Usoma wa Suku uviali wocili wa tumbikiwa la Yehova Suku. Vembimbiliya, “Usoma wa Suku” u tukuiwavo hati “usoma wokilu” momo u viala oku upisa kilu. (Mar. 1:14, 15; Mat. 4:17) Owo u kuete ovina vialua via lisietahãla luviali womanu, pole, wa velapo uviali womanu.

•   Olombiali. Suku wa nõla Yesu Kristu oku kala Ombiali Yusoma waye, kuenda wa eca kokuaye unene wa velapo okuti womanu u sule. (Mat. 28:18) Omo Yesu o talavaya lika lunene waco oco a linge ovina viwa, ci lekisa okuti Ombiali yimue ya koleliwa haeye ukuahenda. (Mat. 4:23; Mar. 1:40, 41; 6:31-34; Luka 7:11-17) Lekuatiso lia Suku, Yesu wa nõla omanu vo kolofeka viosi, vana va ka ‘viala kumue laye kilu lieve’ oku pisa kilu.—Esit. 5:9, 10.

•   Otembo u ka kala. Usoma wa Suku ka u kasi ndowu womanu okuti, wimuha, momo ‘lalimue eteke u ka nyõliwa.’—Dan. 2:44.

•   Olonungi. Vana va linga ovina Suku a yongola, va pondola oku kala olonungi Viusoma wa Suku, okuti ka va nõliwa omo lioku tiamẽla kepata limue, ale kofeka yimue.—Ovil. 10:34, 35.

•   Ovihandeleko. Vovihandeleko (ale volonumbi) Viusoma wa Suku mua kongela ovina vialua okuti, ka vi tu tateka lika oku linga eci cĩvi, pole, vi tu lekisa ndomo tu pondola oku kala olonungi viwa. Embimbiliya li popia ndoco: “Yesu wo kumbulula hati, Sola Ñala Suku yove lutima wove wosi lomuenyo wove wosi lolondunge viove viosi. Eci oco ocihandeleko cinene, haico catete. Kuenje cavali ca lisoka laco, ceci, okuti, Sola u o lisungue love ndeci o lisole ove muele.” (Mat. 22:37-39) Oku sola Suku kuenda omanu ku vetiya olonungi Viusoma oku lingila ovina viwa vakuavo.

•   Elilongiso. Osimbu olonungi Viusoma wa Suku via velisapo elilongiso, vi longisavo omanu oku kapako olonumbi viaco.—Isa. 48:17, 18.

•   Ocikundi. Ombiali Yusoma wa Suku, ka yi kisika olonumbi viawo lovina ka vi kuete esilivilo. Ovio vi tẽlisa ocipango ca Suku oku kongelamo ohuminyo yokuti vosi va lekisa ocisola va ka kala vofeka yelau palo posi otembo ka yi pui.—Isa. 35:1, 5, 6; Mat. 6:10; Esit. 21:1-4.