Omanu valua voluali va siata oku linga ocipito co Natale omo liasunga alua. Vamue va linga ocipito caco oco va kale lakamba kuenda epata. Vakuavo va tenda ocipito caco ndeteke lioku sokolola Suku ale lioku kuatisa olosuke. Pole, omanu vaco ovo va sukila ekuatiso. Momo va kasi vupeke woku limbuka ocili ceteke liaco.

Catete, omanu valua va siata oku linga ocipito caco poku sima okuti olio eteke Yesu a citiwa. Pole vakuovolandu va limbuka okuti lomue wa kũlĩha eteke Yesu a citiwa. Elivulu losapi, O Livro Cristão Dos Porquês, li lombolola okuti, “Akristão vatete ka va tavele oku linga ocipito coku citiwa kua Yesu,” momo va yonguile oku litepa lovituwa violuali.” Ocili okuti, Embimbiliya ka li tukula ulandu umue u lekisa okuti Yesu wa linga ocipito coku citiwa kuaye ale kuomunu ukuavo. Pole eye wa vetiya olondonge viaye oku ivaluka olofa viaye.—Luka 22:19.

Cavali, olonoño vialua via limbuka okuti ovihilahila viatiamẽla kocipito Conatale via tunda Katavo esanda okuti Hakristãoko. Vovihilahila viaco mua kongelele ovina ndeci Papai Noel, uti wo Natale, oku eca olombanjaile, oku tamisa olovela, uti woku mihila, oku posuisa olonjo kuenda oku imba ovisungo. Catiamẽla kovihilahila viaco elivulu losapi, The Externals of the Catholic Church lia lombolola okuti: “Eci tu eca ale ceci tu tambula olombanjaile Vionatale, oku posuisa olonjo vietu kuenda olonembele lovisapa, vañami pokati ketu tu limbuka okuti tu kasi oku linga ovihilahila viatavo esanda?”

Ove pamue o lipula esunga lieci ka ca sungulukilile oku kuama ovihilahila viaco. Kũlĩhĩsa atosi atatu a eca etambululo liaco. Suku ka tava oku tenga ovihilahila vietavo liesanda letavo liocili. Vonduko yuprofeto Amosi, Yehova Suku wa sapuila afendeli vaye va Isareli kosimbu hati: “Nda suvuka olofesta viene . . . Onjuela yovisungo viene yi kale kupãla lame.”—Amosi 5:21, 23.

Momo lie Yehova a ecela elungulo liaco? Kũlĩhisa eci omanu va kala kuviali wosimbu konano yo Isareli va enda oku linga. Soma yavo yatete Yerevoama, wa tungile olonãle viulu kalupale o Dani lo ko Betele kuenje wa vetiya omanu oco va fendele oloñale viaco okuti va liwekapo oku fendela Yehova Suku vonembele ko Yerusalãi. Soma wa tumbikavo olofesta kuenda wa nõla ovitunda oco vi kuatise koku vetiya omanu oku fendela oloñale viaco.—1 Olosoma 12:26-33.

Ocina va Isareli va kala oku linga ca molehele ndu okuti ca sunguluka. Anga hẽ ka va kaile oku linga ovina viaco viosi vonduko ya Suku loku u fendela? Elungulo Suku a eca vonduko ya Amosi kuenda ovaprofeto vakuavo vi lekisa ndomo Suku a kala eci a mola omanu va linga ovihilahila viaco. Vonduko yuprofeto Malakiya Suku wa popia hati: “Ame ndi Yehova si pongoloka.” (Malakiya 3:6) Olondaka evi ka vi tu kuatisa hẽ oku limbuka ndomo Suku a kala eci omanu valua va linga ocipito Conatale?

Omanu valua noke yoku kũlĩhisa atosi a tukuiwa ndeti, va liwekapo oku linga ocipito Conatele. Poku ci linga va sanga esanju poku kala lakamba vavo kuenda epata loku kuatisa olosuke vepuluvi liosi li va ecelela vokuenda kunyamo.