1. Малы милемлы ваньмылы буйгатэм кулэ?

 ВАНЬМЫЛЫ асьмелы буйгатэм кулэ. Ми дышимы ини, дыр, улонмы сюлмаськонъёсын, курадӟонъёсын но куректонэн тырмемын шуыса. Оло нош, ми куректӥськомы бадӟым арлыдмы сэрен, висеммы яке матысь адямимес ыштэммы сэрен. Куд-огъёсыз нош адӟемпотостэм каронэн пумисько. Ми ӵемгес но ӵемгес лек ужъёсын пумиськиськомы. Зэм, та «секыт дыръёс» умой возьмато, ми «берпум аръёсы» улӥськомы но выль дунне пумен матэгес вуэ ини шуыса (2 Тим. 3:1). Оло нош, Инмарлэн кыл сётонъёсызлэсь быдэсмемзэс ми трос аръёс ӵоже возьмаськомы ини но улонамы шуг-секытъёс тросгес но тросгес луо. Мар милемыз буйгатыны быгатоз?

2, 3. а) Мае ми тодӥськомы Аввакум сярысь? б) Малы ми Аввакумлэсь книгазэ эскеромы?

² Та юанлы валэктон сётэ Аввакумлэн книгаез. Пророклэн улонэз сярысь Библиын номыр верамын  ӧвӧл ке но, книгаын, кудзэ со гожтӥз, трос буйгатӥсь малпанъёс вань. Аввакум ним «ӟыгыртон» шуэм луэ, вылды. Со возьматыны быгатэ сое, кызьы Иегова милемыз буйгатон понна яратыса ӟыгыртэ, яке сое, кызьы солэн ужась-тыршисьёсыз со бордын юн возисько. Аввакум Иеговалы юанъёс сётӥз, кудъёсызлы валэктонъёс милемлы но пайда ваё. Соин ик Инмар Аввакумез вераськемзэс гожтыны косӥз (Авв. 2:2).

³ Юн куректӥсь пророклэн Иеговаен сюлмысь вераськемез — со ваньмыз, мае ми тодыны быгатӥськомы Библиысь пророк сярысь. Аввакумлэн книгаез гожтэмын «асьмемыз визьман-дышетон понна», чидан пыр, Священной Гожтэм пыр мылкыдмес ӝутыса, «асьмеос оскиськыса мед уломы шуыса» (Рим. 15:4). Кыӵе пайда вайыны быгатэ милемлы та книга? Со юрттэ валаны, мар со сыӵе Иеговалы оскиськон. Со сяна, со оскытэ милемыз, шуг-секытъёсын пумиськыку но, сюлмамы каньыллык луыны быгатэ шуыса. Ойдолэ умойгес тодматскомы Аввакумлэн книгаеныз.

4. Малы Аввакум сокем куректӥз?

⁴ Лыдӟе Аввакумлэсь 1:2, 3. Аввакум туж секыт дыръёсы улӥз. Со котырын туж урод, лек адямиос вал, соин сэрен со юн куректӥз. Кытчы гинэ медам учкы, котькытысь со адӟе вал, кызьы израиль пиос ог-огзэс зӥбыса но вӧсь карыса возё. Аввакумлэн йыраз ялан таӵе юанъёс бергазы: «Ку лек ужъёслы пум вуоз? Малы Иегова номыр уг кары?» Таӵе секыт югдуре, сюлмыз чигиськыса, со Иеговалы тэльмыриз но югдурез тупатыны куриз. Аввакум малпаз, дыр, Иегова калыкез сярысь уг сюлмаськы ни шуыса. Тӥляд но сыӵе шӧдонъёсты кылдылӥзы-а?

5. Малы дышетэ милемыз Аввакумлэн книгаез? (Учке статья кутсконысь туспуктэмез.)

⁵ Аввакум Иеговалы оскиськемысь дугдӥз шат? Ӧз. Аслэсьтыз сюлмаськонъёссэ адямилы верам интые, со Инмарлы вераз. Со возьматэ, Аввакум Инмарлы оскемысь ӧз дугды шуыса. Аввакум сюлмаськиз, малы ке шуоно уг вала вал, малы Иегова уродзэ уг быдты, но лэзе, пророк мед курадӟоз шуыса. Аввакумез аслэсьтыз шӧдонъёссэ гожтыны косыса, Иеговалэн милемыз дышетэмез потэ вал: кыӵе ке юанъёс яке сюлмаськонъёс кылдо ке, кышкано ӧвӧл соосты Инмарлы вераны. Со яратэ милемыз но куре, ми солы, сюлэммес усьтыса, мед вӧсяськомы шуыса (Пс. 49:15; 61:9). Мадёнъёсын 3:5 верамын: «Вань сюлмыныд Кузё-Инмарлы оскиськы, визьмыд вылэ эн пыкиськы». Аввакум та кылъёсты тодэ вал, вылды, но соосты санэ понэ вал.

6. Малы туж кулэ Иеговалы вӧсяськыны?

⁶ Аввакум Иеговалы оске вал. Солэн аслаз оскымон Эшез но Атаез доры эшшо но матэгес кариськемез потэ вал. Кылдэм югдуръёсын со аслаз валанэз вылэ ӧз пыкиськы. Со аслэсьтыз сюлэмзэ Иеговалы вӧсяськыса кисьтӥз. Озьы со милемлы  умой пример возьматӥз. Иегова сярысь Библиын верамын, со вӧсяськемез кылэ шуыса. Солэн потэ, ми солы мед оскиськомы но вань сюлэмшугъяськонъёсмес солы мед вераломы шуыса (Пс. 64:3). Озьы лэсьтӥмы ке, ми адӟомы, кызьы Иегова вӧсяськонъёсмылы ответ сётэ. Ми шӧдомы, кызьы со яратыса милемыз ӟыгыртэ, яке буйгатэ но визь-кенеш сётэ (Пс. 72:23, 24). Кыӵе гинэ сюлмаськонъёсын ми медам пумиське, Иегова юрттоз милемлы валаны сое, кызьы со кылдэм югдурмы шоры учке. Макем тросгес ми Иеговалы оскиськимы, сокем сюлмысь луозы вӧсяськонъёсмы.

7. Кызьы Иегова Аввакумлэн кылъёсыз шоры учкиз?

⁷ Лыдӟе Аввакумлэсь 1:5—7. Вань сюлмаськонъёссэ Иеговалы верамез бере Аввакум малпаськиз, вылды, кызьы Инмар вӧсяськемезлы ответ сётоз. Иегова — шӧдӥсь-валась Атай. Соин ик со Аввакумез пӧсекъямез понна ӧз пыкылы. Иегова валаз, Аввакум юн куректӥз но юрттэт куриз шуыса. Со вераз аслаз пророкезлы, мар кароз кылзӥськисьтэм еврейёсын. Аввакум нырысетӥез вал, вылды, кинлы Иегова вераз, ӝоген лек ужъёс быдтэмын луозы шуыса.

8. Малы Иеговалэн кылъёсыз Аввакумез туж паймытӥзы?

⁸ Иегова валэктӥз Аввакумлы, ӝоген со урод но лек адямиосты кыл кутытоз шуыса. «Тӥляд улоно нуналъёсады» кылъёс возьмато, Инмар сётэм кылзэ пророк улон нуналъёсы яке со вакытысь адямиос улон дыръя быдэстоз шуыса. Иеговалэн кылъёсыз Аввакумез туж паймытӥзы. Солэн кылъёсысьтыз пророк валаз, израиль пиосты эшшо но трос курадӟонъёс возьмало на шуыса. Халдейёс (Вавилонияын улӥсьёс), Иеговалэсь законъёссэ тодӥсь еврейёс сярысь, эшшо но лекесьгес вал. Малы меда Иегова та лек язычникъёслы лэзиз аслэсьтыз калыксэ киултыны но озьы калыксэ кыл кутытӥз? Мар тӥ малпасалды, Иеговалэсь сыӵе валэктонзэ кылыса?

9. Кыӵе юанъёсыз кылдӥзы, вылды, Аввакумлэн?

⁹ Лыдӟе Аввакумлэсь 1:13—14, 17. Аввакум валаз, лек язычникъёс пыр Иегова аслэсьтыз калыксэ кыл кутытыны малпа шуыса, но тросэз солы валантэм на вал (Авв. 1:12). Озьы ке но Аввакум вераз Инмарлы, со азьвыл сямен ик сое «пырдылӥсьтэм изгурезен» лыдъя шуыса (К. Зак. 32:4; Ис. 26:4). Пророк чидаса возьмаз но оскиз, Иегова — яратӥсь но ӟеч сямо Инмар шуыса. Сыӵе мылкыд юрттӥз солы кышкатэк выльысь Иеговалы юанъёсын вазиськыны: «Иегова святой но солэн синъёсыз лек ужъёс шоры учкыса улыны уг быгато бере, малы соку со лэзёз, Иудаын югдур эшшо но секытгес мед луоз шуыса? Малы со югдурез али уг тупаты? Малы Ваньзэ Быгатӥсь Инмар дась учкыса улыны, кызьы курадӟонъёс тросгес но тросгес луо? Малы со номыр карытэк учкоз лек ужъёслэн котыр вӧлмемзы шоры?»

10. Малы куддыръя милям Аввакумлэн кадь шӧдонъёсмы луыны быгато?

 ¹⁰ Куддыръя милям но Аввакумлэн кадь шӧдонъёсмы луыны быгато. Ми Иеговаез кылзӥськомы, куке солэсь Кылзэ дышетӥськомы. Озьы милям осконмы юнма. Со сяна, ми Иеговалэн кыл сётонъёсыз сярысь тросгес тодӥськомы солэн организациеныз сётэм косонъёсысь. Озьы ке но милемыз таӵе юан сюлэмшугъяськытыны быгатэ: «Ку меда бырозы милям курадӟонъёсмы?» Ойдолэ тодомы, мар кариз Аввакум, но малпаськомы, малы со милемыз дышетэ.

11. Кыӵе ужпум кутӥз Аввакум Иеговаен вераськемез бере?

¹¹ Лыдӟе Аввакумлэсь 2:1. Иеговаен вераськыса, Аввакумлэн сюлмыз каньыл луиз. Аввакум Иеговаез возьманы ужпум кутӥз. Со пӧсекъяса, чик малпаськытэк кутэм ужпум ӧй вал — Аввакум трос пол, выльысь кутскыса, вераз: «Шугадӟон нуналэ... мон зӥбыт-востэм луыны кулэ» (Авв. 3:16). Инмарлэн мукет оскымон ужась-тыршисьёсыз но Иеговалы оскиськизы но сое чидаса возьмазы. Соос милемлы умой пример возьматӥзы, кызьы осконмес ыштытэк улыны но чидаса возьманы (Мих. 7:7; Иак. 5:7, 8).

12. Малы дышетэ милемыз Аввакумлэн примерез?

¹² Малы ми дышетскыны быгатӥськомы, Аввакумлэн мылкыдыз вылын малпаськыса? Нырысетӥез — кыӵе гинэ шуг-секытъёсын медам пумиське, милемлы Инмарлы вӧсяськоно. Кыкетӥез — санэ басьтоно ваньзэ, мае Иегова милемлы аслаз Кылыз пыр но организациез пыр вера. Куинетӥез — Иеговаез чидаса возьмано но осконо, дырыз вуиз ке, со милемыз курадӟонъёслэсь мозмытоз шуыса. Аввакумлэсь адӟем карыса, Иеговаен матысь эшенымы кадь вераськимы ке, кылзӥмы ке, мае со милемлы вера, но сое чидаса возьмамы ке, милям сюлмамы каньыллык луоз но ми шуг-секытъёсты вормыны быгатомы. Оскиськон милемлы чиданы кужым сётоз, нош кужым юрттоз шумпотонэн улыны, мар гинэ медаз луы. Ми оскиськомы, инмысь Атаймы ваньзэ тупатоз шуыса (Рим. 12:12).

13. Кыӵе юнматӥсь кылъёсты ми шедьтӥськомы Аввакумлэн 2:3?

¹³ Лыдӟе Аввакумлэсь 2:3. Веранэз ӧвӧл, Иегова туж шумпотӥз, Аввакумлэсь сое чидаса возьманы мылкыдзэ адӟыса. Ваньзэ Быгатӥсь Инмар умой тодэ вал, макем секыт вал Аввакумлы. Соин ик Иегова лякытэн но яратыса буйгатӥз пророксэ но оскытӥз сое, сюлмаськытӥсь юанъёсызлы со одно ик валэктонъёс шедьтоз шуыса. Ӝоген солэн сюлмаськонъёсыз бырыны кулэ вал. Вераны луоз, Инмар Аввакумлы тазьы вераз шуыса: «Чида, оскиськы мыным. Тыныд туж кема кадь потэ ке но, мон одно ик тынад вӧсяськемедлы ответ сёто». Иегова тодаз вайытӥз солы, со дыр пуктӥз ини шуыса, ку аслэсьтыз кыл сётонъёссэ быдэстоз. Со Аввакумлэсь мылкыдзэ ӝутӥз азьланяз но чидаса возьманы. Аввакумлэн чидамез юнме ӧй вал.

14. Кыӵе милям мылкыдмы луыны кулэ секыт дыръёсы?

 ¹⁴ Секыт дыръёсы ми Иеговаез чидаса возьмаськомы но сое кылзӥськомы ке, со юрттоз милемлы осконэн улыны но сюлмамы каньыллык шедьтыны. Иисус вераз, ми сокем медам тырше шуыса «дырез, срокез тодыны», кудзэ Инмар милемлы ӧз усьты на (Ап. уж. 1:7). Милемлы тодамы возёно, Иегова дырез но срокез аслаз киулаз кутыса возе шуыса, но тодэ, ку умойгес луоз ваньзэ воштыны. Соин ик ойдолэ осконмес ум ыштэ, нош оскыса, зӥбыт-востэм мылкыдын но чидаса Иеговаез возьмаломы. Озьы ик, дырмес юнме ум быдтэ но ужан-тыршонын каромы ваньзэ, мае быгатӥськомы (Марк 13:35—37; Гал. 6:9).

15, 16. а) Кыӵе кыл сётонъёс гожтэмын Аввакумлэн книгаяз? б) Малы дышето милемыз со кыл сётонъёс?

¹⁵ Инмар кылзэ сётэ: «Шонер улӥсь осконэз пыр улэп улоз». Озьы ик со вера: «Музъем пачылмоз Кузё-Инмарлэсь данлыксэ тодонэн» (Авв. 2:4, 14). Зэм, соосты, кинъёс чидаса возьмало но Иеговалы оско, пырак улон возьма.

¹⁶ Аввакумлэн 2:4 кылъёсты Павел туж кулэен лыдъяз. Со соосты аслаз гожтэтъёсаз куинь пол выльысь  кутскыса гожтӥз (Рим. 1:17; Гал. 3:11; Евр. 10:38). Шуг-секытъёсын пумиськыса, ми осконмес ӧм ыштэ, нош Инмарлы оскиськимы ке, ми ас синмынымы адӟомы солэн кыл сётонъёсызлэсь быдэсмемзэс. Иеговалэн потэ, шуг-секытъёсын нюръяськыкумы, ми мед адӟомы шуыса, мар милемыз азьпалан возьма.

17. Кыӵе оскон сётэ Аввакумлэн книгаез?

¹⁷ Та берпуметӥ нуналъёсы улӥсь адямиос Аввакумлэн книгаысьтыз туж кулэезлы дышетскыны быгато. Иегова кылзэ сётэ пырак улон кузьманы ваньмызлы, кин шонерлыко улэ но солы оскиське. Ойдолэ азьланяз но Иеговалы осконмес юнматомы, кыӵе гинэ шуг-секытъёсын но курадӟонъёсын ми медам пумиське. Аввакум пророкез пыр Иегова оскытэ милемыз, аслэсьтыз ужась-тыршисьёссэ юнматоз но утёз шуыса. Иегова куре оскиськыны солы но чидаса возьманы дырез, ку Эксэйлыклэн кивалтэмез улсын музъем вылын шудо но зӥбыт-востэм адямиос гинэ улозы (Матф. 5:5; Евр. 10:36—39).

18. Кызьы Иеговалэн кылъёсыз Аввакумлэн мылкыдыз вылын шӧдӥськизы?

¹⁸ Лыдӟе Аввакумлэсь 3:16—19. Иеговалэн кылъёсыз Аввакумлэн сюлмаз мур пыӵазы. Со малпаськиз Иеговалэн паймымон ужъёсыз вылын, кудъёссэ Иегова азьло дыръёсы аслаз калыкез понна лэсьтылӥз. Со солэсь Иеговалы осконзэ эшшо но юнматӥз на. Аввакум вала вал, кӧня ке дыр ӵоже солы лек ужъёсты чидано луоз на шуыса. Но со тодэ вал: ӝоген Иегова ваньзэ воштоз. Со сое туж буйгатӥз. Аввакумлэн сюлэмшугъяськонъёсыз быдэсак быризы. Со туж шумпотэ вал, малы ке шуоно оске вал, Иегова сое утёз шуыса. 18-тӥ кылбурын гожтэмын: «Мон Кузё-Инмаре вань шуыса шумпото, утись Инмаре вань шуыса шулдыръясько». Та кылъёсысь Аввакумлэн Иеговалы юн оскемез адӟиське. Макем со милесьтым мылкыдмес ӝутэ! Иегова кылзэ гинэ уг сёты, со каре ваньзэ, сётэм кылзэ быдэстон понна.

19. Кызьы ми, Аввакум сямен, Иеговалэсь буйгатскон шедьтыны быгатомы?

¹⁹ Валтӥсез, малы дышетэ милемыз Аввакумлэн книгаез,— котьку Иеговалы оскиськоно (Авв. 2:4). Со понна милемлы Иеговаен кусыпъёсмес юнматоно. Соин ик милемлы кулэ: 1) котьку Иеговалы вӧсяськыны но вераны солы ваньзэ, мар милемыз сюлмаськытэ; 2) санэ басьтыны, мар Иегова вера милемлы аслаз Кылыз но организациез пыр; 3) осконэн улыны но чидаса возьманы, ку Иегова ваньзэ воштоз. Ӵапак озьы лэсьтӥз Аввакум. Аввакумлэн книгаез ӝож кылъёсын кутске ке но, со быре кылъёсын, кудъёсаз шумпотон но Иеговалы быдэсак оскиськон шӧдӥське. Ойдолэ Аввакумлэсь адӟем каромы, соку ми шӧдомы, кызьы инмысь Атаймы милемыз яратыса ӟыгыртэ! Та пеймыт но кышкыт дуннеысь луоз-а кытысь ке шедьтыны та выллем буйгатонэз?