Te hoê autahuˈa arii no te maitai o te huitaata
“E ui maitihia . . . outou, e autahuˈa arii, e nunaa moˈa, e feia hoohia.”—PET. 1, 2:9.
1. No te aha “te amuraa maa a te Fatu” e parau-atoa-hia ˈi te Oroa haamanaˈoraa, e eaha to te reira fa?
I TE taperaa mahana o te 14 no Nisana 33, ua faatupu Iesu e ta ˈna na aposetolo 12 i te oroa Pasa ati Iuda no te taime hopea. I to Iuda Isakariota taiva faarueraa ia ratou, ua haamau atura Iesu i te tahi atu oroa, i parauhia “te amuraa maa a te Fatu” i muri aˈe. (Kor. 1, 11:20) E piti taime to Iesu faaueraa: “E na reira outou ei manaˈoraa ia ˈu.” Ua matau-atoa-hia te reira mai te Oroa haamanaˈoraa. E taime maitai teie no te haamanaˈo e ua pohe Iesu no tatou. (Kor. 1, 11:24, 25) No reira te mau Ite no Iehova na te ao atoa nei e faatupu ai i te Oroa haamanaˈoraa i te mau matahiti atoa. I 2012, ia au i te tarena Bibilia, e haamata te 14 no Nisana i te toparaa mahana o te Mahana maha 5 no Eperera.
2. Eaha ta Iesu i parau no nia i te pane e te uaina?
2 Ua haapoto Luka i ta Iesu i rave e i parau i taua taime ra: “Ua rave ihora oia i te pane, haamaitai atura i te Atua, vavahi ihora, tuu atura ia ratou ra, na ô atura, O tau tino teie e horoahia na outou nei, e na reira outou ei manaˈoraa ia ˈu. E ua na reira atoa hoi i te auˈa ia oti aˈe te amuraa, na ô atura, Teie nei auˈa, o te faufaa apî ïa i to ˈu nei toto, e haamaniihia no outou nei.” (Luka 22:19, 20) Eaha ta te mau aposetolo i taa?
3. Eaha ta te mau aposetolo i taa no nia i te pane e te uaina?
3 Ei ati Iuda, ua matau maitai te mau aposetolo i te mau tusia animara ta te mau tahuˈa e pûpû ra i te hiero i Ierusalema no te fanaˈo i ta Iehova farii maitai. E te rahiraa o te tusia, no te faaore ïa i te hara. (Lev. 1:4; 22:17-29) Ua taa ïa ia ratou eaha to Iesu manaˈo a na ô ai e e horoahia to ˈna tino e e haamaniihia to ˈna toto no ratou. Oia hoi e horoa oia i to ˈna ora tia roa ei tusia o te riro ei mea faufaa roa ˈˈe i te mau tusia animara.
4. Eaha ta Iesu i manaˈo a parau ai e, “Teie nei auˈa, o te faufaa apî ïa i to ˈu nei toto”?
4 Eaha ta Iesu i manaˈo a parau ai e, “Teie nei auˈa, o te faufaa apî ïa i to ˈu nei toto”? Ua ite te mau aposetolo i te parau tohu no nia i te faufaa apî i roto i te Ieremia 31:31-33. (A taio.) Ua faaite ta Iesu mau parau e te haamau nei oia i te faufaa apî o te mono i te faufaa o te Ture ta Iehova i faaau ia Iseraela na roto ia Mose. Ua taaihia anei teie na faufaa e piti?
5. Eaha ta Iseraela i fanaˈo maoti te faufaa o te Ture?
5 Ua taai-roa-hia te fa o tera na faufaa. A haamau ai oia i te faufaa o te Ture, ua parau Iehova i te nunaa: “Ia faaroo mau mai outou i tau reo, e ia haapao maite i ta ˈu ra faufaa, e riro ïa outou ei taoˈa here rahi na ˈu i te mau taata atoa ra. No ˈu noa iho hoi to te ao atoa nei. E riro â outou ei basileia tahuˈa anaˈe na ˈu, ei nunaa moˈa.” (Exo. 19:5, 6) Eaha ta te mau Iseraela i maramarama?
UA FAFAUHIA TE HOÊ AUTAHUˈA ARII
6. Ua tauturu te faufaa o te Ture ia tupu teihea parau fafau?
6 Ua taa i te mau Iseraela eaha te hoê “faufaa,” ua faaau ê na hoi Iehova i te tahi ia Noa e ia Aberahama. (Gen. 6:18; 9:8-17; 15:18; 17:1-9) I roto i ta ˈna faufaa e o Aberahama, ua fafau Iehova: “E maitai te mau fenua atoa o te ao nei i to oe na huaai.” (Gen. 22:18) Ua haamau te Atua i te faufaa o te Ture ia tupu iho â teie parau fafau, a riro mai ai Iseraela ei ‘taoˈa here rahi na Iehova i te mau taata atoa ra.’ No teihea fa? No te ‘riro ei basileia tahuˈa na Iehova.’
7. Eaha te auraa o te parau “te hoê basileia tahuˈa”?
7 Ua matau Iseraela i te mau arii e tahuˈa. Hoê noa râ taata i tahito ra tei amo i na toroa e piti i te hoê â taime e o tei fariihia e Iehova, o Melehizedeka. (Gen. 14:18) I teie nei, te horoa nei Iehova ia Iseraela te fanaˈoraa e faatupu i “te hoê basileia tahuˈa.” Te faaite ra te tahi atu mau papai faaurua e e riro mai te feia i maitihia ei autahuˈa arii, oia hoi ei arii e ei tahuˈa atoa.—Pet. 1, 2:9.
8. Eaha ta te mau tahuˈa faatoroahia e te Atua e rave?
8 E faatere iho â ïa te hoê arii. E te hoê tahuˈa? Te faataa ra te Hebera 5:1: “Te mau tahuˈa rarahi atoa i maitihia no roto i te taata nei, ua haapaohia â ïa na te taata, ei rave i te mau mea o te Atua ra, ei hopoi i te perosephora [aore ra ô] e te tusia taraehara.” Te tia ra ïa te hoê tahuˈa faatoroahia e Iehova no te feia hara i mua i te Atua. E taparu o ˈna ia ˈNa ia faaore i ta te taata hara ma te pûpû i te mau tusia. E e tia atoa o ˈna no Iehova i mua i te taata no te haapii atu i ta te Atua mau ture. (Lev. 10:8-11; Mal. 2:7) E tauturu ïa te hoê tahuˈa faatoroahia e Iehova i te taata ia faafaite i te Atua ra.
9. (a) Ia aha te mau Iseraela no te riro ei “basileia tahuˈa”? (b) No te aha Iehova i faatoroa ˈi i te mau tahuˈa i Iseraela? (c) No te aha i ore ai i tia i te mau Iseraela ia riro ei “basileia tahuˈa” i raro aˈe i te faufaa o te Ture?
9 Maoti te faufaa o te Ture, ua nehenehe Iseraela e riro ei autahuˈa arii no te maitai o “te mau taata atoa.” Ia pee râ ratou i teie faaueraa e tia ˈi: “Ia faaroo mau mai outou i tau reo, e ia haapao maite i ta ˈu ra faufaa.” E nehenehe anei te mau Iseraela e ‘faaroo mau i to Iehova reo’? E, eiaha râ ma te tia roa. (Roma 3:19, 20) No reira Iehova i faatoroa ˈi i te mau tahuˈa i Iseraela, e ere i te arii, o te pûpû i te mau tusia animara no te hara a te mau Iseraela e ta ratou iho. (Lev. 4:1–6:7; Heb. 5:1-3; 8:3) Ua farii Iehova i teie mau tusia. Aita râ te reira i tapoˈi roa i te mau hara. Aita i tia i te autahuˈaraa i raro aˈe i te Ture ia faafaite roa i te mau Iseraela i te Atua. Ta te aposetolo Paulo ïa i parau: “Eita roa hoi e tia i te toto puaatoro e te puaaniho ia faaore i te hara.” (Heb. 10:1-4) Ua ofati Iseraela i te Ture e ua ino roa ˈtura ratou. (Gal. 3:10) Aita ïa ratou e nehenehe faahou e tavini ei autahuˈa arii no te mau taata atoa.
10. Eaha te fa o te faufaa o te Ture?
10 Eita iho â ïa ratou e nehenehe e riro mai ei melo o “te hoê basileia tahuˈa” mai ta Iehova i fafau? E nehenehe â, eiaha râ i raro aˈe i te Ture. E mea tia ia tutava ratou i te faaroo ia ˈNa ma te aau haavare ore. No te aha? (A taio i te Galatia 3:19-25.) E paruru te Ture i te mau ati Iuda taiva ore i te haamoriraa hape. E taa atoa ia ratou e mea hara ratou e e titauhia te hoê tusia rahi aˈe i tei pûpûhia e ta ratou tahuˈa rahi. E aratai te Ture ia ratou i te Mesia ra, tiaraa iˈoa o “Tei faatavaihia” te auraa. Ia tae mai râ te Mesia, e haamau oia i te faufaa apî ta Ieremia i tohu. Ua ô te feia i farii i te Mesia i roto i te faufaa apî a riro mai ai ei melo o “te hoê basileia tahuˈa.” E hiˈo anaˈe mea nafea.
E FAATUPU TE FAUFAA APÎ I TE HOÊ AUTAHUˈA ARII
11. Mea nafea Iesu i te riroraa ei niu o te autahuˈa arii?
11 I te matahiti 29, ua fa mai te Mesia, o Iesu no Nazareta. Fatata to ˈna e 30 matahiti a bapetizo ai oia ia ˈna no te faaite e ua ineine oia i te rave i to Iehova hinaaro taa ê no ˈna. “Tau Tamaiti here teie,” ta Iehova ïa i parau hou a faatavai ai ia ˈna i te varua moˈa, eiaha i te hinu. (Mat. 3:13-17; Ohi. 10:38) Ua faatavai Iehova ia ˈna ei Tahuˈa rahi no te maitai o te taata atoa e tiaturi ra ia ˈna e ei Arii no a muri aˈe. (Heb. 1:8, 9; 5:5, 6) O Iesu iho â te niu o te autahuˈa arii.
12. Ua aha te tusia o Iesu?
12 Ei Tahuˈa rahi, eaha te tusia ta Iesu e pûpû ia tapoˈi-roa-hia te hara i tutuuhia mai a te feia e tiaturi ra ia ˈna? A haamau ai oia i te Oroa haamanaˈoraa o to ˈna poheraa, ua parau oia e te tusia, o to ˈna ïa ora ei taata tia roa. (A taio i te Hebera 9:11, 12.) Mai to Iesu faatavairaahia ei Tahuˈa rahi, ua faaruru oia i te mau tamataraa tei faaineine ia ˈna e tae roa ˈtu i to ˈna poheraa. (Heb. 4:15; 5:7-10) I muri aˈe i to ˈna faatia-faahou-raahia, ua haere oia i nia i te raˈi e ua pûpû i te faufaa o to ˈna tusia ia Iehova. (Heb. 9:24) Mai reira mai, ua tia ˈtu Iesu i mua ia Iehova no te feia e faatupu ra i te faaroo i to ˈna tusia e ua tauturu ia ratou ia tavini i te Atua no te ora e a muri noa ˈtu. (Heb. 7:25) Ua haamana atoa to ˈna tusia i te faufaa apî.—Heb. 8:6; 9:15.
13. Eaha te tiai ra i te feia i ô i roto i te faufaa apî?
13 Ua faatavai-atoa-hia te feia i ô i roto i te faufaa apî i te varua moˈa. (Kor. 2, 1:21) Tei roto te mau ati Iuda taiva ore e te mau Etene. (Eph. 3:5, 6) Eaha te tiai ra ia ratou? E faaore-roa-hia ta ratou mau hara. Ua fafau Iehova: “E faaore hoi au i ta ratou hara, e ore au e manaˈo faahou i ta ratou ino.” (Ier. 31:34) E nehenehe ïa ratou e riro mai ei “basileia tahuˈa.” I te mau Kerisetiano faatavaihia, ua papai Petero: “E ui maitihia . . . outou, e autahuˈa arii, e nunaa moˈa, e feia hoohia; ia faaite hua outou i to ˈna maitai, tei parau ia outou i to roto i te pouri, ia tae i to ˈna ra maramarama umerehia.” (Pet. 1, 2:9) Ua faaohipa Petero i ǒ nei i te mau parau a Iehova ia Iseraela, a haamau ai Oia i te Ture, i nia i te mau Kerisetiano i ô i roto i te faufaa apî.—Exo. 19:5, 6.
E HAAMAITAIHIA TE HUITAATA MAOTI TE AUTAHUˈA ARII
14. Ihea te autahuˈa arii e tavini ai?
14 Ihea te feia i ô i roto i teie faufaa apî e tavini ai? I nia i te fenua. Ei pǔpǔ, e tavini ratou ei autahuˈa, ei tia no Iehova i mua i te taata ma ‘te faaite hua i to ˈna mau maitai’ e ma te horoa i te maa pae varua. (Mat. 24:45; Pet. 1, 2:4, 5) I muri aˈe i to ratou poheraa e tia-faahou-raa, e tavini ratou e te Mesia i nia i te raˈi ma te rave faahope roa i to ratou tiaraa arii e tahuˈa. (Luka 22:29; Pet. 1, 1:3-5; Apo. 1:6) Ua ite orama Ioane e rave rahi mea ora varua i pihaiiho i te terono o Iehova i nia i te raˈi. I roto i te hoê “himene apî” faataehia i “te Arenio,” te parau nei ratou: “Ua hoo oe ia matou ei taata no te Atua, i to oe iho na toto, no roto i te mau opu atoa, e te mau reo atoa, e te mau nunaa atoa e te mau fenua atoa; e ua faariro oe ia matou ei hui arii, e ei tahuˈa na to matou Atua, e e riro ia matou te hau i teie nei ao.” (Apo. 5:8-10) I roto i te tahi atu orama, te na ô nei Ioane no teie mau arii: “E riro . . . ratou ei tahuˈa na te Atua e na te Mesia, e e hau to ratou ia ˈna ra e ia hoê tausani i te matahiti.” (Apo. 20:6) Apitihia e te Mesia, e riro ratou ei autahuˈa arii o te haamaitai i te huitaata.
15, 16. E hopoi mai te autahuˈa arii i teihea haamaitairaa no te huitaata?
15 E hopoi mai na 144 000 i teihea haamaitairaa no te huitaata? Te faataa ra te Apokalupo pene 21 ia ratou mai te hoê oire i te raˈi, te Ierusalema apî, parauhia “te vahine a te Arenio.” (Apo. 21:9) Te na ô ra te irava 2 tae roa ˈtu i te 4: “Ite atura hoi au . . . i te oire moˈa ra, ia Ierusalema apî, i te pouraa mai mai ǒ mai i te Atua i nia i te raˈi ra, ua faanehenehehia mai te vahine i faanehenehehia no te faaipoiporaa i tana tane ra. Ua faaroo atura vau i te hoê reo rahi no te raˈi maira, i te na ôraa mai e, Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito.” Auê hoi haamaitairaa faahiahia mau! Aore e roimata, e oto, e mihi e e mauiui, no te mea aita e pohe faahou. E hoˈi mai ïa te huitaata i te tia-roa-raa e e faafaite-roa-hia ratou i te Atua.
16 Te na ô ra te Apokalupo 22:1, 2 no nia â i teie mau haamaitairaa: “Ua faaite maira t[e] melahi ia ˈu i te hoê pape ora tahe ra, mai te kerehe ra te ateate, no roto mai i te terono o te Atua e to te Arenio ra. E tei ropu i te aroâ [o te Ierusalema Apî], e tei te tahi pae pape, e te tahi pae pape, o te raau ora ïa i te tiaraa, hoê ahuru ma piti huru o te huero, hoê marama hoê hoturaa, e hope roa ˈˈe te mau marama atoa ra; e te rau o taua raau ra, ei faaora ïa i te mau fenua.” E tiamâ-roa-hia ïa “te mau fenua,” oia hoi te mau fetii taata atoa, i te huru tia ore i tutuuhia mai e Adamu. E mou iho â te mau mea tahito!
E RAVE HOPE ROA TE AUTAHUˈA ARII I TA ˈNA OHIPA
17. Eaha ta te autahuˈa arii i rave ia hope na 1 000 matahiti?
17 Ia hope na 1 000 matahiti taviniraa, ua tauturu ïa te autahuˈa arii i te huitaata ia riro ei feia tia roa. Ei Tahuˈa rahi e ei Arii, e faaite atu te Mesia i te huitaata tia roa ia Iehova. (A taio i te Korinetia 1, 15:22-26.) Ua rave hope roa ïa te autahuˈa arii i ta ˈna ohipa i tera taime.
18. Ia oti te ohipa a te autahuˈa arii, e nafea Iehova e faaohipa ˈi i te mau apiti o te Mesia?
18 E nafea Iehova e faaohipa ˈi i te mau apiti o te Mesia i muri iho? Ia au i te Apokalupo 22:5, “e hau â to ratou e a muri noa ˈtu.” I nia ia vai? Aita te Bibilia e parau ra. I te mea e e fanaˈo ratou i te tino varua pohe ore e te tahuti ore e i te aravihi i te tautururaa i te huitaata tia ore, e tapea noa ïa ratou i te hoê tiaraa faahiahia i roto i te mau opuaraa a Iehova e a muri noa ˈtu.
19. Ia haamanaˈo te feia e putuputu no te Oroa haamanaˈoraa i te aha?
19 E haamanaˈo anaˈe i teie mau haapiiraa Bibilia a putuputu ai tatou no te Oroa haamanaˈoraa i te poheraa o Iesu i te Mahana maha 5 no Eperera 2012. E rave te toea iti o te mau Kerisetiano faatavaihia i te fenua nei â i te pane hopue ore e te uaina uteute no te faaite e ua ô atoa ratou i roto i te faufaa apî. E haamanaˈo ratou i ta ratou fanaˈoraa taa ê e hopoia i roto i ta te Atua i opua mai te matamua mai â. Ua faanaho te Atua ra o Iehova i te autahuˈa arii no te maitai o te huitaata. E faaite anaˈe ïa i to tatou mauruuru rahi ia putuputu tatou no te Oroa haamanaˈoraa!
[Uiraa haapiiraa]
[Hohoˈa i te api 31]
E hopoi mai te autahuˈa arii i te mau haamaitairaa mure ore no te huitaata
