U Tevhela Kristo, Murangaphanḓa O Fhelelaho

VHATHU vhane vha tevhela vhavhusi vha vhathu kanzhi vha a nyabwa. Naho zwo ralo, vhuvhusi ha Kristo vhu kwama vhathu vhane vha ḓiṱukufhadza khaho nga nḓila i sa fani tshoṱhe na yeneyo. Yesu o ri: “Iḓani ha nṋe noṱhe no netaho, no lemelwaho; nṋe ndi ḓo ni awedza. Ḓi-hweseni dzhogo yanga, ni funzwe nga nṋe; ngauri ndo vuḓa, ndi mudzia-u-ḓi-ṱukufhadza mbiluni; ndi hone dzimbilu dzaṋu dzi tshi ḓo rula.” (Mat. 11:28, 29) Nḓila ine Yesu a ranga ngayo phanḓa i a homolosa. U na dzangalelo ḽihulwane kha vho netaho na vho lemelwaho, nahone u vha ramba uri vha ḓihwese dzhogo yawe i sa gogoni. Naho zwo ralo, ndi mini zwine zwa katelwa kha u tevhela Yesu sa murangaphanḓa washu?

Muapostola Paulo o ṅwala uri: “Ngauri na Kristo o shengedzelwa inwi. O sia ó ni edzisela, uri ni ḓo tevhela ṋayo dzawe.” (1 Pet. 2:21) Ndi zwa ndeme lungafhani uri ri tevhele ṋayo dza Yesu? Edzani u humbula ni tshi khou tshimbila sa tshigwada nahone ni tshi fanela u pfuka fhethu ho bwelwaho zwithuthubi, nahone kha vhoiwe noṱhe hu tshi tou vha na muthu muthihi fhedzi ane a ḓivha uri hu pfukiwa hani henefho nga nḓila yo tsireledzeaho. Naa no vha ni sa ḓo tevhedza ṋayo dzawe, na ita na u kanda he a kanda hone? Nga hu fanaho, u tsireledzea hashu ha tshifhingani tshi ḓaho hu ḓitika nga uri ri tevhedze ṋayo dza Yesu nga hune zwa nga konadzea ngaho. U tevhedza ṋayo dza Yesu zwi katela u mu thetshelesa na u ita zwine a ri vhudza zwone khathihi na u shumisana na vhane vha imela ene.

U Pfa Na U Ita

Musi a tshi ḓo phetha Pfunzo yawe ya Thavhani Yesu o amba u ri: “Muthu a pfaho zwe nda amba afha, a zwi ita, ndi ḓo ri u nga munna wa vhuṱali o fhaṱaho nnḓu yawe kha tombo. Ha wa mvula, ha ḓa mikumbela, ha vhudzula maḓumbu, zwa kuḓa iḽa nnḓu, i si we.”—Mat. 7:24, 25.

Yesu o ri a pfaho zwe a amba a zwi ita ndi muthu wa “vhuṱali.” Naa ri a sumbedza uri ri a ṱhonifha na u dzhiela nṱha tsumbo ya Yesu nga u thetshelesa zwi tshi bva mbiluni, kana ro sendamela kha u thetshelesa milayo ya Yesu ine ra vhona zwi tshi leluwa u i tevhedza fhedzi? Yesu o ri: ‘Ndi dzula ndi tshi ita zwi takadzaho Mudzimu.’ (Yoh. 8:29) Kha ri lwele u edzisa tsumbo yeneyo.

Ḓanani ḽa u thoma ḽa miṅwaha vhaapostola vho ri vhetshela tsumbo yavhuḓi nga u ḓiṱukufhadza kha Kristo murangaphanḓa wavho. Kha tshiṅwe tshiitea, Petro o vhudza Yesu a ri: “Khezwi, riṋe ró ṱutshela zwoṱhe, ra U tevhela.” (Marko 10:28) Vhukuma, vhaapostola vho vha vha tshi dzhia vhurangaphanḓa ha Yesu sa ha ndeme vhukuma lwe vha vha vho ḓiimisela u ṱutshela zwoṱhe u itela u mu tevhela.—Mat. 4:18-22.

Shumisanani Na Vhane Vha Imela Kristo

Nga phanḓanyana ha u fa hawe, Yesu o bula iṅwe nḓila ine ra nga tevhela ngayo vhurangaphanḓa hawe. O ri: “A ṱanganedzaho ané nṋe nda mu ruma, u ṱanganedza nṋe; a ṱanganedzaho nṋe, u ṱanganedza we a nthuma.” (Yoh. 13:20) Zwi re zwone ndi uri Yesu o vhidza vhaimeli vhawe uri ndi “vharathu” vhawe. (Mat. 25:40) Musi Yesu o no vuselwa ngei ṱaḓulu, “vharathu” vhawe vho vhewa uri vha ime vhudzuloni hawe, vhe “tshiimoni tsha Kristo” sa vhaḓinḓa vhane vha ramba vhaṅwe uri vha tende u pfumedzanywa na Yehova Mudzimu. (2 Vha-Kor. 5:18-20) U ṱhogomela Kristo sa murangaphanḓa washu zwi katela u ḓiṱukufhadza kha “vharathu” vhawe.

Zwi ḓo vha zwavhuḓi u ṱolisisa nḓila ine ra aravha ngayo musi ri tshi ṋewa nyeletshedzo ya Maṅwalo  i re tshifhingani kha khandiso dzashu dzo thewaho Bivhilini. Nga u guda Maṅwalo na u vha hone miṱanganoni ya tshivhidzo, ri humbudzwa zwine Kristo a ri vhudza zwone. (2 Pet. 3:1, 2) Ri sumbedza u livhuha zwi tshi bva mbiluni ndugiselelo yeneyi ya zwiḽiwa zwa muya nga u zwi ḽa tshifhinga tshoṱhe. Naho zwo ralo, ri fanela u aravha hani musi hu na nyeletshedzo ine ya dovhololwa tshifhinga tshoṱhe? Sa tsumbo, Ipfi ḽa Mudzimu ḽi eletshedza Vhakriste uri vha ‘dzee fhedzi Murenani.’ (1 Vha-Kor. 7:39) Ho no fhela miṅwaha i fhiraho ḓana hu tshi haseledzwa nga ha mafhungo enea kha Tshiingamo. A zwi timatimisi uri vharathu vha Kristo vha sumbedza u vhilaelela nga lufuno vhushaka hashu na Yehova nga u gandisa thero dzine dza amba nga ha mafhungo enea na dziṅwe nyeletshedzo dzo hevhedzwaho. U thetshelesa dzenedzi nyeletshedzo ndi iṅwe nḓila ine ra sumbedza ngayo uri ri khou tevhela Yesu Kristo, Murangaphanḓa washu o fhelelaho.

Mirero 4:18 i ri: “Gondo ḽa vhavhuya ḽi nga tshedza u naka, tshine tsha ḓi tshena tshi tshi ya, ḽa vhuya ḽa tsha.” I ngoho, vhurangaphanḓa ha Yesu vhu khou bvela phanḓa, a ho ngo ima fhethu huthihi. Iṅwe nḓila ine ra nga shumisana ngayo na “vharathu” vha Yesu ndi u vha na mavhonele o teaho musi hu tshi vha na tshanduko kha nḓila ine ra pfesesa ngayo mafhungo-ngoho a Maṅwalo o gandiswaho nga “mukoma a fulufhedzeaho na wa vhuṱali.”—Mat. 24:45.

Ri dovha ra sumbedza uri ri a ḓiṱukufhadza kha “vharathu” vha Kristo nga u shumisana na vhalavhelesi vho vhewaho tshivhidzoni tsha Vhukriste. Muapostola Paulo o ri: “Ipfani vha-ranga-phanḓa vhaṋu ni vha tevhele, ngauri vha linda mimuya yaṋu.” (Vha-Heb. 13:17) Sa tsumbo, muhulwane a nga ri ṋea nyeletshedzo malugana na u fara Vhurabeli ha Muṱa ha nga madekwana tshifhinga tshoṱhe kana a ri ṋea nyeletshedzo malugana na ḽiṅwe sia ḽa vhuḓinḓa hashu ha tsimu. Mulavhelesi a dalelaho a nga kha ḓi ri ṋea nyeletshedzo ya Maṅwalo ine ya ḓo ri thusa kha ḽiṅwe sia u itela uri ri tshile nga nḓila ya Vhukriste. Musi ri tshi thetshelesa nyeletshedzo dzenedzo nga u ḓifunela ri sumbedza uri ri khou tevhela Murangaphanḓa washu Yesu.

Zwi ṱungufhadzaho ndi uri shango a ḽi na vharangaphanḓa vhavhuḓi. Fhedzi zwi homolosa lungafhani u tevhela Kristo murangaphanḓa washu a re na lufuno! Kha ri ite zwoṱhe zwine ra nga kona u itela u thetshelesa Murangaphanḓa washu na u shumisana na vhane vha imela ene musalauno.

[Zwifanyiso kha siaṱari 27]

Naa ni a thetshelesa nyeletshedzo ya Maṅwalo ya uri ni songo vhingana na muthu a sa tendiho?