Yesu o vha a sa koni fhedzi u fhodza vha lwalaho na u vusa vho faho, o vha a tshi dovha a kona na u langa muya na mvula. Musi o no fhedza u rabela thavhani, Yesu o sedza fhasi Lwanzheni lwa Galilea nahone a vhona ḓumbu. Vhaapostola vhawe vho vha vhe tshikepeni, vha tshi khou u konḓelwa u tshi tshimbidza nga ṅwambo wa muya. Yesu a tsa thavhani, a thoma u tshimbila nṱha ha maḓi o livha tshikepeni. Musi vhaapostola vha tshi vhona muthu a tshi khou tshimbila nṱha ha maḓi, vha ofha vhukuma. Fhedzi Yesu a ri khavho: ‘Ndi nṋe. Ni songo ofha.’

Petro a ri: ‘Murena, arali hu inwi zwa vhukuma, vhidzelelani uri ndi ḓe ngeo kha inwi.’ Yesu a vhudza Petro a ri: ‘Iḓani ngeno.’ Vhukati ha ḓumbu, Petro a bva tshikepeni a tshimbila nṱha ha maḓi a tshi khou ya kha Yesu. Fhedzi musi a tshi swika tsini nae, Petro a sedza ḓumbu a dzhenwa nga nyofho. A thoma u mbwandamela. Petro a vhidzelela a ri: ‘Murena, nthuseni!’ Yesu a mu fara nga tshanḓa, a ri: ‘Ndi ngani no thoma u timatima? Ndi ngani ni si na lutendo?’

Yesu na Petro vha dzhena tshikepeni, nga u ṱavhanya, ḓumbu ḽa fhela. Ni humbula uri vhaapostola vho ḓipfa hani? Vho ri: ‘Vhukuma ni Ṅwana wa Mudzimu.’

Tshenetshi a si tshone tshifhinga tshi tshoṱhe tshee Yesu a kona u langa mutsho. Nga tshiṅwe tshifhinga, musi Yesu na vhaapostola vha tshi wetshela seli ha lwanzhe, Yesu o ya a eḓela nga murahu ha tshikepe. Musi o eḓela, ha vuwa ḓumbu ḽihulu. Magabelo a rwa tshikepe, tsha ḓala nga maḓi. Vhaapostola vha vusa Yesu, vha vhidzelela vha ri: ‘Mufunzi, ri tsini na u fa! Ri thuseni!’ Yesu a vuwa a amba na lwanzhe a ri: ‘Dzika!’ Nga u ṱavhanya, muya na lwanzhe zwa dzika. Yesu a vhudzisa vhaapostola a ri: “Ndi ngani ni si na lutendo?” Vha amba nga tshavho vha ri: ‘Na muya na lwanzhe zwi a mu thetshelesa.’ Vhaapostola vho guda uri arali vha tshi fhulufhela tshoṱhe Yesu, a vho ngo fanela u ofha tshithu.