• Othanliwa ni Muluku. “Nto ti yomi kimukilathihale mwen’aka . . . Ni Miyo kinimovahani miloko ntoko sohiyeriwa sanyu ni minlano sa valaponi ntoko mukalamp’anyu.”— Nsalmu 2:6, 8.

• Namukalampa a Omwene wa Davidi. “Vetthwitthuni nòyareliwa mwana. . . . Wera ùnnuwihe otokwene, alipihe murettele wa mahiku othene, vehitxeni va Davidi ni momweneni mwawe, alipihaka ni akhomalihaka.” — Yesaya 9:5, 6 [ 6, 7 NM].

• Oyariwa oBethelehemu. “Nto weyo, Bethelehemu, Efrata, orokhalaru mwamukhanixa variyari va itthoko sa Yuda, vano mpuwa mwá onrowaiye okikhumelela analamule, . . . Niwoko owo anakhale mutokwene mpaka minlano sa elapo.”— Mikeya 5:1, 3 [ 2, 4 NM].

• Aathanyiwa ni wiiviwa n’atthu. Mene, “Àvehiwa ni àhòmoliwa ni àramusiwa . . . Nto àhòmmwa niwoko na sottheka sahu, àswanyiwa nthowa na sotakhala sahu” — Yesaya 53:3, 5.

• Ovinyererihiwe mwa alipa ookhwa ni ovuwihiwe. “Tthiri nyuwo khamuhiya Munepa’aka nari khamwakhulela nakharari anyu òne nlitti. . . . Ohakalala womalela ti vamaithoni vanyu, witthaneliwa va mono anyu wolopwana ehuhu eri yothene.” — Nsalmu 16:10, 11.

Mwa soowereya sa atthu, khaavo ophwanenle olamulela ohikhanle paahi, Yesu Kristu. “Mwa ekhaikhai nlaika nimoha naamuleela Maria may’awe Yesu Kristu, neeraka, Muluku Apwiya enenvahe ehitxe ya Davidi atith’awe, . . . ni omwene awe khorwa omala.” Luka 1:31-33.

Yesu khaninte okhala mwene a elapo ya vathi. Mene owo anaalamuleleke atthu areene wiirimu ntoko mwene a Omwene wa Muluku. Mwaha wa heeni owo okhanla awe Namalamula oophwanelela? Nrowe noone itthu Yesu aapakiy’awe areene elapo ya vathi.

•   Yesu annaathokorera atthu. Mene Yesu khaakhalanne muthanle, waari weera aari mulopwana, muthiyana, mmiravo, asimookwaaxa naari nihimo, mene ootheene ala, annaathokorora. (Matheyo 9:36; Marko 10:16) Vaavo namaretta mmoha iikhupanyenra awe wa Yesu weera amulamihe, “Watthuna onnawera okirapiha.” Vano Yesu ammorela ikharari ni aamulamiha. — Marko 1:40-42.

• Yesu oonixuttiha moota woomuhakalaliha Muluku. Owo eenre: “Nyuwo khamunawera omurumela Muluku ni muhaku” Owo tho aahima weera hiyo naathokororeke atthu akina antoko nintthuna ahu weera nthokororiweke — Miruku sinsuweliwa okhala, Nlamulo Noowaara. Opwaha mwa yeeyo, owo aahonihera moota Muluku onahela awe mwiitti etthu nnuupuwela ahu ni itthu siri vamurimani. Tivaavo-nto, weera nimuhakalalihe Muluku ontthuneya weera nthokororeke itthu siri vamurimani vahu. (Matheyo 5:28; 6:24; 7:12) Nave Owo aahuluma etthu eneera enikhavihere weera nikhale oohakalala eyo tiiyo, oxuttera ni opaka yootthuna ya Muluku. — Luka 11:28.

• Yesu aaxuttiha ele nsivelo nintaphulela aya. Itthu Yesu uuluma awe ni aapaka awe, saannavara murima atthu yaamwiiwa. ‘Ni wàkhumelela wi Yesu amalihalaiye masu ala, miloko sa atthu sàhùmiwa owanoni nthowa na nihusiho nawe, vawì ànàhusiha yawo ntoko mutthu orino owèra.’ (Matheyo 7:28, 29) Owo ahaaxuttiha: “Mwàtthune amwittan’anyu.” Ahoonihera eyo, vaavo owo aavekelenla awe atthu yaanveleenle weera iiviwe ni masu ala: “Tithi mwàlevelele, niwoko khansuwela yeyo anèraya”. — Matheyo 5:44; Luka 23:34.

Yesu taphwanenle weera akhale Mwene a elapo yootheene, mwaha wooweera owo tooreera murima. Vanonto, salini aneera awe apatxere olamula?