Musi Yesu o no huwelela ṅwaha na hafu, o vha o tea u ita phetho ya ndeme. O vha a tshi ḓo khetha nnyi uri a shumisane nae? O vha a tshi ḓo gudisa nnyi uri a range phanḓa tshivhidzo tsha Vhukriste? U itela uri a ite dzenedzo phetho, Yesu o vha ṱoḓa vhulivhisi ha Yehova. Ngauralo a ya thavhani hune a ḓo vha e eṱhe nahone a rabela vhusiku hoṱhe. Nga matsheloni, Yesu a vhidza vhaṅwe vha vha vhafunziwa vhawe nahone a khetha vhaapostola vha 12. Ndi afhio madzina avho ane na a humbula? Madzina avho o vha e Petro, Andrea, Yakobo, Yohane, Filipo, Baratholomeo, Thomasi, Mateo, Yakobo murwa wa Alifeo, Thadeo, Simoni, na Yudasi Iskariote.

Vhenevho vha 12 vho vha tshi ḓo tshimbila nae. Musi o no vha gudisa, vho rumiwa uri vha ye u huwelela nga vhoṱhe. Yehova o vha ṋea maanḓa a u pandela madimoni na u fhodza vha lwalaho.

Yesu o vhidza vhenevho vha 12 khonani dzawe, nahone o vha a tshi vha fhulufhela. Vhafarisei vho vha vha tshi humbula uri vhaapostola  vho vha vha songo funzea nahone vhe vha vhuimoni ha fhasi. Fhedzi Yesu o vha gudisa mushumo wavho. Vho vha vha tshi ḓo dzula vhe tsini na Yesu zwifhingani zwa ndeme zwa vhutshilo hawe, u fana na musi a tshi fa na musi a tshi vuswa. U fana na Yesu, vhunzhi ha vhenevho vha 12 vho vha vha tshi bva Galilea. Vhaṅwe vho vha vho vhinga.

Vhaapostola vho vha vha songo fhelela nahone vha tshi khakha. Nga tshiṅwe tshifhinga vho vha vha tshi amba vha songo thoma vha humbula nahone vha ita phetho dzi si dzavhuḓi. Nga tshiṅwe tshifhinga vho vha vha tshi fhela mbilu. Vho ita na u lwela uri ndi nnyi a re wa ndeme u fhira muṅwe. Fhedzi vho vha vhe vhathu vhavhuḓi vha funaho Yehova. Vho vha vha thikho ya tshivhidzo tsha Vhukriste musi Yesu o no ṱuwa.