Son nassesto in Székesfehérvár, una cità dela Ungria, che la ze stata fata pi de mila ani indrio. Ancora me ricordo dele brute robe che le ga sucedesto lì par causa dela Seconda Guera Mondial.

Quando mi ero picinin, mi restea coi me noni. Go tanti bei ricordi de lori, ancora de pi dela me nona, Elisabeth. Ela la me ga giutà a gaver una forte fede in Dio. Quando gavea 3 ani, mi belche fea la orassion del Pare Nostro tute le sere. Ma, l’è stà sol quando gavea intorno de 27 ani che go capio ben cossa che volea dir quela orassion.

Me pare e me mare i laorea note e di parché i volea imuciar soldi par comprar una casa. Par quela, i me noni i me tendea. Ma, una volta al mese magnéino tuti insieme in fameia. Me piasea tanto de quei giorni.

Nel ano 1958, ga sucedesto quel che me pare e me mama i volea tanto: i ze stati boni de comprar una casa. Son restà tanto contento parché cossita poderìssino ndar de star noantri tre insieme. Ma, sol sei mesi dopo me pare l’è morto de càncaro e son restà tanto disgustà.

Questa roba la me ga spacà el cuor. Ricordo che go pregà: “Dio, te go pregà tanto par salvar me pare. Go bisogno de lu! Parché no te me ghè scoltà?” Mi volea tanto saver ndove l’era me pare e par quela mi me domandea: ‘Sarà che lu l’è ntel cielo? Sarà che lu no’l esiste pi?’ Mi volea tanto gaver me pare insieme a mi, compagno i altri toseti i gavea i soi.

Par tanti ani, son ndà nel semitèrio quasi tuti i di. Mi me indenociea davanti la tomba de me pare e preghea: “Dio, fame saver ndove l’è me pare”. Mi anca preghea parché volea saver el ogetivo dela vita.

Quando gavea 13 ani, go scominsià a imparar aleman. Mi catea che, se ledesse arquanti libri de scritori alemani, saria bon de catar fora le risposte a tute le domande che gavea. Nel ano 1967, son ndà studiar nela cità de Iena, che in quela època la fea parte dela Alemagna Oriental. Go ledesto tanti libri dei filòsofi alemani e ancora de pi quei che i parlea sora el ogetivo dela vita. Ghen’era tante idee interessante, ma gnanca una me ga dato pròpio una risposta giusta. Par quela, go seità pregar par gaver le risposte.

Nel ano 1970, son tornà ala Ungria e là go cognossesto la dona che dopo me go maridà, Rose. In quela època, la Ungria la era soto el governo dei comunisti e quando se ghemo maridà, semo scampadi via par la Àustria. Noantri voléino ndar de star in Sydney, Austràlia, ndove el me zio l’era de star.

Dopo de poco tempo, go catà un laoro nela Àustria. Un di, un colega de laoro el me ga dito che mi podea catar le risposte ale me domande ntela Bìblia. Lu anca el me ga dato arquanti libri che parlea dela Bìblia. In poco tempo go ledesto tuti quei libri e go volesto imparar de pi. Alora, go scrito ale Testimònie de Geovà, che le fea quei libri, e ghe go domandà altre publicassion.

Ntel giorno che ghemo fato un ano de maridadi, l’è vegnesto casa nostra un gióveno dela Àustria, che l’era Testimònia de Geovà. Lu el me ga portà i libri che mi gavea domandà e ghemo scominsià studiar la Bìblia. Mi gavea tanta voia de imparar. Par quela, se studiea due volte ala stimana, cada volta par quatro ore.

Quel che go imparà nela Bìblia me ga tocà el cuor. No l’era gnanca de creder quando le Testimònie de Geovà le me ga fato veder ntela me Bìblia, in ùngaro, el nome de Dio, Geovà. Son ndà ala ciesa par 27 ani e no gavea mai scoltà el nome de Dio. Mi son restà maraveià cole risposte dela Bìblia, le era sémplisse e fàcile de capir. Go imparà che i morti i ze come che nte un sono profondo e par quela, no i sà gnente. (Eclesiasti 9:5, 10; Gioani 11:11-15) Mi go anca imparà la promessa dela Bìblia de un novo mondo ndove no ghen sarà pi la morte. (Apocalisse 21:3, 4) Go speransa de veder me pare nantra volta, parché ntel novo mondo ghen sarà una ressuression. — Ati 24:15.

La me dona, Rose, anca la ga scominsià a studiar la Bìblia e la era tanto interessada. El nostro progresso l’è stà ben svelto. In sol due mesi ghemo finio de studiar el libro. Noantri ndéino a tute le riunion dele Testimònie de Geovà. Semo restadi pròpio maraveiadi quando ghemo visto el amor, la union e la bontà che lore le mostrea. — Gioani 13:34, 35.

Nel ano 1976, semo ndati de star nela Austràlia. Poco tempo dopo che semo rivadi là, ghemo parlà cole Testimònie de Geovà e lore le ne ga fato sentirse pròpio ben. Semo stati batesadi come Testimònie de Geovà nel ano 1978.

Dopo de tanto tempo, go catà le risposte che ero premoso de saver. Quando go cognossesto a Geovà, lu l’è deventà par mi el meio Pare che una persona la pol gaver. (Tiago 4:8) E la speransa de veder me pare nantra volta, ntel novo mondo, la ga tanto valor par mi. — Gioani 5:28, 29.

Nel ano 1989, mi e Rose, ghemo dessidio tornar ala Ungria e cossita parlar de quel che credemo ai nostri amighi e ala nostra fameia. Ghemo bio la alegria de insegnar la Bìblia a tante persone. De queste, de pi de 70 le ze deventade Testimònie de Geovà. Intrà de lore, anca me mama.

Par 17 ani mi gavea pregà parché volea saver le risposte ale me domande. Fà belche 39 ani che go scominsià a studiar la Bìblia. Mi seito pregar, sol che adesso mi posso dir: “Gràssie, caro Pare, parché te ghè rispondesto ale orassion che mi fea quando ero picinin.”