Ovisimĩlo vipi o kuata eci o yeva ondaka yokuti: “Esulilo li kasi ocipepi? O sokolola hẽ ukundi umue Lembimbiliya peka o vetiyiwa oku vangula ovina lonjila yimue okuti poku ci linga ka sokolola vali? Ale o sokolola ulume umue wa kuka o kuete olonjele otãi pevindi liokololo yimue, luwalo walepa okuti wa itika uvia vombunda, lekuadru limue peka mua sonehiwa ondimbukiso yeteke liesombiso? Poku sokolola ovolandu aco, pamue ci pondola oku sakalaisa omanu vamue, osimbu okuti ci nena esanju komanu vakuavo.

Embimbiliya li lombolola ndoco: “Esulilo liya.” (Mateo 24:14) Ulandu waco u tukuiwa hati: ‘Eteke linene lia Suku Tõlo’ kuenda li tukuiwavo hati: “Harmagedo.” (Esituluilo 16:14, 16) Ocili okuti, atavo alua a kuete atatahãi a tiamẽla kulandu waco​—kuenda ovisimĩlo viaco vi kasi oku livokiya calua. Pole, Embimbiliya li lombolola ciwa ovina viatiamẽla kesulilo, kuenda li situlula eci esulilo li lomboloka kuenda eci ka ci lomboloka esulilo. Ondaka ya Suku yi tu kuatisavo oku limbuka nda esulilo li kasi ocipepi. Handi vali, li tu longisa ndomo tu pondola oku puluka! Tete, tu konomuisa ovisimĩlo vimue ka via sungulukile, kuenje ku lomboluiwa ovisimĩlo via suapo. Nye ci lomboloka “esulilo” ndomo ca lomboluiwa Vembimbiliya?

1. ESULILO KA LI LOMBOLOKA OKU NYÕLIWA KUONGONGO.

   Embimbiliya li lombolola ndoco: “[Suku] wa seveta oluali koviseveto vialuo okuti ka lu sengiwa vali.” (Osamo 104:5) Ocisonehua eci kuenda vikuavo vi eca uvangi wokuti, Suku lalimue eteke a ka nyõla oluali kuenda ka ka ecelela okuti lu​—nyõliwa.​—Ukundi 1:4; Isaya 45:18.

2. ESULILO KA LI LOMBOLOKA, ULANDU UMUE WIYA OCIPIKIPIKI.

   Embimbiliya li situlula okuti​—Suku wa sokiya eteke liesulilo. Tu tanga ndoco: ‘Puãi eteke liaco lowola yaco, lomue wa yi kũlĩha, ndaño ovangelo vokilu, ndaño Mõla, te Isia lika. Lunguki, lavululi kuenda likutilili, momo ka wa kũlĩhili eteke liaco.’ (Marko 13:32, 33) Suku okuti (“Isia”) wa linga esokiyo liwa ‘lieteke liaco’ eci esulilo li ka fetika.

3. ESULILO KA LI KOKIWA LOMANU ALE LOVIMALẼHO VIUYAKI.

   Nye ci ka situlula esulilo? Elivulu Liesituluilo 19:11 li lombolola ndoco: “Nda mola ilu lia yuluka, kuenje, tala, okavalu ka yela! U wa endelako wa tukuiwa Kolelua, kuenda Ukuacili.” Ocinimbu 19 ca amisako ndoco: “Nda mola ocinyama lolosoma viokilu lieve, lolohoka viavo, va liongolola, va katukila u wa endela kokavalu kuenda olohoka viaye.” (Esituluilo 19:11-21) Ndaño okuti kalimi alua ulandu wa tukuiwa ndeti u tendiwa ndocindekaise, pole, etu tu kuete elomboloko liokuti: Suku o ka tuma olohoka viovangelo oco va ka nyõle ovanyãli vaye.

1. ESULILO LIOLOMBIALI VIOMANU.

   Embimbiliya li lombolola ndoco: “Suku yokilu o katula usoma, [uviali] ka u nyolẽha, ka u tambuiwa  lomanu vofeka yiñi; puãi owo u nyõla loku lia ovosoma aco osi, haiwo u kala muẽle hũ oloneke ka vi pui.” (Daniele 2:44) Ndomo ca lekisiwa ketosi lia 3, ku ka kala oku nyõliwa ‘kuolosoma viokilu lieve kuenda olohoka viavo,’ okuti va ka “liongolola, oco va katukile u wa endela kokavalu kuenda olohoka viaye.”​—Esituluilo 19:19.

2. ESULILO LIUYAKI, UNGANGALA

   KUENDA EKAMBO LIESUNGA.

   “[Suku] imola ovita toke kesukiyo liongongo.” (Osamo 46:9) “Vakuesunga va tunga vofeka, Vakuacili va tumalamo. Vakuakandu puãi va tundisua vofeka, kuenda vakuosuanji va veyuiwamo.” (Olosapo 2:21, 22) “Tala ovina viosi ndi vi lingisa viokaliye.”​—Esituluilo 21:4, 5.

3. ESULILO LIATAVO A SIATA OKU LUEYELA SUKU KUENDA OMANU.

   “Ovaprofeto va imbaimba owanji wuhembi, kuenda ovitunda vi vialela kowanji wavo. . . . Oco hẽ, kesulilo vu linga ndati?” (Yeremiya 5:31) “Keteke liaco va lua va popia lame vati: ‘A Ñala, a Ñala, ka tua imbaile hẽ owanji wondaka vonduko yove? Ka tua tundaisaile hẽ ovilũlu vonduko yove?’ Ka tua lingile ovonene a lua vonduko yove? Oco mopia lavo siti, ‘Sia lo kũlĩhi. Nundi, alondingaĩvi.’”​—Mateo 7:21-23.

4. ESULILO LIOMANU VA AMAMAKO OKU KUATISA KEKALO LĨVI LIOLUALI.

   Yesu Kristu wa popia hati: “Episo liaco lieli, ocinyi ceya voluali, puãi lopo omanu va sole ca lua owelema okuti ocinyi ci sule, momo ovilinga viavo vĩvi.” (Yoano 3:19) Embimbiliya li lombolola ulandu umue woku nyõliwa kuoluali wa pita kotembo yulume umue ukuekolelo o tukuiwa hati Noha. “Oluali luo koloneke viaco lua nyõliwa lovava kuenje lua taka. Puãi londaka yaco haiyo, ilu li kasi ndeti longongo ya angiliyiwila ondalu, yi tãilili eteke liekanga hailio lioku nyõleha kuomanu va tomba Suku.”​—2 Petulu 3:5-7.

Kũlĩhĩsa okuti okuiya “kueteke liesombiso kuenda lienyõleho,” ku sokisiwa lenyõleho “lioluali” luokoloneke via Noha. Oluali lupi lua nyõliwa? Ongongo ka ya nyõliwile, pole “omanu vakuesino” okuti ovanyãli va Suku, ovo va kunduiwa. Vokuenda “kueteke liesombiso” lia Suku li kasi oku iya, vana va nõlapo oku kala ovanyãli va Suku va ka kunduiwa. Pole, akamba va Suku va ka popeliwa ndeci ca pita la Noha kumue lepata liaye.​—Mateo 24:37-42.

Sokolola ndomo ongongo yi ka kala eci Suku a ka kundula ovina viosi vĩvi! Ocili okuti esapulo Liembimbiliya liatiamẽla kesulilo, esapulo limue liwa. Ndaño okuti esapulo liaco liwa, pamue o li pula ndoco: Anga hẽ Embimbiliya li tu sapuila eteke esulilo liya? Li kasi hẽ ocipepi? Ndi puluka ndati?