Ove hẽ o Sole Ondaka ya Suku?

LORRAINE wa popia hati, “eci nda fetika oku tanga Embimbiliya eteke leteke, sia kuatele esanju, momo ca kala ndocilemo. Ca tĩlile calua oku kuata elomboloko lialio, kuenje olonjanja vimue sia tẽlele oku tiamisila utima kueci ndi tanga.”

Vakuavo va lombolola okuti eci va fetika oku tanga Embimbiliya ka va kuatele esanju. Pole, va pandikisa momo va kũlĩhĩle okuti oku tanga Ovisonehua vi Kola, oco lika ca velapo. Marko wa popia hati: “Ca leluka oku ecelela oku yapuisiwa lasakalalo omuenyo okuti ka tu tangi vali Embimbiliya loku linga elilongiso lio pokolika. Oco ndi kuate ocituwa coku tanga Embimbiliya eteke leteke, nda sukilile oku likutilila kuenda oku likolisilako calua.”

Nye o pondola oku linga oco o sanjukile ovisonehua Viondaka ya Suku, Embimbiliya? O kuata ndati esanju poku vi tanga? Kũlĩhĩsa olonumbi vi kuãimo.

Ovimãho Kuenda Ndomo li Tangiwa

Osimbu kua fetikile oku tanga ocipama cimue Cembimbiliya, likutilila kuenda tiamisila utima kulandu waco. Pinga ku Yehova oco a ku kuatise oku kuata esanju lioku lilongisa Ondaka yaye. Likutilila kokuaye oco a situlule utima wove okuti o kuata olondunge viocili. (Osa. 119:34) Nda kua ci lingile, elilongiso Liembimbiliya li lingiwa ño lonjanga kuenda ku kuata vali onjongole yoku amamako. Lynn wa popia hati: “Olonjanja vimue, ndi tanga ño lonjanga kuenje si limbuka atosi a velapo a kasi vocipama ndi kasi oku tanga. Pamue si kuata elomboloko liulandu waco. Nda likutilila oco ndi tule utima kuenje ca ndi kuatisa oku tiamisila ovisimĩlo kueci ndi tanga.”

Kapako eci o lilongisa. Ivaluka okuti, oku kuata elomboloko liocili Cembimbiliya kuenda oku ci kapako, ci kuete esilivilo koku kuata omuenyo ko pui. Omo liaco, likolisilako oku sandiliya atosi avelapo kuenda oku a kapako. Chris wa popia hati: “Nda siata oku sandiliya ovina vi ndi kuatisa oku limbuka ovituwa viange vĩvi kuenda ovina vi ndi kolisa. Ci sanjuisa calua oku limbuka ndomo ovolandu Embimbiliya, lalivulu akuavo a siata oku ndi kuatisa, ndaño okuti asonehi vaco ka va ndi kũlĩhĩle.”

Li tumbikila ovimãho via leluka. Seteka oku lilongisa ovolandu amue okaliye vomanu va sonehiwa Vembimbiliya. O pondola oku sanga ovolandu vomanu vaco poku kũlĩhĩsa velivulu Estudo Perspicaz das Escrituras ale vo Índice das Publicações da Torre de Vigia. Poku kũlĩha okuti omanu va sonehiwa Vembimbiliya va kuatelevo ovituwa, kuenda ovisimĩlo ndevi vietu, o ka patekela ciwa ovolandu avo.

Sandiliya olonjila vikuavo vioku kũlĩhĩsa Ovisonehua. (Ovil. 17:2, 3) Sophia wa siata oku lilongisa locimãho caco. Eye wa popia hati: “Onjongole yange, oku lilongisa uloño wokaliye woku kũlĩhĩsa ovisonehua oco ci ndi kuatise kupange woku kunda kuenda kapuluvi akuavo, okuti ndi sapela ciwa lomanu catiamẽla kocili Cembimbiliya. Utala Wondavululi owo ocimãleho ca velapo ci kuatisa konepa eyi.”—2 Tim. 2:15.

Kũlĩhĩsa ovolandu Embimbiliya. Elivulu lia va Heveru 4:12, li popia hati: “Ondaka ya Suku  yi kasi lomuenyo.” Eci o tanga Ovisonehua, ecelela okuti esapulo lia Suku li kala vutima wove poku sokolola eci omanu va sonehiwa Vembimbiliya va enda oku mola. Seteka oku yeva ovina va enda oku yevelela, kuenda oku sokolola eci va enda oku sokolola. Sokisa ovolandu avo lovitangi o kasi oku liyaka lavio. Lilongisa ndomo va enda oku tetulula ovitangi viavo. Poku cilinga o ka mioñolola ukũlĩhĩso wove loku kapako ovolandu Embimbiliya.

Sanda otembo yoku konomuisa ovisonehua via tĩla kuenda alomboluilo avio oco o kuate elomboloko liwa. Pesila otembo yiwa kocipama locipama celilongiso. Citava okuti o pondola oku sanga apulilo amue a sukila oku linga akonomuiso akuavo. Sandiliya olondaka vina kua kũlĩhĩle, loku kũlĩhĩsa atosi pombuelo yemẽla, kuenda ovisonehua vikuavo Viembimbiliya via ilikiwamo. Osimbu o kuata elomboloko liwa loku kapako ovina wa tanga, o ka sanjukila Ondaka ya Suku. O ka popia ndeci ukualosamo a popia hati: “Ovisila viove nda vi tambula ndocipiñalo ka ci pui. Ovio onjolela yutima wange.”—Osa. 119:111.

Yuvula oku lilongisa lonjanga. Lekisa esunguluko poku sokiya otembo o pesila kelilongiso liove lio pokolika. Tepisa ciwa otembo yaco leyi o pesila koku lipongiyila olohongele viekongelo. Raquel wa popia hati: “Olonjanja vimue ndi li yeva ndu okuti nda sakalala calua, kuenje si tẽla oku tula utima. Omo liaco, nda nõlapo oku lilongisa vokatembo katito oco ndi upeko esilivilo. Poku ci linga ca siata oku ndi kuatisa calua.” Chris wa popia hati: “Eci ndi linga ño elilongiso lonjanga, utima wange u ndi vetela evelo, momo sio pileko esilivilo. Ulandu nda lilongisa ka u vetiya utima wange.” Omo liaco, sokiya otembo yiwa yoku lilongisa.

Kuata ocituwa coku livela ondaka ya Suku. Upostolo Petulu wa popia hati: “Liveli ndoloñaña asenjele ovitima ana ka a kuete elimbi. A liveli okuti vu kulila kepopelo.” (1 Pet. 2:2) Ocili okuti, oloñaña ka vi sukila oku kuata ocituwa coku livela asenjele. Momo onjongole yaco va citiwa layo. Pole, Ovisonehua vi lekisa okuti tu sukila oku kuata onjongole yoku livela ondaka ya Suku. Nda wa tanga emẽla limosi Liembimbiliya eteke leteke, onjongole yaco yi keya vokuove. Kuenje ocina cina kefetikilo ca molẽhele okuti ca tĩla, ci ka kala cesanju.

Sokolola Ovisonehua wa tanga. Poku sokolola ovina wa tanga, o kuatisiwa calua. Momo ci ku kuatisa oku sokisa ovina viaco lovolandu wa  konomuisile tete. Kuenje o ka kuata ukũlĩhĩso wa velapo wovina viespiritu, una u nena esanju.—Osa. 19:14; Olosap. 3:3.

Otembo Yimue yi Pesiwa Ciwa

Oku kuata ocituwa ciwa coku lilongisa, ka ca lelukile, pole, ci nena asumũlũho alua. O ka kuata elomboloko liwa Liovisonehua. (Va Hev. 5:12-14) Ukũlĩhĩso kuenda olondunge Viovisonehua o ka kuata, vi nena esumũlũho lesanju, kuenda ombembua. Olondunge vi sangiwa Vondaka ya Suku, vi lomboloka “uti womuenyo” ku vana va vi kuata, haivo va vi kapako.—Olosap. 3:13-18.

Elilongiso liondaka ya Suku, li ku ĩha olondunge viutima. (Olosap. 15:14) Vi ku kuatisa oku eca elungulo li tunda Vembimbiliya. Nda wa ecelela oku songuiwa lolonumbi wa tanga Vovisonehua kuenda valivulu “ukuenje wa kolelua haeye wa lunguka,” o ka limbuka ekavuluko kuenda ekoliso Liondaka ya Yehova. (Mat. 24:45) O ka yuvula oku kuata ovisimĩlo ka via sungulukile, loku pua ohele, kuenje o ka songuiwa ciwa konepa yespiritu. Handi vali, ovina viosi o linga viatiamẽla kukamba wove la Suku, o ka sumũlũha lavio.—Osa. 1:2, 3.

Oku kuatela ocisola Suku lutima wosi, ci ku vetiya oku situlula ekolelo liove komanu. Oku cilinga ci nenavo onima yiwa. Sophia, o kasi oku likolisilako oku ivaluka ovisonehua a tanga kuenda oku talavaya lavio poku sapela lomanu vocikanjo oco upange waye woku kunda u lingiwe ciwa lesanju. Eye wa popia hati: “Oku mola ndomo omanu va yevelela ciwa ovisonehua Viembimbiliya, ci sanjuisa calua.”

Esilivilo lia velapo lioku sanjukila Ondaka ya Suku, oku kuata ukamba la Yehova. Elilongiso Liembimbiliya li ku kuatisa oku kũlĩha olonumbi viaye, loku kapako ocisola caye, ocali, kuenda esunga liaye. Ka kuli upange ukuavo u kuete esilivilo lia velapo, ale onima yiwa. Omo liaco, likolisilako oku lilongisa Ondaka ya Suku. Nda wa ci linga o ka lekisa okuti wa pesela ciwa otembo.—Osa. 19:7-11.

[Okakasia Lelitalatu kemẽla 5]

OKU TANGA ONDAKA YA SUKU: OVIMAHO KUENDA NDOMO CI LINGIWA

▪ Osimbu kua fetikile oku tanga ocipama cimue Cembimbiliya, likutilila kuenda tiamisila utima kulandu waco.

▪ Kapako eci o lilongisa.

▪ Li tumbikila ovimãho via leluka.

▪ Sandiliya olonjila vikuavo vioku kũlĩhĩsa Ovisonehua.

▪ Kũlĩhĩsa ovolandu Embimbiliya.

▪ Sanda otembo yoku konomuisa ovisonehua via tĩla kuenda alomboluilo avio oco o kuate elomboloko liwa.

▪ Yuvula oku lilongisa lonjanga.

▪ Kuata ocituwa coku livela ondaka ya Suku.

▪ Sokolola Ovisonehua wa tanga.

[Elitalatu kemẽla 4]

Poku tanga ulandu umue Wembimbiliya, sokolola ndu okuti o kasi oku lipita locitangi caco