A ZWI TIMATIMISI uri ni nga vha no no zwi ṱhogomela uri vhurereli vhunzhi vhu ombedzela uri hu fanela u vha na nnḓu ya thabelo nahone vhu vhea na tshifhinga tshine ha fanela u rabelwa ngatsho. Naa Bivhili yo ri vhetshela tshifhinga na fhethu hune ra fanela u rabela hone?

Bivhili i sumbedza uri hu na zwiitea zwo teaho zwa uri ri rabele. Sa tsumbo, musi Yesu na vhatevheli vhawe vha sa athu ḽa, o rabela u itela u livhuha Mudzimu. (Luka 22:17) Nahone musi vhafunziwa vha tshi kuvhangana u itela vhurabeli, vho rabela vhoṱhe. Nga zwenezwo, vho bvela phanḓa na maitele e a vha a tshi itwa lwa tshifhinga tshilapfu ngei zwikoloni zwa Vhayuda na thembeleni ngei Yerusalema. Mudzimu o vha o ita uri thembele i vhe “nnḓu ya thabelo ya tshakha dzoṱhe.”—Marko 11:17.

Musi vhashumeli vha Mudzimu vha tshi kuvhangana na u rabela vhoṱhe, khumbelo dzavho dzi nga vha na mvelelo dzavhuḓi. Arali vhathu vho kuvhangana sa tshigwada vhe na vhuthihi nahone ha rabelwa u tendelana na zwi re Maṅwaloni, Mudzimu u a takala. Thabelo yeneyo i nga ṱuṱuwedza muthu uri a ite zwithu zwe khamusi a vha a sa ḓo kona u zwi ita. (Vha-Heberu 13:18, 19) Ṱhanzi dza Yehova vha a rabela tshifhinga tshoṱhe miṱanganoni yavho. Ni a rambiwa nga lufuno uri ni ye Holoni ya Muvhuso ya tsini na hune na dzula hone uri ni kone u tou ḓipfela nga dzaṋu dzenedzo thabelo.

Naho zwo ralo, Bivhili a i ambi uri hu na tshifhinga tsho vhewaho na fhethu ho tou livhaho hune na nga rabela hone. Bivhilini ri wana thabelo dza vhashumeli vha Mudzimu vhe vha rabela tshifhinga tshiṅwe na tshiṅwe nahone huṅwe na huṅwe. Yesu o ri: “U tshi rabela U dzhene lufherani lwa nnḓu yau, huno wó hoṋa muṋango, U rabele khotsi-au wó dzumbama. Huno ene khotsi-au a vhonaho zwo dzumbamaho, u ḓo U ṋea zwi tshi vhonala.”—Mateo 6:6.

Naa zwenezwo a zwi ṱuṱuwedzi? Ni nga amba na Muvhusahoṱhe tshifhinga tshiṅwe na tshiṅwe, tshiphirini, nahone ni nga vha na vhungoho ha uri u ḓo ni pfa. Ndi ngazwo zwi sa mangadzi uri nga zwiṅwe zwifhinga Yesu o vha a tshi ṱoḓa u vha e eṱhe u itela u rabela. Kha tshiṅwe tshiitea, o vhuya a fhedza vhusiku hoṱhe a tshi khou rabela Mudzimu, nahone zwi tou vha khagala uri o vha a tshi khou ṱoḓa vhulivhisi u itela u ita phetho ya ndeme.—Luka 6:12, 13.

Vhaṅwe vhanna na vhafumakadzi Bivhilini vho rabela musi vha tshi ṱoḓa u ita phetho khulwane kana musi vho sedzana na khaedu dzi konḓaho. Nga zwiṅwe zwifhinga vho ambela nṱha musi vha tshi rabela nahone nga zwiṅwe zwifhinga vho vha vha tshi rabelela mbiluni; vho rabela musi vhe zwigwada na musi vhe vhoṱhe. Zwa ndeme ndi uri vhoṱhe vho rabela. Mudzimu o dovha a vhudza vhashumeli vhawe a ri: “Ni so ngo litshedza u rabela!” (1 Vha-Thesalonika 5:17) O ḓiimisela u thetshelesa vhathu vhane vha ita zwine a zwi funa tshifhinga tshoṱhe. Naa yeneyo a si khumbelo ya lufuno?

Vhukuma, kha ḽino shango ḽa ṋamusi ḽi re na tseḓa, vhathu vhanzhi vha a ḓivhudzisa arali thabelo i tshi shuma nahone i ya ndeme. Ni nga kha ḓi ḓivhudzisa uri, ‘Naa i ḓo nthusa zwa vhukuma?’