تەرجىمىھال
بىز «ئىنتايىن قىممەت باھالىق بىر مەرۋايىتنى» تاپتۇق
ۋىنستون ۋە پامېلا (پام) قېرىنداشلار ئاۋسترالىزىيىدىكى بەيتەلدە خىزمەت قىلىدۇ. ئىككىسى باش قوشقاندىن باشلاپ بەختلىك تۇرمۇش كەچۈرسىمۇ، بېشىدىن كۆپ قىيىنچىلىقلارنى ئۆتكۈزگەن. مەسىلەن، باشقا مەدەنىيەتكە كۆنۇش ۋە قورساقتىكى تېخى توغۇلمىغان بالىسىنىڭ چۈشۈپ كېتىشى سەۋەبلىك ئۇلار قايغۇ-ھەسرەتلەرنى چەككەن. بۇنىڭغا قارىماستىن ئۇلار يەھۋاغا ۋە ئۇنىڭ خەلقىگە بولغان مېھىر-مۇھەببىتىنى ۋە ۋەز خىزمىتىدىكى خۇشاللىقنى ساقلاپ قالالىغان. بۇ سۆھبەتتە ۋىنستون بىلەن پامېلا ئۆزلىرى توغرۇلۇق ئېيتىپ بېرىدۇ.
ۋىنستون بۇرادەر، خۇدانى قانداق ئىزدىگەنلىكىڭىز توغرۇلۇق ئېيتىپ بېرەلەمسىز؟
مەن ئاۋسترالىيىنىڭ كۋىنسلەند شتاتىدىكى دېھقانچىلىق مەيدانىدا چوڭ بولدۇم. بىزنىڭ ئائىلىمىز دىنغا ئىشەنمىگەن ئىدى. بىز ئادەملەردىن يىراق يەردە ياشىغانلىقتىن، مەن ئۆيدىكىلەردىن باشقا ھېچكىم بىلەن ئارىلاشمىدىم دېسىمۇ بولىدۇ. 12 يېشىمدىن تارتىپ مەن خۇدانى ئىزدەشكە باشلىدىم. مەن ئۇنىڭغا دۇئا قىلىپ، ئۆزى توغرۇلۇق ھەقىقەتنى ئېچىپ بېرىشىنى سورىدىم. كېيىن، مەن ئۆيدىن كېتىپ، ئاۋسترالىيىنىڭ جەنۇبىدىكى ئادېلېيد شەھىرىدە ئىش تاپتىم. 21 يېشىمدا سىدنېي شەھىرىگە دەم ئېلىشقا بارغىنىمدا پام دېگەن قىز بىلەن تونۇشۇپ قالدىم. ئۇ ماڭا برىتان-ئىسرائىل، دەپ ئاتالغان دىنىي ئېقىم ھەققىدە ئېيتىپ بەردى. بۇ ئېقىمدىكىلەر برىتانىيىلىكلەر ئىسرائىلنىڭ يوق بولۇپ كەتكەن قەبىلىلىرىدىن چىققان دەپ ئىشىنىدىكەن. ئۇلار بۇ قەبىلىلەر مىلادىدىن ئىلگىرىكى 740-يىلى ئەسىرلىككە ئېلىپ كېتىلگەن شىمالىي ئىسرائىل پادىشاھلىقىنىڭ ئون قەبىلىسى دېيىشىدۇ. مەن ئادېلېيدقا قايتىپ بارغاندا، بىر خىزمەتدىشىم بىلەن شۇ توغرۇلۇق سۆزلىشىشكە باشلىدىم. ئۇ يەھۋا گۇۋاھچىلىرى بىلەن مۇقەددەس كىتابنى ئۆگىنىشنى باشلىغان ئىكەن. ئۇنىڭ بىلەن ئاساسلىقى يەھۋا گۇۋاھچىلىرىنىڭ نېمىگە ئىشىنىدىغانلىقى توغرۇلۇق بىر نەچچە سائەت سۆزلەشتۇق. شۇ چاغدا، مەن بالا چېغىمدىكى دۇئالىرىمغا جاۋاب ئالغانلىقىمنى چۈشەندىم. مەن ياراتقۇچى ۋە ئۇنىڭ پادىشاھلىقى توغرىسىدا ھەقىقەتنى بىلدىم! شۇنداق قىلىپ «ئىنتايىن قىممەت باھالىق بىر مەرۋايىتنى» تاپتىم!—مەتتا 13:45، 46.
پام قېرىنداش، سىزمۇ «مەرۋايىتنى» كىچىكىڭىزدىن ئىزدەشنى باشلىدىڭىز. سىز ئۇنى قانداق تاپتىڭىز؟
مەن يېڭى جەنۇبىي ۋېلىس شتاتىدىكى كوفس-خاربور، دېگەن كىچىك شەھەردە چوڭ بولدۇم. ئۆيدىكىلىرىم دىنغا بەك يېقىن بولغان ئىدى. ئاتا-ئانام ۋە بوۋا-موماملىرىم برىتان-ئىسرائىل ئېقىمىنىڭ تەلىملىرىنى چىڭ تۇتاتتى. ئۇلار ئىنىمنى، ھەدەمنى، مېنى ۋە باشقا قېرىنداشلىرىمنى خۇدا پەقەت ئاتا-بوۋىلىرى برىتانىيىلىك بولغان كىشىلەرنى ياخشى كۆرىدۇ، دەپ ئۆگەتكەن. بىراق، مەن بۇنىڭغا ئانچە ئىشىنىپ كەتمىدىم. خۇدا توغرۇلۇق بىلىمگە موھتاج بولۇپ يۈرگەنلىكتىن، 14 يېشىمدا مەن ھەر تۈرلۈك چېركاۋلارغا باردىم. ئانگلىكان، بەپتىست ۋە يەتتىنچى كۈن ئادۋېنتىست دېگەنلەرنىڭ چېركاۋلىرىغا بېرىپ كۆردۈم. بىراق، ئۇلارنىڭ ھېچقايسىسى خۇدانى بىلىشىمگە ياردەم بېرەلمىدى.
كېيىنرەك، بىز سىدنېيغا كۆچتۇق. شۇ يەردە مەن ۋىنستون بىلەن تونۇشتۇم. ئۇ سىدنېيغا دەم ئېلىش ئۈچۈن كەلگەن ئىكەن. ئۆزى ئېيتقاندەك، ئىككىمىزنىڭ توغرۇلۇق سۆھبىتى ئارقىسىدا، ئۇ گۇۋاھچىلار بىلەن مۇقەددەس كىتابنى ئۆگىنىشكە باشلىغان. شۇنىڭدىن كېيىن، ئۇنىڭ ماڭا يازغان ھەربىر خېتى مۇقەددەس كىتاب ئايەتلىرىگە تولغان ئىدى. راستىنى ئېيتقاندا، بېشىدا مەن ئازراق ئەنسىرىدىم، ھەتتا ئاچچىقلاندىم. بىراق، ۋاقىت ئۆتۈپ مەن ھەقىقەتنى تاپقانلىقىمنى چۈشەندىم.
1962-يىلى مەن ۋىنستونغا يېقىنراق بولۇش ئۈچۈن ئادېلېيدقا كۆچۈپ باردىم. ئۇ توماس ۋە جانىس سلومان دېگەن گۇۋاھچى ئەر-ئايالنىڭ ئۆيىدە تۇرۇشۇمغا كېلىشىپ قويغان ئىكەن. بۇرۇن ئۇلار پاپۇئا-يېڭى گۋىنېيىدە ياتئەل خەلقى ئارىسىدا ۋەز ئېيتقۇچى (مىسسىئونېر) بولۇپ خىزمەت قىلغان. شۇ چاغدا مەن 18 ياشقا ئەمدى كىرگەن ياش قىز ئىدىم. سلومانلار ئائىلىسى ماڭا ئىنتايىن مېھرىبانلىق بىلەن مۇئامىلە قىلغان ۋە يەھۋا توغرۇلۇق كۆپرەك بىلىشىمگە ياردەم بەرگەن. مەنمۇ خۇدا سۆزىنى ئۆگىنىشنى باشلاپ، كۆپ ئۆتمەي ھەقىقەتنى تاپقىنىمغا كۆز يەتكۈزدۈم. ۋىنستون ئىككىمىز باش قوشقاندىن كېيىن، دەرھال يەھۋاغا تولۇق ۋاقىتلىق خىزمەت قىلىشنى باشلىدۇق. بىز كۆپلىگەن قىيىنچىلىقلارغا دۇچ كەلسەكمۇ، خىزمىتىمىز كۆپ بەرىكەتلەرنى ئېلىپ كەلگەن. بىز قىممەت باھالىق مەرۋايىت، يەنى ھەقىقەتنى تېخىمۇ كۆپرەك قەدىرلەيدىغان بولدۇق.
ۋىنستون بۇرادەر، يەھۋاغا خىزمەت قىلغان دەسلەپكى يىللىرىڭلار ھەققىدە ئېيتىپ بەرسىڭىز؟
1. رايونلۇق زىيارەت خىزمەتتىكى رايونىمىزنىڭ خەرىتىسى
2. بىز ئارىلىغان بەزى ئاراللارنىڭ پوچتا ماركىلىرى. كىرىباتى ۋە تۇۋالۇ بۇرۇن گىلبېرت ۋە ئىللىس ئاراللىرى دەپ ئاتالغان
3. تۇۋالۇ خەلقىنىڭ فۇنافۇتى دېگەن گۈزەل ئارالى. ياتئەل خەلقى ئارىسىدىكى ۋەز ئېيتقۇچىلار (مىسسىئونېرلار) كېلىشتىن ئاۋۋال، بىز زىيارەت قىلغان كۆپلىگەن ئاراللارنىڭ بىرى
پام بىلەن توي قىلغاندىن كېيىن كۆپ ئۆتمەي، يەھۋا خۇدا ئالدىمىزدا خىزمەتنىڭ چوڭ ئىشىكلىرىنى ئېچىشقا باشلىدى (1-كورىنت. 16:9). بىرىنچى ئىشىك كىچىككىنە جامائىتىمىزنى زىيارەت قىلغان رايۇنغا مەسئۇل ئاقساقال بولۇپ خىزمەت قىلغان جەك پورتېر بۇرادەر ئارقىلىق ئېچىلدى. ھازىر ئۇ ئاۋىسترالىزىيىدىكى بەيتەل كېڭىشىنىڭ ئەزاسى. جەك ۋە ئۇنىڭ ئايالى روزلىن بىزنى پىدائىي ۋەز خىزمەت قىلىشقا دەۋەت قىلغان. پام ئىككىمىز 5 يىل پىدائىي ۋەز ئېيتقۇچى بولۇپ، بۇ خىزمەتتىن چوڭ خۇشاللىق ئالدۇق. مەن 29 ياشتا بولغاندا، بىزنى شۇ چاغدا فىجى ئارىلىدىكى بەيتەلنىڭ يېتەكچىلىكى ئاستىدىكى جەنۇبىي تىنچ ئوكيان ئاراللىرىدا رايونغا مەسئۇل ئاقساقال بولۇپ خىزمەت قىلىشقا تەكلىپ قىلدى. شۇ ئاراللارغا ساموئا، ئامېرىكا ساموئاسى، كىرىباتى، نائۇرۇ، نىئۇۋۇ، توكېلائۇ، تونگا، تۇۋالۇ ھەم ۋانۇئاتۇ كىرگەن.
شۇ چاغدا يىراقتا جايلاشقان بەزى ئاراللاردىكى ئادەملەر يەھۋا گۇۋاھچىلىرىغا گۇمان بىلەن قارىغان. شۇنىڭ ئۈچۈن، بىز ئېھتىياتچان ۋە سەزگۈر بولۇشىمىز كېرەك ئىدى (مەتتا 10:16). شۇ يەرلەردىكى جامائەتلەر بەك كىچىك بولغانلىقتىن، بىزگە قونىدىغان جاي تېپىش قىيىن بولاتتى. شۇڭا، بىز يېزا ئىچىنى ئارىلاپ، يەرلىك كىشىلەرنىڭ ئۆيىدە قوناتتۇق. ئۇلار بىزنى ھەرقاچان قۇچاق ئېچىپ قارشى ئالاتتى.
سىزنىڭ تەرجىمە ئىشىغا قىزىقىدىغانلىقىڭىزنى بىلىمىز. بۇنىڭغا نېمە سەۋەب بولغان؟
ئاقساقاللار مەكتىپىدە (ساموئا)
شۇ ۋاقىتلاردا تونگا تىلىدا پەقەت بىرنەچچە ۋاراقچە بىلەن كىتابچىلار بولغان. قېرىنداشلار ۋەز خىزمىتىدە «مەڭگۈ ھاياتقا يېتەكلەيدىغان ھەقىقەت» كىتابىنىڭ ئىنگلىزچە نۇسخىسىنى ئىشلەتكەن. شۇڭا، ئاقساقاللار ئۈچۈن تۆت ھەپتىلىك بىر مەكتەپتە ئوقۇش ئورۇنلاشتۇرۇلغاندا، ئۈچ ئاقساقال شۇ كىتابنى تەرجىمە قىلىشقا ماقۇل بولغان. ئۇلار ئاقساقاللار مەكتىپىدە ئوقۇۋاتسىمۇ ۋە ئىنگلىزچىنى ياخشى بىلمىسىمۇ، بۇ ئىشقا تەييارلىق بىلەن كىرىشتى. قولدا يېزىلغان مەزمۇنلارنى پام خەت بېسىش ماشىنىسىدا يېزىپ، ئۇنى قوشما شتاتلاردىكى باسمىخانىغا ئەۋەتتۇق. كىتابنى باشتىن ئاياققىچە تەرجىمە قىلىشقا 8 ھەپتىدەك ۋاقىت كەتتى. تەرجىمنىڭ سۈپىتى ئانچە ياخشى بولمىسىمۇ، بۇ كىتاب تونگا تىلىدا سۆزلەيدىغان كۆپلىگەن ئادەملەرنىڭ ھەقىقەتنى تونۇشقا ياردەم بەردى. بۇنىڭدىن ئاۋۋال پام ئىككىمىز ھېچقاچان تەرجىمە ئىشىغا قاتناشمىغان. بىراق، بۇ ۋەقە تەرجىمە ئىشىغا قىزىقىشىمىزنى ئويغاتتى.
پام قېرىنداش، ئارالدىكى تۇرمۇش بىلەن ئاۋىسترالىيىدىكى تۇرمۇشنىڭ چوڭ پەرقى بارمۇ؟
رايونلۇق زىيارەت خىزمىتىدە بولغاندا، بىز بەزىدە ئاپتوبۇستا ياشىغان ئىدۇق
ئەلۋەتتە! ئاسمان بىلەن يەردەك پەرقى بار! بۇ قايسى ئارالدا بولغىنىمىزغا باغلىق بولۇپ، بەزى جايلاردا پاشىلار شۇنچىلىك كۆپ، چىدىغۇسىز ئىسسىق ياكى نەملىك ۋە ھەرخىل كېسەللەردىن قىينىلاتتۇق. بەزىدە قوسىقىمىز ئاچ يۈرەتتۇق. ئەمما ھەر كۈنى كەچقۇرۇن فالېدىن ئوكيانغا قارىغاندا، ئۆزگىچە راھەتلىنەتتۇق. ساموئالىقلار «فالې» دەپ تۆپ تەرەپلىرى ئوچۇق، ئۆگۈزى قومۇش ياكى يوپۇرماقلاردىن ياسالغان ئۆينى ئېيتىدۇ. ئايدىڭ كېچىلەردە كوكوس دەرەخلىرى بەك ئېنىق كۆرۈنەتتى. ئاي شولىسى چۈشكەن سۇنىڭ دولقۇنلىرى جانغا ئارامبەخش ئېتەتتى. شۇنداق چىرايلىق مەنزىرىلەر بىزنى چوڭقۇر ئويلىنىش ھەم دۇئا قىلىشقا ۋە سەلبىي ئەمەس، ئىجابىي نەرسىلەر ھەققىدە ئويلاشقا ئۈندىگەن.
بىز بولۇپمۇ بالىلارنى بەك ياخشى كۆرۈپ قالدۇق. ئۇلار شۇنچىلىك ئوماق ئىدى. بالىلار ئۈچۈن بىز، ئاق تەنلىك چەت ئەللىكلەر، ئىنتايىن قىزىق بولدۇق. بىر كۈنى نىئۇۋۇ ئارىلىدا بولغىنىمىزدا، بىر كىچىك بالا ۋىنستوننىڭ تۈكلەر باسقان قولىنى كۆرۈپ: «پەيلىرىڭ قالتىسقۇ!»— دەپ قولىنى سىيپاپ قويدى. ئۇ شۇنچىلىك تۈكلۈك قولنى ھېچقاچان كۆرمىگەنلىكتىن، ئۇنى قانداق تەسۋىرلەشنىمۇ بىلمىگەن ئوخشايدۇ.
ئادەملەرنىڭ ناچار تۇرمۇشىنى كۆرگەندە، يۈرىكىمىز ئاغرىغان. ئۇلار جەننەتتەك ئاجايىپ چىرايلىق مەنزىرىدە ياشىسىمۇ، ئىچىدىغان سۈيى يېتىشمىگەن ۋە تىببىي داۋالاشقا ئېرىشەلمىگەن. بىراق، قېرىنداشلار ئۈچۈن بۇ ئادەتلەنگەن نورمال تۇرمۇش بولغانلىقتىن، ئۇلارنىڭ روھى چۈشمىگەن. ئۇلار بارىغا شۈكۈر قىلىپ، بالا-چاقىسى يېنىدا، خۇداغا ئىبادەت قىلىدىغان ئورنى ھەم يەھۋانى مەدھىيىلەش مۇمكىنچىلىكى بولغانلىقىغا خۇشال ئىدى. ئۇلارنىڭ ئۈلگىسى بىزگىمۇ ھاياتتا نېمە مۇھىملىقىنى ئۇنتۇماي، ئاددىي ھايات كەچۈرۈشكە ياردەم بەردى.
يات يەرنىڭ شارائىتلىرى تامامەن باشقىچە بولسىمۇ، بەزىدە قۇدۇقتىن سۇ تارتىشقا، تاماقنى تەييارلاشقا توغرا كېلىپتۇ. شۇ توغرۇلۇق كۆپرەك ئېيتىپ بېرەلەمسىز؟
پام كىر يۇيۇۋاتىدۇ (تونگا)
دادام ماڭا ئوت يېقىپ، ئوتتا تاماق تەييارلاشنى ۋە يوقنى بار قىلىشنى ئۆگەتكەنىدى. شۇڭا، ئۇنىڭغا بەك مىننەتدارمەن. بىر قېتىم كىرىباتىغا بارغاندا، ئۆگىزى قومۇش بىلەن يېپىلغان كىچىك ئۆيدە توختىدۇق. شۇ ئۆينىڭ ئاستىغا دېڭىزدىكى مارجان قۇلۇلىلەر پول قىلىپ بېسىلغان، تاملىرى بامبۇكتىن ياسالغان ئىدى. تاماقنى ئېتىش ئۈچۈن مەن كىچىكىنە يەرنى ئويۇپ، ئوچاق ياساتتىم، ئوتۇننىڭ ئورنىغا كوكوس قاسراقلىرىنى ئىشلىتەتتىم. سۇنى ئېلىپ كېلىش ئۈچۈن مەن قۇدۇق بېشىغا بېرىپ، يەرلىك ئاياللار بىلەن نۆۋەتتە تۇراتتىم. ئۇلار سۇنى ئىككى مېتىر ئۇزۇن تاياق بىلەن تارتىپ چىقىراتتى. بۇ تاياق قارماققا ئوخشايتتى، لېكىن ئارغامچىغا ئىلمەك ئەمەس، قەلەي قاچا باغلانغان. نۆۋىتى كەلگەندە ھەربىر ئايال يىپقا باغلانغان قاچىنى سۇغا تاشلاپ، قولىنى دەرھال بۇراپ، قاچىنى سۇغا تولدۇرۇۋالاتتى. قارىماققا بۇ بەك ئاسان ئىدى، لېكىن نۆۋەت ماڭا كەلگەندە، قولۇمنى قانچە بۇرىمىساممۇ، قاچام سۇغا چۆكمەي، لەيلەپ تۇراتتى. ھەممىسى كۈلۈشۈپ توختىغاندىن كېيىن، بىر ئايال ماڭا ياردەملەشتى. يەرلىك ئاياللار ھەرقاچان ياردەم بېرىشكە تەييار ۋە مېھرىبان ئىدى.
ئىككىلىڭلار ئاراللاردىكى خىزمەتنى ياخشى كۆرۈپ قالدىڭلار. ئېسىڭلاردا قالغان قىزىقارلىق ۋەقەلەرنى ئېيتىپ بېرەلەمسىلەر؟
ۋىنستون بۇرادەر: يەرلىك ئۆرپ-ئادەتلەرگە ئادەتلىنىش ئۈچۈن بىراز ۋاقىت كېرەك بولدى. مەسىلەن، قېرىنداشلار بىزنى مېھمان قىلغاندا، ئادەتتە داستىخانغا ھەممە تاماقلىرىنى قوياتتى. ئۇلارغىمۇ قالدۇرۇشىمىز كېرەكلىكى ئوي-خىيالىمىزغا كىرىپ چىقماپتۇ، ئالدىمىزغا قويۇلغان ھەممىنى يەۋىتەتتۇق. ئەلۋەتتە، ئۆرپ-ئادەتلىرىنى چۈشىنىۋالغاندىن كېيىن، ئۇنداق قىلمايدىغان بولدۇق. كۆپ نەرسىلەرنى بىلمەي خاتا قىلساقمۇ، قېرىنداشلار بىزنى چۈشىنىشكە تىرىشقان. ھەر ئالتە ئايدا جامائەتلەرگە بارغاندا، ئۇلار بىزنى قۇچاق ئېچىپ قارشى ئالاتتى. يەرلىك قېرىنداشلار بىزدىن باشقا يات دۆلەتتىن كەلگەن گۇۋاھچىلارنى كۆرمىگەن.
قېرىنداشلار بىلەن ۋەز خىزمىتىگە چىقىۋاتىمىز (نىئۇۋۇ)
ھەر تۈرلۈك جامائەتلەرگە بارغاندا، شۇ يېزىلاردىكى كىشىلەرگە ياخشى گۇۋاھلىق بەرگەن ئىدۇق. ئۇلار يەھۋا گۇۋاھچىلىرى دۇنياۋىي تەشكىلات ئەمەس، يەرلىك قېرىنداشلار چىقىرىۋالغان دىن، دەپ ئويلىغان. لېكىن، ئۇلار چەت ئەلدىن كەلگەن قېرىنداشلارنى كۆرگەندە، ئۆز كۆز قارىشىنى ئۆزگەرتتى. خەلقئارا تەشكىلات ئىكەنلىكىمىزنى بىلىپ، ئۇلار ھەيران قالغانىدى.
پام: ماڭا چوڭقۇر تەسىرات قالدۇرغان كىرىباتىدىكى بىر ۋەقە ئېسىمدە. شۇ يەردە پەقەت بىرنەچچە قېرىنداش بار ئىدى. سىنىكاي ماتېرا دېگەن يالغۇز ئاقساقال ھەرقاچان بىزگە غەمخورلۇق قىلغان. بىر كۈنى ئۇ بىزگە كېلىپ: «بۇ سىلەرگە»،— دەپ بىر سېۋەتنى تۇتقۇزدى. ئىچىدە بىر تال توخۇ تۇخۇمى بار ئىكەن. شۇ چاغدا تۇخۇم كەم ئۇچرايتتى. ئۇنىڭ بۇ كىچىك بولسىمۇ، مەردلىكى بىزنى بەكمۇ ھاياجانغا سالغانىدى.
پام، بۇ ۋەقەلەردىن بىرنەچچە يىل كېيىن بالىڭىز چۈشۈپ كېتىپتۇ. بۇ ئېغىر سىناققا بەرداشلىق بېرىشىڭىزگە نېمە ياردەم بەرگەن؟
1973-يىلى بىز تىنچ ئوكيان ئاراللىرىدا خىزمەت قىلغاندا، ھامىلدار بولۇپ قالدىم. شۇ سەۋەبتىن، بىز ئاۋسترالىيىگە قايتىشنى قارار قىلدۇق. بىراق تۆت ئايدىن كېيىن بالىمىز چۈشۈپ كەتتى. ۋىنستون ئىككىمىزنىڭ يۈرىكىمىزگە پىچاق سانجىلغاندەك بولدى. ۋاقىت ئۆتۈپ قايغۇ-ھەسرىتىمىز ئازايسىمۇ، تېخى پۈتۈنلەي بېسىلمىغان ئىدى. «كۈزىتىش مۇنارى» 2009-يىل، 15-ئاپرېل سانىدىكى «ئەگەر تېخى تۇغۇلمىغان بالا ئۆلۈپ كەتسە، ئۇنىڭ تىرىلىش ئۈمىدى بارمۇ؟»، دېگەن ماقالە چىققان. شۇ ماقالىدە يېزىلغانلار بىزگە تەسەللىي بېرىپ، بۇنى يەھۋانىڭ ئۆزى ئادىل بىر تەرەپ قىلىدىغانلىقىغا ئىشەندۈردى. يەھۋا خۇدا يۈرەك يارىلىرىمىزنى ساقايتىدۇ ۋە ئوغلى ئەيسا ئارقىلىق «ئىبلىسنىڭ ئىشلىرىنى بۇزىدۇ» ياكى پۈتۈنلەي يوق قىلىدۇ (1-يۇھاننا 3:8). بۇ ماقالىنى ئوقۇپ، يەھۋانىڭ خەلقى سۈپىتىدە ئىگە بولغان «مەرۋايىتىمىزنى» تېخىمۇ قەدىرلەيدىغان بولدۇق. پادىشاھلىققا ئۈمىدىمىز بولمىسا، بىز نېمە قىلاتتۇق؟!
بالىمىزدىن ئايرىلغاندىن كېيىن، بىز قايتىدىن تولۇق ۋاقىت خىزمەت قىلىشنى باشلىدۇق. بىرنەچچە ئاي ئاۋسترالىيىدىكى بەيتەلدە خىزمەت قىلدۇق، كېيىن جامائەتنى زىيارەت قىلىش خىزمىتىمىزگە قايتتۇق. يېڭى جەنۇبىي ۋېلىس شىتاتى ۋە سىدنېيدا تۆت يىل خىزمەت قىلدۇق. 1981-يىلى قايتىدىن بەيتەلگە چاقىرىلدۇق ۋە مۇشۇ كەمگىچە بۇ يەردە خىزمەت قىلىۋاتىمىز.
ۋىنستون بۇرادەر، ھازىر سىز ئاۋسترالىزىيە بەيتەلكېڭىشىنىڭ ئەزاسى بولۇپ خىزمەت قىلىۋاتىسىز. جەنۇبىي تىنچ ئوكيان ئاراللىرىدا توپلىغان تەجرىبىڭىز سىزگە ياردەم بېرەمدۇ؟
ئەلۋەتتە، كۆپ ياردەم بېرىدۇ. ئاۋۋال ساموئا بىلەن ئامېرىكا ساموئاسى ئاۋىسترالىيە بەيتەلنىڭ قارمىقىدا بولدى. كېيىنرەك ئاۋسترالىيە بەيتەل بىلەن يېڭى زېلاندىيە بەيتەل قوشۇلۇپ ئاۋىسترالىزىيە بەيتەل دەپ ئاتالدى. ھازىر بۇ بەيتەل تېررىتورىيىسىگە ئاۋىسترالىيە، ساموئا بىلەن ئامېرىكا ساموئاسى، كۇك ئاراللىرى، يېڭى زېلاندىيە، نىئۇۋۇ، تىمور-لېستې، توكېلائۇ ۋە تونگا كىرىدۇ. مەن بۇ دۆلەتلەرنىڭ كۆپىنچىسىگە بەيتەل ۋەكىلى سۈپىتىدە بارغان. ئاراللاردىكى سادىق قېرىنداشلار بىلەن خىزمەت قىلىپ توپلىغان تەجىربەم ماڭا زور ياردەم بېرىدۇ. ھازىر بەيتەلدە خىزمەت قىلىپ، ئۇلارغا ياردەم بېرەلەيمەن.
ۋىنستون بىلەن پام ئاۋىستىرالىزىيىدىكى بەيتەلدە
سۆزۈمنىڭ ئاخىرىدا بىر نەرسىنى ئېيتقۇم كەلدى: خۇدانى پەقەت چوڭ كىشىلەرلا ئىزدىمەيدىكەن. بىزنىڭ ھاياتىمىز بۇنى ئىسپاتلايدۇ. ئائىلىدىكىلەر ھەقىقەتكە قىزىقمىسىمۇ، ياشلارمۇ «ئىنتايىن قىممەت باھالىق بىر مەرۋايىتنى» ئىزدەيدىكەن (2-پادىشاھ. 5:2، 3؛ 2-تارىخ. 34:1—3). شەك-شۈبھىسىزكى، مېھىر-مۇھەببەتكە تولغان خۇدايىمىز يەھۋا قېرى-ياش، چوڭ-كىچىك ھەممىسىنىڭ مەڭگۈلۈك ھاياتقا ئېرىشىشىنى خالايدۇ!
پام ئىككىمىز 50 يىل بۇرۇن ھەقىقەتنى ئىزدەشنى باشلىغاندا، بۇ يولنىڭ قاياققا يېتەكلەيدىغانلىقىنى بىلمىگەن ئىدۇق. ھەقىقەتەن، پادىشاھلىق توغرىسىدىكى ھەقىقەت — قىممەتباھا مەرۋايىت! بۇ مەرۋايىتنى چىڭ تۇتۇشقا بەل باغلىدۇق.
