NAA ni a ḓivha uri luvhengelambiluni ndi mini?— Luvhengelambiluni zwi amba u sa funa muṅwe muthu nga ṅwambo wa uri ha fani na inwi kana u amba luambo lu sa fani na lwaṋu. U vha na luvhengelambiluni ndi u vhenga muṅwe muthu kana u humbula zwithu zwo khakheaho nga muṅwe muthu u sa athu vhuya wa mu ḓivha uri ndi muthu-ḓe.

Ni humbula uri ndi zwavhuḓi u sa funa muṅwe muthu ni sa athu vhuya na ḓivha uri ndi muthu-ḓe kana nga ṅwambo wa uri ha fani na inwi?— Hai, luvhengelambiluni a lwo ngo luga, nahone a zwi sumbedzi uri ri na vhuthu. A ro ngo fanela u vhenga muṅwe muthu nga ṅwambo wa uri ha fani na riṋe.

Humbulani nga haya mafhungo. Naa huna muthu a re na lukanda lu sa fani na lwaṋu kana ane a amba luambo lu sa fani na lwaṋu ane na mu ḓivha?— Khamusi ni a ḓivha vhathu vha sa fani na inwi nga ṅwambo wa uri vho huvhala kana vha a lwala. Naa vhathu vhane vha sa fane na inwi ni a vha sumbedza vhuthu na u vha funa?—

Arali ra thetshelesa Mufunzi Muhulu, Yesu Kristo, ri ḓo sumbedza vhathu vhoṱhe vhuthu. Ri songo vhenga muthu nga ṅwambo wa uri u bva kha ḽiṅwe shango kana u na lukanda lu sa fani na lwashu. Ri fanela u mu funa. Naho vhaṅwe vhathu vha sa zwi dzhii nga yeneyi nḓila, hezwi ndi zwe Yesu a zwi funza. Kha ri ambe nga hazwo.

Muṅwe Muyuda a re na luvhengelambiluni o ḓa kha Yesu nahone a mu vhudzisa a ri: ‘Ndi fanela u ita mini uri ndi tshile nga hu sa fheli?’ Yesu o vha a tshi zwi ḓivha uri khamusi onoyo munna o vha a tshi ṱoḓa uri a ambe uri u fanela u funa vhathu vha lushaka lwa hawe kana  vha shango ḽa hawe. Nṱhani ha uri Yesu a fhindule yeneyo mbudziso, o vhudzisa onoyo munna a ri: ‘Mulayo wa Mudzimu uri ri fanela u ita mini?’

Onoyo munna a fhindula a ri: ‘U fanela u funa Yehova Mudzimu wau nga mbilu yau yoṱhe, nahone u fanela u funa wahau vhunga u tshi ḓifuna.’ Yesu a ri: ‘Wo fhindula zwone. Bvela phanḓa u tshi ita zwenezwo nahone u ḓo wana vhutshilo vhu sa fheli.’

Naho zwo ralo, onoyo munna o vha a sa ṱoḓi u sumbedza vhuthu, kana u funa vhathu vha luṅwe lushaka. Nga zwenezwo a lingedza u ṱoḓa tshiitisi tsha u sa ita zwenezwo. A vhudzisa Yesu a ri: “Wa hanga ndi nnyi?” A nga kha ḓi vha o ṱoḓa uri Yesu a ri: “Wahaṋu ndi khonani dzaṋu,” kana “Ndi vhathu vhane vha fana na inwi.” Yesu o fhindula yeneyo mbudziso nga u mu anetshela nganea ya Muyuda na Musamaria. Thetshelesani nganea ya hone.

Muṅwe munna o vha a tshi khou tsa na bada a tshi bva muḓini wa Yerusalema a tshi khou ya Yeriko. Onoyu munna o vha e Muyuda. Musi a tshi khou ḓi tshimbilela zwithu zwawe, a farwa nga mavemu. Eneo mavemu a mu rwa a wela fhasi, a mu dzhiela tshelede na zwiambaro zwawe. A mu rwa a mu sia o eḓela thungo ha bada e tsini na u fa.

Nga murahunyana, ha ḓa tshifhe a tshi khou tshimbila nga yeneyo  bada. A vhona onoyo munna we a vha o vhaisala vhukuma. No vha ni tshi ḓo vha no ita mini?— Onoyo tshifhe a pambutshela kha ḽiṅwe sia ḽa bada a fhira. Na u ima ho ngo ima. Ho ngo thusa onoyo munna.

Nga murahu ha zwenezwo ha ḓa muṅwe wa mutendi a tshi khou tshimbila badani yeneyo. O vha e Mulevi ane a shuma thembeleni ngei Yerusalema. Naa o ima a mu thusa?— Hai. O ita zwi fanaho na zwe zwa itwa nga tshifhe.

Ndi izwi-ha hu tshi ḓa Musamaria. Naa ni khou mu vhona a tshi khou thunyuwa kha khona ya yeneyo bada?— O vhona Muyuda o eḓela henefho o vhaisala nga maanḓa. Vhunzhi ha Vhasamaria na Vhayuda vho vha vha sa funani na luthihi. (Yohane 4:9) Naa onoyu Musamaria o vha a tshi ḓo fhira onoyo munna a sa mu thuse? Naa o  vha a tshi ḓo ḓivhudzisa uri: ‘Ndi ngani ndi tshi fanela u thusa onoyu Muyuda? Naa o vha a tshi ḓo nthusa arali hu nṋe ndo vhaisalaho?’

Onoyo Musamaria o sedza munna we a vha o eḓela thungo ha bada nahone a mu pfela vhuṱungu. O vhona zwi songo fanela uri a mu litshe henefho a fe. A tsa kha tshipuka tshe a vha o tshi ṋamela, a ya kha onoyo munna, nahone a thoma u ṱanzwa ntho dzawe. A shela mapfura na veine khadzo. Hezwi zwo vha zwi tshi ḓo ita uri ntho dzi fhole. Nga murahu a vhofha dzenedzo ntho nga labi.

Musamaria a takula onoyo munna o huvhalaho zwavhuḓi u itela uri a sa mu khanikhe a mu ṋamedza tshipuka tshawe. Nga murahu ha zwenezwo vha tsa na bada nga u ongolowa u swika vha tshi swika nḓuni ya vhaeni, kana hodelani ṱhukhu. Henefho Musamaria a mu wanela fhethu ha u dzula, nahone a mu ṱhogomela.

Nga murahu ha zwenezwo Yesu a vhudzisa munna we a vha a tshi khou amba nae a ri: ‘Ndi ufhio kha vhenevha vhanna vhararu ane na humbula uri o vha e muhura wavhuḓi?’ Ni nga ri mini? Naa o vha e tshifhe, Mulevi, kana Musamaria?—

Onoyo munna a fhindula a ri: ‘Munna we a ima a ṱhogomela munna o vhaisalaho ndi ene muhura wavhuḓi.’ Yesu a ri: ‘Wo amba zwone. Ṱuwa na iwe u ite nga u ralo-vho.’—Luka 10:25-37.

 Naa yeneyo yo vha i si nganea i takadzaho? I zwi bvisela khagala uri vhahura vhashu ndi vhafhio. A si khonani dzashu khulwane fhedzi. Nahone a si vhathu vha re na lukanda lune lwa fana na lwashu fhedzi kana vhane vha amba luambo lune lwa fana na lwashu. Yesu o ri funza uri ri vhe na vhuthu kha vhathu vhoṱhe hu sa londwi hune vha bva hone, uri ndi vhathu-ḓe, kana vha amba luambo lufhio.

Heyi ndi nḓila ine Yehova Mudzimu a vha ngayo. Ha na luvhengelambiluni. Yesu o ri: ‘Khotsi aṋu wa ṱaḓulu u ṱavhisela ḓuvha vhathu vhavhi na vhavhuya. U nisela mvula vho lugaho na vha songo lugaho.’ Nga zwenezwo-ha, ri fanela u vha na vhuthu kha vhathu vhoṱhe, u fana na Mudzimu.—Mateo 5:44-48.

Ni ḓo ita mini musi ni tshi vhona muthu o vhaisala?— Ni ḓo ita mini arali onoyo muthu a tshi bva kha ḽiṅwe shango kana e na lukanda lu sa fani na lwaṋu? Onoyo muthu na ene ndi wahaṋu nahone ni fanela u mu thusa. Arali ni nga si kone u thusa, humbelani muthu muhulwane uri a thuse. Kana ni nga kha ḓi vhidza pholisa kana mudededzi. Musi ni tshi ita zwenezwo ni ḓo vha ni tshi khou sumbedza vhuthu, u fana na Musamaria.

Mufunzi Muhulu u ṱoḓa uri ri vhe na vhuthu. U ṱoḓa uri ri thuse vhathu vhoṱhe, hu sa londwi uri ndi vhonnyi. Ndi ngazwo o ri anetshela nga ha Musamaria wa vhuthu.