MUSI Yesu o no aluwa nahone o no pfa nga ha nḓila ye a tsireledzwa ngayo musi a tshee ṅwana, naa ni humbula uri o rabela Yehova, a mu livhuha?— Ni humbula uri nga murahu Yesu a nga vha o vhudza mini Maria na Yosefa musi a tshi pfa uri vho tsireledza vhutshilo hawe musi vha tshi ṱuwa nae Egipita?—

Ndi ngoho uri Yesu ha tshee ṅwana. Nahone ha tsheeho kha ḽifhasi. Fhedzi naa no no zwi ṱhogomela uri vhaṅwe vhathu vha humbula uri Yesu u tshee ṅwana a re mukungwani?— Hezwi zwi vhonala nga maanḓa nga Khirisimusi musi fhethu hunzhi ri tshi vhona zwifanyiso zwa Yesu a tshee ṅwana.

Naho Yesu a si tsheeho kha ḽifhasi, naa ni a tenda uri u a tshila?— Ee, o vuswa vhafuni, nahone zwino ndi Khosi ya maanḓa ngei ṱaḓulu. Ni humbula uri a nga ita mini u itela u tsireledza vhane vha mu shumela?— Musi Yesu a tshee kha ḽifhasi, o sumbedza nḓila ine a nga tsireledza ngayo vhane vha mu funa. Kha ri vhone nḓila ye ita ngayo zwenezwi ḽiṅwe ḓuvha musi o ṋamela gungwa na vhafunziwa vhawe.

Ḓuvha ḽo vha ḽi tshi vho ṱoḓa u kovhela. Yesu o ṱwa ḓuvha ḽoṱhe a tshi khou funza Lwanzheni lwa Galilea, lune lwa vha dzivha ḽihulwane ḽo lapfaho khilomithara dza 20  nahone lwa ṱanḓavhuwa khilomithara dza 12. Ndi izwi-ha a tshi vhudza vhafunziwa vhawe a ri: “Kha ri wele dzivha, ri ye ngei seli.” Vha dzhena gungwani nahone vha thoma u alavha vha wela seli. Yesu o vha o neta nga maanḓa, nga zwenezwo a ya nga murahu ha gungwa a eḓela kha musiamelo. A mbo ḓi farwa nga khofhe nga u ṱavhanya.

Vhafunziwa a vho ngo eḓela u itela uri vha kone u langa gungwa. Zwithu zwa tshimbila zwavhuḓi lwa tshifhinganyana, fhedzi ha mbo ḓi vuwa ḓumbu ḽihulu. Ḽa vhudzula vhukuma nahone magabelo a engedzea. Magabelo a thoma u rwa gungwa, nahone gungwa ḽa thoma u ḓala nga maḓi.

Vhafunziwa vho vha vho tshuwa ngauri vho humbula uri vha ḓo nwela khothe. Fhedzi Yesu o vha a songo tshuwa. O vha a tshee o eḓela nga murahu kha gungwa. Vhafunziwa vha fheleledza vho mu vusa vha ri: ‘Mufunzi, Mufunzi, ri tshidze; heḽi ḓumbu ḽi ḓo ri vhulaha.’ Ndi izwi-ha Yesu a tshi vuwa nahone a amba na ḓumbu na magabelo. “Fhumula, U ri ‘tshete’!”

Ḓumbu ḽa si tsha vhudzula, nahone dzivha ḽa mbo ḓi dzika. Vhafunziwa vho vha vho mangala. Vho vha vha sa athu vhuya vha vhona tshithu tshine tsha nga tshenetsho.  Vha thoma u vhudzisana vha ri: “Naa ndi nnyi uyu? U laya maḓumbu na maḓi, zwa mu pfa.”—Luka 8:22-25; Marko 4:35-41.

Naa ni a ḓivha uri Yesu ndi nnyi?— Naa ni a ḓivha uri u wana ngafhi maanḓa awe mahulwane?— Vhafunziwa vha Yesu vho vha vha songo fanela u ofha musi Yesu e henefho navho, ngauri Yesu o vha a sa fani na vhaṅwe vhathu. O vha a tshi kona u ita zwithu zwi mangadzaho zwine ha si vhe na muthu ane a nga zwi ita. Thetshelesani ndi ni vhudze zwiṅwe zwithu zwe a vhuya a zwi ita musi e lwanzheni lu re na maḓumbu.

Hezwi zwo itea ḽiṅwe ḓuvha ḽi tshi vho kovhela. Nga madekwana, Yesu a vhudza vhafunziwa vhawe uri vha ṋamele gungwa vha vhe vha tshi ṱuwa vha buḓe lwanzhe. Ndi izwi-ha Yesu a tshi ṱuwa a ya thavhani e eṱhe. Ndi fhethu hu si na phosho hune a nga rabela Khotsi awe, Yehova Mudzimu.

Vhafunziwa vha dzhena gungwani nahone vha thoma u alavha vha wela lwanzhe. Fhedzi ha mbo ḓi thoma u vha na ḓumbu. Ḓumbu ḽa bvela  phanḓa ḽi tshi vhudzula nga maanḓa. Ha mbo ḓi vha vhusiku. Vhenevha vhanna vha bvisa maseila vha thoma u shumisa thanda dza u alavha. Vho vha vha sa koni u alavha nga u ṱavhanya nga ṅwambo wa uri vho vha vho sedzana na ḓumbu ḽihulwane. Gungwa ḽi khou vhudzulelwa ngeno na ngei magabeloni mahulwane nahone maḓi a tshi khou dzhena. Vhenevha vhanna vha ḓidina vhukuma u itela uri vha swike khunzikhunzini, fhedzi vha kundwa.

Yesu u tshee eṱhe thavhani. Ho no fhela tshifhinga tshilapfu e henengei. Fhedzi zwino u a zwi vhona uri vhafunziwa vhawe vha khomboni nga ṅwambo wa magabelo mahulwane. Ndi izwi-ha a tshi mbo ḓi tsa thavhani a ya khunzikhunzini ya lwanzhe. Yesu o vha a tshi ṱoḓa u thusa vhafunziwa vhawe, a mbo ḓi thoma u tshimbila lwanzheni lu re na maḓumbu a ya khavho!

Hu nga itea mini kha inwi arali na lingedza u tshimbila nṱha ha maḓi?— Ni nga mbombomela, nahone ni nga kha ḓi nwela khothe. Fhedzi zwenezwo a zwo ngo itea kha Yesu. U na maanḓa o khetheaho. Yesu o tshimbila tshikhala tshihulwane uri a swike kha gungwa. Ḓuvha ḽo vha ḽi tshi vho ṱoḓa u tsha musi vhafunziwa vha tshi vhona uri Yesu u khou ḓa khavho a tshi khou tshimbila nṱha ha maḓi. Fhedzi vha mangala musi vha tshi vhona zwine zwa khou itea. Vha tshuwa vhukuma, nahone vha huwelela nga ṅwambo wa nyofho. Nga zwenezwo Yesu a amba navho a ri: “Rudzani mbilu, ndi nṋe, ni songo ofha.”

Musi Yesu a tshi dzhena gungwani, ḓumbu ḽa dzika. Vhafunziwa vha dovha vha mangala. Vha gwadama phanḓa ha Yesu vha ri: “Nangoho, U Murwa wa Mudzimu.”—Mateo 14:22-33; Yohane 6:16-21.

Naa zwo vha zwi sa ḓo takadza arali no vha ni hone nga tshenetsho tshifhinga nahone na vhona Yesu a tshi ita zwithu zwi ngaho zwenezwo?— Ni a ḓivha uri ndi ngani Yesu o ita vhuṱolo?— O vhu ita nga ṅwambo wa uri u funa vhafunziwa vhawe nahone o vha a tshi ṱoḓa u vha thusa. Fhedzi o dovha a vhu ita u itela u sumbedza maanḓa mahulwane ane a vha nao, ane a ḓo a shumisa tshifhingani tshi ḓaho musi e Muvhusi wa Muvhuso wa Mudzimu.

 Na ṋamusi, kanzhi Yesu u shumisa maanḓa awe u itela u tsireledza vhatevheli vhawe kha vhuḓidini ha Sathane ha u vha thivhela uri vha sa vhudze vhaṅwe nga ha Muvhuso wa Mudzimu. Fhedzi Yesu ha shumisi maanḓa awe u itela u tsireledza vhafunziwa vhawe uri vha sa lwale kana u vha fhodza musi vha tshi lwala. Na vhafunziwa vhoṱhe vha Yesu vho fheleledza vho fa. Yakobo mukomana wa Yohane o vhulahwa, nahone Yohane a valelwa khothoni.—Mishumo 12:2; Ndzumbululo 1:9.

Zwo tou ralo na ṋamusi. Vhathu vhane vha shumela Yehova na vha sa mu shumeli vha a lwala nahone vha fa. Fhedzi hu si kale zwithu zwi ḓo shanduka musi Yesu a tshi vhusa sa Khosi ya muvhuso wa Mudzimu. Nga tshenetsho tshifhinga, a huna ane a ḓo ofha, nga ṅwambo wa uri Yesu u ḓo shumisa maanḓa awe u itela u fhaṱutshedza vhoṱhe vhane vha mu thetshelesa.—Yesaya 9:5, 6.