Yesu O Vha E Hani?
Bivhili i a fhindula
A hu na muthu ane a ḓivha uri Yesu o vha e hani, samusi na Bivhili i sa ambi nga ha mbonalo yawe. Zwenezwi zwi sumbedza uri mbonalo ya Yesu a si ya ndeme. Naho zwo ralo, Bivhili i a ri ṋea luvhonela nga ha mbonalo ya Yesu.
Mbonalo: Yesu o vha e Muyuda nahone u ḓo vha o wana mbonalo na mikhwa ya Tshiyuda kha mme awe. (Vhaheberu 7:14) A zwi vhonali hu tshi nga o vha e na mbonalo i mangadzaho. Kha tshiṅwe tshiitea o kona u tshimbila u bva Galilea u ya Yerusalema vhathu vha sa mu ṱhogomeli. (Yohane 7:10, 11) Nahone ene na vhafunziwa vhawe vhe a vha e na vhushaka ha tsini navho vho vha vhe na mbonalo i fanaho. Humbulani uri Yudasi Iskariote o tea u ṱalula Yesu kha tshigwada tsha vhathu vhe vha vha vhe na zwihali vhe vha vha vha tshi ṱoḓa u mu fara.—Mateo 26:47-49.
Vhulapfu ha mavhudzi: Yesu o vha a sa ḓo vha na mavhudzi malapfu ngauri Bivhili i amba uri “arali munna e na mavhudzi malapfu u a nyadzea.”—1 Vhakorinta 11:14.
Ndebvu: Yesu o vha e na ndebvu. O vha a tshi tevhedza mulayo wa Tshiyuda, we wa vha u sa tendeli vhanna vha tshi ‘tumulela ndebvu dzavho.’ (Levitiko 19:27; Vhagalata 4:4) Zwiṅwe hafhu, Bivhili i amba nga ha ndebvu dza Yesu kha vhuṅwe vhuporofita nga ha u shengela hawe.—Yesaya 50:6.
Muvhili: Mafhungo oṱhe a sumbedza uri Yesu o vha e na mutakalo wavhuḓi. O vha a tshi tshimbila khilomithara nnzhi musi e vhuḓinḓani. (Mateo 9:35) O kunakisa thembele ya Tshiyuda luvhili, a thudzekanya maṱafula a vhatshintshi vha tshelede na u pandela zwifuwo nga tshimebi. (Luka 19:45, 46; Yohane 2:14, 15) Cyclopedia ya McClintock na Strong i amba uri: “Mafhungo oṱhe a evangeli a amba nga ha mutakalo wavhuḓi [wa Yesu].”—Volumu IV, siaṱari 884.
Mbonalo ya tshifhaṱuwo: Yesu o vha e na vhuthu na u pfela vhuṱungu, nahone zwenezwo zwo vha zwi tshi vhonala khofheni hawe. (Mateo 11:28, 29) Vhathu vha mifuda yoṱhe vho vha tshi ya khae uri a vha thuse na u vha khuthadza. (Luka 5:12, 13; 7:37, 38) Na vhana vho vha vha tshi ḓipfa vho vhofholowa musi vhe nae.—Mateo 19:13-15; Marko 9:35-37.
Mazwifhi nga ha mbonalo ya Yesu
Mazwifhi: Vhaṅwe vha amba uri Yesu a nga vha o vha a tshi bva Afurika ngauri bugu ya Nzumbululo i vhambedza mavhudzi awe na muḓali nahone milenzhe yawe i vhambedzwa na “tsimbi-tswuku.”—Nzumbululo 1:14, 15.
Ngoho: Bugu ya Nzumbululo i amba “nga zwiga.” (Nzumbululo 1:1) Mavhudzi na milenzhe ya Yesu zwo ṱaluswa hu tshi shumiswa luambo lwa pfanyisedzo u itela u fanyisela pfaneleo dzawe musi o no vuswa, hu si u ṱalusa mbonalo yawe ya musi e kha ḽifhasi. Musi hu tshi pfi “mavhudzi a ṱhohoni yawe [Yesu] o vha e matshena sa muḓali mutshena, sa mahaḓa,” Nzumbululo 1:14 i tshi vhambedza i shumisa muvhala, hu si nḓila ine a vha ngayo. Zwenezwi zwi imela vhuṱali u ya nga miṅwaha yawe. (Nzumbululo 3:14) Yeneyi ndimana a i khou vhambedza nḓila ine mavhudzi a Yesu a vha ngayo na muḓali kana mahaḓa.
Milenzhe ya Yesu yo vha “i tshi nga tsimbi-tswuku musi i tshi khou penya i ṋanḓoni.” (Nzumbululo 1:15) Zwiṅwe hafhu, tshifhaṱuwo tshawe tsho vha “tshi tshi nga ḓuvha ḽine ḽa penya vhukuma.” (Nzumbululo 1:16) Samusi hu si na lushaka lune lwa vha na muvhala wa lukanda wo raloho, hu fanela u vha hu tshi khou fanyiselwa u vuwa ha Yesu sa ane “a dzula tshedzani tshi sa swikelelei.”—1 Timotheo 6:16.
Mazwifhi: Yesu o vha e si na nungo.
Ngoho: Yesu o vha e munna. Sa tsumbo, o ḓibvisela khagala nga tshivhindi kha mmbi ye ya vha i tshi ṱoḓa u mu fara. (Yohane 18:4-8) Yesu u fanela u vha o vha e na maanḓa u itela u shuma sa muvhaḓi a tshi shumisa zwishumiswa zwa u vhaḓa.—Marko 6:3.
Nga zwenezwo, ndi ngani Yesu o vha a tshi ṱoḓa thuso ya u hwala danda? Nahone ndi ngani o fa vhaṅwe vhe a vha o ombelwa navho vha sa athu u fa? (Luka 23:26; Yohane 19:31-33) Musi Yesu a sa athu u ombelwa, o vha e si tsheena nungo. Ho ngo kona u eḓela ngauri o vha o tsikeledzea maḓipfeleni. (Luka 22:42-44) Vhayuda vho mu tambudza vhusiku hoṱhe nahone nga matsheloni Vharoma vha mu fara lwa tshiṱuhu. (Mateo 26:67, 68; Yohane 19:1-3) Zwenezwo zwi nga vha zwo ita uri a fe nga u ṱavhanya.
Mazwifhi: Yesu o vha a tshi dzula o ṱungufhala a sa ambi.
Ngoho: Yesu o sumbedza nga ho fhelelaho pfaneleo dza Khotsi awe wa ṱaḓulu, Yehova, ane Bivhili ya mu ṱalusa sa “Mudzimu o takalaho.” (1 Timotheo 1:11; Yohane 14:9) Ngoho ndi uri, Yesu o funza vhaṅwe nḓila ya u vha na dakalo. (Mateo 5:3-9; Luka 11:28) Dzenedzi mbuno dzi sumbedza zwavhuḓi uri Yesu o vha a tshi vhonala o takala tshifhaṱuwoni.
You May Also Like
ESSENTIAL BIBLE TEACHINGS
Ri Nga Vha Hani Na Vhungoho Ha Uri Bivhili Ndi Ya Ngoho?
Arali Bivhili yo ṅwalwa nga Mudzimu, i tea u fhira bugu dzoṱhe dze dza vhuya dza ṅwalwa.
NGA HA RIṊE
Humbelani U Dalelwa
Haseledzani mbudziso i bvaho Bivhilini kana ni gude zwo engedzeaho nga ha Ṱhanzi dza Yehova.