1. Parché che ghemo de pareciarse ben par la perseghission?

 LA note vanti che el nostro Signor Gesù el fusse copà, el ga dito che quei che volea esser so dissìpoli i saria stà odiadi. (Gioani 17:14) Le persone che ze contra la vera adorassion i ga perseghio fin al di de ancoi i Cristiani Testimònie de Geovà. (2 Tim. 3:12) Ghemo de pareciarse ben, parché come el fin de questo sistema de cose l’è darente, i nostri nemighi i farà sempre pedo. — Mat. 24:9.

2-3. (a) Cossa ghemo de ver in mente sora la paura? (b) Cossa ndaremo imparar in questo stùdio?

² Cossa podemo far par pareciarse par la perseghission? No ne ocore star là pensar a tuto quel che podaria sucederne ntel futuro. Se se metemo pensar a tuto quel che podaria suceder, podarìssino esser pieni de paura e ansietà e fin fermarse de servir a Geovà, sensa gnanca che ne suceda un problema. (Pro. 12:25; 17:22) La paura ze una arma poderosa che el nostro “nemigo, el Diaol,” el proa doperar contra de noantri. (1 Pie. 5:8, 9) Cossa podemo far adesso par pareciarse par quel che ndarà suceder?

³ In questo stùdio, ndaremo veder come far pi forte la nostra amicìssia con Geovà e parché la nostra vita depende de farlo adesso. Ndaremo anca parlar de come ver pi coraio, e anche cossa podemo far con quei che ne òdia.

4. De acordo con Ebrei 13:5, 6, de cossa ghemo de esser sicuri e parché?

⁴ Sìpia sicuro che Geovà te ama e che no’l te abandonarà mai. (Ledi Ebrei 13:5, 6.) Fà tanti ani, la revista La Sentinela ga scrito: “Pi una persona cognosse Dio, pi se fidarà de lu quando riva le provassion.” L’è pròpio vera! Par infrontar ben la perseghission, ne ocore amar Geovà e creder in lu del tuto, e mai gaver dubi che lu el ne vol tanto ben. — Mat. 22:36-38; Tia. 5:11.

5. Cossa te giutarà a sentir el amor de Geovà?

⁵ Ledi la Bìblia tuti i di col ogetivo de deventar sempre pi amigo de Geovà. (Tia. 4:8) Quando te ledi, daghe atension ale bele qualità de Geovà. Senti el so amor e afeto nele robe che el dise e el fà. (Éso. 34:6) Te fè fadiga a creder che Dio te ama? Fursi no te ghe mai sentio amor ntela to vita. Se te te senti cossita, proa far tuti i di una strissa de bele robe che Geovà ga belche fato par ti. (Sal. 78:38, 39; Rom. 8:32) Intanto che te pensi ntele to benedission e a quel che te ghè ledesto ntela Parola de Dio, te sarè bon de far una strissa de robe che Geovà el ga fato e el fà par ti. Quanto pi te ghe dè valor a quel che Geovà el fà, tanto pi forte sarà la to amicìssia con lu. — Sal. 116:1, 2.

6. De acordo con Salmo 94:17-19, cossa sucederà se te preghi de tuto el cuor?

⁶ Prega sempre. Proa pensar a un toseto che riceve un bel strucon de so pare. El pol dirghe tute le robe che ga sucedesto, quele bele e quele brute, a so pare. Ti te pol sentirte compagno se te verdi el to cuor in orassion a Geovà tuti i di. (Ledi Salmo 94:17-19.) Quando te preghi a Geovà, “spandi el to cuor come che el fusse àqua” e dighe al to amoroso Pupà tute le to paure e ansietà. (Lam. 2:19) Cossa ndarà suceder? Te podarè provar quel che la Bìblia ciama “la pace de Dio che la ze pi granda de quel che podemo capir.” (Fil. 4:6, 7) Pi che te preghi de tuto cuor, pi darente te te sentirè de Geovà. — Rom. 8:38, 39.

7. Parché te pol esser sicuro che le promesse sora el Regno de Dio ndarà suceder?

⁷ Sìpia sicuro che le promesse sora el Regno de Dio ndarà suceder. (Nùm. 23:19) Se no te ghè una fede forte sora le promesse de Dio, sarà pi fàcile par Sàtana e el so mondo farte vegner paura. (Pro. 24:10; Ebr. 2:15) Cossa te pol far par far pi forte la to fede ntel Regno de Dio? Te ghe de torte el tempo che ocore, fà una bona programassion par studiar le promesse de Geovà sora el so Regno, e parché te pol esser sicuro che le ndarà suceder. Par capir parché ze pròpio importante, prova pensar sora l’esémpio de Stanley Jones, che l’è stà in preson par 7 ani par via de quel che el credea. b Come galo fato par restar fedele? Lu el conta: “Tuto quel che savea sora el Regno de Dio, che mi era pròpio sicuro e no gavea dubi, me ga dà tanta forsa. Cossita no i ga podesto farme cambiar de idea.” Se te ghè una fede forte ntele promesse de Dio, te restarè ancora pi darente de lu e no te gavarè mai paura. — Pro. 3:25, 26.

8. Cossa te fà capir quanta importansa te dè ale riunion ancoi? Spiega.

⁸ Seita assister a tute le riunion. Le riunion ne giuta sempre a ver una amicìssia pi granda con Geovà. La importansa che ghe demo ale riunion ancoi, ne fà capir se saremo boni o nò de infrontar la perseghission. (Ebr. 10:24, 25) Vedemo parché. Se adesso assemo che robete pìcole no ne fae assister ale nostre riunion, cossa sucederà quando sarà pericoloso riunirse coi nostri fradei? Invesse, se te fè de tuto fin adesso par no mancar mai ale riunion, no te gavarè paura ntel futuro. Alora, adesso l’è ora de imparar a amar le riunion. Se te fè cossita, la perseghission e le proibission dei governi, no te farà gaver paura de obedir a Dio invesse che ai òmini. — Ati 5:29.

9. Parché l’è importante gaver in mente testi dela Bìblia par pareciarse par la perseghission?

⁹ Gàpia in mente i testi bìblichi che te piase de pi. (Mat. 13:52) Fursi no te ghè bona memòria, ma Geovà pol giutarte col so poderoso spìrito santo par farte ricordar i testi. (Gio. 14:26) Un fradel che l’è stà nte una preson de Alemagna Oriental e sarà su nte una solitària, el ga dito: “Son stà contento de ver in mente pi de 200 testi dela Bìblia, cossita go podesto pensar sora difarenti assunti bìblichi, tuto quel tempo che era mi mi sol.” Quei testi che’l gavea in mente lo ga giutà a seitar darente de Geovà e restar fedele.

10. Parché te gavarissi de ver in mente càntichi?

¹⁰ Gàpia in mente càntichi e mùsiche e cantale par lodar Geovà. Quando Paolo e Sila i zera in preson a Filipos, i ga cantà càntichi che i gavea in mente. (Ati 16:25) I nostri fradei dela vècia Union Soviètica, che i ze stati menadi in Sibèria, i ga fato compagno par giutarse intrà de lori. La sorela Mariya Fedun la se pensa: “Se ghemo metesto a cantar càntichi dele riunion, tuti quei che ricordeino.” La ga dito che quei càntichi ghe dea coraio e ghe giutea a sentirse pi darente de Geovà. Te dà coraio cantar i càntichi che te piase de pi e le mùsiche del site jw? Alora, sfòrsate par verle in mente adesso! — Varda el quadro “ Geovà, dame coraio”.

11-12. (a) De acordo con 1 Samuel 17:37, 45- 47, parché Davi el gavea tanto coraio? (b) Cossa imparemo del esémpio de Davi?

¹¹ Par infrontar la perseghission, ghe vol coraio. Cossa te pol far, se te par che el te manca? Ricòrdate che el vero coraio no depende de quanto te sì grando, dela to forsa, o de cossa te sì bon de far. Pensa in Davi. Quando l’era gióveno, el se ga infrontà a Golia. Davi l’era pi ceo e fiaco de quel gigante filisteo, e ancora, no l’era parecià par la guera e gnanca el gavea una spada. Ma el gavea tanto coraio e l’è ndà a lotar sensa paura contra quel gigante pien de orgòlio.

¹² Parché Davi el gavea tanto coraio? Parché l’era pròpio sicuro che Geovà l’era con lu. (Ledi 1 Samuel 17:37, 45- 47.) Davi no l’è restà là a pensar che no l’era gnente in comparassion con Golia. Invesse, el ga pensà che Golia no l’era gnente in comparassion con Geovà. Cossa imparemo? Che gavaremo coraio se se fidemo del tuto che Geovà l’è con noantri, e se semo sicuri che i nostri nemighi no i ze gnente in comparassion del nostro poderoso Dio. (2 Cró. 20:15; Sal. 16:8) Alora cossa podemo far adesso par ver pi coraio, vanti che riva la perseghission?

13. Cossa podemo far par gaver pi coraio? Spiega.

¹³ Una roba che podemo far par gaver pi coraio ze predicar le bone notìssie del Regno de Dio adesso. Parché? Farlo ne insegna a fidarse in Geovà e no ver paura dele persone. (Pro. 29:25) Compagno i mùscoli podemo farli pi forti coi esersissi, podemo far pi forte el nostro coraio quando predichemo de casa in casa, in posti pùblichi, ntei mercadi e in tute le oportunità. Se adesso femo cresser el nostro coraio par predicar, saremo boni de seitar farlo anca se i ne lo proibisse. — 1 Tes. 2: 1, 2.

14-15. Cossa imparemo de Nancy e Valentina?

¹⁴ Imparemo tanto de due sorele fedele che le ga mostrà un coraio gnanca de creder. Una ze la sorela Nancy Yuen. La era una picinina de un metro e meso, ma zera fadiga farghe paura. c Come la ga dito che no la gavaria molà de predicar le bone notìssie del Regno, i la ga assada in preson par 20 ani in Cina. Quei dela preson che ghe fea domande, i ga dito che la era la persona pi testarda dela Cina!

¹⁵ Altro esémpio l’è dela sorela Valentina Garnovskaya. La ze restada in preson, in 3 volte diverse, nela vècia Union Soviètica, par un total de 21 ani. d La era cossita dessidia a seitar predicar, che le autorità ga dito che la zera una criminosa tanto pericolosa. Parché queste sorele le ga bio cossita tanto coraio? Tanto Nancy come Valentina le era sicure de che Geovà l’era con lore.

16. Qual zela la ciave del vero coraio?

¹⁶ Come ghemo visto, el vero coraio no’l vien dele nostre forse o de quel che semo boni de far. Invesse, gavaremo el vero coraio se semo sicuri che Geovà l’è con noantri e el lota par noantri. (Deu. 1:29, 30; Zac. 4:6) Questa ze la ciave del vero coraio.

17-18. De cossa ne ga avisà Gesù in Gioani 15:18- 21? Spiega.

¹⁷ Ne piase che i altri ne rispete, ma no stà pensar che el to valor depende de quel che i altri dise o pensa de ti. Gesù el ga dito: “Valtri saré felici sempre che i altri ve òdia, i ve assa de banda, i parla robe brute sora valtri e i ve dise su, par causa del Fiol del omo.” (Luc. 6:22) Cossa vol dir queste parole de Gesù?

¹⁸ Gesù no l’era drio dir che i so dissìpoli i zera contenti de esser odiadi, ma el disea quel che sucede. Semo odiadi parché no femo parte del mondo, vivemo de acordo coi insegnamenti de Gesù e predichemo el messàgio che lu ga predicà. (Ledi Gioani 15:18-21.) Ghemo caro far contento a Geovà. Se le persone ne òdia parché amemo nostro Pare, no ze un problema nostro.

19. Come podemo far compagno el esémpio dei apòstoli?

¹⁹ Mai ghemo de ver vergogna de esser Testimònie de Geovà par quel che i altri dise o fà. (Mic. 4:5) Una roba che ne giutarà a infrontar la paura dei òmini, l’è vardar l’esémpio dei apòstoli de Gesù in Gerusalen poco dopo che i ga copà Gesù. I savea ben quanto i lìderi religiosi giudei i li odiea. (Ati 5:17, 18, 27, 28) Ma anca cossita, tuti i di i ndea ntel témpio e i disea ale persone che i zera dissìpoli de Gesù. (Ati 5:42) No i ga assà che la paura li inciodesse. Anca noantri vinseremo la paura, se disemo sempre che semo Testimònie de Geovà, nel nostro laoro, ntela scola e coi nostri visigni. — Ati 4:29; Rom. 1:16.

20. Anca se i era odiadi, parché i apòstoli i era contenti?

²⁰ I apòstoli i era contenti, parché i savea el motivo de parché le persone li odiea. E anca, i pensea che l’era un onor patir dei problemi par far la volontà de Geovà. (Luc. 6:23; Ati 5:41) Tempo dopo, el apòstolo Piero ga scrito che ‘anca se i patia par far le robe giuste, i saria felici’. (1 Pie. 2:19-21; 3:14) Se ghemo ben ciaro in mente che le persone ne òdia parché femo la volontà de Geovà, no gavaremo paura e seitaremo servirlo.

21-22. (a) Cossa pénsito de far par pareciarte par la perseghission? (b) Cossa ndaremo veder nel pròssimo stùdio?

²¹ No savemo quando rivarà la perseghission o quando i governi proibirà el nostro laoro de predicar. Ma savemo che podemo pareciarse adesso. Come? Femo pi forte la nostra amicìssia con Geovà, femo de tuto par ver pi coraio e imparemo far le robe anca se i ne òdia. Se se pareciemo adesso, saremo boni de restar fedeli nel futuro.

²² Ma cossa faremo se sucede che i proibisse el nostro laoro? Nel pròssimo stùdio, vedaremo arquanti prinsipi dela Bìblia che ne giutarà seitar servir a Geovà in questa situassion.