THERO I RE KHA GWATI | NI NGA SENDELA TSINI NA MUDZIMU
Naa Ni Ḓipfa Ni Tsini Na Mudzimu?
“U vha na vhushaka ha tsini na Mudzimu zwi ita uri ni ḓipfe no tsireledzea, no fhelela nahone no khwaṱha. Zwi tou nga tshifhinga tshoṱhe Mudzimu u ni ṱoḓela zwa khwine.”—CHRISTOPHER, MUṰHANNGA WA NGEI GHANA.
“Mudzimu u vhona zwoṱhe zwine zwa ni dina, u a ni funa vhukuma nahone u a ni ṱhogomela u fhira nḓila ine na humbula ngayo.”—HANNAH ANE A VHA NA MIṄWAHA YA 13 WA NGEI ALASKA, KHA ḼA U.S.A.
“U ḓivha uri ni na vhushaka ha tsini na Mudzimu ndi tshithu tsha ndeme nahone zwi ita uri ni si vhilaele!”—GINA, A RE MIṄWAHANI YA VHU-40 WA NGEI JAMAICA.
A si Christopher, Hannah, na Gina fhedzi vhane vha ḓipfa nga yeneyo nḓila. Vhathu vhanzhi shangoni ḽoṱhe vha a zwi ḓivha uri Mudzimu u vha dzhia sa khonani dzawe. Hu pfi mini nga inwi? Naa ni ḓipfa u nga ni tsini na Mudzimu? Kana naa ni nga takalela u vha tsini kana u vha tsinisa nae? Khamusi ni ḓivhudzisa uri: ‘Naa zwi a konadzea uri muthu a vhe na vhushaka ha tsini na Mudzimu Ramaanḓaoṱhe? Arali zwo ralo, nga nḓila-ḓe?’
ZWI A KONADZEA U VHA TSINI NA MUDZIMU
Bivhili i sumbedza uri zwi a konadzea u vha tsini na u vha na vhushaka ha muthu nga eṱhe na Mudzimu. Bivhili i amba uri Mudzimu o vhidza musimulalushaka wa Muheberu Abrahamu “khonani yanga.” (Yesaya 41:8) Dovhani ni ṱhogomele u rambiwa nga lufuno ho ṅwalwaho kha Yakobo 4:8: “Sendelani tsini ha Mudzimu, na ene u ḓo sendela tsini haṋu.” Nga zwenezwo, zwi khagala uri u vha na vhushaka ha tsini na Mudzimu zwi a konadzea. Fhedzi samusi Mudzimu a sa vhonali, ni nga ‘sendela tsini’ nae na u takalela u vha na vhushaka havhuḓi nae nga nḓila-ḓe?
U itela u fhindula yeneyo mbudziso, ṱhogomelani nḓila ine vhathu vha vhumba ngayo vhukonani. Kanzhi vhu thoma nga uri vhathu vhavhili vha ḓivhane madzina. Nga murahu, vhukonani havho vhu a hula musi vha tshi bvela phanḓa vha tshi davhidzana, u amba nga ha zwine vha zwi humbula na maḓipfele avho. Musi vha tshi ita vhuḓidini ha u ita zwithu vhoṱhe, vhushaka havho vhu a khwaṱha. Hu nga ambiwa zwi fanaho nga ha u vhumba vhukonani na Mudzimu. Kha ri vhone uri nga nḓila-ḓe.
You May Also Like
TSHIINGAMO
Naa Ni A Ḓivha Na U Shumisa Dzina Ḽa Mudzimu?
Mudzimu o ḓiḓivhadza kha riṋe a ri: “Ndi Nṋe Yehova, ndi ḽone dzina ḽanga.”
