Havha vhanna vha khomboni. Vha fanela u ṱuwa, vha sa ralo vha ḓo vhulawa. Ndi dziṱholi dza Vhaisiraele, nahone musadzi ane a khou vha thusa ndi Rahaba. Rahaba u dzula afha nḓuni luvhondoni lwa muḓi wa Yeriko. Kha ri wane uri ndi ngani vhe khomboni.

Vhaisiraele vho vha vho lugela u wela Mulambo wa Yorodane vha dzhena Kanana. Fhedzi vha sa athu u wela, Yoshua a ri kha ṱholi mbili: Iyani ni sedze shango na muḓi wa Yeriko.’

Musi ṱholi dzi tshi dzhena Yeriko, dza ya nḓuni ya Rahaba. Fhedzi muṅwe muthu a vhudza khosi ya Yeriko: ‘Vhaisiraele vhavhili vho ḓa fhano madekwana u ṱola shango.’ Musi khosi i tshi zwi pfa, ya ruma vhanna ha Rahaba, nahone vha mu laya: ‘Bvisa vhanna vhe wa vha dzhenisa nḓuni yau!’ Fhedzi Rahaba o vha o dzumba dziṱholi ṱhangani yawe. A ri: ‘Ho ḓa vhaṅwe vhanna nḓuni yanga, fhedzi thi ḓivhi uri vho vha vha tshi bvafhi. Vho ṱuwa ḽi tshi swifhala, hu sa athu u valwa gethe ya muḓi. Arali na ṱavhanya ni nga vha fara!’ Vhanna vha vha pandamedza.

Vho no ṱuwa, Rahaba a gidimela ṱhangani. A vhudza dziṱholi: ‘Ndi a zwi ḓivha uri Yehova u ḓo ni fha shango ḽino. Ro zwi pfa uri o omisa hani Lwanzhe Lutswuku ni tshi bva Egipita, na uri no vhulaha hani dzikhosi Sihoni na Ogo. Ndo vha na vhulenda kha vhoinwi, nga khumbelo, mpfulufhedziseni uri ni ḓo ntshidza na khotsi anga na mme, na dzikhaladzi dzanga na vharathu.’

Ṱholi dza fulufhedzisa uri dzi ḓo zwi ita, fhedzi Rahaba o vha o fanela o ita tshiṅwe tshithu. Ṱholi dza ri: ‘Vhofhelela iyi thambo tswuku fasitereni ḽau. U kuvhanganye na mashaka au nḓuni yau. Musi roṱhe ri tshi vhuya u fhelisa Yeriko, ri ḓo vhona iyi thambo ri si vhulahe muthu nḓuni yau.’ Musi ṱholi dzi tshi humela ha Yoshua, dza mu vhudza zwoṱhe zwe zwa itea.

Yoshua 2:1-24; Vhaheberu 11:31