1. Nnaamwi Yehova oryeene Muluku Oowerya Sotheene, exeeni onaalattula awe akina opaka?

YEHOVA ti Mpattuxa a itthu sotheene, yoowo onisuwela itthu sotheene ni orina owerya wuulupalexa. Yobi aanisuwela eyo. Nuumala Yehova omukoha Yobi voohimya sa itthu sipattuxale awe, Yobi aakhunle so: “Miyo kosuwela wira nyuwo munniwerya sothene ni wira khivo enojelanyu”. (Yobi 42:2) Nnaamwi Yehova oweryaka opaka khula etthu eniphavela awe ohikhaliheriwe ni mutthu, masi okhuma khalaixa owo onnaalattula akina wira amukhaliheryeke ovara yoolakela awe.

2. Muteko xeeni Yehova anvahale awe Yesu?

² Ohinatthi opattuxa itthu sikina, Yehova ampattunxe Mwanawe. Nuumala-vo, aahimulattula Mwaana owo wira omukhaliheryeke opattuxa itthu sotheene sikina, sa wiirimu ni vathi. (Yoh. 1:1-3, 18) Murummwa Paulo aahimuhimya Yesu oriki: “Mwa yowo Muluku òpattuxa itthu sothene wirimu ni vathí, itthu sinòneya n’iye sihinòneya,  eyo p’iyo: omwene n’uwerya n’utokwene ni malamulelo. Muluku òpattuxa sothene mwa Kristu: sothene sipattuxeriwe yowo”. (aKol. 1:15-17) Tivo, Yehova oomuttittimiha Mwanawe, onvahaka muteko wa opattuxa itthu ni aaleelaka atthu wira Mwaana owo tootthuneya vanceene wira yoolakela ya Muluku yiiraneye.

3. Etthu xeeni Yehova aamulattunle awe Adamu ovara, ni nthowa xeeni?

³ Yehova ohaalattula-tho apinaatamu wira avareke muteko ni yena. Mwa ntakiheryo, aahimweemererya Adamu wira ovahe masina inama. (Maph. 2:19, 20) Tthiri Adamu aahihakalala ni muteko aavahiwe awe, okhala wira anwerya osoma makhalelo a khula enama wira ovahe nsina nimphwanela. Yehova topattunxe inama, nto anwerya ovaha masina. Masi moophenta, yena aahimuhiyerya Adamu wira ovare muteko owo. Nave-tho Yehova aahinvekela Adamu wira wuncererye eParayiisu. (Maph. 1:27, 28) Moothananiha, moohipisa Adamu aahithanla ohiya ovara muteko ni Yehova, nto eyo yaahimukumiherya maxakha mwaneene ni osuulu awe.​—Maph. 3:17-19, 23.

4. Moota xeeni atthu akina yaakhalihenrye aya yootthuna ya Muluku?

⁴ Muhoolo mwaya, Yehova aahaalattula apinaatamu akina ovara muteko waarowa omaleliha yoolakela awe. Nowe aahiteka ekalawa, yeeyo yaamooponle yena ni emusi awe, okathi aakhumelenle awe Mutaaseke elapo yotheene. Moise aahiwoopola aIsarayeli wEjiitu. Yoxuwa aaheettiha nloko na Isarayeli mpakha okela Elapo Yooleiheriwa. Salomoni aahiteka etemplo oYerusalemu. Maria aahimuyara Yesu. Arumeyi otheene ala oororomeleya ni akina anceene, yaahivara muteko ni Muluku wira amalelihe yoolakela awe.

5. Muteko xeeni onivara ahu olelo, nto niireke Yehova aamuhiwerya ovara muteko owo mekhawe? (Nwehe elatarato yoopacerya.)

⁵ Olelo-va, Yehova onnivekela wira nikhaliheryeke vanceene Omwene wa oMesiya. Sookhala miteko sinceene sinikhaliherya Omwene. Miteko sikina pooti ohiweryaneyaka ovariwa ni maKristau otheene, masi otheene ahu nnoowerya ovara muteko wa olaleerya ihapari sa Omwene. Khahiyo wira Yehova aamuhiwerya ovara muteko owo. Yena anwerya waalaleerya atthu vathi-va, oryeene wiirimu. Yesu aahimmye wira Yehova anwerya wiiriha maluku onvuwiha Mwene a oMesiya. (Luka 19:37-40) Masi Yehova onnineemererya ‘ovara vamosá’ ni yena. (1 aKor. 3:9) Murummwa Paulo olempe so: “Okhala wira kinvara muteko vamosá ni Muluku, kinotumereryani wira muhikhalihé ethiru eparakha ya Muluku yakhenlyanyu”. (2 aKor. 6:1) Hiyo khanniphwanelela ovara muteko vamosa ni Muluku, tivonto eri eparakha yuulupale owo onnivaha awe. Nrowe noone mathowa anniiriha ohimya siiso.

6. Mwaana oopacerya a Muluku onitthokiherya sai okathi aavara awe ni Tiithi awe?

⁶ Okhuma khalai, arumeyi a Yehova annihakalala ovara muteko ni Muluku. Ohinatthi orwa valaponi, Mwaana a Muluku, aahimmye so: “Apwiya àkipattuxa, kikhalaka muraji . . . Miyo kari ni yowo, kinvarelaka miteko iye sothene: kanimusiveliha nihiku ti nihiku. Wanikittela murima okhala vamaithoni vawe okathi p’ukathi”. (Mir. 8:22, 30) Yesu aanihakalala ovara muteko ni Tiithi awe, mwaha wa miteko aavara awe ni osuwela wira Yehova aanisiveliwa ni yena. Ankhi hiyo?

7. Xeeni muteko woolaleerya onnihakalaliha aya?

⁷ Yesu ohimmye wira ole onivaha onnitepa ohakalala onvikana ole onivahiwa.  (Mit. 20: 35) Noohakalala mwaha woosuwela ekeekhai, nave ninnihakalala mwaha wa waasuweliha akina ekeekhai eyo. Vaavo vanilaleerya aya ekeekhai ya mBiibiliyani, ninnaaweha atthu anceene ahakalalaka wiixutta ekeekhai ya Muluku, amusomaka Biibiliya. Ninnihakalala vanceene waaweha arukunuxaka muupuwelo aya ni mikhalelo saya. Hiyo ninnisuwela wira muteko woolaleerya ihapari sooreera onnoopola ikumi. Atthu yaale anaakhulela ihapari iyo, enaphavela otthikela wataana ni Muluku, pooti ophwanya okumi woohimala. (2 aKor. 5:20) Niireke wookhala muteko mukina waarowa okhala woohakalaliha, onivikana waakhaliherya atthu ophwanya okumi woohimala muhoolo?

8. Nvahe matakiheryo anooniherya ohakalala onikhumelela mwaha wa ovara muteko vamosa ni Yehova.

⁸ Nnaamwi nihakalalaka mwaha woowi atthu annaakhela muhupi onilaleerya ahu, nave ninnihakalala-tho osuwela wira ninnimuhakalaliha Yehova ni osuwela wira onnixukhurela muteko onivara ahu. (Mmusome 1 aKorinto 15:58.) Marcos, yoowo onikhala wItalia, onihimya so: “Kinnihakalala vanceene osuwela wira kininvarela muteko Yehova, ohiya pinaatamu oowaakuva oliyala etthu epanke aka”. Vamosaru, Franco, yoowo-tho onirumeela wItalia onihimya so: “Yehova onnirumeela Nuulumo nawe ni soovaha somunepani, ophavelaka onuupuxerya wira onniniphenta ni wira khula etthu enipaka ahu yookhalana efaita, hata ikwaha sikina nihoonelaka siiso. Ti nthowa naya kinihakalala aka ovara muteko ni Muluku”.

9. Wataana xeeni yaarina aya Yehova ni Yesu, ni nthowa xeeni?

⁹ Okathi onivara ahu vamosa ni atthu anaaphenta ahu, ninnitepa wataana ni ninnaasuwela oratteene. Ninnisuwela soolukama saya ni itthu anipaka aya wira aphwanye soolukama iyo. Yesu aahivara muteko ni Yehova mwa iyaakha soohikontareya, nto yaahikhalana ompatthani woolipa ni ophentana waya waari wuulupale. Alavulaka sa wataana waya, Yesu aahimmye so: “Miyo n’Atithi nri mmosáru”. (Yoh. 10:30) Awo yaahiiraana tthiri, ni yaaniiwanana okathi yaavara aya muteko hoothe.

10. Moota xeeni muteko woolaleerya onniiriha awe wataana ni Muluku ni atthu akina?

¹⁰ Yesu aahinvekela Yehova wira aakhapelele awiixutti awe. Mwaha wa xeeni? Owo onihimya so: “Wira ekhalé mmosáru, sisale nyuwo ni miyo siryahu mmosáru pahi”. (Yoh. 17:11) Vaavo vanikhala ahu moovarihana ni malamulo a Muluku ni olaleerya ihapari sooreera, ninnisuwela mikhalelo sooloka sa Yehova. Ninniixutta nthowa naya varyaaya vooloka omuroromela yena ni otthara malakiheryo awe. Vaavo vanitepa ahu omwaattamela, yena onninaattamela. (Mmusome Yakobo 4:8.) Nave wataana wahu ni annihu onnilipa  mwaha woowi otheene ahu nookhalana itthu soohakalaliha ni mixankiho simosaru. Aayo, ninvara muteko hoothe, ninhakalala hoothe ni ninvilela hoothe. Murokora mmosa oniitthaniwa Octavia, yoowo onikhala oBretanhã, onihimya so: “Ovara muteko vamosa ni Yehova onnikiphwanyiha apatthani eekeekhai, maana nirina soolukama simosaru ni nintthara ephiro emosaru”. Niireke nyuwo munoonela siiso? Niireke waaweha akina yiimananihaka omuhakalaliha Yehova khoniwiirihani waaphenta atthu awo?

11. Exeeni enirowa onikhaliherya otepa wataana ni Yehova vamosa ni akhwiihu mparayiisu?

¹¹ Omphenta wahu Muluku ni annihu onnitepa olipa vano, masi onrowa otepa olipa elapo esya. Nkahaya muupuwele muteko woohakalaliha onirowa ahu ovaraka muhoolo. Ninrowa owaakhelaka atthu anceene anrowa ohihimuxiwa ni owiixuttiha iphiro sa Yehova. Ninrowa okhaliherya wira elapo ekhale eparayiisu. Miteko iyo khahiyo saamukhaani, masi vanrowa okhala voohakalaliha ovaraka muteko vamosa ni annihu, nihooleliwaka ni Omwene wa oMesiya, mpakha okhala atthu oomalela! Apinaatamu anrowa wataana yaaworu vamosa ni Muluku, yoowo onrowa waavaha apinaatamu itthu sotheene siniphavela aya.​—Esal. 145:16.

12. Muteko woolaleerya onnikhapelela sai?

¹² Nohaana okhapelela mukhalelo ahu womunepani. Okhala wira ninkhala elapo enilamuleliwa ni Satana, nto mwaha wookhala atthu oottheka, nto vannikhweya opacerya wuupuwelaka ntoko atthu a mulaponi. Munepa wa mulaponi pooti olikanaka ni maasi ootupa annikuxa eniroihaka mpantta mmosa ohinitthuna ahu orowa. Nto wira nihikhumpwe, nohaana wiimananiha okata wira nirowe opuro oniphavela ahu. Vamosaru, nohaana wiimananiha wira nihihapuxiwe ni munepa wa elapo ela ya Satana. Okathi onaalaleerya ahu atthu akina, hiyo ninniimananiha wuupuwelaka itthu sirina efaita, eyo piiyo, somunepani, ohiya wuupuwela itthu saarowa ohonona waamini wahu. (aFil. 4:8) Olaleerya onnilipiha waamini wahu, ni onninuupuxerya itthu Muluku onilaihenrye awe. Nave-tho sinninikhaliherya okhapelela mikhalelo sahu somunepani.​—Mmusome aÉfeso 6:14-17.

13. Munna mmosa wAustralia onoonela sai muteko woolaleerya?

¹³ Oluttuweliwa olaleerya ni itthu sikina somunepani, onniniiriha ohikhalana okathi woomakela wuupuwela mixankiho sahu, nto eyo enninikhapelela. Joel, yoowo onikhala wAustralia, onihimya so: “Muteko woolaleerya onnikikhaliherya wuupuwelaka makhalelo a mahiku ala. Onnikuupuxerya mixankiho sinaaphwanya atthu, ni mireerelo kiniphwanya aka mwaha wa otthara miruku sa Biibiliya. Muteko ola onnikikhaliherya weererya ovikaniha okhala oowiiyeviha; onnikivaha eparakha ya omuroromela Yehova ni anna ni arokora”.

14. Xeeni ovilela wahu mmuteko woolaleerya onooniherya aya wira munepa wa Muluku ori ni hiyo?

¹⁴ Olaleerya onninlipiherya wira munepa wa Muluku ori ni hiyo. Muupuwele ela: Moovahiwa muteko wa okawa iphaau soosiva mmuttettheni mwanyu. Masi khamunrowa oliviwa wala oliveriwa etthu. Hata vari siiso, atthu akina khaniphavela iphaau, nave akina khanisiveliwa woowehani mukawaka iphaau iyo. Niireke mwaarowa ovilela mpakha silini? Woonasa wene khimwaarowa ovara vanceene, okhala wira atthu khiyaarowa woonelaka vatthu wiimananiha wanyu. Masi anamunceene a hiyo ninnivilela iyaakha sinceene nilaleeryaka,  nihiliviwaka wala oliveriwa etthu, nnaamwi atthu akina aniveehaka ni ahoonelaka vatthu muteko ahu. Eyo khahiyo ethoonyeryo yoowi munepa wa Muluku ori ni hiyo?

15. Muteko woolaleerya onivarihana sai ni yoolakela Muluku erina awe ni apinaatamu?

¹⁵ Muteko woolaleerya ihapari sooreera onivarihana sai ni yoolakela Yehova orina awe ni apinaatamu? Yehova aaphavela wira apinaatamu akhaleke valaponi ahikhwaaka; nto hata Adamu atthenke ene, Yehova khoturunke muupuwelo awe. (Yes. 55:11) Yehova oopaka mareheryo wira apinaatamu yoopoliwe yoottheka ni okhwa. Yesu aahikhaliherya wiiraneya wa yoolakela eyo ya Yehova, aahirwa valaponi wira ovahe okumi awe wira owoopole apinaatamu oowiiwelela. Masi wira atthu amwiiweleleke Yehova, ahaana osuwela ele oniphavela awe. Nto Yesu aahiwiixuttiha atthu sooruma sa Muluku, ni aahaaruma awiixutti awe opaka etthu emosaru. Vaavo vanaakhaliherya ahu akina okhala apatthani a Muluku, hiyo ninvara muteko vamosa ni Muluku wira atthu anceene yoopowe.

16. Muteko woolaleerya onivarihana sai ni sooruma piili suulupale sa Muluku?

¹⁶ Okathi onaakhaliherya ahu akina ophwanya ephiro ya okumi woohimala, enooniherya wira ninnaaphenta atthu awo ni Yehova, yoowo “ontthuna wira yòpowe, esuwele ekekhai”. (1 Tim. 2:4) Nuumala okohiwa tiivi yaari yooruma yuulupalexa na Nlamulo na Moise, Yesu aakhunle so: “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene. Ela ti yoruma yulupalexa ni yopajerya. Yoruma yanenli, enlikana ni yopajerya, t’ila: ‘Mumphenteke mukhw’inyu ntoko sinìphentanyu’”. (Math. 22:37-39) Muteko woolaleerya onnooniherya wira ninniiwelela sooruma iya.​—Musome Miteko 10:42.

17. Munoonela sai eparakha erina anyu ya olaleerya ihapari sooreera?

¹⁷ Tthiri hiyo nooreelihiwa! Yehova oonivaha muteko onnihakalaliha, onniiriha wataana ni yena vamosa ni annihu, nave-tho onnikhapelela wataana wahu nuuwo. Nave enninivaha eparakha ya wooniherya omphenta wahu Muluku ni atthu akina. Nnaamwi makhalelo a arumeyi a Yehova avirikanaka khula opuro, masi otheene aya, akhale amiravo wala oowuuluvala, athaaciri wala oohaawa, arina ekumi yoolipa wala oowereiwa, anniphavelasa inamuna sa waaleela akina sookupali saya. Woonasa wene, munookupali ele enihimya murokora Chantel, a oFrança. Owo onihimya so: “Mukhulupale ooweryexa olumwenku wotheene, yoowo Opattunxe itthu sotheene, ni ori oohakalala, onnikiruma oriki: ‘Muroweke! Mwalavuleke nipuro naka, ni murima anyu wotheene. Kinimoovahani ikuru saka, Nuulumo naka Biibiliya, nikhaliheryo ninkhuma wiirimu, apatthani valaponi, kinoowiixuttihani, ni kinimoovahani malakiheryo khula okathi oniphavela anyu’. Tthiri ninnoona okhala eparakha yuulupale ovara etthu Yehova onnivekela awe ni ovaraka muteko vamosa ni Muluku!”