Issi gallassi, Kawotettaa Addaraashaa keexxiyo sohuwaappe simmaydda otobisee eqqiyoosaa matan saꞌaappe hosppun xeetu Amarkkaa doolaariyaa kessiya worqqaa alleequwaa demmaasu. A hiyyeesa gidikkokka, a godaa demmidi immanaadan worqqaa xaabiyaa efaada polisiyau immaasu. Yan deꞌiya polisetu halaqay ba beꞌiyoobaa ammanibeenna! Guyyeppe hara polise halaqay, “Worqqaa neessi ekkabeennay aybissee?” giidi o oychiis. A, “Geeshsha Maxaafaa timirttee tana laammiis; yaatiyo gishshau, haꞌꞌi taani ammanettiya asa” yaagada yootaasu. I garamettidi, iira xaabiyaa biida Kiristtaane cimaayyo: “Ha biittan 38 miilooniyaappe dariya asay deꞌees. Ha maccaaseedan hananaadan intte tammu asa maaddana danddayiyaakko, hegee keehi gitabaa” yaagiis. Xoossaa timirttee miilooniyan qoodettiya asaa deꞌuwaa laammidoogaa qoppiyo wode, nuuni Yihoowa galatanaadan oottiya daro gaasuwaa akeekoos.

9. Asaa deꞌoy keehippe laamettana danddayiyoy ayba ogiyaanee?

⁹ Xoossaa Qaalaayyo deꞌiya laammiyo wolqqaynne Yihooway ba geeshsha ayyaanaa baggaara immiyo maadoy, asaa deꞌoy keehippe laamettanaadan oottees. (Roome 12:2; Galaatiyaa 5:22, 23) Qolasiyaasa 3:10y, “Xoossai, a medhdhidaagee, bana milatissanaunne baayyo de7iya eratetta ubbaa immanau, ubba wode ooraxissiyo ooratta meretaa” maayanaadan yootees. Xoossaa Qaalay, Geeshsha Maxaafay yootiyoobay, issi ura wozanan tumuppe aybi deꞌiyaakko qonccissees; qassi a qofaanne hanotaa i xeelliyo  ogiyaakka laammana danddayees. (Ibraawe 4:12 nabbaba.) Issi uri Geeshsha Maxaafaa tumu eraa demmiyoogaaninne Yihoowa geeshshatettaa maaraara moggottidi deꞌiyoogan, Xoossaa dabbo gididi, merinaa deꞌuwau hidootaa wottana danddayees.

Yihooway Nuna Sinttanaa Wodiyau Giigissees

10. (a) Sinttanaa wodiyau nuuni giigettanaadan maaddana danddayiyay Yihoowa xalaala gidiyoy aybissee? (b) Mata wode kumetta saꞌan gakkana wolqqaama laamee aybee?

¹⁰ Yihooway mata wode yaanabaa eriyo gishshau, sinttanaa wodiyau nuuni giigettanaadan maaddana danddayiyay a xalaala. Asaa naatu sinttanaa wodee ay mala gidanaakko i erees. (Isiyaasa 46:9, 10) Geeshsha Maxaafaa hiraagay, “GODAA gita gallassai” matidoogaa yootees. (Sofonaasa 1:14) He gallassaa xeelliyaagan, Leemiso 11:4n deꞌiya: “Hanqquwaa gallassi duretettai go77enna; shin xillotettai haiquwaappe ashshees” yaagiya qaalay polettana. Yihooway Seexaanaa alamiyaa pirddiyo wodee gakkiyoode, keehippe koshshiyaabay Xoossaa ufayssiyoogaa. Miishshi he wode aynnekka goꞌꞌenna. Hizqqeela 7:19y: “Eti bantta biraa ogiyan olana; eta worqqaikka tunabaa gidana” yaagees. Nuuni hegaa kaseti eriyoogee haꞌꞌi aadhida eratettan kuuyanaadan maaddees.

11. Xoossaa timirttee nuuni sinttanaa wodiyau giigettanaadan maaddiyo issi ogee aybee?

¹¹ Xoossaa timirttee sinttaara yiya Yihoowa gallassau nuuni giigettanaadan oottiyo qoncce ogee, bessiyaabaa kaseyanaadan nuna maaddiyoogaa. Kiitettida PHauloosi Ximootiyoosayyo: “Ha77i ha wodiyan dure gidiyaageeti otorettennaadaaninne . . . de7o Xoossan ammanettanaagaappe attin, aadhdhiya duretettan eti ammanettennaadan, eta azaza” yaagidi xaafiis. Nuuni dure gidana xayikkonne, Xoossaa ayyaanay denttettin xaafettida ha zoriyan goꞌettana danddayoos. Hegaadan ammanettiyoogee ay gujjii? Aquwaa demmanau baaxetiyoogaappe, “lo77obaa oottanaadan,” qassi “lo77o oosuwan duretanaadan” baaxetana koshshees. Nu deꞌuwan ayyaanaabaa kaseyiyoogan nuuyyo ‘sinttanau mino baaso gidiya miishshaa shiishshoos.’ (1 Ximootiyoosa 6:17-19) Hegaadan ba goꞌꞌaa yarshshiyo deꞌoy bessiya kuushshaa kuuyiyoogaa qonccissees. Ayssi giikko, “Issi urai sa7an de7iya ubbabaa bau shiishshidi, ba shemppuwaa bashshikko, a ai maaddanee?” (Maatiyoosa 16:26, 27) Yihoowa gallassay matattidoogaa qoppiyo wode, nuuni ubbay: ‘Taani miishshaa dagayiyoy awaanee? Taani haarettiyoy Xoossaasseeyye miishshaassee?’ yaagidi nuna oychana koshshees.—Maatiyoosa 6:19, 20, 24.

12. Issoti issoti nu haggaazuwaa xaasayidi xeelliyaaba gidikko, nuuni hidootaa qanxxana koshshennay aybissee?

¹² Xoossaa Qaalan qonccida ‘loꞌꞌo oosotuppe’ Kiristtaanetussi keehi koshshiyaagee, Kawotettaabaa sabbakiyoonne erissiyo ashkkara oottiyo, deꞌuwaa ashshiya oosuwaa. (Maatiyoosa 24:14; 28:19, 20) Koyro xeetu layttan hanidaagaadan, issoti  issoti nu haggaazuwaa toochana danddayoosona. (1 Qoronttoosa 1:18-21 nabbaba.) Gidikkokka, hegee nuuni yootiyoobau deꞌiya goꞌꞌaa laammenna; qassi ubba asay wodee wuriichennan hegaa ammaniyo injjiyaa demmanaadan oottiyoogee keehippe koshshiyoogaa laafettenna. (Roome 10:13, 14) Harati Xoossaa timirttiyaappe goꞌettanaadan nuuni maaddiyoode keehi daro anjjuwaa demmoos.

Yarshsho Oottiyo Wode Yihooway Anjjees

13. Kiitettida PHauloosi mishiraachuwaa gishshau yarshshidobay aybee?

¹³ Kiitettida PHauloosi Kiristtaane gidanaappe kase, Ayhuda siraatan hayttatanau loohiiddi takkiis. I keehippe erettida, Higgiyaa asttamaariyaa Gamaaliyaalappe tamaaranau, ba yelettido katamaa Xarsseeseppe Yerusalaame biis. He wode ayyo layttay 13ppe darennaba malatees. (Oosuwaa 22:3) Guyyeppe, PHauloosi ba wodiyan erettida asa gidiis; qassi i hegaa aggennan kaallidaba gidiyaakko, Ayhuda timirttiyan erettida asa gidana danddayees. (Galaatiyaa 1:13, 14) I mishiraachuwaa ammanidi ekkido wode, he ubbabaa ba dosan aggibayis. PHauloosi ba kuuyido kuushshan zilꞌꞌettidee? Zilꞌꞌettibeenna. I: “Taani ta Godaa Kiristtoos Yesuusa eriyoogee ubbabaappe keehi aadhdhiyo gishshau, ubbabaa tana mulekka go77ennabaadan qoodaas; taani a gishshau ubbabaa yegga bayaas. . . . Ubbabaa wora olidobaadan qoodais” yaagidi xaafiis.—Piliphphisiyuusa 3:8, 9.

14, 15. Nuuni Xoossaara ‘issippe oottiyoogan’ ayba anjjo demmiyoo?

¹⁴ PHauloosaagaadan, ha wodiyan deꞌiya Kiristtaanetikka mishiraachuwaa sabbakanau bantta goꞌꞌaa yarshshoosona. (Marqqoosa 10:29, 30) Hegaadan oottiyoogan nuussi pacciyaabi deꞌii? Doomettan denttido Robertti giido kaallidi deꞌiyaabay darotu qofaara issi mala: “Taani aybanne zilꞌꞌettikke. Kumetta wodiyaa haggaazoy taani ufayttanaadaaninne woppaa demmanaadan, qassi Yihooway ‘keha gidiyoogaa xeella beꞌanaadan’ oottiis. Taani ayyaanaabaa hoolliyaa gakkanau aquwaabaa yarshshido payduwan, yarshshidobaappe aaruwaa Yihooway tana ubbatoo anjjiis. Hanotay taani aynnekka yarshshabeennaba mala. Ubba aadhiyaaba demmaas!”—Mazamure 34:8; Leemiso 10:22.

¹⁵ Sabbakayddanne tamaarissaydda amarida wodiyaa takkidaba gidikko, Yihooway keha gidiyoogaa xeella beꞌiyo injjiyaa neenikka demmidoogee sirissenna. Neeni mishiraachuwaa sabbakaydda Yihoowa ayyaanaa maaduwaa akeekido wodee deꞌii? Harati mishiraachuwaa ufayssan ekkanaadan Yihooway eta wozanaa dooyidoogaa neeni akeekido wodee deꞌii?  (Oosuwaa 16:14) Ne haggaazuwaa aassanaadan ogiyaa dooyiyoogaana gidana danddayees, xubbiyaabaa xoonanaadan Yihooway nena maaddido wodee deꞌii? Nena metoy gakkin, neeyyo wolqqay wuridabadan siyettido wode, neeni ayyo oottiyoogaa aggennaadan Yihooway nena maaddido wodee deꞌii? (Piliphphisiyuusa 4:13) Nu haggaazuwaa poliyoode Yihooway nuna maaddiyoogaa beꞌiyo wode, i nuuyyo qonccidi beetteesinne akko keehi shiiqidoogee nuuyyo siyettees. (Isiyaasa 41:10) Gita ooso gidida Xoossaa timirttiyan aara ‘issippe oottiyaageetuppe’ issuwaa gidiyoogee anjjo gidennee?—1 Qoronttoosa 3:9.

16. Xoossaa timirttiyaara gayttidaagan neeni baaxetiyo baaxiyaanne yarshshiyoobaa xeelliyaagan neeyyo aybi siyettii?

¹⁶ Daro asay ba deꞌo layttan adussa wodiyau takkiyaabaa polanau amottees. Ha alamiyan gita ooso geetettiyaabaykka darotoo sohuwaara dogettiyoogaa beꞌida. Gidikkonne, Yihooway ba sunttaa geeshshiyoogaara gayttidaagan ha wodiyan oottiyoobay a asaa taarikiyan ubbatoo dogettennaba gidana. He oosoy merinau hassayettana. (Leemiso 10:7; Ibraawe 6:10) Harata Yihoowabaa tamaarissiyo, dogetti attenna oosuwaa oottiyo maataa xoqqu oottidi xeelliyaageeta gidoos.

Woygada Zaaruutii?

• Yihooway baappe tamaariyaageeti ay oottanaadan koyii?

• Xoossaa timirttee asaa deꞌuwaa laammiyoy ayba ogiyaanee?

• Harati Xoossaa timirttiyaappe goꞌettanaadan maaddiyoogan nuuni anjjettidoy ayba ogetuunee?

[Questions]

[Picture on page 26]

Yihoowappe tamaaridaageeti saꞌa yuushuwan tumu ishatettan issippetettaa medhidosona

[Picture on page 27]

Xoossaara ‘issippe oottiyaageetuppe’ issuwaa gidiyoogee anjjo gidennee?