Anamathelana anilakela okhala hoothe moororomeleya, annoona ekasamento aya okhala etthu ehinimala. Nave oowanli aya anniroromela wira ole othelanne aya onoovikaniha ororomeleya, hata okathi wa mixankiho.

Anamathelana akina annivikaniha okhala hoothe mwaha woowi anookhanyereriwa ni apatthani wala amusi aya. Masi etthu yooloka, ovikaniha okhala hoothe mwaha wa niphento ni nttittimiho.

ELE BIIBILIYA ONIHIMYA AWE: “Mulopwana ahimwalané ni mwar’awe”.​—1 aKorinto 7:11.

“Mwaaphavelaka ommaleliha natiri a ekasamento anyu, khamunaakuvaka onanariwa. Munniweha mixankiho okhala etthu eniweryaneya ophuka ohiya etthu enrowa omaliha ekasamento”.​—Micah.

Okathi wa mixankiho, anamathelana oohiroromeleya pooti waakuvaka wuupuwela so: ‘Khinaapakeliwe okhala hoothe’, nto khiyaphavela manera wira amwalane.

“Atthu anceene annithelana yuupuwelaka wira ekasamento aya yaahikhumele saana, awo pooti omwalana. Nto ale anithelana yuupuwelaka omwalana, ororomeleya waya mukasamentoni onikhala woohilipa”.​—Jean.

MWIIKOHEKE SO:

Kiireke okathi ohiniiwanana ahu . . . 

• Kinnithanana mwaha wa othelana ni mutthu ola?

• Kinnipacerya wuupuwela moota itthu saarowa aya okhala kaathelanne ni mutthu mukina?

• Kiireke kinnihimya so: “Kinimoohiyani” wala “kinomphavela mutthu mukina onikoonela vatthu”?

Vakhala wira muhaakhula nikoho nimosa wira ‘aayo’, weeso muhaana opacerya olipiha ororomeleya mukasamentoni mwanyu.

MUTHOKORERYE MAKOHO ALA NI OLE OTHELANNE ANYU

• Niireke ororomeleya wahu mukasamentoni onnivukuwa? Vakhala wira ti siiso, mwaha wa xeeni?

• Nipakeke exeeni vano wira nlipihe ororomeleya wahu mukasamentoni?

MIRUKU

• Mmulepeleke ole othelanne anyu muhupi wa niphento.

• Mooniherye wira munniroromeleya, mpwehaka efootu ya ole othelanne anyu vameesa vanyu omutekoni.

• Mmuligareleke ole othelanne anyu khula nihiku muryeene omutekoni wala okathi muhinikhala anyu nipuro nimosa.

ELE BIIBILIYA ONIHIMYA AWE: “Yeyo Muluku ephitanyalyawe mutthu ahimwalanyihé-tho”.​—Matheyo 19:6.