NYE o lete vociluvialuvia cilo okuti ka tua ci muile vocipama ca pita? Ocili okuti vociluvialuvia cilo, muli omanu. Ava, ovo omanu vatete okuti ulume kuenda ukãi. Helie wa lulika omanu vaco? Suku eye wa va lulika. Ove hẽ, wa kũlĩha onduko ya Suku? Onduko yaye, eye Yehova. Ulume watete onduko yaye Adama kuenda ukãi waye onduko yaye Heva.

Yehova poku lulika Adama wa linga ndoco: Wopa eve lioposi kuenje wa tunga lalio etimba liaye. Noke wo fuimĩla ofela yomuenyo vanyulu aye kuenje Adama wa kuata omuenyo.

Yehova Suku wa eca upange umue ku Adama. Eye wa sapuila Adama oco a ece olonduko kovinyama viosi. Adama wa sukilile oku pita otembo yalua oco a kũlĩhĩse onduko yi sesamẽla ocinyama locinyama. Osimbu Adama a kala oku luka ovinyama, eye wa limbuka ocina cimue. Ove hẽ, wa kũlĩha eci eye a limbuka?

Adama wa limbuka okuti ovinyama viosi via kala vivali vivali ndokuti ulume lomange. Olonjamba via kala ulume lomange kuenda olohosi via kalavo ulume lomange. Pole, Adama wa kala lika liaye. Yehova wa pekelisa Adama otulo tuelume, kuenje osimbu a pekela wopa lumue kolomati viaye. Olumati luaco Yehova opa ku Adama, wa tunga laluo ukãi kuenje wo weca ku Adama oco a linge ukãi waye.

Adama wa kuata esanju liocili! Sokololavo esanju Heva a kuata eci a kapiwa vocumbo caco ceposo! Kaliye, ovo kavali kavo va pondola oku kuata omãla kuenda oku kala kumuamue lesanju.

Yehova wa yonguile okuti Adama la Heva va kala otembo ka yi pui. Eye wa yonguilevo okuti ovo va pongolola ongongo oco yi posoke ndeci ca kala ocumbo Cedene. Adama la Heva va kuata esanju liocili poku sokolola upange waco! Anga hẽ ove wa yonguilevo oku kuatisa kupange waco woku pongolola ongongo oco yi linge ocumbo ceposo? Ocili okuti esanju lia Adama la Heva ka lia kaile otembo yalua. Tu konomuisi esunga liaco..