“Ta outou mau mea atoa e rave ra, e rave ma te aau atoa mai te mea e e na te Fatu [o Iehova].”—KOL. 3:23.

1-3. (a) Ua pohe Iesu ei taraehara, te auraa anei e aita faahou ta tatou e tusia na Iehova? A faataa. (b) Eaha te uiraa e hiti mai no nia i ta tatou mau tusia i teie mahana?

 I TE senekele matamua, ua faaite Iehova e ua hopoi ê, aore ra ua faaore, te tusia taraehara o Iesu i te Ture a Mose. (Kol. 2:13, 14) Aita i titau-faahou-hia te mau tusia ta Iseraela i pûpû na e rave rahi senekele. Aita to te reira e faufaa faahou. Ua hope ta te Ture tuhaa ‘ei orometua e aratai i te Mesia ra.’—Gal. 3:24.

² E ere ïa te auraa e aita faahou ta te mau Kerisetiano e tusia. Ua faahiti hoi Petero i te faufaaraa ia “hopoi i te tusia varua e au i te Atua ia Iesu Mesia ra.” (Pet. 1, 2:5) Ua haapapu maitai atoa Paulo e e au te oraraa taatoa o te Kerisetiano i te “tusia.”—Roma 12:1.

³ E rave ïa te hoê Kerisetiano i te mau haapaeraa ma te horoa aore ra ma te pûpû i te tahi mea na Iehova. Eaha ta tatou i ite i te mau tusia ta Iseraela i pûpû na? E nafea e papu ai e e farii Iehova i ta tatou mau tusia i teie mahana?

I TE MAU MAHANA ATOA

4. Ia haamanaˈo tatou i te aha no nia i te mau ohipa matauhia?

⁴ I roto i te oraraa i te mau mahana atoa, mea fifi paha ia faatuati i ta tatou mau ohipa i te pûpûraa tusia. E au ra e aita e tuatiraa to te ohipa fare, haapiiraa, imiraa moni, hoohoo-haere-raa, e te vai ra ˈtu â i te mau ohipa Kerisetiano. Ua pûpû râ paha oe i to oe oraraa no Iehova aore ra e na reira paha oe i mua nei, mea faufaa ïa ta oe huru hiˈoraa i te mau ohipa matauhia.  E Kerisetiano tatou e 24 hora i nia i te 24, ia faaohipa iho â ïa tatou i te mau aratairaa Bibilia i roto i te mau tuhaa atoa o to tatou oraraa. No reira Paulo i faaitoito mai ai: “Ta outou mau mea atoa e rave ra, e rave ma te aau atoa mai te mea e e na te Fatu [o Iehova], eiaha na te taata.”—A taio i te Kolosa 3:18-24

5, 6. No nia i to tatou haerea e huru ahuraa, ia aha tatou?

⁵ E ere ta tatou mau ohipa i te mau mahana atoa i te taviniraa moˈa. Tera râ, a faaitoito ai Paulo ia ohipa ‘ma te aau atoa mai te mea e na Iehova,’ ia feruri ïa tatou i to tatou huru oraraa. E nafea e faaohipa ˈi i te reira no tatou iho? Te ohipa e te ahu ra anei tatou ma te tano i te mau taime atoa? A ohipa ˈi tatou i tera e tera mahana, mea haama anei ia faaite e e Ite no Iehova tatou no te huru haerea aore ra ahuraa? Eiaha roa ˈtu! Eita iho â te nunaa o Iehova e rave i te tahi mea o te faaino i te iˈoa o te Atua.—Isa. 43:10; Kor. 2, 6:3, 4, 9.

⁶ E nafea te hinaaroraa e haa ‘ma te aau atoa mai te mea e na Iehova’ e ohipa ˈi i roto i e rave rahi tuhaa taa ê o te oraraa? E hiˈopoa mai tatou i te reira. A haamanaˈo râ e ua pûpû Iseraela i te mea maitai roa ˈˈe na Iehova i roto i ta ratou mau tusia atoa.—Exo. 23:19.

E TO OE ORARAA

7. Eaha te pûpûraa Kerisetiano?

⁷ I to oe pûpûraa ia oe iho no Iehova, ua rave oe i te faaotiraa ma te aau tae, e ere anei? Ua parau iho â oe e i roto i te mau tuhaa atoa o te oraraa, e tuu oe ia Iehova na mua roa. (A taio i te Hebera 10:7.) E faahopearaa maitai te itehia ia rave oe i to Iehova hinaaro e ia haa ia au i te reira. (Isa. 48:17, 18) E nunaa moˈa tatou e te oaoa, no te mea te pee ra tatou ia Iehova o te haapii ia tatou.—Lev. 11:44; Sal. 104:31.

8. Mea moˈa te mau tusia i tahito no Iehova, eaha ïa te auraa no tatou?

⁸ Mea moˈa te mau tusia ta Iseraela i pûpû na Iehova. (Lev. 6: 25; 7:1) Teie te manaˈo o te taˈo Hebera hurihia ei “moˈa,” faataa-ê-hia, no ˈna anaˈe, aore ra haamoˈahia no te Atua. Ia farii Iehova i ta tatou mau tusia, ia faataa ê mai ïa tatou i te mau mea viivii atoa o teie nei ao. Eita tatou e hinaaro noa ˈˈe i te mau mea atoa ta Iehova e riri. (A taio i te Ioane 1, 2:15-17.) Ia ape iho â ïa tatou i te mau  amuimuiraa aore ra i te mau mea e viivii ai i te aro o te Atua. (Isa. 2:4; Apo. 18:4) Eiaha atoa ïa e tamau noa i te hiˈo aore ra i te manaˈo i te mau mea viivii aore ra morare ore.—Kol. 3:5, 6.

9. No te aha mea faufaa ˈi te haerea o te hoê Kerisetiano i nia ia vetahi ê?

⁹ Ua faaitoito Paulo i to ˈna mau hoa Kerisetiano i te na ôraa: “Area te hamani maitai, e te horoa, eiaha roa ïa e haamairihia: te mauruuru roa ra hoi te Atua i te reira tusia.” (Heb. 13:16) Ia hamani maitai e ia tauturu noa tatou ia vetahi ê, e haerea e e tusia au te reira na Iehova. E faaite atoa ïa tatou e e Kerisetiano mau tatou.—Ioa. 13:34, 35; Kol. 1:10.

TE TUSIA I ROTO I TE HAAMORIRAA

10, 11. Eaha to Iehova manaˈo i ta tatou taviniraa e haamoriraa, e ia aha ïa tatou?

¹⁰ Hoê o te mau ravea papu roa ˈˈe e hamani maitai ai tatou ia vetahi ê, o te faaiteraa ïa i to tatou tiaturiraa i mua i te taata. Te poro ra anei oe i te mau taime atoa? Ua faahiti Paulo i teie taviniraa Kerisetiano ei ‘tusia haamaitai, oia hoi ta te vaha, i te haamaitairaa i to Iehova iˈoa.’ (Heb. 10:23; 13:15; Hos. 14:2) Mea faufaa ia feruri i te rahiraa hora e poro ai tatou i te evanelia e e nafea ia haamaitai i te reira. Ua faaineinehia e rave rahi tuhaa o te Putuputuraa no te taviniraa no te tauturu ia tatou. A haamanaˈo râ e e tuhaa o ta tatou haamoriraa te “tusia haamaitai” oia hoi te taviniraa e te pororaa faanaho-ore-hia. Tera te tusia maitai roa ˈˈe ta tatou e pûpû. Mea taa ê te tupuraa o te taata taitahi, e faaite râ te rahiraa taime e poro ai tatou i to tatou mauruuru no te mau ohipa Kerisetiano.

¹¹ I te fare aore ra i roto i te amuiraa, te haamori tamau nei tatou ia Iehova. Ta ˈna iho â ïa e titau maira. Noa ˈtu e eita tatou e auraro faahou i te ture o te Sabati aore ra e haere i Ierusalema no te mau oroa, e haapii mai â tera mau ture ia tatou. Te hinaaro noa ra te Atua ia haapae tatou i te mau ohipa faufaa ore e ia haapii i ta ˈNa Parau, ia pure e ia haere i te mau putuputuraa. E aratai te mau  upoo utuafare Kerisetiano i te haapiiraa Bibilia e te mau melo o to ratou iho utuafare. (Tes. 1, 5:17; Heb. 10:24, 25) No te mau ohipa Kerisetiano, mea maitai ia uiui: “E mea tia anei ia haamaitai au i ta ˈu haamoriraa?”

12. (a) Te faaauhia nei te pûpûraa i te mea noˈanoˈa i tahito ra i te aha? (b) E nafea ta tatou mau pure e au ai i te mea noˈanoˈa?

¹² Ua himene Davida ia Iehova: “Ia tano atu tau pure i mua ia oe mai te mea hauˈa noˈanoˈa.” (Sal. 141:2) A feruri na maa taime: Mea tamau e mea maitai anei ta oe mau pure? Te faaau ra te buka Apokalupo i “te pure a te feia moˈa” i te mea noˈanoˈa. E au te pure ta Iehova e farii i te mea hauˈa noˈanoˈa e te maitai. (Apo. 5:8) I Iseraela i tahito, e haapao e e faaineine-maitai-hia na te mea noˈanoˈa e pûpû-tamau-hia ra i nia i te fata a Iehova. E farii te Atua mai te peu noa e ua pûpûhia te reira ia au i ta ˈna mau aratairaa. (Exo. 30:34-37; Lev. 10:1, 2) E faaroo iho â Iehova i te mau pure haavare ore.

HOROA ˈTU E HOROA MAI

13, 14. (a) Mea nafea to Epapherodito e te amuiraa i Philipi tautururaa ia Paulo, e eaha to ˈna manaˈo? (b) E nafea ia pee i te hiˈoraa o Epapherodito e to Philipi?

¹³ Mea rahi aore ra mea iti, e au te mau ô no te turu i te ohipa na te ao atoa nei i te tusia. (Mar. 12:41-44) I te senekele matamua, ua tono te amuiraa i Philipi ia Epapherodito i Roma no te haapao i to Paulo mau hinaaro pae tino. Ua afai atu iho â teie vea i te tahi moni tauturu a te amuiraa na Paulo. E ere a tahi ra to Philipi e faaite ai i to ratou hamani maitai ia Paulo. To ratou hinaaro, eiaha oia ia haapeapea i te pae moni, ia rahi atu â râ to ˈna taime no te taviniraa. Eaha te manaˈo o Paulo i tera ô? Ua faahiti oia i te reira ei “taruru haua ïa, e tusia mauruuru rahi e te itehia mai e te Atua ra.” (A taio i te Philipi 4:15-19.) Ua mauruuru mau Paulo, oia atoa o Iehova, i to Philipi.

¹⁴ I teie mahana atoa, te mauruuru roa nei Iehova i ta tatou mau ô no te ohipa na te ao atoa nei. Hau atu â, te fafau nei oia e, ia tamau noa tatou i te tuu i te mau faufaa a te Basileia i te parahiraa matamua i roto i to tatou oraraa, e haapao ïa oia i to tatou mau hinaaro atoa, pae varua e pae tino.—Mat. 6:33; Luka 6:38.

A FAAITE I TO MAURUURU

15. No teihea mau mea e mauruuru ai tatou ia Iehova?

¹⁵ Mea rahi te tumu e mauruuru ai tatou ia Iehova. E haamauruuru iho â tatou ia ˈna no te ora ta ˈna i ho mai. Te horoa maira oia i te mau mea atoa ia ora noa tatou: te maa, te ahu, te nohoraa e te mataˈi ta tatou e huti ra. Hau atu â, maoti to tatou faaroo, tei niuhia i nia i te ite mau, e fanaˈo ai tatou i te tiaturiraa. Mea tano ia haamori e ia pûpû i te mau tusia haamaitai ia Iehova, no to ˈna huru e no ta ˈna i rave no tatou.—A taio i te Apokalupo 4:11.

16. Ia aha tatou ei pahonoraa i te tusia taraehara o te Mesia?

¹⁶ Mai ta tatou i ite i roto i to na mua ˈtu tumu parau, e ô faufaa mau te tusia taraehara o Iesu na te Atua i te huitaata. E faaiteraa faahiahia te reira i to te Atua aroha, aore ra here,  ia tatou. (Ioa. 1, 4:10) Ei pahonoraa, ia aha ïa tatou? Te na ô ra Paulo: ‘Te riro nei matou i te aroha o te Mesia ra, no te mea te parau nei matou e, i pohe te hoê no te taata atoa, e i pohe Iesu no te taata atoa, ia ore te feia e ora ra ia haapao faahou ia ratou iho i te oraraa nei, ia haapao râ ia ˈna, tei pohe e tei tia faahou no ratou.’ (Kor. 2, 5:14, 15) No Paulo, ia mauruuru tatou i ta te Atua i rave, e ora ïa tatou no te faahanahana ia Iehova e i ta ˈna Tamaiti. No reira, e faaite anaˈe i to tatou here e mauruuru ia raua na roto i to tatou auraro e hinaaro e poro e e faariro i te taata ei pǐpǐ.—Tim. 1, 2:3, 4; Ioa. 1, 5:3.

17, 18. Mea nafea vetahi i te haamaitairaa i ta ratou tusia ia Iehova? A faataa.

¹⁷ E nehenehe anei outou e haamaitai i ta outou tusia i te Atua? A feruri ai i te mau mea maitai atoa ta Iehova i rave no ratou, ua faanaho e rave rahi Kerisetiano i to ratou taime e ta ratou ohipa, no te apiti atu â i te pororaa i te Basileia aore ra i te tahi atu mau ohipa Kerisetiano. Ua rave vetahi i te taviniraa pionie tauturu hoê aore ra tau avaˈe i te matahiti hoê, area vetahi, i te taviniraa pionie tamau ïa. Ua apiti vetahi atu â i te mau paturaa. E ravea maitai anaˈe tera no te faaite i te mauruuru, e ere anei? Ia ravehia teie mau ohipa moˈa ma te aau tae ei haamauruururaa, e farii te Atua i te reira.

¹⁸ Ua hinaaro e rave rahi Kerisetiano e faaite i to ratou mauruuru ia Iehova. O Morena te hoê. A paari ai oia i roto i te faaroo Katolika, ua uiui oia no nia i te Atua e te auraa o te oraraa. Ua imi oia i te mau pahonoraa i roto i ta ˈna faaroo e te philosophia a to Asia. Ia ˈna noa i haapii i te Bibilia e te mau Ite no Iehova i pahonohia ˈi ta ˈna mau uiraa. Ua mauruuru roa oia ia Iehova no ta ˈna i haapii e no te oaoa mau ta ˈna i fanaˈo. Ua hinaaro atura Morena e faaohipa i to ˈna puai i roto i te taviniraa. I muri noa ˈˈe i to ˈna bapetizoraa, ua tavini oia ei pionie tauturu e, a nehenehe ai oia, riro maira ei pionie tamau. E 30 matahiti i teie nei, to roto â oia i te taviniraa taime taatoa.

19. E nafea outou e haamaitai ai i ta outou tusia ia Iehova?

¹⁹ Mea rahi iho â te tavini taiva ore a Iehova o te ore e nehenehe e tavini ei pionie. Noa ˈtu râ, e nehenehe tatou paatoa e pûpû i te mau tusia pae varua ta ˈNa e au. Ma te haerea, ia auraro maite ïa tatou i te mau faaueraa tumu Bibilia ma te haamanaˈo e te tia ra tatou no Iehova i te mau taime atoa. Ma te faaroo, ia tiaturi ïa tatou e e tupu iho â ta te Atua mau opuaraa. Ma te mau ohipa maitatai, ia poro ïa tatou i te parau apî maitai. No te î o to tatou aau e te mauruuru no ta ˈNa i rave no tatou, e tamau anaˈe ïa i te rave i te tusia ma te aau atoa na Iehova.

[Uiraa haapiiraa]

[Parau iti faaôhia i te api 27]

E turai anei to Iehova maitai ia oe ia haamaitai i ta oe tusia?

[Hohoˈa i te api 25]

Te poro ra anei oe i te mau taime atoa?