10-بۆلۈم
ئىمان-ئېتىقادنىڭ دۈشمىنىنى ئاشكارا قىلىش
پەرۋەردىگار يەھۋا يەرنى يارىتىشتىن ئۇزۇن زامانلار ئىلگىرى، ئاسماندا پەرىشتىلەرنى ياراتقان. ئەمما، كۈنلەرنىڭ بىرىدە، بىر پەرىشتە پەقەتلا خۇداغا تېگىشلىك بولغان ئىبادەتكە ئۆزى ئېرىشىشنى ئارزۇ قىلىشقا باشلىغان. شۇ خاتا ئارزۇ-ھەۋەسلىرىگە ئەگىشىپ، ئۇ ئۆزىنى شەيتانغا ئايلاندۇرغان. ئۇنىڭ مەنىسى «قارشىلاشقۇچى». ئۇ خۇدا بىلەن قارشىلىشىدۇ. شەيتان خۇداغا قارشى نېمە ئىش قىلغان؟
شەيتان ھاۋا-ئانىنى ئازدۇرۇشتا يىلاندىن پايدىلانغان
شەيتان ھاۋا-ئانىنى ئازدۇرۇپ، خۇداغا ئىتائەتسىزلىك قىلىشقا قۇتراتقان. ئۇ قۇۋلۇق بىلەن، يەھۋا خۇدا ھاۋا-ئانىنى مەلۇم بىر دەرەخنىڭ مېۋىسىدىن يېيىشنى چەكلەش ئارقىلىق ياخشى نەرسىنى ئۆزىگە ئېلىپ قالدى، دەپ يۇشۇرۇن كۆرسەتكەن. ئۇ: «خۇدا شۇنى بىلىدۇكى، سىلەر ئۇ دەرەخنىڭ مېۋىسىدىن يېگەن كۈندە كۆزلىرىڭلار ئېچىلىدۇ، ياخشى بىلەن ياماننى بىلىپ، خۇدادەك بولىسىلەر»،— دېيىش ئارقىلىق، نومۇسمۇ قىلماي، خۇدانى يالغانچى قىلىپ كۆرسەتكەن ۋە ھاۋا-ئانىنىڭ خۇدانىڭ يولباشچىلىقىنى رەت قىلىشقا ئاستىرتىن قۇتراتقۇلۇق قىلغان (يارىتىلىش 3:5). ھاۋا-ئانا نادانلىق قىلىپ، شەيتانغا ئىشىنىپ كەتكەن. ئۇ خۇدانىڭ قانۇنىنى بۇزغان ۋە ئادەم-ئاتىمۇ ھاۋا-ئانىنىڭ تەسىر قىلىشى بىلەن، ئۇمۇ شۇنداق قىلغان. شۇنىڭدىن باشلاپ، شەيتان بارلىق ھەقىقىي ئىمان-ئېتىقادلىق كىشىلەرگە دۈشمەنلىك قىلىپ، تاكى بۈگۈنكى كۈنگىچە ئادەملەرنى ئالداپ كەلمەكتە. ئۇنداقتا، ئۇ ئادەملەرنى قانداق ئالدايدۇ؟
ئىمان-ئېتىقادىنى بۇلغاش
شەيتان ئادەملەرنى ئازدۇرۇش ئۈچۈن بۇتپەرەسلىك ۋە ئەنئەنىۋى ئۆرپ-ئادەتلەرنى ئىشلىتىپ كەلمەكتە
شەيتان بۇتپەرەسلىك ۋە ئىنسانلار ئارىسىدىكى ئەنئەنىۋى ئۆرپ-ئادەتلەرنى ئىشلىتىپ، ئىسرائىل خەلقىنى چىرىكلەشتۈرگەن. ئەيسا مەسىھ: ئۇلارنىڭ دىنىي ئۆلىمالىرىنىڭ «ئۆگىتىدىغان تەلىملىرى ئىنسانلارنىڭ بۇيرۇقلىرىدۇر»، شۇڭا ئۇلارنىڭ قىلغان ئىبادەتلىرى بېھۇدە،— دېگەن ئىدى (مەتتا 15:9). ئاشۇ ئىسرائىل خەلقى مەسىھنى رەت قىلغىنىدا، خۇدا ئۇلارنىمۇ تاشلىغان. ئەيسا پەيغەمبەر ئۇلارغا: «خۇدانىڭ پادىشاھلىقى سىلەردىن تارتىۋېلىنىپ، مېۋىسىنى بېرىدىغان باشقا بىر مىللەتكە بېرىلىدۇ،— دېگەن ئىدى (مەتتا 21:43). شۇنىڭدىن كېيىن، ئەيسانىڭ ئەگەشكۈچىلىرى خۇدانىڭ ئىلتىپاتىغا ئېرىشكەن.
كېيىن، شەيتان ئەيسانىڭ ئەگەشكۈچىلىرىنى چىرىكلەشتۈرۈشكە ئۇرۇنغان. ئۇ غەلبە قىلالىدىمۇ؟ ئەيسا پەيغەمبەر نېمە ئىش يۈز بېرىدىغانلىقىنى بېشارەتلىك تەمسىل بىلەن ئالدىن ئېيتقان ئىدى. شۇ تەمسىلدە، بىر كىشى ياخشى بۇغداي ئۇرۇقىنى يەرگە تېرىغان. ئارقىدىن، دۈشمىنى كېلىپ، بۇغدايلار ئارىسىغا ياۋا ئوتلارنىڭ ئۇرۇقىنى چېچىۋەتكەن. ھەر ئىككىسىنى ھوسۇل يىغىۋالىدىغان ۋاقىتقىچە ئۆسۈشكە قويۇپ بەرگەن. ئاندىن كېيىن، ياۋا ئوتلارنى بۇغدايدىن ئايرىپ، ئۇلارنى يوق قىلغان. بىراق، بۇغدايلار ئىگىسىنىڭ ئاشلىق ئامبىرىغا دۆۋىلەنگەن.
كېيىنچە، ئەيسا ئۆز شاگىرتلىرىغا تەمسىلنىڭ مەنىسىنى چۈشەندۈرۈپ، ئۆزىنىڭ ئۇرۇق چاچقۇچى ئىكەنلىكىنى ئېيتقان. يەنە ئۇ داۋاملىق چۈشەندۈرۈپ: «ياخشى ئۇرۇق پادىشاھلىقنىڭ ئوغۇللىرىدۇر. ئەمما، ياۋا ئوت-چۆپلەر بولسا رەزىل شەيتاننىڭ ئوغۇللىرىدۇر؛ ئۇلارنىڭ ئۇرۇقىنى چاچقان دۈشمەن شەيتاندۇر. ئورما ۋاقتى زاماننىڭ ئاخىرىدۇر. ئورمىچىلار بولسا پەرىشتىلەردۇر»،— دېگەن (مەتتا 13:38، 39). ئەيسا ئۆزىنىڭ ھەقىقىي ئەگەشكۈچىلىرىنى بۇغدايلارغا ئوخشاتقان. بىراق، شەيتان ياۋا ئوتلارغا ئوخشاش ساختا ئەگەشكۈچىلەرنى، ئەيسانىڭ ھەقىقىي ئەگەشكۈچىلەرنىڭ ئارىسىغا تارقىتىدۇ. شۇڭا، ھەزرىتى ئەيسا ئۆزى ئالدىن ئېيتقاندەك، ئۇ ئۆلۈپ، ئەسىرلەر داۋامىدا ساختا ئەگەشكۈچىلەر مەيدانغا كەلگەن. ئۇلار ئۈچ بىرلىك يەنى خۇدا ئۈچ شەخستىن تەركىب تاپقان، دېگەندەك ساختا تەلىملەرنى تەرغىپ قىلىشقان. شۇ ساختا ئەگەشكۈچىلەر يەنە بۇتپەرەسلىك بىلەن مەشغۇل بولغان ۋە سىياسىي ئىشلارغا ئارىلىشىشنى باشلىغان. ئەيسانىڭ تەلىملىرىگە پەقەت ئازلا كىشىلەر ھەقىقىي ئەگەشكەن.
ھەقىقىي ئىمان-ئېتىقادنى ساقلاش
ئەمما، ئەيسا مەسىھ چۈشەندۈرۈپ ئۆتكەندەك، بىر ئۆزگىرىش پەيدا بولىدۇ. خۇدانىڭ پەرىشتىلىرى ھەقىقىي ئىمان-ئېتىقادى بولمىغان كىشىلەرنى ھالاك قىلىش ئۈچۈن ئايرىپ چىقىدۇ. شۇ ۋاقىتتا، ھەقىقىي ئىمان ئېتىقادلىق كىشىلەرنى پەرق ئېتىش ئاسان بولىدۇ. ئەڭ ئاخىردا، ئىمان-ئېتىقادنىڭ ئەسلى دۈشمىنى، ئىبلىس شەيتانمۇ ھالاك قىلىنىدۇ. ھەقىقىي ئىمان-ئېتىقاد غەلبە قازىنىدۇ!
لېكىن، بۈگۈنكى كۈندە كىم ھەقىقىي ئىمان-ئېتىقادلىق كىشى ئىكەنلىكىنى قانداق پەرق ئېتەلەيسىز؟ تۆۋەندە سوئال توغرىسىدا مۇلاھىزە قىلىمىز.
خۇدانىڭ پەرىشتىلىرى ھەقىقىي ئىمان-ئېتىقادنى يېتىلدۈرۈشكە ئىنتىزار بولغانلارنى ئىزدىمەكتە
