Вавило́нчу кулданыгга изра́ильчилерниң бүзүрели чаңгыс удаа эвес шылгаттынган турган. Седрахты, Мисахты, Авденагону изиг суугуже киир октаптарга-даа, Бурган оон оларны бүдүнге үндүрүпкен. Элээн үе эрткенде мидийжилер биле пе́рсилер Вавило́нну эжелеп алган соонда, Дании́лди арзылаңнарлыг оңгарже киир октапкан, ынчалза-даа бо удаа база Бурган ону камгалап, арзылаңнарның аксын дуглаан.

Сөөлүнде барып изра́ильчилерни пе́рси хаан Кир хостаан. Олар кулданыгдан бодунуң чуртунче таптыг-ла 70 чыл болгаш чанып келген. Иерусали́мче чедип келгеш, олар хамыкты мурнай Иегованың өргээзин тудуп эгелээн. Ынчалза-даа удатпаанда дайзыннар тудугну соксадырын чедип алган. Ынчангаш оларның Иерусали́мге эглип келген үезинден эгелээш, өргээниң тудуунуң төнеринге чедир 22 хире чыл эрткен.

Оон бис Е́здраның Иерусали́мче өргээни каастаар дээш, канчаар чорутканын билип алыр бис. Ол чүүл Бурганның өргээниң тудуп төндүргенинден бээр 47 хире чыл эрткенде болган. Оон ыңай 13 чыл эрткенде Е́здраның соонда Неемия Иерусали́мниң бузук ханаларын тударынга дузалаан. Ниитизи-биле алырга, БЕШКИ кезекче 152 чылдың төөгүзү кирип турар.