SHemppuwaa Tammanne Isiiniya

Xoossay Tuggaa Aybissi Coꞌꞌu Giidi Xeellii?

Alamiyan deꞌiya tuggaa ehiiday Xoossayiyye?

Edene ataakiltte sohuwan ayba oyshi denddidee?

Tuggay asaa naatu bolli gattidobaa Xoossay waatidi giigissanee?

1, 2. Asay ha wodiyan ayba tuggaa beꞌiiddi deꞌii? Daro asay hegaappe denddidaagan woygidi oychchii?

 OLAY darotoo qohiyo biittan denddida issi wolqqaama olan, shaꞌan qoodettiya saro maccaasaynne naati hayqqidaageeta issippe moogidosona. Eti moogettido ollaa yuushuwan maalatati eqqidosona. He malaatatau ubbaa bolli xaafettida xuufee: “Aybissi?” yaagiyaagaa. Issi keehi michchiyaabay gakkido gaasoy erettennan ixxiyo wode, asay hegaadan giidi oychchees. Olan, bashshan, harggiyan woy danuwan siiqiyo asi hayqqiyo wode, keettay laalettiyo wode woy hara hanotan bana wolqqaama tuggay gakkiyo wode, asay azzanidi hegaadan giidi oychchees. Hegaa mala keehi azzanttiyaabay ba bolli aybissi gakkidaakko asay eranau koyees.

² Xoossay tuggaa aybissi coꞌꞌu giidi xeellii? Xoossaa Yihooway keehi wolqqaamaa, siiqiyaagaa, eranchchaanne suure pirddiyaagaa gididaashin, saꞌay aybissi hagaa keena ixuwaaninne pirddaa pacan kumidee? Hagaa malabay nenakka qofissi erii?

3, 4. (a) Xoossay tugaa coꞌꞌu giidi xeelliyoy aybissakko oychchiyoogee bala gidennaagaa bessiyay aybee? (b) Iitatettaabaunne tuggaabau Yihoowassi aybi siyettii?

³ Xoossay tuggaa aybissi coꞌꞌu giidi xeelliyaakko oychchiyoogee balee? Issi issi asay hegaa mala oyshaa oychchiyoogee ammanoy laafa gidiyoogaa woykko Xoossaa bonchchennaagaa bessees  giidi qoppees. Gidikkonne, neeni Geeshsha Maxaafaa nabbabiyo wode, Xoossaayyo yayyiya ammanettida asatikka hegaadan oychchidoogaa beꞌana danddayaasa. Lemisuwau, hananabaa yootiya Imbbaaqoomi, Yihoowa: “Ha naaquwaa tana aissi bessai? Mooruwaa xeellaidda neeni aissi co77⁠u gaada danddayai? Bashshainne makkalai ta sinttaana; waretainne ooshshai biitta ubban dariis” yaagidi oychchiis.—Imbbaaqooma 1:3.

⁴ Hegaa mala oysha oychchido gishshau, Yihooway hananabaa yootiya ammanettida Imbbaaqooma toochchidee? CHii. Hegaappe, Imbbaaqoomi ba suuretettan oychchido oyshati Geeshsha Maxaafan xaafettanaadan Xoossay oottiis. Xoossay, i hanotaa geeshidi eranaadaaninne wolqqaama ammanoy ayyo deꞌanaadan maaddiis. Yihooway neessikka hegaadan oottana koyees. Geeshsha Maxaafay, ‘i neeyyo qoppiyoogaa’ tamaarissiyoogaa hassaya. (1 PHeexiroosa 5:7) Xoossay iitatettaanne hegee ehiyo tugaa, oogaappenne keehi aaruwan ixxees. (Isiyaasa 55:8, 9) Yaatin alamiyan tuggay hagaadan aybissi daridee?

TUGGAY HAGAA KEENA AYBISSI DARIDEE?

5. Tuggay gakkiyoy aybissakko qonccissanau asay issitoo issitoo woygii? SHin Geeshsha Maxaafay ay tamaarissii?

⁵ Tuggay hagaa keena daridoy aybissakko eranau, haymaanootiyaa  kaalettiyaageetanne tamaarissiyaageeta asay oychchees. Darotoo demmiyo zaaroy, tuggay gakkiyoy Xoossaa shene gidiyo gishshataassa; i asaa gakkiya hanttaarabaa gujjin hanettiyaaba ubbaa beni kuuyiis yaagiyaagaa. Daro asay, Xoossay akeekanau metiyaabaa oottiyoobadan, woy qassi i naata gujjidi asay banaara saluwan deꞌana mala hayqqanaadan oottiyoobadan yootiyoogaa siyoosona. Gidoppe attin, neeni tamaaridoogaadan Xoossaa Yihooway iitabaa mule oottenna. Geeshsha Maxaafay: “Ubbaa Danddayiya Xoossai iitabaa mulekka oottenna” yaagees.—Iyyooba 34:10.

6. Daro asay, alamiyan deꞌiya tuggaa Xoossan gaasoyiyo balaa oottiyoy aybissee?

⁶ Asay alamiyan deꞌiya tugga ubbaa Xoossan gaasoyiyo balaa aybissi oottiyaakko eray? Daro hanotan eti Ubbaa Danddayiya Xoossaa hegau gaaso oottiyoy, ha alamiyaa tumuppe haariyay a giidi qoppiyo gishshataassa. Eti Geeshsha Maxaafay tamaarissiyo keehi koshshiya, eranaukka metenna tumaa erokkona. Neeni ha maxaafan SHemppuwaa 3n he tumaa tamaaradasa. Ha alamiyaa tumuppe haariyaagee Seexaanaa Dabloosa.

7, 8. (a) Alamee bana haariyaagaa eeshshaa waatidi bessii? (b) Asaa naatu polotetta pacay, ‘ubbabay qoppennan gayttiyoogeenne wodee oottiyoobay’ tuggaa waatidi gujjidee?

⁷ Geeshsha Maxaafay: ‘Ha mule saꞌay xalahe halaqan haarettees’ yaagidi qonccissi yootees. (1 Yohaannisa 5:19) Neeni qoppiyo wode hegee gaanau bessiyaaba gidennee? Ha alamee, ‘saꞌa ubbaa balettiya’ ayyaana meretaa eeshshaa bessiiddi deꞌees. (Ajjuutaa 12:9) Seexaanay keehi ixxiyaagaa, cimmiyaagaanne meqetti baynnaagaa. Yaatiyo gishshau i haariyo alamee, ixoy, cimoynne iitatettay kumidoogaa. Tuggay hagaa keena darido issi gaasoy hegaa.

⁸ Tuggay darido naaꞌꞌantto gaasoy, SHemppuwaa 3n qonccidaagaadan, Edenen makkalay denddoosappe doommidi asaa naati polo gidenna nagaranchcha gidido gishshataassa. Nagaranchcha asay harata haaranau baaxetiyo gishshau, hegee olaa, huqqunnaanne tuggaa kaalettees. (Eranchchaa 4:1; 8:9) Tuggau  heezzantto gaasoy, “ubbaikka qaadainne [“qoppennan gayttiyaabaynne,” NW] wodee oottoogaadan” haniyo gishshataassa. (Eranchchaa 9:11) Haariyaagee Yihoowa gidenna ha alamiyan, iita wode iita sohuwan deꞌido gishshau, asaa bolli tuggay gakkana danddayees.

9. Yihooway tuggay deꞌishin coꞌꞌu giidi xeellido loꞌꞌo gaasoy deꞌiyoogaa nuuni ammaniyoy aybissee?

⁹ Xoossay tuggaa ehibeennaagaa eriyoogee minttettiyaaba. I olau, danuwau, huqqunnau gido, meretaaban yiya asaa tuggan yeggiya bashshau gaaso gidenna. Gidikkonne, Yihooway ha ubba tuggay gakkiyo wode aybissi coꞌꞌu giidaakko eranau bessees. I Ubbaa Danddayiyaagaa gidikko, hegaa essanau ayyo wolqqay deꞌees. Yaatin i aybissi guyye gii? Nuuni abaa erido, siiqiya Xoossay hegaa oottido loꞌꞌo gaasoy deꞌana bessees.—1 Yohaannisa 4:8.

KEEHI KOSHSHIYA OYSHAY DENDDIIS

10. Seexaanay ayba oysha denttidee? Waatidi denttidee?

¹⁰ Xoossay tuggaa coꞌꞌu giidi xeelliyo gaasuwaa eranau, beni tuggay doommido wodiyaa qoppana bessees. Seexaanay Addaameenne Hewaana Yihoowayyo azazettennaadan oottido wode, keehi koshshiya oyshay denddiis. Seexaanay Yihoowa wolqqaa bolli oyshaa denttibeenna. Ubba Yihoowa wolqqaayyo zawi baynnaagaa Seexaanay erees. Seexaanay oyshaa denttidoy, Yihoowa haaruwaa maataa bollaana. Xoossay baassi haarettiyaageeta loꞌꞌobaa diggiya worddanchchaa giidi, Seexaanay Yihoowa haaroy iita giidi a mootiis. (Doomettaabaa 3:2-5) Seexaanay hegan, asay Xoossaa haaruwaappe gaxi kiyidi loꞌꞌoba demmanaba milatissiis. Hegee ubbaappe bollaara haariyo Yihoowa maataa bolli eqettiyoogaa.

11. Yihooway Edenen makkalidaageeta xayssibeennay aybissee?

¹¹ Addaameenne Hewaana Yihoowa bolli makkalidosona. Hegaadan oottiyoogan eti: ‘Nuna Haariyaagee Yihoowa gidana koshshenna. Nuuni iitaa kehaa nu huuphessi kuuyana danddayoos’ yaagidosona. Yihooway he yohuwaa waatidi giigissanee?  I, makkalanchchati oottidobay bala gidiyoogaanne ba ogee tumu aybippenne aaro gidiyoogaa yuushshi qoppiya ba meretati ubbay tamaaranaadan waatidi oottanee? Issi uri Xoossay makkalanchchata xayssidi hara asata medhdhana bessees gaana danddayees. SHin Yihooway saꞌaa, Addaamenne Hewaani zerettan kunttanau halchchidoogaa yootiis; qassi eta gannate gidida saꞌan wottanau koyiis. (Doomettaabaa 1:28) Yihooway ba halchchuwaa awudenne polees. (Isiyaasa 55:10, 11) Hegaappe haray, Edenen makkalidaageeta xayssiyoogee, Yihooway haariyo maataa bolli denddida oyshaa zaariyaaba gidana danddayenna.

12, 13. Seexaanay ha alamiyaa haaranaadaaninne asay asaa ayssanaadan Yihooway aybissi coꞌꞌu giidi xeellidaakko leemisuwan yoota.

¹² Ane issi leemisuwaa beꞌoos. Issi asttamaaree ba tamaaretussi issi deexo hisaabiyaa oottiyo ogiyaa yootiiddi deꞌiyaabadan qoppa. Issi goobaa gidida makkalanchcha tamaaree, asttamaaree hisaabiyaa oottanaadan tamaaretussi yootiyo ogee bala gees. He tamaaree, asttamaaree danddayenna giyoogaa bessiya ogiyan, i he hisaabiyaa oottiyo keehi loꞌꞌo ogiyaa eriyoogaa yootees. Amarida tamaareti he tamaaree giyoobay tuma gi qoppidi, etikka makkalidosona. Asttamaaree ay oottana bessii? Makkalanchcha  tamaareta kifiliyaappe kessikko, hegee hara tamaaretu bolli ay kaalettanee? Eti he tamaareenne aara hashetidaageeti likke gidiyoogaadan ammanokkonaa? Kifiliyan deꞌiya hara tamaareti ubbay, asttamaaree ba balay qonccennaadan yayyiis gi qoppidi, a bonchchennan aggana danddayoosona. SHin asttamaaree, hisaabiyaa oottiyo ogiyaa he makkalanchcha tamaaree kifiliyaa tamaaretussi bessanaadan oottiis giidi qoppoos.

¹³ Yihooway he asttamaaree oottiyoogaa milatiyaabaa oottiis. Yohoy Edenen makkalidaageeta xalaalaa xeelliyaaba gidennaagaa hassaya. Miilooniyan qoodettiya kiitanchchati hanettiyaabaa beꞌiiddi deꞌoosona. (Iyyooba 38:7; Daaneela 7:10) Yihooway denddida makkalaa oyqqido ogee, he kiitanchchata ubbaanne wurssettan yuushshi qoppiya meretata ubbaa bochchana. Yaatin Yihooway ay oottidee? I, Seexaanay asaa naata haaridi ba haaruwaa bessanaadan oottiis. Yihooway, asaa naatikka banttana Seexaanay kaalettin ayssanaadan coꞌꞌu giidi xeelliis.

14. Yihooway asaa naati banttana banttarkka haaranaadan coꞌꞌu giidi xeellanau qofaa qachchidoogee ayba goꞌꞌaa ehaanee?

¹⁴ Leemisuwan odettida asttamaaree, makkalanchcha tamaareenne a miyyiyan eqqida tamaareti balidoogaa erees. SHin eti bantta qofaa oosuwan bessanaadan oottiyoogee tamaareta ubbaa goꞌꞌanaagaakka i erees. Makkalanchchatussi hanennan ixxiyo wode, suure tamaareti ubbay tamaareta kaalettiyo eray deꞌiyoy, asttamaariyaa xalla gidiyoogaa akeekoosona. Eti, asttamaaree hegaappe guyyiyan makkaliya ura oonanne kifiliyaappe kessiyoy aybissakko akeekoosona. Hegaadankka, Seexaanaassinne aara makkalidaageetussi hanennan ixxidoogaanne asaa naati banttana banttarkka ayssana danddayennaagaa beꞌidi, suure gidida asaa naati ubbaynne kiitanchchati goꞌettanaagaa Yihooway erees. Beni wode deꞌida Ermmaasaagaadan, etikka: “Abeet GODAU, asa de7⁠oi he aawussi buzo gidennaagaanne ba hemetaa suurissanaagee aawu shene gidennaagaa taani erais” yaagiya keehi goꞌꞌiya tumaa erana.—Ermmaasa 10:23.

 HAGAA KEENA AYBISSI GAMꞌꞌIDEE?

15, 16. (a) Tuggay hagaa keena wodiyaassi gamꞌꞌanaadan Yihooway aybissi coꞌꞌu giidee? (b) Yihooway iita danuwaa mala hanotata aybissi teqqibeennee?

¹⁵ Gidikkonne, Yihooway tuggay hagaa keena gamꞌꞌanaadan aybissi coꞌꞌu giidee? Qassi iitabay hanennaadan i teqqennay aybissee? Leemisuwan odettida asttamaaree oottenna naaꞌꞌubata ane qoppa. Koyroy, makkalanchcha tamaaree ba qofaa shiishshishin diggenna. Naaꞌꞌanttoy, makkalanchchay baliyo wode giigissidi a maaddenna. Hegaadankka, Yihooway oottennan agganau qofaa qachchido naaꞌꞌubata qoppa. Koyruwan, Seexaanaynne a miyyiyan eqqidaageeti bantta qofay tumakkonne bessana malishin diggibeenna. Hegaa gishshau, wodiyaa immanau koshshiis. Asaa naati deꞌido shaꞌan qoodettiya laytta taarikiyan, asay bana barkka ayssiyo ubba ogiyaa mali beꞌiis. Asaa naati saynisiyaaninne harabatun guutta dichchaa bessidosona; shin pirddaa pacay, hiyyeesatettay, danoynne olay awudeegaappenne yaa dariis. Asaayyo haaranau ixettidoogee haꞌꞌi qoncciis.

¹⁶ Naaꞌꞌanttuwan, Seexaanay ha alamiyaa haaranaadan Yihooway a maaddibeenna. Leemisuwau, Xoossay iita danuwaa teqqidaba gidiyaakko, hegee makkalanchchatu qofaa kaafiyoogaa gidennee? Xoossay hegaadan oottidi, iitabi gakkennan asay bana barkka haarana danddayanabadan geella qoppana mala oottennee? Yihooway hegaadan oottidaba gidiyaakko, i worddoban hashettiyooba gidees. Gidoppe attin, “Xoossai worddotanau danddayenna.”—Ibraawe 6:18.

17, 18. Asaa haaroynne Seexaanaa sugettay gattido qohuwaa ubbaa Yihooway waatanee?

¹⁷ Gidoshin, Xoossaa bolli makkalido adussa wodiyan gakkida daro naaquwaabaa woygana danddyettii? Nuuni Yihooway ubbaappe wolqqaamaa gidiyoogaa hassayana bessees. Yaatiyo gishshau, tuggay asaa naatu bolli ehiidobaa ubbaa i xayssana danddayees, qassi xayssana. Nuuni tamaaridoogaadan, saꞌaa mooriyoogaa gishshaa saꞌaa Gannate oottiyo hanotay deꞌana. Nagaray kaalettidobay, Yesuusa wozuwaa yarshshuwan ammaniyoogaa  gaasuwan xayana; qassi hayqoy kaalettidobay dendduwaa gaasuwan laamettana. Xoossay hegaadan oottidi “xalahe halaqaa oosuwaa xaissanau” Yesuusan goꞌettana. (1 Yohaannisa 3:8) Hagaa ubbabaa Yihooway, bessiya wodiyan polana. A genccaappe denddidaagan nuuni tumaa tamaaridi ayyo haggaaziyo injjiyaa demmido gishshau, i kasetidi tangguwaa ekkibeennaagan ufayttana bessees. (2 PHeexiroosa 3:9, 10) He wodee gakkanaashin, Xoossay wozanappe goynniyaageeta minttidi koyiiddinne ha meto alamiyan gakkana danddayiya tuggaa ubbaa danddayanaadan eta maaddiiddi takkiis.—Yohaannisa 4:23; 1 Qoronttoosa 10:13.

¹⁸ Issoti issoti, Xoossay Addaamanne Hewaano makkalana danddayennaadan oottidi medhdhidaakko, ha ubba tuggay teqettana danddayenneeshin? giidi qoppana danddayoosona. He oyshaa zaaranau Yihooway neessi immido issi alꞌꞌo imotaa neeni hassayana bessees.

XOOSSAAPPE DEMMIDO IMOTAA WAATADA GOꞌETTUUTEE?

19. Yihooway nuussi ayba alꞌꞌo imota immidee? Nuuni hegaa ayssi xoqqu ootti xeellana bessii?

¹⁹ SHemppuwaa 5n beꞌidoogaadan, asay koyidobaa dooridi oottiyo maataara merettiis. Hegee ay mala alꞌꞌo imotakko akeekay? Xoossay qoodi baynna mehetanne doꞌata medhdhiis; eti yuushshi qoppennan, banttau imettida meretaadan simerettoosona. Xoossay nuna he mehetudan woykko doꞌatudan medhdhidaba gidiyaakko nuuni ufayttanee? CHii; nuuni ay mala asa gidanau, ay mala deꞌo deꞌanau, ay mala asaara dabbotanau koyiyaakko, hegaa  mala harabatakka dooranau demmido laꞌatettan ufayttoos. Amarida laꞌatetta demmidoogaa nuuni dosoos; qassi Xoossay nu hegaa demmanaadan koyees.

20, 21. Nuuni koyidobaa dooridi oottiyo maataa waatidi loꞌꞌo ogiyan goꞌettana danddayiyoo? Hegaadan oottana bessiyoy aybissee?

²⁰ Asay wozanappe gidennabaa oottiyooban Yihooway ufayttenna. (2 Qoronttosa 9:7) Leemisuwau: Yelida ura keehippe ufayssanay, issi naꞌi asi yootin “Ta nena siiqayis” yaagiyoogeeyye, ooninne odennan ba huuphe wozanappe hegaadan giyoogee? Yaatiyo gishshau denddiya oyshay, Neeni Yihoowappe demmido koyidobaa dooridi oottiyo maataa waatada goꞌettuutee? yaagiyaagaa. Seexaanay, Addaameenne Hewaana koyidobaa dooridi oottiyo maataa keehi iita ogiyan goꞌettidosona. Eti Xoossaa Yihoowa siyibookkona. Neenishin ay oottuutee?

²¹ Koyidobaa dooridi oottiyo maalaalissiya imotaa aybippenne aadhdhiya ogiyan goꞌettiyo injjiyaa demmadasa. Neeni Yihoowa miyyiyan eqqida miilooniyan qoodettiya haratuura gidana danddayaasa. Eti Seexaanay worddanchchanne haaranau keehippe ixettidoogaa gidiyoogaa bantta oosuwan qonccissidi, Xoossaa ufayssoosona. (Leemiso 27:11) Neenikka deꞌuwan suure ogiyaa kaalliyoogan hegaadan oottana danddayaasa. Hegee kaalliya shemppuwan qonccana.

GEESHSHA MAXAAFAY TAMAARISSIYOOBAA

▪ Alamiyan deꞌiya iita hanotaa ehiyay Xoossaa gidenna.—Iyyooba 34:10.

▪ Seexaanay Xoossaa worddanchchanne Baassi haarettiyaageeta loꞌꞌobaa diggees giidi, Yihooway haariyo maataa bolli oyshaa denttiis.—Doomettaabaa 3:2-5.

▪ Yihooway Masiyaa Kawotettan haariya ba Naꞌan goꞌettidi, asaa gakkiya tuggaa ubbaanne hegee kaalettiyo ubbabaa xayssana.—1 Yohaannisa 3:8.

[Oyshaa]

[Sinttaa 107n diya misiliyaa]

Yihooway tugga ubbaa xayssana

[Sinttaa 110n diya misiliyaa]

Tamaaree asttamaariyaappe eran aadhdhii?

[Sinttaa 113n diya misiliyaa]

Neeni tuggaa danddayanaadan Xoossay nena maaddana