Lilongisila Kondaka ya Suku

Momo Lie Akristão va Papatisiwila?

Ocipama cilo, ceca atambululo kapulilo amue okuti, pamue wa va lingile ale, kuenda ci lekisa ovinimbu vi ku kuatisa oku sanga atambululo aco Vembimbiliya liove. Olombangi Via Yehova vi sanjukila oku eca atambululo kokuove kapulilo a kuãimo.

1. Epapatiso Liakristão li lomboloka nye?

Epapatiso li lomboloka epingilo lioku kuata ukamba uwa la Suku. Omo liaco, Ukristão ka papatisiwa eci a kasi oñaña, pole o papatisiwa lika eci a kuata utunga lolondunge vioku lilongisa ovina viatiamẽla ku Suku kuenje o linga ondonge ya Yesu. (Ovilinga 8:12; 1 Petulu 3:21) Tu kala lika ondonge ya Yesu eci tu lilongisa kuenda tu linga ovina eye a handeleka.​—Tanga Mateo 28:19, 20.

Koloneke viovapostolo va Yesu, omanu valua va linga apongoloko lonjanga oco va lilongise ovina viatiamẽla ku Suku kuenda ku Yesu. Eci ulume umue a lilongisa okuti oku fa kua Yesu kua yulula onjila yeyovo, haico a linga ondonge yaye. Koloneke vilo, omanu valua vakuavitima via sunguluka, va siatavo oku nõlapo oku linga olondonge via Yesu.​—Tanga Ovilinga 8:26-31, 35-38.

2. Momo lie Yesu a papatisiwila?

Yesu eci a papatisiwa la Yoano u Papatisi Volui Yordão, wa kuata 30 kanyamo. Epapatiso liaye, lia kala ocindekaise conjila a nõlelepo yoku linga ocipango ca Suku. (Va Heveru 10:7) Vocikele caye mua kongelele oku eca omuenyo waye ndocilumba coku yovola omanu kekandu. Yesu ndaño muẽle ceci keyile handi palo posi, wa solele Isiaye Yehova loku pokola kokuaye. ​—Tanga Marko 1:9-11; Yoano 8:29; 17:5.

  3. Momo lie Ukristão a sukilila oku papatisiwa?

Ekalo lietu lia litepa leli lia Yesu, momo tua citiwa lekandu. Pole, ocilumba colofa via Yesu ca ecelela okuti tu kuata ukamba uwa la Suku. (Va Roma 5:10, 12; 12:1, 2) Cilo, tu pondola oku tiamẽla kokuaye ndomanu vakuepata liaye. (2 Va Korindo 6:18) Tu kuata ndati esumũlũho liaco? Vohutililo yo pokolika, tu litumbika ku Yehova, loku likuminya oku linga ocipango caye vokuenda kuomuenyo wetu wosi. Noke, tu lekisa elitumbiko liaco komanu poku papatisiwa vovava.​—Tanga Mateo 16:24; 1 Petulu 4:2.

4. Nye o sukila oku linga oco o papatisiwe?

Olombangi Via Yehova via siata oku longisa Embimbiliya komanu vosi va yongola oku kuata ukamba la Suku. Oku lilongisa Embimbiliya loku endaenda kolohongele, ci pamisa ocisola cove ku Suku kuenda ekolelo liove kokuaye. Handi vali, ci ku kuatisa oku kuata ovituwa viwa. Oku kuata ocisola, ekolelo, kuenda ovituwa vikuavo viwa, ci ku kuatisa oku tẽlisa ohuminyo wa linga yoku vumba Yehova otembo ka yi pui.​—Tanga Yoano 17:3; Va Heveru 10:24, 25.

Oco o kuate alomboluilo akuavo, tanga ocipama 18, celivulu eli lia sandekiwa Lolombangi Via Yehova. Embimbiliya li Longisa Nye?